Vintu viheni vyeneivyo vikucitika pacaru capasi sono vikurongora kuti Paradiso waneng’enera. Baibolo likayowoya kuti tizamukumana na nyengo zakusuzga pambere Paradiso wandize. Sono tikukhala mu nyengo zanteura izo! Pano pali vintu ivyo Baibolo likayowoya kuti vizamucitika:

Nkondo zikuru. “Mtundu wamkuwukirana na mtundu, ufumu na ufumu.” (Mateyu 24:7) Ucimi uwu wafiskika nadi. Kwambira mu cirimika ca 1914, nkondo ziŵiri zikuru zarweka pacaru cose ndiposo na nkondo zinandi zicoko-zicoko. Ŵantu mamiliyoni ghanandi ŵapotera cifukwa ca nkondo izi.

Kuthandazgika kwa matenda. Kukayowoyeka kuti ‘kuŵenge vilengo mu malo na malo.’ (Luka 21:11) Kasi ici cafiskika? Enya. Ntenda ya mtima, khansa, cikhoso ca TB, Maleliya, AIDS, na matenda ghanyake gheneagho ghakoma ŵantu mamiliyoni ghanandi.

Kusoŵa kwa vyakurya. Pacaru cose capasi pali ŵantu ŵanandi ŵeneawo ŵalije cakurya cakukwanira. Mamiliyoni ghanandi gha ŵantu ghakupotera na njara cirimika cilicose. Ici ncimanyikwiro cinyake cakuti Paradiso sono-sono apa wazamuŵa pano pacaru. Baibolo likuyowoya kuti: “Kuzamuŵa kusoŵa kwa vyakurya.”—Marko 13:8, NW.

 Vindindindi. “Vindindindi viti viŵengepo mu malo na malo.” (Mateyu 24:7) Ici naco cafiskika mu nyengo yithu. Ŵantu ŵakujumpa pa miliyoni yimoza ŵapotera cifukwa ca vindindindi kwambira mu 1914.

Ŵantu ŵaheni. Ŵantu ŵazamuŵa “ŵakujitemwa” na “ŵakutemwa ndrama.” Ŵazamuŵa “ŵakutemwa vyakusekereska kwakuruska kutemwa Ciuta.” Ŵana ŵazamuŵa “ŵambura kupulikira ŵapapi.” (2 Tim. 3:1-5) Kasi mukuzomerezga cara kuti pali ŵantu ŵanandi ŵeneawo ŵakurongora mikhaliro ya nga ndi iyi mazuŵa ghano? Iwo ŵakucindika cara Ciuta, ndipo ŵakusuzga ŵantu awo ŵakukhumba kusambira za Ciuta.

Kuswa-marango. Kukayowoyeka kuti kuzamuŵaso “kwandana kwa ucikana-marango.” (Mateyu 24:12) Namwe mungazomerezga kuti ucikana-marango sono waluta pantazi kuruska umo ukaŵira virimika vyakunyuma. Ŵantu palipose ŵali pangozi ya kwibilika, kupusikika, panji kupwetekeka.

Vintu vyose ivi vikurongora kuti Ufumu wa Ciuta waneng’enera. Baibolo likuyowoya kuti: “para mukuwona vyeneivi vikucitika, manyani kuti Ufumu wa Ciuta uli pafupi.” (Luka 21:31) Kasi Ufumu wa Ciuta ndi vici? Uwo ndi boma la Ciuta la kucanya leneilo liziskenge Paradiso pacaru ici. Ufumu wa Ciuta uzamunjira mu malo mwa maboma gha ŵantu.—Daniel 2:44.