Yehova * Ciuta ndiyo wakakwatiska nthengwa yakwamba. Baibolo likutiphalira kuti Ciuta wakalenga mwanakazi ndipo ‘wakiza nayo kwa munthu.’ Adamu wakakondwa comene mwakuti wakati: ‘Uyu sono nchiwangwa ca viwangwa vyane na nyama ya nyama yane.’ (Genesis 2:22, 23) Yehova wandasinthe. Wakukhumba kuti ŵanthu ŵakutorana ŵakondwenge.

Para munthu watora panji kutengwa wakughanaghana kuti vinthu vyose vyendenge makora. Kweni unenesko ngwakuti nanga ni mfumu na muwoli awo ŵakutemwana comene ŵakuŵa na masuzgo. (1 Ŵakorinte 7:28) Mu burosha ili musangenge fundo za mu Baibolo, izo usange mungazilondezga, mungaŵa ŵakukondwa mu mbumba yinu.—Salmo 19:8-11

IVYO BAIBOLO LIKUYOWOYA: Mfumu ni mutu wa mbumba.—Ŵaefeso 5:23.

Para ndimwe mfumu, Yehova wakukhumba kuti mupwelelerenge muwoli winu. (1 Petrosi 3:7) Ciuta wakalenga mwanakazi kuti waŵe movwiri winu, ndipo wakukhumba kuti mumucindikenge na kumutemwa. (Genesis 2:18) Mukwenera kumutemwa comene mwakuti ivyo iyo wakukhumba ndivyo viŵenge pakwamba m’malo mwa ivyo imwe mukukhumba.—Ŵaefeso 5:25-29.

Usange ndimwe muwoli, Yehova wakukhumba kuti mumucindikenge comene mfumu winu na kumovwira kuti wafiske udindo wake. (1 Ŵakorinte 11:3; Ŵaefeso 5:33) Mukoleranenge na ivyo mfumu winu wadumura. (Ŵakolose 3:18) Para mucitenge nthena, muŵenge wakutowa kwa mfumu winu na kwa Yehova.—1 Petrosi 3:1-6.

IVYO MUNGACITA:

• Fumbani muwoli panji mfumu winu kuti wamuphalirani ivyo mukwenera kucita kuti muŵe mfumu panji muwoli muwemi. Tegherezgani comene para wakuyowoya, ndipo citani ivyo mungafiska kuti musinthe

• Zikirani. Vikutora nyengo kuti waliyose wamanye umo wangakondweskera munyake

IVYO BAIBOLO LIKUYOWOYA: Mukwenera kughanaghanira ivyo munyinu wakukhumba. (Ŵafilipi 2:3, 4) Mumuwonenge kuti ngwakuzirwa na kukumbuka kuti Yehova wakukhumba kuti ŵateŵeti ŵake ŵaŵenge “ŵakuzika ku wose.” (2 Timote 2:24) ‘Mazgu ghamawara ghali nga ni kulasa kwa lupanga, kweni lulimi lwa wamahara lukucizga.’ Ipo mukwenera kughanaghanirapo pambere mundayowoye. (Zintharika 12:18) Mzimu wa Yehova umovwiraninge kuti muyowoyenge mwalusungu kweniso mwacitemwa.—Ŵagalatiya 5:22, 23; Ŵakolose 4:6.

IVYO MUNGACITA:

• Para mukukhumba kudumbiskana nkhani yakuzirwa, lombani kuti muŵe ŵakuzika kweniso kuti mupulikiske ivyo munyinu wayowoyenge

• Ghanaghanirani ivyo muyowoyenge na umo muyowoyerenge

IVYO BAIBOLO LIKUYOWOYA: Para mwatorana mukuŵa “thupi limoza.” (Mateyu 19:5) Ndipouli, mucali ŵanthu ŵaŵiri ŵakupambana maghanoghano. Ntheura mukwenera kusambira kuti muŵe na maghanoghano ghakuyana. (Ŵafilipi 2:2) Nchakuzirwa kukolera pakucita vinthu. Baibolo likuti: “Fundo zose zikukhozgeka mu wupu.” (Zintharika 20:18) Londezgani fundo za mu Baibolo para mukudumbiskana vyakuti mucite.—Zintharika 8:32, 33.

IVYO MUNGACITA:

• Phalirani munyinu maghanoghano ghinu kweniso umo mukujipulikira

• Nchiwemi yayi kucita vinthu pamwekha