1, 2. Kasi Balamu wakachita wuli kuti wapweteke ŵanthu ŵa Yehova?

MUNTHU uyo wakuŵeja somba wakupenja malo agho wangakorapo somba izo wakukhumba. Wakusankha nyambo yakwenelera na kuponya mbeja yake pa maji. Iyo wakulindilira waka, ndipo para somba yakora ku mbeja, wakukhucha mbeja na kutora somba yake.

² Ŵanthu nawo ŵangakoleka nga ni somba. Ŵaisrayeli ŵakakhala pachoko chomene kufika mu Charu cha Layizgano, ndipo ŵakazenga misasa mu Vidika vya Mowabu. Themba la Mowabu likachema munthu munyake zina lake Balamu kuti watembe Ŵaisrayeli ndipo likati limupenge ndalama zinandi. Pamanyuma, Balamu wakasanga nthowa yakuti Ŵaisrayeli ŵajichemere ŵekha nthembo. Wakasankha makora nyambo. Wakatuma ŵamwali ŵa ku Mowabu ku misasa ya Israyeli kuti ŵakakope ŵanalume.—Maŵazgo 22:1-7; 31:15, 16; Chivumbuzi 2:14.

3. Kasi Ŵaisrayeli ŵakakoleka wuli na nyambo ya Balamu?

³ Kasi nyambo ya Balamu yikagwira ntchito? Enya. Ŵanalume ŵanandi chomene Ŵachiisrayeli ŵakachita “uzaghali na ŵanakazi ŵa ku Mowabu.” Ŵakambaso kusopa  ŵachiuta ŵatesi, nga Baala Peyori, chiuta wakuseluska wa vyakugonana. Pa chifukwa ichi, Ŵaisrayeli 24,000 ŵakafwira mu mphaka yakunjilira mu Charu cha Layizgano.—Maŵazgo 25:1-9.

4. Chifukwa wuli Ŵaisrayeli ŵanandi ŵakachita uzaghali?

⁴ Chifukwa wuli Ŵaisrayeli ŵanandi nthena ŵakakoleka na nyambo ya Balamu? Ŵakaghanaghananga waka vyakujikondweska ŵekha, ndipo ŵakaluwa vyose ivyo Yehova wakaŵachitira. Ŵaisrayeli ŵakaŵa na vifukwa vinandi vyakuŵira ŵakugomezgeka kwa Chiuta. Ndiyo wakaŵawombora ku wuzga ku Eguputo, wakaŵalyeskanga mu mapopa, ndipo wakaŵayendeska makora m’paka mu mphaka yakunjilira mu Charu cha Layizgano. (Ŵahebere 3:12) Kweni iwo ŵakanyengeka na uzaghali. Mpositole Paulosi wakalemba kuti: “Tingachitanga uzaghali yayi, nga umo ŵanyake ŵa iwo ŵakachitira uzaghali, ndipo . . . ŵakafwa.”—1 Ŵakorinte 10:8.

5, 6. Kasi ivyo vikachitika mu Vidika vya Mowabu vikutisambizga vichi?

⁵ Charu chiphya chili pafupi chomene. Nase tili nga Mbaisrayeli mu mphaka yakunjilira mu Charu cha Layizgano. (1 Ŵakorinte 10:11) Ŵanthu mazuŵa ghano ŵakukoleka yayi pa nkhani za kugonana, kuluskaso Ŵamowabu. Ŵanthu ŵa Yehova nawo ŵangakaŵa yayi kutimbanizgika na mzimu uwu. Nakuti uzaghali ni nyambo iyo Dyabulosi yikumwendera chomene.—Maŵazgo 25:6, 14; 2 Ŵakorinte 2:11; Yuda 4.

⁶ Jifumbani kuti, ‘Kasi ningatemwa kusangwa na makhumbiro ghane agho ghamalenge kanyengo kachoko waka, panji ningatemwa kuti nizakakhale mu charu chiphya mwakukondwa muyirayira?’ Ntchiwemi chomene kuyezgayezga kupulikira dango la Yehova lakuti: “Chimbirani uzaghali.”—1 Ŵakorinte 6:18.

7, 8. Kasi uzaghali ni vichi? Chifukwa wuli uzaghali ngwakofya?

⁷ Ŵanthu ŵanandi mazuŵa ghano ŵakupwelerako yayi ndipo ŵakuyuyura malango gha Chiuta pa nkhani za kugonana. Mu Baibolo, lizgu lakuti uzaghali likuyowoya vya kugonana pakati pa ŵanthu awo ŵandatorane mwandondomeko. Likung’anamuraso kugonana kwa ŵanalume panji ŵanakazi ŵekhaŵekha, kweniso kugonana pakati pa ŵanthu na vinyama. Uzaghali ukuŵapo para ŵanthu ŵakugwiliskira ntchito viŵaro vyakubisika, kugonana mu mlomo, kugonana kumatako, panji kukora viŵaro vya munthu munyake, na chilato cha kuwuska makhumbiro ghake.—Wonani Mazgu Ghakuumaliro 23.

⁸ Baibolo likuyowoyerathu kuti munthu uyo wakulutilira kuchita uzaghali wangalutilira yayi kuŵa mu mpingo. (1 Ŵakorinte 6:9; Chivumbuzi 22:15) Chinyake ntchakuti munthu muzaghali wakujivura ntchindi ndipo ŵanthu ŵakuleka kumugomezga. Nyengo zose uzaghali ukwambiska masuzgo. Kanandi munthu njuŵi yikumusuzga, wangatora nthumbo yapathondo, wanganjizga masuzgo munthengwa, wangatora matenda, nanga nkhufwa wuwo. (Ŵazgani Ŵagalatiya 6:7, 8.) Usange munthu wangaghanaghanirapo masuzgo agho ghakuŵapo chifukwa cha uzaghali wangakhumba yayi kuchita uzaghali. Kweni kanandi munthu wakughanaghana waka vyakukhorweska makhumbiro ghake para wakuchita chinthu chakwamba icho chikulongozgera ku uzaghali. Chinthu ichi nkhukopeka na vinthu vyamsikuzi panji kuti vyamziro.

9. Chifukwa wuli vyamsikuzi ni vyakofya?

⁹ Vinthu vyamsikuzi ŵakuvipanga na chilato cha kuwuska  makhumbiro ghakugonana. Vinthu ivi vili waka palipose mazuŵa ghano, mu magazini, mabuku, pa TV, kweniso pa Intaneti. Ŵanthu ŵanandi ŵakuwona kuti vyamsikuzi ni viheni yayi, kweni unenesko ngwakuti ni vyakofya chomene. Vingapangiska munthu kulota vyakugonana pera kweniso kuŵa na makhumbiro ghaheni chomene ghakugonana. Para munthu wamba waka kutemwa vyamsikuzi, ndikuti watora nthowa iyo yingamuchitiska kuti wambe nkhunyenyenkha nkhule, kunjizga masuzgo munthengwa, nanga nkhumazga nthengwa.—Ŵaroma 1:24-27; Ŵaefeso 4:19; wonani Mazgu Ghakuumaliro 24.

10. Kasi fundo ya pa Yakobe 1:14, 15 yingatovwira wuli kuti tikane uzaghali?

¹⁰ Ntchakukhumbikwa chomene kuti timanyenge umo uzaghali ungatikopera. Wonani chenjezgo ilo lili pa Yakobe 1:14, 15, lakuti: “Waliyose wakuyezgeka para wakopeka na kunyengeka na khumbiro lake. Kufuma apo, para khumbiro lakura, likubaba kwananga, ndipo para kwananga kwachitika, kukubaba nyifwa.” Ntheura para maghanoghano ghaheni ghamwizirani ghachimbizgani nyengo yeneyiyo. Usange mwawona vithuzi viheni mwangozi, laŵiskani kumphepete. Zimwiskani kompyuta panji sinthani tchanelo pa TV. Lekani kuzomerezga makhumbiro ghaheni kujintha misisi mwa imwe. Para mungapusa, makhumbiro agha ghangaŵa ghankhongono chomene mwakuti chingaŵa chakusuzga kuti mughawezge.—Ŵazgani Mateyu 5:29, 30.

11. Kasi Yehova wangatovwira wuli para tili na maghanoghano ghaheni?

¹¹ Yehova wakutimanya makora kuluska umo taŵene tikujimanyira. Wakumanya kuti nyengo zinyake tikutondeka kuchita makora. Wakumanyaso kuti tingatonda makhumbiro ghaheni. Yehova wakutiphalira kuti:  “Ntheura zgorani viŵaro vya thupi linu vya pa charu chapasi kuŵa vyakufwa ku uzaghali, ukazuzi, makhumbiro ghakugonana kwambura kujikora, khumbiro liheni, na udokezi, uko nkhusopa vikozgo.” (Ŵakolose 3:5) Nangauli ntchipusu yayi kuchita nthena, Yehova wakuzikira nase ndipo watovwirenge. (Salimo 68:19) Mubali munyake wachinyamata wakakoleka mu chipingo cha kuwonelera vyamsikuzi na kunyenyenkha nkhule. Ŵanyake ku sukulu ŵakamuphalira kuti ndimo vikuŵira na waliyose para wakukura. Kweni iyo wakati: “Njuŵi yane yikanangika, ndipo nkhamba kuchita uzaghali.” Mubali uyu wakamanya kuti ntchakukhumbikwa kuti wakanizge makhumbiro ghake, ndipo Yehova wakamovwira, wakaleka chizgoŵi ichi. Usange mu maghanoghano ghinu mukwenda waka vyakugonana, pemphani Yehova kuti wamupani “nkhongono zakuluska zakawiro” kuti muŵe na maghanoghano ghakutowa.—2 Ŵakorinte 4:7; 1 Ŵakorinte 9:27.

12. Chifukwa wuli tikwenera ‘kuvikilira mtima withu’?

 ¹² Solomoni wakalemba kuti: “Pa vyose ivyo ukuvikilira, vikilira chomene mtima wako, pakuti ndimo muli chisimi cha umoyo.” (Zintharika 4:23) “Mtima” uwo ukuyowoyeka apa ni wunthu withu wamukati, wunthu uwo Yehova wakuwona. Ivyo tikulaŵiska vingaŵa na nkhongono yikuru pa ise. Yobu, munthu wakugomezgeka, wakati: “Nachita phangano na maso ghane. Kasi ningalaŵiskirachi mwali na khumbiro liheni?” (Yobu 31:1) Nga ni Yobu, tikwenera kujikora pa ivyo tikulaŵiska na kughanaghanira. Nase tilombenge nga ngwamasalimo kuti: “Zgorani maso ghane kuti ghaleke kulaŵiska vyawaka.”—Salimo 119:37.

13. Kasi Dina wakasankha ŵanthu wuli kuŵa ŵabwezi ŵake?

¹³ Ŵabwezi awo tili nawo ŵangatovwira panji kutipwetekeska. Usange mwasankha ŵanthu awo ŵakulondezga fundo za Chiuta kuŵa ŵabwezi ŵinu, ŵamovwiraninge kuti namwe mulondezgenge fundo izi. (Zintharika 13:20; ŵazgani 1 Ŵakorinte 15:33.) Ivyo vikachitikira Dina vikutovwira kuwona kuti ntchiwemi kusankha makora ŵabwezi. Dina wakakulira mu banja lakusopa Yehova, chifukwa wakaŵa yumoza wa ŵana ŵasungwana ŵa Yakhobe. Dina wakaŵa wamasomaso yayi, kweni wakamba kutemwana chomene na ŵasungwana Ŵachikenani awo ŵakasopanga Yehova yayi. Umo Ŵakenani ŵakawoneranga nkhani za kugonana vikapambananga na umo ŵanthu ŵa Chiuta ŵakaziwoneranga. Nakuti Ŵakenani ŵakamanyikwanga kuti ŵakaŵa ŵazaghali. (Levitiko 18:6-25) Apo Dina wakachezganga na ŵabwezi ŵake, munyamata Wachikenani zina lake Shekemu, wakamba  kumudokera. Ŵanthu ŵakatenge Shekemu ni munyamata “wakuchindikika chomene” mu mbumba yakwake. Kweni wakamutemwanga yayi Yehova.—Genizesi 34:18, 19.

14. Ntchivichi chikachitikira Dina?

¹⁴ Shekemu wakachita icho wakawona kuti ntchiwemi waka na chakuzomerezgeka kwa iyo. Pakuti wakamudokera Dina, “wakamutora” na “kumukazuzga.” (Ŵazgani Genizesi 34:1-4.) Ivyo wakachita apa vikachemera masuzgo ghakuru pa Dina kweniso pa mbumba yakwake yose.—Genizesi 34:7, 25-31; Ŵagalatiya 6:7, 8.

15, 16. Kasi tingachita wuli kuti tiŵe na vinjeru?

¹⁵ Tikukhumba yayi kuti tibudiske dankha vinthu, pamanyuma na kuyowoya kuti chiŵenge chakumanya mphanyi nkhachita cha. Ivi ndivyo vikapwetekeska Dina. “Uyo wakwenda na ŵavinjeru waŵenge wavinjeru, kweni uyo wakuchita vinthu pamoza na vindere wapwetekekenge.” (Zintharika 13:20) Ŵikanipo mtima kuti mumanye “nthowa yose ya uwemi,” ndipo mujithaskenge ku vyakuŵinya na suzgo.—Zintharika 2:6-9; Salimo 1:1-3.

¹⁶ Tingaŵa na vinjeru para tikusambira Mazgu gha Chiuta, kulomba pambere tindasankhe chakuchita, na kulondezga ulongozgi uwemi wakufuma kwa muzga wakugomezgeka na wavinjeru. (Mateyu 24:45; Yakobe 1:5) Tikumanya kuti tose tili ŵakulopwa na ŵakupeleŵera. (Yeremiya 17:9) Kweni kasi mungachita wuli usange munyinu wakumuchenjezgani kuti mungachita uzaghali para mungapusa? Kasi mukwiyenge, panji mupokerenge wovwiri?—2 Mathemba 22:18, 19.

17. Yowoyani chiyelezgero cha umo ulongozgi wa Mkhristu munyithu ungatovwilira.

¹⁷ Tiyelezgere kuti mudumbu wakugwira ntchito ndipo mwanalume munyake ku ntchito kura wamba kumuchitira  tuwemituwemi na kutemwa kumuchezgeska. Mwanalume uyu wakuteŵetera Yehova yayi, kweni wakuwoneka muwemi na walusungu. Mudumbu munyake wakuŵawona ŵanthu aŵa kuti ŵakutemwa kuŵira lumoza, ndipo pamanyuma wakuyezga kumuchenjezga mudumbu munyake yura. Kasi mudumbu wakwamba uyu wachitenge wuli? Kasi wajigowokerenge, panji wawonenge kuti ntchiwemi kupulikira chenjezgo ili? Mudumbu uyu wangaŵa kuti wakumutemwa Yehova ndipo wakukhumba kuchita icho ntchiwemi. Kweni usange wakulutilira kuŵira lumoza na mwanalume uyu, kasi ndikuti ‘wakuchimbira uzaghali’ panji “wakuthemba mtima wake”?—Zintharika 22:3; 28:26; Mateyu 6:13; 26:41.

18, 19. Longosorani umo Yosefe wakachimbilira uzaghali.

¹⁸ Yosefe wakaŵa muzga ku Eguputo, apo wakaŵa  munyamata. Zuŵa lililose, muwoli wa bwana wake wakamupemphanga kuti wagone nayo, kweni Yosefe wakamanyanga kuti ntchiheni kuchita nthena. Yosefe wakamutemwanga chomene Yehova ndipo wakakhumbanga yayi kumukwiyiska. Ntheura nyengo yiliyose apo mwanakazi yura wakayezganga kumunyengelera, Yosefe wakakananga. Pakuti Yosefe wakaŵa muzga, pakaŵa pakusuzga kuti wafumepo waka pa nyumba ya bwana wake. Zuŵa linyake apo muwoli wa bwana wake wakakhumbanga kumubwaka kuti wagone nayo, Yosefe ‘wakachimbilira kuwaro.’—Ŵazgani Genizesi 39:7-12.

¹⁹ Yosefe waŵenge kuti wakaŵa na maghanoghano gha kugonana panji kulota waka vya mwanakazi yura mphanyi wakachimbira yayi. Yosefe wakawonanga kuti ubwezi wake na Yehova ndicho chikaŵa chinthu chakuzirwa chomene kuluska chilichose. Wakaphalira muwoli wa bwana wake kuti: ‘Fumu yane yindanikanizge chilichose kupaturako imwe, chifukwa ndimwe muwoli wake. Ntheura ningachitirachi uheni ukuru uwu na kunangira Chiuta?’—Genizesi 39:8, 9.

20. Kasi tikumanya wuli kuti Yehova wakakondwa nayo Yosefe?

²⁰ Yosefe wakaŵa kutali chomene na kukwake kweniso ŵapapi ŵake. Kweni wakaŵa wakugomezgeka kwa Chiuta nyengo zose, ndipo Yehova wakamutumbika. (Genizesi 41:39-49) Yehova wakakondwa na kugomezgeka kwa Yosefe. (Zintharika 27:11) Chingaŵa chakusuzga kukana uzaghali. Kweni kumbukani mazgu agha: “Imwe mukutemwa Yehova, tinkhani icho ntchiheni. Iyo wakusunga umoyo wa ŵakugomezgeka ŵake. Wakuŵathaska mu woko la muheni.”—Salimo 97:10.

21. Kasi mubali munyake wakachita wuli nga ni Yosefe?

 ²¹ Zuŵa lililose, ŵanthu ŵa Yehova ŵakuchita chikanga na kulongora kuti ‘ŵakutinkha chiheni’ ndipo ‘ŵakutemwa chiwemi.’ (Amosi 5:15) Waliyose wangaŵa wakugomezgeka kwa Yehova, mulara panji mwana. Chipulikano cha mubali munyake wachinyamata chikayezgeka ku sukulu. Msungwana munyake wakamuphalira kuti para wangamovwirako masamu pa mayeso mbwenu wamugona nayo. Kasi mubali uyu wakachita wuli? Wakachita nga ni Yosefe. Iyo wakati: “Nkhamukanira nyengo yeneyiyo. Chifukwa cha kuŵa wakugomezgeka, nindajinangepo kweniso najisungira ntchindi.” Nakuti “vyakukondweska vya nyengo yichoko waka” ivyo munthu wangasanga ku uzaghali, kanandi vikubaba vyakuŵinya na suzgo. (Ŵahebere 11:25) Para munthu wakupulikira Yehova wakuŵa wakukondwa nadi nyengo zose.—Zintharika 10:22.

22, 23. Kasi Yehova wangatovwira wuli para tachita kwananga kukuru?

²² Satana wayezgenge kutikora kwizira mu uzaghali, ndipo chingaŵa chakusuzga kutchintha nyengo zinyake. Tose nyengo zinyake tikuŵa na maghanoghano ghaheni. (Ŵaroma 7:21-25) Yehova wakumanya ndipo wakukumbuka kuti “tili fuvu.” (Salimo 103:14) Ipo wuli usange Mkhristu wachita uzaghali? Kasi ndikuti kwake kwamara? Yayi. Usange munthu uyu walapa nadi, Yehova wamovwirenge. Chiuta ‘ngwakunozgeka kugowokera.’—Salimo 86:5; Yakobe 5:16; ŵazgani Zintharika 28:13.

²³ Yehova watipaso “vyawanangwa mu ŵanthu,” ŵalara awo ŵakutitemwa na kutipwelelera. (Ŵaefeso 4:8, 12; Yakobe 5:14, 15) Watipa ŵalara kuti ŵatovwire kuwezgerapo ubwezi withu na iyo.—Zintharika 15:32.

24, 25. Kasi “mahara” ghangatovwira wuli kuti tikane uzaghali?

²⁴ Tikwenera kumanya umo malango gha Yehova ghakutovwilira kuti tisankhe makora vyakuchita. Tikukhumba yayi kuŵa nga ni munyamata uyo wakuzunulika pa Zintharika 7:6-23. Munyamata uyu wakaŵavya “mahara,” ndipo wakakoleka mu chipingo cha uzaghali. Mahara na kuchenjera vikuyana yayi. Munthu wamahara ni uyo wakumanya maghanoghano gha Chiuta na kughalondezga mu umoyo wake. Kumbukani mazgu ghavinjeru ghakuti: “Uyo wakusanga mahara wakutemwa umoyo wake. Uyo wakusungilira umanyi vinthu vimwenderenge.”—Zintharika 19:8.

²⁵ Kasi imwe mukukhorwa kuti fundo za Chiuta ni ziwemi? Kasi mukugomezga nadi kuti mungaŵa ŵakukondwa para mungazilondezga? (Salimo 19:7-10; Yesaya 48:17, 18) Usange mukumanya makora yayi, kumbukani viwemi vyose ivyo Yehova wamuchitirani. “Chetani mwe, muwone kuti Yehova ni muwemi.” (Salimo 34:8) Muwonenge kuti apo mukulutilira kucheta, mumutemwenge chomene Chiuta. Temwani ivyo wakutemwa, ndipo tinkhani ivyo wakutinkha. Zuzgani maghanoghano ghawemi mu mutu winu, zuzganimo vinthu vyaunenesko, vyaurunji, vituŵa, vyakutemweka, na nkharo yiwemi. (Ŵafilipi 4:8, 9) Nase tingaŵa nga ni Yosefe, uyo vinjeru vya Yehova vikamovwira.—Yesaya 64:8.

26. Kasi tidumbiskanenge vichi mu mitu yakulondezgapo?

²⁶ Kwali muli pa nthengwa panji yayi, Yehova wakukhumba kuti muŵe na umoyo uwemi ndipo mukondwenge. Mu mitu yiŵiri yakulondezgapo muli fundo izo zingawovwira kuti nthengwa zendenge makora.