1-3. (a) Kasi ŵanthu ŵanandi ŵakuyiwona wuli ntchito yawo? (b) Kasi tidumbiskanenge mafumbo wuli mu mutu uwu?

ŴANTHU pa charu chose chapasi ŵakulimbikira kugwira ntchito kuti ŵajipwelerere ŵekha na mbumba zawo. Kweni ŵanthu ŵanandi ŵakuyitemwa yayi ntchito yawo, ndipo ŵanji mtima ukuŵa waka bii para ŵakuluta ku ntchito. Usange namwe ndimo mukujipulikira, kasi mungachita wuli kuti mutemwenge ntchito yinu? Kasi mungachita wuli kuti mukondwenge na ntchito iyo mukugwira?

² Yehova wakutiphalira kuti: “Munthu waliyose warye na kumwa, wakondwe na mulimo wake wose uwo wakutokatoka nawo. Ntchawanangwa chakufuma kwa Chiuta.” (Mupharazgi 3:13) Yehova wali kutilenga na khumbo lakuti tigwirenge ntchito. Wakukhumba kuti tikondwenge na ivyo tikuchita.—Ŵazgani Mupharazgi 2:24; 5:18.

³ Kasi ntchivichi chingatovwira kuti tikondwenge na ntchito yithu? Kasi ni ntchito wuli izo Ŵakhristu ŵakwenera yayi kugwira? Kasi tingachita wuli kuti apo tikugwira ntchito tiŵengeso na nyengo yakukwana yakusopera Yehova? Ni ntchito wuli yakuzirwa chomene iyo tikwenera kugwira?

4, 5. Kasi Yehova wakuyiwona wuli ntchito?

⁴ Yehova wakutemwa chomene kugwira ntchito. Pa Genizesi  1:1 pakuti: “Pakwamba, Chiuta wakalenga kuchanya na charu chapasi.” Yehova wakati wamara kupanga charu na vyose ivyo vilimo, wakati vyose ivyo wakapanga vikaŵa “viwemi chomene.” (Genizesi 1:31) Yehova wakakhorwa na ivyo wakapanga.—1 Timote 1:11.

⁵ Yehova wakuleka yayi kugwira ntchito. Yesu wakati: “Adada ŵakugwira ntchito m’paka sono.” (Yohane 5:17) Pa vinthu vyose vyakuzizwiska ivyo Yehova wakuchita, ise tikumanyapo vichoko waka. Yehova wakusankha ŵanthu awo ŵamuwusa lumoza na Mwana wake, Yesu Khristu, mu Ufumu wake. (2 Ŵakorinte 5:17) Yehova wakulongozga na kupwelelera ŵanthu. Ntchito ya kupharazga iyo yikuchitika pa charu chose yikovwira ŵanthu ŵanandi kumanya Yehova kweniso kuŵa na chigomezgo cha kuzakakhala kwamuyirayira mu paradiso pa charu chapasi.—Yohane 6:44; Ŵaroma 6:23.

6, 7. Kasi Yesu wakagwiranga wuli ntchito?

⁶ Yesu nayo wakutemwa chomene kugwira ntchito nga Mbawiske. Pambere wandize pa charu chapasi, Yesu wakaŵa “misiri,” wakavwirananga na Yehova pakulenga vinthu vyose kuchanya na pa charu chapasi. (Zintharika 8:22-31; Ŵakolose 1:15-17) Apo wakaŵa pano pasi, Yesu wakalutilira kulimbikira ntchito. Apo wakaŵa munyamata wakasambira ntchito ya ukalipentara, ndipo wakwenera kuti wakakhomanga mipando na nyumba. Yesu wakayichitanga mwaluso chomene ntchito yake lekani wakamanyikwanga kuti “kalipentara.”—Mariko 6:3.

⁷ Kweni ntchito yakuzirwa chomene iyo Yesu wakachita pa charu chapasi yikaŵa ya kupharazga makani ghawemi na kusambizga ŵanthu vya Yehova. Yesu wakaŵa na vyaka vitatu na hafu kuti wamalizge ntchito iyi, ndipo wakateŵetanga kufuma mulenji m’paka usiku. (Luka 21:37, 38; Yohane 3:2) Yesu wakendanga pasi mtunda utali chomene  mu misewu ya fuvu, kupharazga makani ghawemi ku ŵanthu ŵakupambanapambana.—Luka 8:1.

8, 9. Chifukwa wuli Yesu wakakondwanga na ntchito yake?

⁸ Kugwira ntchito ya Chiuta chikaŵa nga ni chakurya kwa Yesu. Ntchito iyi yikamupanga nkhongono. Nyengo zinyake Yesu wakatangwanikanga chomene na kupharazga mwakuti wakasoŵanga na nyengo yakulyera. (Yohane 4:31-38) Wakalimbikiranga kusambizga ŵanthu vya Awiske pa mpata uliwose. Lekani wakaphalira Yehova kuti: “Namupani uchindami pa charu chapasi, chifukwa namalizga mulimo uwo mukanipa kuti nichite.”—Yohane 17:4.

⁹ Ivi vikulongora kuti Yehova na Yesu ŵakulimbikira chomene ntchito kweniso ŵakukondwa na kukhorwa na ntchito zawo. Tikukhumba ‘kuyezga Chiuta,’ na kulondezga ‘mendero gha Yesu mwakugomezgeka.’ (Ŵaefeso 5:1; 1 Petrosi 2:21) Lekani tikulimbikira ntchito na kuŵikapo mtima pa chilichose icho tikuchita.

10, 11. Kasi ntchivichi chingatovwira kuti tiwonenge ntchito yithu mwakwenelera?

¹⁰ Pakuŵa ŵanthu ŵa Yehova tikulimbikira ntchito kuti tijipwelelere tekha kweniso mbumba zithu. Tikukhumba kuti tikondwenge na ntchito yithu, kweni nyengo zinyake chingaŵa chakusuzga kuchita nthena. Kasi tingachita wuli usange tikuyitemwa yayi ntchito yithu?

¹¹ Wonani ntchito mwakwenelera. Nyengo zinyake tingasintha yayi ntchito panji umo tikugwilira, kweni tingasintha umo tikuyiwonera ntchito. Icho chingatovwira nkhumanya ivyo Yehova wakukhazga kwa ise. Yehova wakukhazga kuti mutu wa mbumba ndiwo usangenge vyakukhumbikwa pa nyumba. Nakuti Baibolo likuti waliyose  uyo wakutondeka kupwelelera mbumba yake “ni muheni chomene kuluska munthu wambura chipulikano.” (1 Timote 5:8) Para ndimwe mutu wa banja, mukwenera kuti mukulimbikira ntchito kuti mupwelelere mbumba yinu. Kwali mukuyitemwa ntchito yinu kwali yayi, kweni mukumanya kuti para mukupwelelera banja linu, mukukondweskaso Yehova.

12. Kasi tikusanga vyandulo wuli para tikulimbikira na kuŵa ŵakugomezgeka pa ntchito?

¹² Limbikirani ntchito ndipo muŵe ŵakugomezgeka. Ichi chingamovwirani kuti mukondwenge na ntchito yinu. (Zintharika 12:24; 22:29) Chinyake ntchakuti bwana winu wamugomezganinge chomene. Mabwana ghakukondwa na ŵantchito awo mbakugomezgeka chifukwa ŵangiba yayi ndalama, katundu, panji kunyenya pa ntchito. (Ŵaefeso 4:28) Chakuzirwa chomene ntchakuti Yehova wakumanya kuti mukulimbikira ntchito kweniso mukugomezgeka. Mungaŵa na “njuŵi yiwemi” chifukwa cha kumanya kuti mukukondweska Chiuta uyo mukumutemwa.—Ŵahebere 13:18; Ŵakolose 3:22-24.

13. Kasi chingachitika ntchivichi para tikugomezgeka pa ntchito?

¹³ Manyani kuti nkharo yinu yiwemi pa ntchito yikulumba Yehova. Para mungamanya kuti nkharo yinu yikulumba Yehova muŵenge ŵakukondwa na ntchito yinu. (Tito 2:9, 10) Nyengo zinyake ŵanji awo mukugwira nawo ntchito ŵangakhumba kusambira Baibolo chifukwa cha nkharo yinu yiwemi.—Ŵazgani Zintharika 27:11; 1 Petrosi 2:12.

14-16. Kasi tikwenera kughanaghanira vichi pakusankha ntchito?

¹⁴ Baibolo likuyowoyapo yayi mitundu ya ntchito izo Mkhristu wangagwira panji yayi. Kweni lili na ulongozgi  uwo ungatovwira kusankha makora ntchito izo tingagwira. (Zintharika 2:6) Pakulondezga fundo za mu Baibolo, tingajifumba mafumbo ghakulondezgapo.

¹⁵ Kasi ntchito iyi yikhumbenge kuti nichite vinthu ivyo Yehova wakuti ni viheni? Tasambira vinthu vinyake ivyo Yehova wakutinkha, nga kwiba na kuteta. (Ekisodo 20:4; Milimo 15:29; Ŵaefeso 4:28; Chivumbuzi 21:8) Ntheura tikukhumba yayi kugwira ntchito izo zikususkana na fundo za Yehova.—Ŵazgani 1 Yohane 5:3.

 ¹⁶ Kasi ntchito iyi yikukhozgera nkharo izo Yehova wakutinkha? Mwachiyelezgero, mungachita wuli usange mwasanga ntchito yakupokelera ŵalendo pa chipatala icho ŵakufumiskirako nthumbo? Palije uheni uliwose wa kugwira ntchito ya kupokelera ŵalendo. Kweni mukumanya umo Yehova wakuwonera nkhani ya kufumiska nthumbo. Ntheura nangauli ndimwe yayi mufumiskenge nthumbo, kweni asi Yehova wakuwona kuti namwe muli na mulandu pa nkhani iyi?—Ekisodo 21:22-24.

17. Kasi ntchivichi chingatovwira kuti tisankhe vinthu ivyo vikukondweska Chiuta?

¹⁷ Para tikulondezga fundo za Chiuta, tiyanenge na ŵanthu awo ŵakulongosoreka pa Ŵahebere 5:14, “awo ŵali kuzgoŵezga nkhongono zawo zakamanyiro kupambaniska pakati pa chiwemi na chiheni.” Jifumbani kuti: ‘Kasi ŵanji ŵangakhuŵara para ninganjira ntchito iyi? Kasi ntchito iyi yikhumbenge kuti nileke ŵana na muwoli wane na kuluta ku charu chinyake? Kasi ivi vingaŵakhwaska wuli?’

18. Chifukwa wuli chingaŵa chakusuzga kudangizga kusopa Yehova?

¹⁸ Ntchakusuzga chomene kudangizga kusopa Yehova mu “nyengo zinonono na zakusuzga” izi. (2 Timote 3:1) Ntchipusu yayi kusanga na kukhaliska pa ntchito. Tikwenera kupwelelera mabanja ghithu, kweni tikumanya kuti kusopa Yehova ndiko kukwenera kuŵa pakwamba. Tikukhumba yayi kuti vinthu vyakuthupi ndivyo tivitorenge kuŵa vyakuzirwa chomene pa umoyo withu. (1 Timote 6:9, 10) Kasi tingamanya wuli “ivyo ni vinthu vyakuzirwa chomene” na kupwelelera mbumba yithu pa nyengo yimozamoza?—Ŵafilipi 1:10.

19. Kasi para tikugomezga Yehova tichitenge wuli pa nkhani ya ntchito?

 ¹⁹ Thembani chomene Yehova. (Ŵazgani Zintharika 3:5, 6.) Tikumanya kuti Chiuta wakumanya ivyo tikukhumbikwira nadi ndipo wakutipwelelera chomene. (Salimo 37:25; 1 Petrosi 5:7) Mazgu ghake ghakutiphalira kuti: “Umoyo winu uŵenge wambura kutemwa ndalama, uku mukukhorwa na vinthu ivyo vilipo. Pakuti [Chiuta] wati: ‘Nikulekenge yayi napachoko nesi kukutaya munthowa yiliyose.’” (Ŵahebere 13:5) Yehova wakukhumba yayi kuti tifipenge chomene mtima na kupwelelera mbumba zithu. Yehova walongora kanandi waka kuti wakupeleka vyakukhumbikwa ku ŵanthu ŵake. (Mateyu 6:25-32) Kwali tingafyenyeka wuli na ntchito, kweni nyengo zose tisambirenge Mazgu gha Chiuta, kupharazga makani ghawemi, na kuwungana.—Mateyu 24:14; Ŵahebere 10:24, 25.

20. Kasi tingachita wuli kuti tiŵe na umoyo wambura kukhumba vinandi?

²⁰ Jiso linu lilate pa chimoza. (Ŵazgani Mateyu 6:22, 23.) Ichi chikung’anamura kuŵa na umoyo wambura kukhumba vinandi mwakuti mtima winu uŵenge pakuteŵetera Yehova. Tikumanya kuti ungaŵa uchindere chomene para tingamba kuwona ndalama, umoyo wapachanya, panji mafoni ghapachanya kuŵa vyakuzirwa chomene kuluska ubwezi withu na Yehova. Ipo kasi ntchivichi chingatovwira kuti tiŵikenge vinthu vyakuzirwa chomene pa malo ghakwamba? Yezgeskani kuleka kukongora vinthu. Para muli kale na ngongoli, yezgeskani kuchepeskako panji kumalizga kulipira. Para tingapusa, vinthu vyakuthupi vingatipoka nyengo na nkhongono, ndipo tingasoŵa nyengo yakulombera, kusambira patekha, panji kupharazga. Tileke kuzomerezga vinthu vyakuthupi kuti vitihangayiske, kweni tisambire kukhorwa na  vinthu ivyo tili navyo nga ‘vyakurya na vyakuvwara.’ (1 Timote 6:8) Mulimose umo vinthu vingaŵira pa umoyo withu, ntchakukhumbikwa kuti nyengo na nyengo tijisandenge na kuwona umo tingachitira kuti titeŵeterenge Yehova mwakukwana.

21. Chifukwa wuli ntchakuzirwa kusankha ivyo tikudangizga pa umoyo withu?

²¹ Dangizgani vinthu vyakuzirwa. Tikwenera kuchita vinthu mwavinjeru na nyengo yithu, nkhongono kweniso  vinthu vyakuthupi. Para tingapusa, vinthu vyakuzirwa pachoko, nga masambiro panji ndalama vingatimalira nyengo yithu yakuzirwa. Yesu wakati: “Lutilirani kupenja dankha Ufumu.” (Mateyu 6:33) Vinthu ivyo tikusankha, ivyo tikutemwa, ivyo tikuchita zuŵa na zuŵa, kweniso vilato vithu vikuvumbura vinthu ivyo tikudangizga pa umoyo withu.

22, 23. (a) Kasi ni ntchito wuli yakuzirwa chomene iyo tili nayo pakuŵa Ŵakhristu? (b) Kasi ntchivichi chingatovwira kuti tikondwenge na ntchito yithu?

²² Ntchito yakuzirwa chomene iyo tili nayo nja kuteŵetera Yehova na kuphalirako ŵanji makani ghawemi. (Mateyu 24:14; 28:19, 20) Nga ni Yesu, nase tikukhumba kuchita chilichose icho tingafiska pa ntchito ya kupharazga. Ŵanji ŵali kusamukira ku malo uko kukukhumbikwa ŵapharazgi ŵanandi. Ŵanyake ŵakusambira viyowoyero vinyake kuti ŵapharazgire ŵanthu awo ŵakuyowoya viyowoyero ivyo. Chezgani na ŵanthu awo ŵali kuchitapo vinthu ivi, ndipo ŵafumbani ivyo ŵakachita kuti ŵakwaniske kuchita nthena. Ŵamuphaliraninge kuti sono mbakukondwa chomene.—Ŵazgani Zintharika 10:22.

²³ Mazuŵa ghano, ŵanthu ŵanandi ŵakumalira nyengo yinandi pa ntchito panji ŵakugwira ntchito zinandi pa nyengo yimoza kuti ŵawovwire mbumba zawo. Yehova wakumanya vyose ivi, ndipo wakuwonga chomene ivyo tikuchita pakovwira mbumba yithu. Kwali tikugwira ntchito wuli, mphanyi tose talutilira kulimbikira ntchito nga ni Yehova na Yesu. Tikumbukenge kuti ntchito yithu yakuzirwa chomene nja kuteŵetera Yehova na kupharazga makani ghawemi gha Ufumu wa Chiuta. Ntchito iyi ndiyo yingatipa chimwemwe chanadi.