Yehova wakapa Ŵaisrayeli ŵeruzgi kuti ŵaŵalongozgenge. Kweni iwo ŵakakhumbanga fumu. Ŵakati kwa Samuyeli: ‘Mitundu yose iyo yili nase pafupi, yili na mafumu. Nase tikukhumba fumu.’ Samuyeli wakakondwa yayi na ivyo Ŵaisrayeli ŵakakhumbanga. Wakalomba kwa Yehova na kumuphalira. Yehova wakati kwa Samuyeli: ‘Ŵanthu aŵa ŵakana iwe yayi. Kweni ŵakana ine. Ŵaphalira kuti ŵangaŵa na fumu kweni fumu iyi yizamukhumba vinandi kwa iwo.’ Kweni ŵanthu ŵakati: ‘Tilije navyo ntchito. Ise tikukhumba waka fumu!’

Yehova wakaphalira Samuyeli kuti Sauli ndiyo waŵenge fumu yakwamba. Apo Sauli wakaluta kukawona Samuyeli ku Rama, Samuyeli wakaphakazga Sauli kuti waŵe fumu. Wakapungulira mafuta pa mutu wa Sauli.

Pamanyuma, Samuyeli wakachema Ŵaisrayeli pamoza kuti waŵalongore fumu yawo yiphya. Kweni Sauli wakawoneka yayi. Kasi ukumanya chifukwa chake? Chifukwa wakabisama mu vikatundu. Paumaliro ŵakati ŵamusanga, ŵakiza nayo na kumuyimika pakati pa ŵanthu. Sauli wakaŵa mutali chomene kuluska waliyose, ndipo wakaŵa wakutowa chomene. Samuyeli wakati: ‘Kasi mwamuwona uyo Yehova wamusankha?’ Ŵanthu ŵakachemerezga kuti: ‘Fumu yiŵe na umoyo utali!’

Pakwamba, Sauli wakapulikiranga ivyo Samuyeli wakamuphaliranga kweniso wakapulikiranga Yehova. Kweni pakati pajumpha nyengo, wakasintha. Mwachiyelezgero, Fumu yikazomerezgekanga yayi kupeleka sembe. Nyengo yinyake, Samuyeli wakaphalira Sauli kuti wamulindilire kuti wazakapeleke sembe. Kweni Samuyeli wakachedwa kwiza. Sauli wakati wawona kuti Samuyeli wachedwa, wakapeleka yekha sembe. Kasi Samuyeli wakati wuli? Wakaphalira Sauli kuti: ‘Undapulikire dango la Yehova.’ Kasi Sauli wakasambirapo kanthu pa ivyo wakabudiska?

Nyengo yinyake, apo Sauli wakaluta kukatimbana na Ŵaamaleki, Samuyeli wakamuphalira kuti wakakome munthu waliyose. Kweni Sauli wakakoma yayi Agagi, fumu ya Ŵaamaleki. Yehova wakaphalira Samuyeli kuti: ‘Sauli waleka kunilondezga, ndipo wakupulikira yayi mazgu ghane.’ Samuyeli wakakwiya chomene, ndipo wakati kwa Sauli: ‘Pakuti waleka kupulikira, Yehova wasankhenge fumu yinyake.’ Apo Samuyeli wakang’anamuka kuti walutenge, Sauli wakakora munjilira wa Samuyeli ndipo ukapaluka. Samuyeli wakaphalira Sauli kuti: ‘Yehova wapalurako ufumu wa Israyeli kwa iwe muhanya uno.’ Yehova wakakhumbanga kupeleka ufumu uwu kwa munthu uyo wakumutemwa na kumupulikira.