KURUSKA virimika 2,000 ivyo vyajumpa, kukababika mwana wapadera comene uyo wakakura na kuŵa muntu wakuruska ŵantu wose awo ŵakaŵako. Pa nyengo yira, kukaŵavya muntu uyo wakaŵa na ndege panji galimoto. Kukaŵavyaso vintu vya nga ni wayilesi, telefoni na wayilesi ya sinema.

Mwana uyu wakapika zina lakuti Yesu. Iye wakaŵa wamahara comene kuruska muntu waliyose uyo wakaŵapo pano pa caru capasi. Yesu wakaŵaso msambizgi waluso. Wakarongosoranga vintu vinonono kuti viŵe vipusu kuti ŵantu ŵapulikiske.

Yesu wakasambizganga ŵantu kulikose uko wakakumananga nawo. Wakaŵasambizganga apo wakaŵa mumpepete mwa nyanja na apo wakaŵa mu boti. Wakaŵasambizganga mu nyumba zawo na apo wakendanga mu misewu. Yesu wakaŵavya galimoto, wakakweranga basi yayi panji tireni. Yesu wakendanga mu malo ghanandi kuti wasambizge ŵantu.

Tikusambira vintu vinandi ku ŵanyithu. Kweni tingasambira vintu vyakuzirwa kwa Yesu, Msambizgi Waluso. Ni mu Baibolo mwekha umo mukusangika ivyo Yesu wakayowoya. Apo tikuŵazga panji kutegherezga mazgu agha mu Baibolo, vikuyana waka nga ni para Yesu wakuyowoya nase.

Ncifukwa wuli Yesu wakaŵa Msambizgi Waluso? Cifukwa cimoza ncakuti iye wakasambizgika makora comene. Iye wakatemwanga kutegherezga ivyo wakasambizgikanga. Kasi nkhwa njani uko Yesu wakategherezganga? Kasi ninjani uyo wakamusambizga?— Awiske ŵake ndiwo ŵakamusambizganga. Awiske ŵa Yesu ni Ciuta.

Pambere wakaŵa wandize pano pa caru capasi nga ni muntu, Yesu wakakhalanga kucanya na Ciuta. Anteura, Yesu wakaŵa wakupambana na  ŵantu ŵanji. Ici ncifukwa cakuti, palije muntu uyo wakakhalako kucanya pambere wandababike pano pa caru capasi. Apo Yesu wakaŵa kucanya, wakaŵa Mwana wakupulikira comene. Wakapulikiranga Adada ŵake. Pakuti Yesu wakasambizgika na Ciuta, cikaŵa cakusuzga yayi kwa iye kuti wasambizge ŵantu. Iwe nawe ungarondezga Yesu mwakupulikira adada na amama ŵako.

Cifukwa cinyake ico Yesu wakaŵira Msambizgi Waluso ncakuti, wakatemwanga ŵantu. Iye wakakhumbanga kovwira ŵantu kuti ŵamumanye Ciuta. Yesu wakatemwanga ŵantu ŵarara na ŵana wuwo. Ŵana ŵakatemwanga comene kwiza kwa Yesu. Ici ncifukwa cakuti wakayowoyanga nawo ndiposo wakategherezganga ivyo iwo ŵakayowoyanga.

Zuŵa linyake ŵapapi ŵakiza na twana twawo kwa Yesu. Kweni mabwezi gha Yesu ghakaghanaghananga kuti, Msambizgi Waluso wakaŵa wakutangwanika comene. Iwo ŵakati Yesu walije nyengo yakuti wayowoye na twana. Anteura iwo ŵakaphalira ŵapapi ŵa twana tura kuti ŵawelere na twana twawo. Kweni kasi Yesu wakayowoyaci?— Yesu wakati: “Tuzomerezgani twana twize kwa Ine; mungatukanizganga.” Yesu wakakhumbanga kuti twana twize kwa iye.  Nangauli Yesu wakaŵa muntu wamahara comene ndiposo wakuzirwa, iye wakapatura nyengo yakuti wasambizge twana.—Marko 10:13, 14.

Kasi ukumanya cifukwa ico Yesu wakasambizgiranga twana na kutegherezga ivyo tukayowoyanga? Cifukwa cimoza ncakuti, wakakhumbanga twana utu kuti tukondwenge mwakutuphalira nkani zakukhwaskana na Ciuta, Adada ŵake ŵakucanya. Ni mwauli umo ungapangiskira ŵantu kukondwa?— Mwakuŵaphalira vintu ivyo wasambira vyakuyowoya za Ciuta.

Pa zuŵa linyake, Yesu wakatora kamwana kuti wasambizge mabwezi Ghake sambiro lakuzirwa. Wakatora kamwana na kukayimika mukati mwa ŵasambiri Ŵake. Pamanyuma pake Yesu wakaphalira ŵantu ŵarara aŵa kuti ŵasinte kaghanaghaniro na kacitiro kawo ka vintu kuti viyane na kamwana kara kakimilira mukati mwawo.

Kasi Yesu wakang’anamurangaci? Kasi ukumanya umo muntu murara, panji mwana uyo ni murara pacoko, wakwenera kucitira kuti wakozgane na kwamwana?— Mwana mucoko wakugomezga kuti muntu murara wakumanya vintu vinandi kuruska ivyo iye wakumanya, ndiposo kuti wakwenera kumucindika muntu murara. Wakukhumbisiska kusambira vintu vipya. Anteura, Yesu wakang’anamuranga kuti ŵasambiri ŵake ŵakeneranga kuŵa ŵakujiyuyura nga ni umo ŵana ŵaliri. Mwanadi, tose tingasambira vintu vinandi kufuma ku ŵanyithu. Tikwenera kumanya kuti visambizgo vya Yesu ni vyakuzirwa comene kuruska maghanoghano ghithu.—Mateyu 18:1-5.

Cifukwa cinyake ico Yesu wakaŵira Msambizgi Waluso ncakuti, wakamanya umo wangapangiskira vintu kuŵa vyakukondweska  ku ŵantu. Wakarongosoranga vintu mwaupusu comene. Wakazunuranga tuyuni na maluŵa na vintu vinyake ivyo ŵantu ŵakavimanyanga kuti waŵawovwire kupulikiska nkani zakuyowoya za Ciuta.

Zuŵa linyake apo Yesu wakaŵa pa phiri, ŵantu ŵanandi ŵakiza kwa iye. Yesu wakakhala pasi na kwamba kuyowoya nkani, panji kupharazga kwa iwo, nga ni umo ukuwonera pa cithuzithuzi apa. Nkani iyi yikumanyikwa na zina lakuti Upharazgi wa pa Phiri. Iye wakati: ‘Wonani viyuni vya mu mlengalenga. Viyuni vikupanda vyakurya yayi. Vikusunga mu nthamba vyakurya yayi. Kweni Ciuta wakuvilera. Kasi imwe muli ŵakuzirwa kuruska ivyo yayi?’

Yesu wakayowoyaso kuti: ‘Toranipo sambiro pa maluŵa gha mu thengere. Ghakukura kwambura kupwerereka. Wonani umo ghaliri ghakutowa! Nanga lingaŵa themba lisambazi, Solomon, kuti likavwaranga vyakutowa nga ni umo ghaliri maluŵa agha yayi. Usange Ciuta wakupwererera  nteura maluŵa gha ku thengere kuti ghakule makora, kasi iye wangapwerereraso imwe yayi?’—Mateyu 6:25-33.

Kasi walimanya sambiro ilo Yesu wakusambizga?— Iye wakusambizga kuti tireke kudandaura kuti tamutora nku cakurya kuti tirye panji vyakuvwara kuti tivware. Ciuta wakumanya kuti tikusoŵa vintu ivi. Kweni Yesu wakasambizganga kuti tireke kugwira ncito kuti tisange vyakurya panji vyakuvwara yayi. Kweni iye wakati tiŵike Ciuta pa malo ghakwamba mu umoyo withu. Para tingacita ntena, mbwenu Ciuta watovwirenge kuti tisange cakurya cakuti tirye na vyakuvwara kuti tivware. Kasi ukugomezga mazgu agha?—

 Apo Yesu wakati wamalizga kuyowoya nkani, kasi ŵantu ŵakajipulika wuli?— Baibolo likuyowoya kuti ŵantu ŵakazizwa na kasambizgiro kake. Wakasambizganga mwakukondweska comene. Ivyo wakasambizganga vikawovwira ŵantu kuti ŵacitenge vintu viweme.—Mateyu 7:28.

Anteura, ncakuzirwa comene kuti titegherezgenge kwa Yesu. Kasi ukumanya umo tingacitira?— Tili na buku ilo mulikulembeka mazgu ghake. Kasi buku ili ukulimanya?— Ni Baibolo. Anteura tingategherezga kwa Yesu mwakucita vintu ivyo tikuŵazga mu Baibolo. Baibolo liri na nkani yakukondweska iyo Ciuta wakutiphalira kuti titegherezge kwa Yesu. Tiye tiwone ivyo vikacitika.

Zuŵa linyake Yesu wakaruta pa phiri na ŵabwezi ŵake ŵatatu. Mazina ghawo ghakaŵa Yakobe, Yohane na Petros. Tisambirenge vinandi vya ŵantu aŵa kuntazi. Ŵantu aŵa ŵakaŵa mabwezi ghapamtima gha Yesu. Kweni pa zuŵa ili, cisko ca Yesu cikaŵara mbee. Vyakuvwara vyake vikaŵara comene, nga ni umo ukuwonera pa cithuzithuzi apa.

Pamanyuma pake Yesu na mabwezi ghake ŵakapulika mazgu kufuma kucanya. Mazgu ghakati: ‘Uyu ni Mwana wane wakutemweka, mweneuyo nkusangwa naye; mupulikani iye.’ (Mateyu 17:1-5) Kasi ukumanya uyo wakayowoya mazgu agha?— Agha ghakaŵa mazgu gha Ciuta! Mwanadi, wakaŵa Ciuta uyo wakayowoya mazgu ghakuti timupulikire Mwana wake.

Wuli pakuyowoya za ise lero? Kasi timupulikirenge Ciuta na kutegherezga kwa Mwana wake, uyo ni Msambizgi Waluso?— Tose tikwenera kucita nteura. Kasi ukukumbukira umo tingacitira?—

Tingategherezga kwa Mwana wa Ciuta mwakuŵazga nkani za mu Baibolo izo zikuyowoya za umoyo wake. Pali vintu vinandi comene viweme ivyo Msambizgi Waluso watiphalirenge. Ukondwenge comene kusambira vintu ivi, ivyo vilikulembeka mu Baibolo. Mwakusazgirapo, kuti uŵe na cimwemwe, phalirako ŵabwezi ŵako za vintu viweme ivyo ukusambira.