PARA ŵana ŵakucita vintu viweme, awo ŵakuŵapwererera ŵakukondwa comene. Para msungwana wakucita makora vintu, ŵadada ŵake ŵakukondwa ndipo ŵakuphalira ŵanji kuti: “Uyu ni mwana wane.” Panji usange munyamata wakucita vintu viweme, dada wakuyowoya mwakukondwa kuti: “Uyu ni mwana wane.”

Nyengo zose Yesu wakucita vintu ivyo vikukondweska Ŵadada ŵake. Mwanteura Ŵadada ŵake mbakukondwa comene. Kasi ukukumbuka ico Ŵadada ŵa Yesu ŵakacita zuŵa linyake apo Yesu wakaŵa na ŵasambiri ŵake ŵatatu?— Ŵakayowoya kufuma kucanya kuŵaphalira ŵasambiri ŵa Yesu kuti: ‘Uyu ni Mwana wane wakutemweka, mweneuyo nkusangwa naye.’—Mateyu 17:5.

Nyengo zose Yesu wakucita vintu ivyo vikukondweska Ŵadada ŵake. Kasi ukumanya cifukwa cake? Cifukwa wakuŵatemwa comene Ŵadada ŵake. Usange muntu wakucita vintu cifukwa cakuti watumika waka para wandakhumbe, ici cikuŵa cakusuzga. Kweni usange ngwakukhumbisiska, pakuŵavya suzgo. Kasi ukumanya ico cikung’anamura kuŵa wakukhumbisiska?— Cikung’anamura kudoka kucita cintu cinyake.

Nanga ni apo wakaŵa wandize pa caru capasi, Yesu wakaŵa wakukhumbisiska kucita cintu cilicose ico Ŵadada ŵake ŵakamutuma. Wakacitanga nteura cifukwa wakuŵatemwa Ŵadada ŵake, Yehova Ciuta. Yesu wakaŵa na malo ghaweme kucanya na Ŵadada ŵake. Kweni Ciuta wakaŵa na mulimo wakuzirwa wakuti Yesu wacite. Kuti wacite mulimo uwo, Yesu wakeneranga kufumako kucanya. Wakeneranga kuti wababike nga ni bonda pa caru capasi. Yesu wakakhumbisiska kucita nteura cifukwa Yehova wakakhumbanga kuti wazakacite mulimo uwo.

Kuti wababike nga ni bonda pa caru capasi, Yesu wakakhumbikwiranga kuti waŵe na ŵanyina. Kasi ukuŵamanya?— Zina lawo  likaŵa Mariya. Yehova wakatuma mungelo wake Gabriyeli kufuma kucanya kuzakayowoya na Mariya. Gabriyeli wakaphalira Mariya kuti wazamuŵa na bonda mwanarumi. Zina lake lizamuŵa Yesu. Kasi dada wa bonda uyu wakeneranga kuzakaŵa njani?— Mungelo wakayowoya kuti Dada wa bonda wakeneranga kuzakaŵa Yehova Ciuta. Ni cifukwa cake Yesu wakeneranga kuzakaŵa Mwana wa Ciuta.

Kasi ukughanaghana kuti Mariya wakati wuli?— Kasi wakayowoya kuti, “nkukhumba cara kuŵa nyina wa Yesu”? Yayi, Mariya wakaŵa wakunozgeka kucita ivyo Ciuta wakakhumbanga. Kweni, kasi Mwana wa Ciuta uyo wali kucanya wangababika wuli nga ni bonda pano pa caru capasi? Ni mwauli umo kubabika kwa Yesu kukaŵira kwakupambana na ŵabonda wose? Kasi ukumanya?—

Ciuta wakalenga ŵapapi ŵithu ŵakwamba, Adamu na Heva mwakuti ŵakhalenge pamoza mu ntowa yapadera comene. Pamanyuma pake, bonda wakwamba kukura mu nthumbo ya ŵanyina. Ŵantu ŵakuyowoya kuti ici ncakuzizwiska! Nkugomezga kuti nawe ukuzomerezga.

Sono Ciuta wakacita cintu cinyake ico cikaŵa cakuzizwiska comene. Wakatora umoyo wa Mwana wake kucanya na kuwuŵika mu nthumbo ya Mariya. Ciuta wakaŵa wandacitepo. Nga ncakufumapo cake, Yesu wakamba kukura mu nthumbo ya Mariya nga ni umo ŵana wose ŵakukulira mu nthumbo za ŵanyinawo. Pamanyuma pake, Yosefe wakatora Mariya kuŵa mwanakazi wake.

Penepapo Yesu wakaŵa pafupi kuti wababike, Mariya na Yosefe ŵakiza mu msumba wa Betelehemu. Kweni mu msumba uwu mukaŵa ŵantu  ŵanandi. Yosefe na Mariya ŵakasanga malo ghakugona cara, mwanteura ŵakagona mu ciŵaya ca viŵeto. Mu ciŵaya mwenemura, Mariya wakababa bonda, ndipo Yesu ŵakamuŵika mu cakuryeramo viŵeto, nga ni umo ukuwonera apa.

Vintu vyakukondweska vikacitika pa usiku uwo Yesu wakababika. Mungelo wakaŵawonekera ŵaliska ŵanji kufupi na Betelehemu. Wakaŵaphalira kuti Yesu wakaŵa muntu wakukhumbikwa comene. Mungelo wakati: ‘Henani! Nkumuphalirani makani ghaweme agho ŵantu ŵakondwenge nagho. Lero muntu munyake wababika uyo wazamuponoska ŵantu.’—Luka 2:10, 11.

Mungelo wakaŵaphalira ŵaliska kuti ŵangakamusanga Yesu mu Betelehemu wagona mu cakuryeramo viŵeto. Pamanyuma pake, ŵangelo ŵanyake ŵakiza na kukolerana na mungelo wakwamba kurumba Ciuta.  “Ucindami kwa Ciuta,” ŵakimba nteura ŵangelo, ‘na pa caru ca pasi cimango mu ŵantu awo ŵakusangwa naye.’—Luka 2:12-14.

Ŵakati ŵaruta ŵangelo ŵara, ŵaliska ŵakaruta ku Betelehemu ndipo ŵakamusanga Yesu. Ŵakati ŵafika ŵakamuphalira Yosefe na Mariya viweme vyose ivyo ŵakapulika. Aghanaghanira waka umo Mariya wakaŵira na cimwemwe cifukwa cakukhumbisiska kuti waŵe mama wa Yesu!

Pamanyuma pake, Yosefe na Mariya ŵakaruta na Yesu ku msumba wa Nazareti. Uku ndiko Yesu wakakulira. Wakati wakura, wakamba uteŵeti wake ukuru wakusambizga. Ici ni cigaŵa ca uteŵeti uwo Yehova Ciuta wakakhumba kuti Mwana  wake wacite pa caru capasi. Yesu wakakhumbisiska comene kucita uteŵeti uwu cifukwa ŵakaŵatemwanga comene Ŵadada ŵake.

Apo wakaŵa wandambe uteŵeti wake nga ni Msambizgi Waluso, wakabapatizika mu Mronga wa Yorodani na Yohane Mbapatizi. Ndipo cintu cinyake cakuzizwiska cikacitika! Apo wakazuwukanga mu maji, Yehova wakayowoya kufuma kucanya kuti: ‘Uyu ni Mwana wane wakutemweka, mweneuyo nkusangwa naye.’ (Mateyu 3:17) Kasi iwe ukukondwa yayi para ŵapapi ŵako ŵakukuphalira kuti ŵakukutemwa?— Tiri na cigomezgo kuti Yesu nayo wakakondwa comene.

Nyengo zose Yesu wakacitanga vintu viweme. Wakacitanga vintu mwaupusikizgi cara. Wakaŵaphalirapo yayi ŵantu kuti iye wakaŵa Ciuta. Mungelo Gabriyeli wakaphalira kale Mariya kuti Yesu wazamucemeka Mwana wa Ciuta. Nanga ni Yesu iye mwene wakayowoya kuti wakaŵa Mwana wa Ciuta. Ndipo wakaŵaphalirapo cara ŵantu kuti iye wakumanya vintu vinandi kuruska Ŵadada ŵake. Iye wakati: ‘Ŵadada mbakuru kuruska Ine.’—Yohane 14:28.

Nanga nkucanya, peneapo Yesu wakapika ncito na Ŵadada ŵake, iye wakacitanga. Iye wakazomeranga waka cara kuti wacitenge na kucita vinyake. Wakaŵatemwanga comene Ŵadada ŵake. Mwanteura wakapulikiranga ivyo Ŵadada ŵake ŵakayowoyanga. Apo wakati wiza pa caru capasi, wakacita ivyo Ŵadada ŵake ŵakucanya ŵakamutuma. Wakacitanga vintu vinyake cara. Ndico cifukwa cake Yehova wakukondwa comene na Mwana wake!

Nase tikukhumba kumukondweska Yehova, asi ntena?— Tikwenera kupulikira ivyo Ciuta wakuyowoya nga ni umo Yesu wakacitira. Ciuta wakuyowoya nase kwizira mu Baibolo. Cingaŵa ciweme yayi kuŵa nga tikumupulikira Ciuta penepapo tikucita vintu ivyo vikukolerana cara na Baibolo, asi ntena?— Ndipo kumbukira kuti, tiŵenge na cimwemwe para tikukondweska Yehova ndiposo usange tikumutemwa nadi.