Kusambizga Ŵanthu Kuŵazga na Kulemba
“Munthu waliyose wali na wanangwa wakuti wasambire, ndipo ichi chikovwira munthu kuchita vinthu payekha kweniso wakovwira pa chitukuko cha mukaya.”—UNESCO. *
MALIPOTI ghakulongora kuti pa charu chose chapasi pali ŵanthu ŵakujumpha 700 miliyoni ŵa vyaka 15 kuya munthazi awo ŵakumanya yayi kuŵazga panji kulemba. Ntheura ŵakumanya vinandi yayi. Ŵakumanyaso yayi viwemi ivyo Baibolo ‘likutisambizga’ pa nkhani ya nkharo na kumanya Chiuta. (Ŵaroma 15:4) Pa chifukwa ichi, Ŵakaboni ŵa Yehova mu vyaru vinandi ŵali na makilasi ghakusambizga ŵanthu kuŵazga na kulemba kwambura kulipira. Kasi ndondomeko iyi yikovwira?
Pulikani ivyo Ŵakaboni ŵa Yehova ŵakuchita ku Mexico. Ŵanthu ŵanandi chomene mu charu ichi ŵakuyowoya Chisipanishi. Kwambira mu 1946, Ŵakaboni ŵa Yehova ŵasambizga ŵanthu ŵakujumpha 152,000 kuŵazga na kulemba. Ndipo ŵanandi awo ŵakasambira sukulu iyi nawo sono ŵakusambizga ŵanyawo. Boma likuwonga chomene ivyo Ŵakaboni ŵakuchita, ndipo likaŵalembera makalata ghanandi. Kalata yimoza yikati: “Boma kwizira mu wupu wa General Board of Education likumanya kweniso likumuwongani chomene chifukwa cha sukulu yakusambizga ŵanthu (Adult Education Program) iyo muli nayo.”
Ŵanthu ŵanandi, ŵana na ŵalara wuwo, ŵawovwirika chomene na sukulu iyi. Mwachiyelezgero, buya munyake zina lake Josefina wakalembeska sukulu iyi apo wakaŵa na vyaka 101. Wakasambira vyaka viŵiri na kumalizga.
Nangauli Chisipanishi ndicho ntchiyowoyero chikuru ku Mexico, kweni sukulu iyi yikuchitikaso mu viyowoyero vinyake. Mu 2013, ŵanthu ŵa viyowoyero 8 vichokovichoko ŵakasambira kuŵerenga na kulemba mu viyowoyero vyawo.
Kumanya kuŵazga na kulemba ntchinthu chakuzirwa nadi icho chikovwira kuti munthu wajulike kumaso. Kweni chikuru chomene ntchakuti vikovwira ŵanthu ŵa mitundu yose kuti ŵaŵazgenge Baibolo, buku lakufuma kwa Chiuta. Buku ili likovwira ŵanthu kuleka tumitheto twawakawaka, kugomezga vyautesi ivyo matchalitchi ghakusambizga, na nkharo ziheni.—Yohane 8:32.
^ ndime. 2 UNESCO chikwimira United Nations Educational, Scientific, and Cultural Organization.
Panji Mungatemwa Kuŵerengaso Nkhani Izi
BAIBOLO LIKUSINTHA UMOYO WA ŴANTHU
“Nkhaŵa na Mafumbo Ghanandi Chomene Kuluska Mazgoro”
Ntchivichi chikamovwira Mario, uyo pakwamba wakaŵa muliska wa tchalitchi kuti wamanye kuti Ŵakaboni ŵa Yehova ŵakusambizga nadi unenesko?
KUFUMA MU NTHAMBA YITHU
Kovwira Ŵanthu pa Charu Chose Kuti Ŵamanye Kuŵerenga na Kulemba
Ŵalara ŵa boma mu vyaru vinandi ŵakulumba Ŵakaboni ŵa Yehova chifukwa cha kulutiska panthazi ntchito yakusambizga ŵanthu kulemba na kuŵerenga.
MAVIDIYO GHA NKHANI ZINYAKE
