NKHANI YAKUSAMBIRA 18
Umo Mungachitira Kuti Mujiŵikire Vilato Vyauzimu na Kuvifiska
“Ughanaghanirepo vinthu ivi, utangwanikenge navyo, mwakuti ŵanthu wose ŵawone umo ukukulira.”—1 TIM. 4:15.
SUMU 84 Tikujipeleka
IVYO VILI MU NKHANI IYI *
1. Kasi ni vilato wuli vyauzimu ivyo tingajiŵikira?
PAKUTI tili Ŵakhristu ŵaunenesko, tikumutemwa chomene Yehova. Tikukhumba kumupa viwemi chomene Yehova apo tikumuteŵetera. Kweni kuti timupe viwemi chomene Yehova ivyo tingafiska, tikwenera kujiŵikira vilato vyauzimu. Vilato nga nkhuŵa na makhaliro Ghachikhristu, kusambira maluso, na kupenja nthowa zakovwilira ŵanji. *
2. Chifukwa wuli tikwenera kujiŵikira vilato vyauzimu na kulimbikira kuti tivifiske?
2 Chifukwa wuli tikwenera kuŵa na khumbo lakuti tilute panthazi mwauzimu? Chifukwa chakwamba ntchakuti tikukhumba kukondweska Adada ŵithu ŵakuchanya. Yehova wakukondwa para wakuwona kuti tikugwiliskira ntchito mwakukwana maluso ghithu pakumuteŵetera. Chinyake ntchakuti tikukhumba kuluta panthazi mwauzimu mwakuti tiwovwire makora ŵabali na ŵadumbu ŵithu. (1 Tes. 4:9, 10) Nanga tingaŵa kuti takhala mu unenesko nyengo yitali wuli, tose tingachitapo kanthu kuti tilutilire kukura mwauzimu. Tiyeni tiwone umo tingachitira nthena.
3. Kuyana na 1 Timote 4:12-16, kasi mpositole Paulosi wakachiska Timote kuti wachite vichi?
3 Apo mpositole Paulosi wakalembanga kalata yakwamba kwa Timote, munyamata uyu wakaŵa kale mubali mulara wakuchita makora vinthu. Ndipouli, Paulosi wakamuchiska kuti walutilire kukura mwauzimu. (Ŵazgani 1 Timote 4:12-16.) Apo mukughanaghanira ivyo Paulosi wakayowoya, muwonenge kuti iyo wakakhumbanga Timote walute panthazi mwauzimu munthowa ziŵiri: Yakwamba, waŵe na makhaliro Ghachikhristu nga chitemwa, chipulikano, na utuŵa. Ndipo yachiŵiri, walutilire kusazgirako maluso ghake, pa kuŵazga pa wumba, kuchiska, na kusambizga. Uku tikughanaghanira vya Timote, sono tiyeni tiwone umo kujiŵikira vilato vyakuti tingafiska kungatovwilira kuti tikure mwauzimu. Tiwonengeso nthowa zinyake za umo tingachitira kuti tisazgireko uteŵeti withu.
MUŴE NA MAKHALIRO GHACHIKHRISTU
4. Kuyana na lemba la Ŵafilipi 2:19-22, kasi ntchivichi chikawovwira Timote kuŵa muteŵeti muwemi wa Yehova?
4 Kasi ntchivichi chikawovwira Timote kuŵa muteŵeti muwemi wa Yehova? Ni makhaliro Ghachikhristu agho wakaŵa nagho. (Ŵazgani Ŵafilipi 2:19-22.) Umo Paulosi wakamulongosolera Timote, tikuwona kuti Timote wakaŵa munthu wakujiyuyura, wakugomezgeka, wakulimbikira, na wambura kukayikiska. Wakaŵa na chitemwa ndipo wakaghanaghaniranga chomene ŵabali. Pa chifukwa ichi, Paulosi wakamutemwanga Timote ndipo wakadonda yayi panji kuti kukayika kumupa milimo yakusuzga. (1 Kor. 4:17) Nase mwakuyana waka, Yehova watitemwenge kweniso tiŵenge ŵakovwira chomene mu mpingo para tili na makhaliro agho iyo wakutemwa.—Sal. 25:9; 138:6.
Manyani mukhaliro Wachikhristu uwo mungatemwa kuti muchitenge makora chomene (Wonani ndime 5-6)
5. (a) Kasi mungasankha wuli mukhaliro Wachikhristu uwo mukukhumba kuŵa nawo? (b) Nga umo tikuwonera pa chithuzi, kasi mudumbu muwukirano uyu wakuchita wuli kuti wafiske chilato chake chakuti waŵe walusungu ku ŵanji?
5 Sankhani mukhaliro uwo mukukhumba kuŵa nawo. Lombani na kughanaghanira mikhaliro iyo mukukhumbikwira kugwilirapo ntchito. Sankhani mukhaliro umoza uwo mukukhumba kuti mwambe kugwilirapo ntchito. Mwachiyelezgero, mungasankha kuti musambire kuŵa ŵalusungu panji kuŵa na khumbo likuru lakovwira ŵabali na ŵadumbu ŵinu. Panji mungakhumba kusambira kuŵa ŵamtende na ŵanji kweniso ŵakugowoka. Mungachita makora kufumba munyinu uyo mukumugomezga kuti wamuphalirani apo mungakhumbikwira kugwilirapo ntchito.—Zinth. 27:6.
6. Kasi mungachita wuli kuti mufiske chilato chinu chakuti muŵe na mukhaliro unyake?
6 Chitanipo kanthu kuti mufiske chilato chinu. Kasi mungachita wuli? Nthowa yimoza ndiyo kusambira mwakupwelelera mukhaliro uwo mukukhumba kugwilirapo ntchito. Tiyelezgere kuti mukukhumba kuchitapo kanthu kuti muŵe na mtima wakugowokera ŵanyinu. Panji mungamba na kusambira kweniso kughanaghanirapo chomene nkhani za ŵanthu ŵa mu Baibolo awo ŵakaŵa na mtima wakugowoka na awo ŵakaŵavya mtima uwu. Ghanaghanirani vya Yesu. Iyo wakagowokeranga ŵanji na mtima wose. (Luka 7:47, 48) Kweniso wakalaŵiskanga pa maubudi ghawo yayi kweni pa ivyo ŵakuchita makora. Kweni Ŵafarisi mu nyengo ya Yesu “ŵakawonanga ŵanyawo wose nga nkhanthu yayi.” (Luka 18:9) Para mwaghanaghanirapo pa viyelezgero ivi, jifumbani kuti: ‘Kasi ine nkhuwonamo vichi mu ŵanji? Kasi ni makhaliro ghawo ngani agho nkhuŵikapo mtima chomene?’ Usange vikumusuzgani kugowokera munthu munyake, yezgani kulemba mikhaliro yose yiwemi iyo wali nayo. Kufuma apo, jifumbani kuti: ‘Kasi Yesu wakumuwona wuli munthu uyu? Kasi wangamugowokera?’ Para tikusambira Baibolo mu nthowa iyi, mbwe tisinthenge kaghanaghaniro kithu. Pakwamba, tingakhumbikwira kuyezgayezga chomene kuti tigowokere munthu uyo watibudira. Kweni para tikulutilira kugwilirapo ntchito kuti tisinthe, paumaliro tizamuŵa nawo mtima wakugowokera ŵanyithu nyengo zose.
SAMBIRANI MALUSO GHAKUZIRWA
Jipelekani kusambira umo munganozgera vinthu pa Nyumba yinu ya Ufumu (Wonani ndime 7) *
7. Kasi lemba la Zintharika 22:29 likulongora wuli kuti Yehova wakugwiliskira ŵantchito ŵanthu ŵaluso mazuŵa ghano?
7 Chilato chinyake icho mungajiŵikira, nkhusambira maluso ghakuzirwa. Ghanaghanirani unandi wa ŵanthu awo ŵakukhumbikwa pakuzenga nyumba za Beteli, Malo Ghakuchitirapo Maungano, kweniso Nyumba za Ufumu. Ŵanandi mwa ŵanthu aŵa ŵakasambira maluso chifukwa cha kugwira ntchito lumoza na awo ŵakuzimanya makora ntchito izi. Nga umo tikuwonera pa chithuzi, ŵabali na ŵadumbu wuwo ŵakusambira maluso agho ngakukhumbikwa pakupwelelera Malo Ghakuchitirapo Maungano na Nyumba za Ufumu. Munthowa izi na zinyake, Yehova Chiuta, “Themba lamuyirayira,” kweniso Khristu Yesu, “Themba la mathemba,” ŵakufiska vinthu vikuru kwizira mu ŵantchito ŵaluso. (1 Tim. 1:17; 6:15; ŵazgani Zintharika 22:29.) Tikwenera kulimbikira na kugwiliskira ntchito maluso ghithu kuchindika Yehova, tekha yayi.—Yoh. 8:54.
8. Kasi mungasankha wuli luso lwakuti musambire?
8 Sankhani luso ulo mukukhumba kusambira. Kasi mungasambira luso wuli? Fumbani ŵalara mu mpingo winu panji mulaŵiliri wa dera kuti ŵamuphalirani luso ulo ŵakuwona kuti mungasambira. Mwachiyelezgero, usange ŵamuphalirani kuti musazgireko luso pakuyowoya kweniso kusambizga, ŵafumbani kuti ŵamulongorani chigaŵa cheneko icho mukwenera kugwilirapo ntchito. Kufuma apo, chitanipo kanthu kuti muchite makora pa chigaŵa icho. Kasi mungachita wuli?
9. Kasi mungachita wuli kuti mufiske chilato chinu cha kusambira luso lunyake?
9 Chitanipo kanthu kuti mufiske chilato chinu. Tiyelezgere kuti mukukhumba kusazgirako luso lwinu pakusambizga. Para vili nthena mungasambira mwakupwelelera kaburosha ka Jipelekani pa Kuŵazga na Kusambizga. Para mwapika nkhani pa maungano ghamukati mwa sabata, mungapempha mubali wakwenelera kuti wapulikizge nkhani yinu pambere mundakayowoye ku mpingo ndipo wamuphalirani apo pakukhumbikwira kunozga. Nozgekerani mwakutendekera nkhani iyo mwapika mwakuti ŵanthu ŵawone kuti ndimwe wakuŵikapo mtima kweniso wakugomezgeka.—Zinth. 21:5; 2 Kor. 8:22.
10. Yowoyani chiyelezgero icho chikulongora umo tingasambilira luso ulo tikukhumba kuŵa nalo.
10 Kasi mungachita wuli usange chilato chinu ntchakuti musambire luso ulo lukuwoneka lunonono kwa imwe? Kuwa mphwayi yayi! Mubali munyake zina lake Garry wakasuzgikiranga kuŵazga. Iyo wakukumbuka kuti soni zikamukoranga chomene para wakuŵazga mwakukwezga pa maungano gha mpingo. Kweni wakaŵikapo mtima kuti wasambire kuŵazga makora. Sono iyo wakuti chifukwa cha kusambizgika na ŵabali kweniso kusambira mabuku ghithu, wakukwaniska kuyowoya nkhani pa Nyumba ya Ufumu, maungano gha dera, kweniso gha chigaŵa!
11. Kasi ntchivichi chingatovwira kuti tichitenge vinandi pakuteŵetera Yehova, nga ni Timote?
11 Kasi Timote wakazgoka nadi waluso pakuyowoya kweniso kusambizga? Baibolo likuyowoya yayi. Kweni tikukayika yayi kuti Timote wakalutilira kuchita makora mauteŵeti ghake chifukwa cha kulondezga ulongozgi wa Paulosi. (2 Tim. 3:10) Mwakuyana waka, usange tikusazgirako maluso ghithu, tikwaniskenge kuchita vinandi pakuteŵetera Yehova.
PENJANI NTHOWA IZO MUNGATEŴETERA ŴANJI
12. Kasi mwasanga chandulo wuli na uteŵeti uwo ŵanyinu ŵakuchita?
12 Tose tikusanga chandulo na uteŵeti uwo ŵanyithu ŵakuchita. Para tili mu chipatala, tikuwonga para ŵalara awo ŵali mu Makomiti Ghakudumbiskana na Chipatala panji mu Magulu Ghakwendera Ŵalwari ŵatiyendera. Para tasangana na suzgo pa umoyo withu, tikuwonga para mulara wachitemwa wapatura nyengo kutitegherezga na kutikhozga. Para tikukhumbikwira wovwiri pakusambira na munthu Baibolo, tikukondwa usange mupayiniya waluso wazomera kuluta nase ku sambiro na kutipako masachizgo. Ŵabali na ŵadumbu wose aŵa mbakukondwa kutovwira. Nase tingaŵa ŵakukondwa usange tingajipeleka kovwira ŵabali ŵithu. Yesu wakati: “Uyo wakupeleka wakukondwa chomene kuluska uyo wakupokera.” (Mil. 20:35) Usange mukukhumba kusazgirako uteŵeti winu munthowa izi panji zinyake, kasi ntchivichi chingamovwirani kufiska vilato vinu?
13. Kasi tikwenera kukumbuka vichi para tikujiŵikira chilato?
13 Lekani kujiŵikira chilato icho ntchachisanisani waka. Mwachiyelezgero, mungati, ‘Nkhukhumba kuchita vinandi mu mpingo.’ Kweni pangaŵa pakusuzga kuti mufiske chilato chanthena, ndipo panyake mungamanya yayi para mwachifiska. Ntheura sankhani chilato icho mukukhumba kufiska. Mungalemba chilato chinu kweniso umo mungachifiskira.
14. Chifukwa wuli tikwenera kugwamira pa chimoza yayi pakujiŵikira vilato?
14 Chinyake ntchakuti para tajiŵikira vilato tileke kungangamira pa chimoza. Chifukwa wuli? Chifukwa ntchakuti ni nyengo zose yayi apo tikuŵa na mazaza pa ivyo vikutichitikira. Chiyelezgero ni mpositole Paulosi, iyo wakawovwira kwambiska mpingo uphya mu msumba wa Tesalonika. Ndipo tikukayika yayi kuti mwenecho wakaŵa na chilato cha kukhala kwenekura na kovwira Ŵakhristu ŵaphya aŵa. Kweni Paulosi wakachichizgika kufumamo mu msumba uwu chifukwa cha ŵalwani. (Mil. 17:1-5, 10) Paulosi waŵenge kuti wakakhala kwenekura mphanyi wakaŵika ŵabali ŵake pangozi. Kweni Paulosi wakavuka yayi kovwira ŵabali. M’malo mwake, iyo wakazomerezga waka umo vinthu vikasinthira. Pamanyuma, wakatuma Timote kuti wakawovwire Ŵakhristu ŵaphya ŵa mu Tesalonika. (1 Tes. 3:1-3) Ŵatesalonika ŵakwenera kuti ŵakakondwa chomene kuwona kuti Timote wakaŵa wakujipeleka kovwira kulikose uko kukakhumbikwanga wovwiri.
15. Kasi vilato vithu vingasintha wuli chifukwa cha kusintha kwa vinthu pa umoyo withu? Yowoyani chiyelezgero.
15 Tingasambirako ku ivyo vikachitikira Paulosi ku Tesalonika. Nyengo zinyake tingajiŵikira chilato, kweni vinthu vingasintha pa umoyo withu ndipo vingatitondeska kufiska chilato chithu. (Muph. 9:11) Usange ndimo viliri na imwe, sankhani chilato chinyake icho mungafiska. Ndivyo wakachita Ted na muwoli wake Hiedi. Chifukwa cha suzgo la muthupi, ŵakaleka uteŵeti wa pa Beteli. Kweni pakuti ŵakatemwanga Yehova ŵakasanga nthowa zinyake izo ŵangasazgirako uteŵeti wawo. Chakwamba, ŵakamba upayiniya wanyengozose. Nyengo yati yajumphapo, ŵakimikika kuŵa ŵapayiniya ŵapadera, ndipo Ted wakasambizgika kuŵa movwiri wa mulaŵiliri wa dera. Kufuma apo, vyaka ivyo munthu wakwenera kuŵira mulaŵiliri wa dera vikasintha. Ted na Hiedi ŵakamanya kuti sono ŵakaŵaso ŵakwenelera yayi pa uteŵeti uwu. Nangauli ivi vikaŵakwenyerezga, kweni ŵakamanya kuti ŵangateŵeteraso Yehova mu nthowa zinyake. Ted wakuti, “Tasambira kuleka kuŵika mtima pa uteŵeti umoza pera.”
16. Kasi tikusambirapo vichi pa Ŵagalatiya 6:4?
16 Tingaŵa yayi na mazaza pa chilichose icho chikuchitika pa umoyo withu. Ntheura chakukhumbikwa ntchakuti tileke kughanaghana kuti tili ŵakuzirwa kwa Yehova chifukwa cha mauteŵeti agho tili nagho, kweniso tileke kuyaniska mauteŵeti ghithu na mauteŵeti gha ŵanyithu. Hiedi wakuti, “Para ukuyaniska umoyo wako na umoyo wa ŵanthu ŵanyake ukuleka kuŵa wakukondwa.” (Ŵazgani Ŵagalatiya 6:4.) Ntheura ntchakuzirwa chomene kuti tipenjenge nthowa izo tingawovwilira ŵanji na kuteŵetera Yehova. *
17. Kasi mungachita wuli kuti muŵe ŵakwenelera mauteŵeti ghanyake?
17 Para mukukhumba kuchita vinandi pakuteŵetera Yehova, mungachita makora kuleka kuŵa na umoyo wakukhumba vinandi kweniso kuŵa na ngongoli zambura kwenelera. Jiŵikirani vilato vichokovichoko ivyo vingamovwirani kuti mufiske vilato vinu vikuruvikuru. Mwachiyelezgero, usange chilato chinu chikuru ntchakuti muzakaŵe mupayiniya wanyengozose, mbwe pasono yezgani dankha kuchita upayiniya wakanyengo mwezi uliwose. Usange chilato chinu ntchakuti muzakaŵe muteŵeti wakovwira, mungachita makora kuti pasono mumalirenge nyengo yinandi mu upharazgi kweniso kwendera ŵalwari na ŵachekuru mu mpingo winu. Ivyo mukuchita sono vingamovwirani kuti muzakaŵe ŵakwenelera mauteŵeti ghanyake munthazi. Yezgayezgani kuchita makora mulimo uliwose uwo mwapika.—Rom. 12:11.
Sankhani chilato icho mukuwona kuti mungafiska (Wonani ndime 18) *
18. Nga umo tikuwonera pa chithuzi, kasi mungasambirako vichi kwa Beverley?
18 Nanga tingaŵa ŵachekuru, nase tingajiŵikira vilato na kuvifiska. Pulikani ivyo wakachita mudumbu munyake wa vyaka 75 zina lake Beverley. Mudumbu uyu wakaŵa na suzgo linyake ilo likamupangiskanga kuti watondekenge kwenda. Kweni wakakhumbanga chomene kuti wachite vinandi pa upharazgi wapadera wakuchemera ŵanthu ku Chikumbusko. Ntheura wakajiŵikira vilato. Beverley wakakondwa chomene wati wafiska vilato vyake pa upharazgi wapadera uwu. Ivyo mudumbu uyu wakachita vikakhukiska ŵanji kulimbikira uteŵeti. Yehova wakuzirwiska chomene uteŵeti uwo ŵabali na ŵadumbu ŵithu ŵachekuru ŵakuchita, nangauli ŵakuchita vichoko malinga na umo vinthu viliri pa umoyo wawo.—Sal. 71:17, 18.
19. Kasi ni vilato wuli vyauzimu ivyo tingajiŵikira?
19 Jiŵikirani vilato ivyo mukuwona kuti mungafiska. Muŵe na makhaliro agho ghakukondweska Yehova. Sambirani maluso agho ghamovwiraninge kuchitira vinandi Chiuta kweniso gulu lake. Penjani nthowa izo mungateŵetera ŵabali na ŵadumbu ŵinu mwakukwana. * Nga Timote, namwe Yehova wamovwiraninge ndipo ‘ŵanthu wose ŵawonenge umo mukukulira.’—1 Tim. 4:15.
SUMU 38 Wamuzgoraninge Ŵankhongono
^ ndime 5 Timote wakaŵa mupharazgi waluso wa makani ghawemi. Ndipouli, mpositole Paulosi wakamuchiska kuti walutilire kukura mwauzimu. Chifukwa chakuti Timote wakalondezga ulongozgi wa Paulosi, Yehova wakamugwiliskira ntchito mwakukwana ndipo wakawovwira chomene ŵabali na ŵadumbu. Nga Timote, kasi namwe muli ŵakunozgeka kuteŵetera Yehova kweniso ŵabali na ŵadumbu mwakukwana? Tikukayika yayi kuti ndivyo mukukhumba. Kasi ni vilato wuli ivyo vingamovwirani kuti muchite nthena? Ndipo kasi mukwenera kuchita vichi kuti mujiŵikire vilato ivi na kuvifiska?
^ ndime 1 MAZGU GHALONGOSOREKA: Vilato vyauzimu vikusazgapo chilichose icho tikulimbikira kuti tichite mwakuti titeŵetere Yehova mwakukwana na kumukondweska.
^ ndime 16 Wonani mutu wakuti “Kuteŵetera Uko Kukukhumbikwira Wovwiri” mu buku la Ŵakunozgeka Kuchita Khumbo la Yehova, mutu 10, ndime 6-9.
^ ndime 19 Wonani sambiro 60 la mutu wakuti, “Lutilirani Kukura Mwauzimu,” mu buku lakuti Mungakondwa na Umoyo Kwamuyirayira!
^ ndime 63 MAZGU GHAKULONGOSORA CHITHUZI: Mubali wakusambizga ŵadumbu ŵaŵiri ntchito ya kunozga vinthu, ndipo pamanyuma ŵakugwiliskira ntchito luso ulo ŵasambira.
^ ndime 65 MAZGU GHAKULONGOSORA CHITHUZI: Mudumbu uyo wakwenda yayi wakupharazga kwizira pa telefoni, wakuchemera ŵanthu ku Chikumbusko.
