1, 2. Chifukwa wuli ntchamahara kutegherezga kwa Mlengi withu para tikusankha ivyo tichitenge mu umoyo withu? (Wonani chithuzi chakwamba.)

USANGE ndimwe muwukirano, mukwenera kuti muli kupikapo ulongozgi wakupambanapambana wakukhwaskana na ivyo mungazakachita munthazi. Ŵasambizgi, ŵakupeleka ulongozgi, panji ŵanthu ŵanyake ŵangamuchiskani kuti musambire masambiro ghapachanya na kusanga ntchito yapachanya. Kweni Yehova wakukhumba kuti muchite vinyake. Unenesko ngwakuti wakukhumba kuti mulimbikirenge sukulu mwakuti para mwamalizga yizakamovwirani kusanga vyakukhumbikwa pa umoyo. (Kol. 3:23) Kweni para mukusankha ivyo mukwenera kuŵika pakwamba mu umoyo winu, wakumuchiskani kuti mulongozgekenge na fundo ziwemi izo zingamovwirani kuti muchite khumbo lake mu nyengo zaumaliro izi.—Mat. 24:14.

² Kumbukaniso kuti Yehova wakuwona vyose chifukwa wakumanya ivyo vichitikirenge charu ichi munthazi ndiposo apo umaliro wake wizirenge. (Yes. 46:10; Mat. 24:3, 36) Kweniso wakumanya ivyo vingatovwira kuti tiŵe ŵakukhorwa na ŵakukondwa. Wakumanyaso ivyo vingatikhuŵazga na kutipangiska kuŵa ŵambura kukondwa. Nanga ulongozgi wa ŵanthu ungawoneka uwemi wuli, kweni para ukufuma  mu Mazgu gha Chiuta yayi, ngwavinjeru yayi.—Zinth. 19:21.

3, 4. Kasi kupulikira ulongozgi uheni kukakhwaska wuli Adamu na Eva ndiposo ŵana ŵawo?

³ Ulongozgi uheni ukamba ni kale kupelekeka. Satana ndiyo wakaŵa wakwamba kupeleka ulongozgi uheni ku ŵanthu. Chifukwa chakuti ngwakujiŵikamo, wakaphalira Eva kuti iyo na mfumu wake ŵaŵenge ŵakukondwa chomene usange ŵangajisankhira ŵekha ivyo ŵachitenge pa umoyo. (Gen. 3:1-6) Kweni unenesko ngwakuti maghanoghano gha Satana ghakaŵa ghakujighanaghanira yekha. Wakakhumbanga kuti Adamu na Eva, na ŵana ŵawo ŵamunthazi ŵajilambikenge kwa iyo na kusopa iyo m’malo mwa kusopa Yehova. Kweni kasi wakaŵa kuti waŵachitirapo vichi? Yehova ndiyo wakaŵapa chilichose. Wakaŵapa chikaya chiwemi chakukhalamo, mathupi ghakufikapo agho ghakatenge ghakhalenge muyirayira kweniso ndiyo wakambiska nthengwa yawo.

⁴ Chachitima ntchakuti Adamu na Eva ŵakapulikira yayi Chiuta, ndipo ŵakadumura ubwezi na iyo. Nga umo mukumanyira kale, vyakufumapo vyake vikaŵa viheni chomene. Nga umo ghakuchitira maluŵa para ghadumulikako ku khuni, iwo ŵakamba kufota pachokopachoko na kufwa. Ŵana ŵawo nawo ŵali kutorako kwananga. (Rom. 5:12) Nangauli vili nthena, ŵanthu ŵanandi ŵakukhumba yayi kujilambika kwa Chiuta. Ŵakukhumba kuti ŵachitenge ivyo iwo ŵakukhumba. (Efe. 2:1-3) Ivyo vikuchitika mu charu vikulongolerathu kuti “kulije vinjeru . . . ivyo vingimikana na Yehova.”—Zinth. 21:30.

5. Kasi Chiuta wakaŵa na chigomezgo wuli mu ŵanthu, ndipo kasi wakachita makora?

⁵ Kweni Yehova wakamanya kuti ŵanthu ŵanyake kusazgapo ŵawukirano ŵanandi ŵa mitima yiwemi ŵamupenjenge na kumuteŵetera. (Sal. 103:17, 18; 110:3) Wakukondwa chomene na ŵawukirano aŵa. Kasi namwe muli pakati pa ŵawukirano aŵa? Usange ni nthena tikukayika yayi kuti mukusangwa na “vinthu viwemi” vinandi kufuma kwa Chiuta, ivyo vikumovwirani kuti muŵe ŵakukondwa. (Ŵazgani Salimo 103:5; Zinth. 10:22) Nga umo tiwonerenge, “vinthu viwemi” ivi vikusazgapo chakurya chinandi chiwemi chauzimu, ŵabwezi ŵawemi, vilato viwemi, na wanangwa wenecho.

6. Chifukwa wuli mukwenera kukhutiska njara yinu yauzimu, ndipo Yehova wakutipa vichi kuti watovwire?

⁶ Mwakupambana na vinyama, imwe muli na njara yauzimu, ndipo ni Mlengi winu pera uyo wangamukhutiskani. (Mat. 4:4) Usange mukutegherezga kwa iyo, mukuŵa na mahara, vinjeru, ndiposo mukuŵa ŵakukondwa. Yesu wakati: “Mbakukondwa awo ŵakumanya kuti ŵali na njara yauzimu.” (Mat. 5:3) Chiuta wakukhutiska njara yinu yauzimu kwizira mu Mazgu ghake ndiposo chakurya chinandi chauzimu icho wakutipa kwizira mwa “muzga wakugomezgeka na wavinjeru.” (Mat. 24:45) Ndipo chakurya ichi ntchakupambanapambana ndipo ntchiwemi chomene.—Yes. 65:13, 14.

7. Kasi ni vyandulo wuli vinyake ivyo tikusanga para tikurya chakurya chauzimu icho Chiuta wakupeleka?

⁷ Chakurya chauzimu icho Chiuta wakupeleka chimovwiraninge kuti muŵe na vinjeru ndiposo kaghanaghaniro kawemi, ivyo vingamuvikilirani mu nthowa zinandi. (Ŵazgani Zintharika 2:10-14.) Mwachiyelezgero, vinthu ivi vikumovwirani kuti mumanye visambizgo vyautesi, nga ntchakuti kulije Mlengi. Vikumuvikilirani ku utesi wakuti munthu wakuŵa wakukondwa para wali na ndalama na vinthu vinandi. Ndipo vimovwiraninge kumanya na kukana makhumbiro ghaheni kweniso nkharo zakupweteka. Ntheura lutilirani kupenja vinjeru vya Chiuta na kaghanaghaniro kawemi, na kuviwona kuti ni vyakuzirwa. Para muchitenge nthena, mujiwonerenge mwekha kuti Yehova wakumutemwani ndipo wakumukhumbirani viwemi.—Sal. 34:8; Yes. 48:17, 18.

8. Chifukwa wuli tikwenera kusendelera kwa Chiuta sono, ndipo tisangenge chandulo wuli munthazi?

 ⁸ Sonosono apa chigaŵa chilichose cha charu cha Satana chiparanyikenge, ndipo Yehova pera ndiyo wazamuŵa muvikiliri withu. Nadi, nyengo yifikenge apo tizamugomezga iyo pera kuti watipe chakurya icho tiryenge zuŵa lililose. (Hab. 3:2, 12-19) Enya, sono ndiyo nyengo yakuti tisendelere kwa Adada ŵithu ŵakuchanya na kukhozga ubwezi withu na iwo. (2 Pet. 2:9) Para tichitenge nthena, nanga tingakumana na masuzgo wuli, tijipulikenge nga umo wakajipulikira wamasalimo Davide, uyo wakalemba kuti: “Nkhuŵika Yehova pamaso pane nyengo zose. Pakuti wali ku woko lane lamalyero, nisunkhunyikenge chara.”—Sal. 16:8.

9. (a) Kuyana na Yohane 6:44, kasi Yehova wakuchita vichi? (b) Kasi chapadera ntchivichi para mwakumana na Ŵakaboni ŵanyinu?

⁹ Yehova wakuguza ŵanthu ŵamitima yiwemi kuti ŵaŵe mu mbumba yake yauzimu, kuti ŵamusopenge mwaunenesko. (Ŵazgani Yohane 6:44.) Para mwakumana kakwamba na munthu uyo wakumanya yayi unenesko, kasi mukumanyapo vichi vya munthu uyu? Padera pa kumanya zina lake na umo wakuwonekera, mukwenera kuti mukumanyapo vichoko chomene. Kweni ndimo vikuŵira yayi para mwakumana na munthu uyo wakumanya Yehova na kumutemwa. Nanga munthu uyo wangaŵa kuti wafuma ku charu chinyake, wakulira kunyake, ndipo ngwa mtundu panji fuko linyake, kweni mukuŵa kuti mukumanya vinandi vya iyo ndipo nayo wakumanya vinandi vya imwe.

10, 11. Kasi ŵanthu ŵa Yehova ŵali na chinthu wuli chakuyana, ndipo ŵakusanga chandulo wuli na chinthu ichi?

¹⁰ Mwachiyelezgero, mose mukupulikana luŵiro “kayowoyero,” ako ‘nkhayowoyero katuŵa’ ka unenesko. (Zef. 3:9) Ntheura mose mukumanya ivyo munyinu wakugomezga vyakukhwaskana na Chiuta, mikhaliro, ndiposo chilindizga cha munthazi. Apa tazunurapo vichoko waka. Kweniso ivi ndivyo ni vinthu vyakuzirwa chomene kumanya vyakukhwaskana na munthu, ndipo vikovwira kuti mugomezganenge. Kweniso vikovwira kuti musange ŵabwezi ŵawemi awo muŵenge nawo paubwezi muyirayira.

¹¹ Tikutalulira yayi para tingayowoya kuti muli  na ŵabwezi ŵawemi chomene, ndipo ŵali pa charu chose chapasi chifukwa chakuti ndimwe musopi wa Yehova. Kuti waka ŵanandi mundakumane nawo. Padera pa ŵanthu ŵa Yehova palije uyo wali na chawanangwa ichi.

12. Kasi ni vilato wuli viwemi vyauzimu ivyo mungajiŵikira?

¹² Ŵazgani Mupharazgi 11:9–12:1. Kasi muli na chilato chimoza panji vinandi ivyo mukukhumba kufiska? Panji mukukhumba kuŵazga Baibolo zuŵa lililose. Panji mukukhumba kuti musazgireko luso lwinu lwakuyowoya panji kusambizga. Mulimose umo vingaŵira, kasi mukujipulika wuli para mukuwona kuti mukusintha panji ŵanyinu ŵakumulumbani pa ivyo mukuchita? Tikukayika yayi kuti mukwenera kuti mukuwona kuti mukufiska vilato vinu ndipo mukukondwa. Ndipo nadi mukwenera kukondwa chomene chifukwa mukudangizga khumbo la Chiuta m’malo mwa linu, ndipo mukulongora kuti mukuyezga Yesu.—Sal. 40:8; Zinth. 27:11.

13. Chifukwa wuli kuteŵetera Chiuta nkhuwemi kuluska kuŵika mtima pa vilato vya mu charu ichi?

¹³ Para mukuŵika mtima pa vilato vyauzimu, mukuchita mulimo uwo ngwakukhorweska nadi chifukwa ngwawaka yayi. Mpositole Paulosi wakalemba kuti: “Muŵe ŵakukhora, ŵambura kusunkhunyika, nyengo zose muŵe na vyakuchita vinandi mu mulimo wa Fumu, pakumanya kuti mulimo winu uwo mukuchita mwa Fumu ngwawaka yayi.” (1 Kor. 15:58) Kweni para munthu wakuŵika mtima pa vilato vya mu charu ichi, nga nkhuŵa na ndalama zinandi panji kuŵa wakumanyikwa, wakuŵa wakukondwa zanadi yayi. Nanga ni para vinthu vingaŵa nga vikumuyendera makora, kweni vyose vikuŵa vyawaka. (Luka 9:25) Tikusambira fundo iyi pa ivyo vikachitikira Themba Solomoni.—Rom. 15:4.

14. Kasi mungasambirako vichi ku ivyo Solomoni wakachita?

¹⁴ Pakuti Solomoni wakaŵa musambazi chomene kweniso wamazaza, ‘wakayezga kusangwa, kuti wawone uwemi uwo uŵengepo.’ (Muph. 2:1-10) Wakazenga zinyumba, wakaŵa na minda na mapaki, ndipo wakachita chilichose icho mtima wake ukakhumbanga. Kasi wakajipulika wuli pamanyuma? Wakakondwa? Wakakhorwa? Tingachita kughanaghanira waka yayi. Solomoni iyomwene wakutiphalira. Wakalemba kuti: “Nkhati nalaŵiska pa milimo yose iyo mawoko ghane ghakachita . . . , nkhasanga kuti vyose vikaŵa vyawaka . . . Pakaŵavya chachandulo cheneko.” (Muph. 2:11) Ili ni sambiro lankhongono chomene. Kasi nyengo zose mukumbukirenge sambiro ili?

15. Chifukwa wuli chipulikano ntchakuzirwa, ndipo tikusanga vyandulo wuli nga umo pakuyowoyera pa Salimo 32:8?

¹⁵ Yehova wakukhumba kuti muvimyanthe dankha yayi kuti ndipo musambirengepo kanthu. Unenesko ngwakuti mukwenera kuŵa na chipulikano kuti mupulikire Chiuta na kuŵika khumbo lake pakwamba mu umoyo winu. Chipulikano ntchakuzirwa chomene, ndipo muzamukhuŵarapo yayi. Nadi, Yehova waluwenge yayi “chitemwa icho mukalongora ku zina lake.” (Heb. 6:10) Ntheura limbikirani kuti muŵe na chipulikano chakukhora, ndipo mujiwonerenge mwekha kuti Adada ŵinu ŵakuchanya ŵakumukhumbirani viwemi.—Ŵazgani Salimo 32:8.

16. Chifukwa wuli tikwenera kuzirwiska wanangwa na kuwugwiliskira ntchito mwamahara?

¹⁶ Paulosi wakalemba kuti: “Apo pali mzimu wa Yehova, pali wanangwa.” (2 Kor. 3:17) Nadi Yehova wakutemwa wanangwa, ndipo wakamulengani kuti namwe mutemwenge wanangwa. Kweni wakukhumba kuti muwugwiliskirenge makora ntchito wanangwa winu, ndipo umuvikiliraninge. Panji mukumanyapo ŵawukirano ŵanyake awo ŵakuwonelera vithuzi vyamuziro panji awo ŵakuchita uzaghali, maseŵero ghakuŵika umoyo pangozi, panji awo kugwiliskira ntchito munkhwala wakuzweteska  wongo ndiposo kumwa chomene phere. Ŵangasangwapo kanyengo kachoko waka, kweni ŵakujipweteka. Nyengo zinyake ŵakutora matenda, ŵakuŵa na chikhumbokhumbo, nanga nkhufwa. (Gal. 6:7, 8) Ŵawukirano awo ŵakuchita vinthu ivi ŵangawona nga ŵali na “wanangwa” wenecho, kweni ŵakujipusika.—Tito 3:3.

17, 18. (a) Kasi kupulikira Chiuta kukutovwira wuli kuti tiŵe na wanangwa wenecho? (b) Kasi wanangwa uwo Adamu na Eva ŵakaŵa nawo pakwamba ukupambana wuli na wanangwa uwo ŵanthu ŵali nawo mazuŵa ghano?

¹⁷ Kweni, kasi mbanthu ŵalinga awo mukumanya kuti ŵakalwara chifukwa chakuti ŵakapulikira fundo za mu Baibolo? Ntchakuwonekerathu kuti para tikupulikira Yehova tikuŵa na umoyo uwemi na wanangwa wenecho. (Sal. 19:7-11) Kweniso para mukugwiliskira ntchito mwamahara wanangwa winu, pakulondezga malango na fundo za Chiuta, mukulongora Chiuta na ŵapapi ŵinu kuti para mungapika wanangwa ukuru mbwe muwugwiliskirenge ntchito makora. Nakuti khumbo la Chiuta ndakuti ŵateŵeti ŵake ŵakugomezgeka waŵape wanangwa wakufikapo uwo ukuyowoyeka mu Baibolo kuti ni “wanangwa wauchindami wa ŵana ŵa Chiuta.”—Rom. 8:21.

¹⁸ Adamu na Eva ŵakaŵapo na wanangwa uwu. Mu munda wa Edeni, kasi ni malango ghalinga agho Chiuta wakapeleka kwa Adamu na Eva? Limoza pera. Ŵakeneranga yayi kurya chipambi cha khuni limoza. (Gen. 2:9, 17) Kasi mukughanaghana kuti dango limoza ili likaŵa lakufyenya kweniso lakusuzga? Yayi. Ghanaghanirani waka unandi wa malango agho ŵanthu ŵali kupanga ndipo ŵakuchichizga ŵanthu kuti ŵaghalondezgenge.

19. Kasi tikusambizgika wuli kuti tizakaŵe na wanangwa wenecho?

¹⁹ Para Yehova wakuchita vinthu na ŵateŵeti ŵake, wakuchita nawo mwavinjeru. M’malo mwa kutipa malango ghanandinandi, wakutisambizga mwakuzikira kuti tipulikirenge dango la chitemwa. Wakukhumba kuti nyengo zose tilondezgenge fundo zake na kunyanyara icho ntchiheni. (Rom. 12:9) Upharazgi wa Yesu wa pa Phiri ntchiyelezgero chiwemi cha umo wakutisambizgira, chifukwa ukulongosora ivyo vikupangiska kuti munthu wanange. (Mat. 5:27, 28) Khristu pakuŵa Themba la Ufumu wa Chiuta, wazamulutilira kutisambizga mu charu chiphya kuti titemwenge urunji na kutinkha uheni nga umo iyo wakuchitira. (Heb. 1:9) Kweniso wazamutovwira kuti mathupi ghithu na maghanoghano ghithu ghaŵe ghakufikapo. Ghanaghanirani waka kuti tizamuŵaso na khumbo la kuchita kwananga yayi panji kusuzgika chifukwa cha kuchita kwananga. Paumaliro, tizamusangwa na “wanangwa wauchindami” uwo Yehova watilayizga.

20. (a) Kasi Yehova wakuchita wuli na wanangwa wake? (b) Kasi tingamuyezga wuli?

²⁰ Nanga muŵe mu charu chiphya, wanangwa withu uzamuŵa na mphaka. Uzamulongozgeka na kutemwa Chiuta ndiposo ŵanthu ŵanyithu. Nakuti Yehova wakutipempha kuti timuyezge. Nangauli wali na wanangwa wambura mphaka, kweni para wakuchita vinthu na vilengiwa vyamahara wakulongozgeka na chitemwa. (1 Yoh. 4:7,8) Ntheura ntchakupulikikwa kuyowoya kuti tingaŵa na wanangwa wenecho pekha para tingamuyezga Chiuta pa nkhani ya chitemwa.

21. (a) Kasi Davide wakajipulika wuli pakuyowoya za Yehova? (b) Kasi tizamusambira vichi mu nkhani yakulondezgapo?

²¹ Kasi mukuwonga “vinthu viwemi” vinandi ivyo Yehova wamupani, nga ni chakurya chinandi chauzimu, ŵabwezi ŵawemi, vilato viwemi, ndiposo wanangwa wenecho uwo mukulindilira kunthazi? (Sal. 103:5) Para ni nthena, mphanyi mwajipulika nga ni Davide uyo wakalomba kuti: “Mukunimanyiska nthowa ya umoyo. Nkhuŵa na chimwemwe chikuru pamaso pinu. Mu woko linu lamalyero muli kukondwa muyirayira.” (Sal. 16:11) Mu nkhani yakulondezgapo tizamusambira fundo zinyake za mu Salimo 16. Fundo izi zizamumovwirani umo mungaŵira na umoyo wakukhorweska.