DIANA wali na vyaka vyakujumpha 80. Mfumu wake wakalwaranga nthenda ya ku wongo ndipo wakalwaliranga ku chipatala kwa vyaka m’paka apo wakafwira. Kweniso wakeneranga kuzizipizga nyifwa ya ŵana ŵake ŵaŵiri, na nthenda ya kansa iyo yikamukora ku bele. Kweni para wali ku Nyumba ya Ufumu panji mu uteŵeti, ŵabali na ŵadumbu ŵakuwona kuti nyengo zose wakuŵa wakukondwa.

John wakaŵa mulaŵiliri wakwendakwenda vyaka vyakujumpha 43. Wakawutemwanga chomene uteŵeti uwu, ndipo ukaŵa nga mbumoyo wake. Kweni wakaleka uteŵeti uwu kuti wakapwelelere mubali wake uyo wakalwaranga, ndipo sono John wakuteŵetera ku mpingo. Para wali pa ungano wadera panji wa chigaŵa ndipo wakumana na ŵabali na ŵadumbu awo wakumanyana nawo, ŵabali aŵa ŵakuwona kuti John wandasinthe. Wachali wachimwemwe chomene.

Chifukwa wuli Diana na John mbachimwemwe? Kasi vingachitika wuli kuti uyo wakusuzgika maghanoghano kweniso ni mulwari waŵe wakukondwa? Ndipo kasi vingachitika wuli kuti munthu uyo walijeso mauteŵeti walutilire kuŵa wakukondwa? Baibolo likuzgora mafumbo agha. Likuti: “Murunji wasekelerenge mwa Yehova.” (Sal. 64:10) Tingapulikiska makora fundo iyi usange tingamanya icho chikupangiska munthu kuti waŵe na chimwemwe chanadi panji waŵavye.

Mukwenera kuti mukumanya vinthu vinyake ivyo vikupangiska munthu kuŵa wachimwemwe. Ghanaghanirani za ŵanthu awo ŵanguŵa pa chibwezi ndipo ŵakutorana. Panji awo ŵaŵa waka na bonda panji ŵapika uteŵeti unyake mu gulu la Chiuta. Vinthu ivi vikupangiska munthu kuŵa wachimwemwe chifukwa vyose ivi ni vyawanangwa vyakufuma kwa Yehova. Ndiyo wakambiska nthengwa, kuti tibabanenge, ndiposo kupeleka milimo yinyake kwizira mu mpingo waunenesko.—Gen. 2:18, 22; Sal. 127:3; 1 Tim. 3:1.

Kweni vinthu vinyake ivyo vikupeleka chimwemwe vingaŵa vyakanyengo. Chachitima ntchakuti munyake mu nthengwa wangaleka kugomezgeka panji wangafwa. (Ezek. 24:18; Hos. 3:1) Ŵana ŵanyake ŵakugalukira ŵapapi ŵawo na Chiuta, ndipo nyengo zinyake ŵakusezgeka. Ŵana ŵa Samuyeli ŵakateŵeteranga Yehova munthowa yakwenelera yayi, ndipo ivyo Davide wakachita  vikapangiska masuzgo mu nyumba yake. (1 Sam. 8:1-3; 2 Sam. 12:11) Vinthu vyanthena ivi vikupangiska munthu kuŵa wachitima ndiposo kusuzgika maghanoghano. Vikupangiska munthu kuŵa wachimwemwe yayi.

Mwakuyana waka, mauteŵeti agho tingaŵa nagho pakati pa ŵanthu ŵa Chiuta ghangamara, panji chifukwa cha ulwari, maudindo gha mbumba, panji kusintha kwa vinthu mu gulu la Chiuta. Ŵanandi awo ivi vili kuŵachitikirapo ŵakuzomerezga kuti ŵakuyikumbuka milimo iyo ŵakachitanga iyo yikaŵapanga chimwemwe.

Tingawona kuti vinthu ivi vikupeleka chimwemwe icho ntchakanyengo. Ntheura kasi chilipo chimwemwe chinyake icho chikukhalilira nanga vinthu vingasintha? Enya chilipo chifukwa Samuyeli, Davide na ŵanji ŵakalutilira kuŵa na chimwemwe nangauli ŵakakumananga na viyezgo.

Yesu wakamanya icho ntchimwemwe chanadi. Apo wakaŵa kuti wandize pa charu chapasi, ndipo vinthu vikaŵa kuti vili makora chomene kwa iyo, ‘wakakondwanga pamaso pa Yehova nyengo zose.’ (Zinth. 8:30) Kweni apo wakaŵa pa charu chapasi nyengo zinyake wakakumananga na masuzgo ghakuru. Ndipouli, Yesu wakakondwa kuchita khumbo la Awiske. (Yoh. 4:34) Wuli pakuyowoya za vyakuŵinya ivyo wakapulika mu maora ghaumaliro gha umoyo wake? Tikuŵazga kuti: “Chifukwa cha chimwemwe icho chikaŵikika panthazi pake, wakazizipizga khuni lakusuzgikirapo.” (Heb. 12:2) Ntheura tingasambirako vinandi ku vinthu viŵiri ivyo Yesu wakayowoya vyakukhwaskana na chimwemwe chanadi.

Nyengo yinyake ŵasambiri 70 ŵakati ŵamalizga kupharazga ŵakawelera kwa Yesu. Ŵakaŵa ŵakukondwa chifukwa ŵakachita milimo yankhongono, nanga nkhufumiska viŵanda. Pamanyuma Yesu wakaŵaphalira kuti: “Lekani kusekelera chifukwa chakuti mizimu yikumupulikirani, kweni sekelerani chifukwa chakuti mazina ghinu ghalembeka kuchanya.” (Luka 10:1-9, 17, 20) Nadi, chakuzirwa chomene chikaŵa kuŵa paubwezi na Yehova kuluska kuŵa waka na mauteŵeti ghapadera. Yehova waŵakumbukenge ŵasambiri ŵakugomezgeka ndipo ŵaŵenge na chimwemwe chikuru chomene.

Panyengo yinyake, Yesu wakayowoyanga ku mzinda. Mwanakazi munyake Muyuda wakayowoya kuti mama wa msambizgi wakuzizwiska, Yesu,  wakwenera kuti ngwakukondwa chomene. Kweni Yesu wakamususka, wakati: “Chara, kweni ŵakukondwa ni awo ŵakupulika mazgu gha Chiuta na kughasungilira!” (Luka 11:27, 28) Ntchiwemi waka kunotha pakuŵa mupapi muwemi; kweni munthu wakuŵa wachimwemwe nadi para wali paubwezi na Yehova ndipo wakumupulikira.

Nadi, tiŵenge na chimwemwe chanadi para tamanya kuti Yehova wakukondwa nase. Nangauli chikuŵa chakukondweska yayi kukumana na viyezgo, kweni vingatipoka yayi chimwemwe ichi. Para tikulutilira kuŵa ŵakugomezgeka panyengo ya viyezgo, chimwemwe chithu chikukura. (Rom. 5:3-5) Kweniso Yehova wakupeleka mzimu wake kwa awo ŵakumugomezga, ndipo chimwemwe ntchimoza cha vipambi vya mzimu. (Gal. 5:22) Fundo iyi yikutovwira kupulikiska chifukwa icho lemba la Salimo 64:10 likuyowoyera kuti: “Murunji wasekelerenge mwa Yehova.”

Vesi ili likulongosoraso chifukwa icho Diana na John, awo taŵazunura pakwambilira, ŵakulutilira kuŵa na chimwemwe nangauli ŵakukumana na masuzgo ghakuru. Diana wakuti: “Natora Yehova kuŵa chakubisamamo chane, nga umo mwana wakubisamira kwa mupapi wake.” Kasi wakumanya wuli kuti Chiuta wakukondwa nayo? Iyo wakuti: “Nkhuwona kuti wanitumbika pakunovwira kulutilira kupharazga mwachimwemwe nyengo zose.” John, uyo wakalutilira kupharazga mwamwamphu wakati waleka mulimo wakwendakwenda, wakalongosora icho chikamovwira, wakati: “Kwamba mu 1998 apo nkhapika mulimo wakusambizga Sukulu Yakusambizga Uteŵeti, nasambira chomene panekha kuluska kumanyuma kose.” Wakalongosora kuti iyo na muwoli wake vikaŵasuzga yayi kusintha chifukwa chakuti nyengo zose ŵakaŵa ŵakunozgeka kuchita chilichose icho Yehova waŵatuma. Wakatiso: “Tikudandawurapo yayi.”

Paliso ŵabali ŵanyake ŵanandi awo nawo ŵawona kuti fundo ya pa Salimo 64:10 njaunenesko. Mwachiyelezgero, wonani ivyo vikachitikira mbumba iyo yikateŵetera pa Beteli ku United States vyaka vyakujumpha 30. Ŵakaphalirika kuti ŵamuchita upayiniya wapadera. Ŵakazomerezga kuti: “Wamunthu chitima chikukukora para ukuleka chinthu icho watemwanga,” kweni ŵakatiso: “Ungaŵa na chitima kwamuyirayira yayi.” Mwaluŵiro ŵakamba kupharazga na mpingo. Mbumba iyi yikatiso: “Tikalombanga vinthu vinyake kwa Chiuta mwakudunjika. Apo tikawonanga kuti malurombo ghithu ghakuzgoreka tikakhozgekanga chomene kweniso tikaŵanga ŵachimwemwe. Tikati tafika waka, ŵanyake mu mpingo ŵakamba upayiniya, ndipo tikatumbikika chomene, tikaŵa na masambiro ghaŵiri gha Baibolo, agho ghakakuranga mwauzimu.”

Mbunenesko kuti ntchipusu yayi kuŵa wakukondwa nyengo zose, ndipo yiŵengepo nyengo iyo tiŵenge ŵakukondwa panji ŵachitima. Kweni Yehova wakutisimizgikira na mazgu agho ghali pa Salimo 64:10. Nanga ni apo nkhongono zingatimalira, tikugomezga kuti awo ŵakulutilira kuŵa ‘ŵarunji’ nanga vinthu vingasintha ‘ŵasekelerenge mwa Yehova.’ Kweniso, tikulindilira kufiskika kwa layizgo la Yehova lakuti kwizenge “machanya ghaphya na charu chapasi chiphya.” Panyengo iyo, waliyose wazamuŵa wakufikapo. Ŵanthu wose ŵa Chiuta ‘ŵazamukondwa na kusekelera muyirayira’ na ivyo Chiuta waŵachitira.—Yes. 65:17, 18.

Ghanaghanirani waka umo umoyo uzamuŵira: tizamulwarangaso yayi ndipo zuŵa lililose tizamuwukanga ŵankhongono. Kwali tikakumana na masuzgo ghakuru wuli, tizamuŵaso ŵachitima yayi chifukwa cha masuzgo agha. Yehova wakutisimikizgira kuti “vinthu vyakale vikumbukikengeso chara, ndipo vinjirengeso yayi mu mtima.” Chiwuka chizamovwira kuti tiŵe pamoza na ŵabwezi ŵithu. Ŵanthu ŵanandi ŵazamujipulika nga mbapapi ŵa msungwana wa vyaka 12 uyo Yesu wakamuwuska: “Ŵakakondwa chomene.” (Mrk. 5:42) Nakuti munthu waliyose pa charu chapasi wazamuŵa “murunji” nadi ndipo ‘wazamusekelera mwa Yehova’ kwamuyirayira.