1-2. Kasi tisambirenge vichi mu nkhani iyi?

NYENGO zinyake nase maghanoghano ghakuti umoyo ngufupi kweniso mazuŵa ghithu “ngakuzura na masuzgo” ghangatizira. (Yobu 14:1) Lekani ntchakupulikikwa kuti nase nyengo zinyake tingagongowa. Ŵateŵeti ŵanandi ŵa Yehova nawo mu nyengo yakale, ŵakagongowapo. Ndipo ŵanyake ŵakakhumbanga kuti ŵafwe waka. (1 Mathe. 19:2-4; Yobu 3:1-3, 11; 7:15, 16) Kweni nyengo zose Yehova wakaŵapembuzganga na kuŵakhozga. Ivyo vikaŵachitikira vikalembekera ise kuti vitipembuzge na kutisambizga.—Rom. 15:4.

² Mu nkhani iyi, tisambirenge za ŵateŵeti ŵanyake ŵa Yehova awo ŵakasangana na vinthu vyakugongoweska kweni ŵakazizipizga. Ŵateŵeti aŵa ni Yosefe mwana wa Yakhobe, Naomi uyo wakaŵa chokoro na mkamwana wake Rute, Mulevi uyo wakalemba Salimo 73, na mpositole Petrosi. Kasi Yehova ŵakaŵakhozga wuli? Ndipo kasi tingasambirako vichi kwa iwo? Mazgoro gha mafumbo agha, ghakutisimikizgira kuti “Yehova wali pafupi na ŵakusweka mu mtima,” ndipo “wakuponoska awo ŵagongoweskeka.”—Sal. 34:18, mazgu ghamusi.

3-4. Kasi ntchivichi chikachitikira Yosefe apo wakaŵa muchoko?

³ Yosefe wakaŵa na vyaka pafupifupi 17 apo wakalota maloto ghaŵiri. Maloto agha ghakafuma kwa Chiuta. Ndipo ghakalongoranga kuti zuŵa linyake, Yosefe wazamuŵa munthu wakuzirwa chomene uyo mbumba yakwawo yose yizamumuchindikanga. (Gen. 37:5-10) Kweni nyengo yichoko waka yati yajumphapo kufuma apo Yosefe wakalotera maloto agha, vinthu viheni vikamuchitikira. M’malo mwa kumuchindika, ŵabali ŵake ŵakamuguliska, ndipo pamanyuma wakaŵa muzga wa Potifara ku Eguputo. (Gen. 37:21-28) Mu kanyengo kachoko waka, umoyo wa Yosefe ukasintha chomene,  kufuma pakuŵa mwana wakutemweka chomene na adada ŵake, kufika pakuŵa muzga wa munthu uyo wakamumanyanga yayi Yehova ku Eguputo.—Gen. 39:1.

⁴ Kweni masuzgo gha Yosefe ghakafikaso paheni chomene. Muwoli wa Potifara wakamupusikizgira kuti wakakhumbanga kumukolelera. Ndipo kwambura kufufuza kuti wamanye usange uwu ukaŵa unenesko, Potifara wakajalira Yosefe mu jele ndipo ŵakamukakilira na maunyoro. (Gen. 39:14-20; Sal. 105:17, 18) Panyengo iyi Yosefe wakaŵa muchoko. Ntheura ghanaghanirani umo wakajipulikira ŵati ŵamupusikizgira kuti wakakhumbanga kukolelera muwoli wamwene. Kweniso ghanaghanirani umo ivi vikatenge vitukiskirenge zina la Yehova. Ichi chikaŵa chifukwa chakupulikikwa kuti Yosefe wagongowe.

5. Kasi Yosefe wakachita wuli kuti waleke kugongowa chomene?

⁵ Apo Yosefe wakaŵa muzga kweniso mukayidi, pakaŵavya chakuti wangachitapo kuti wasinthe umo vinthu vikaŵira. Kasi ntchivichi chikamovwira kuti walutilire kuwona vinthu mwakwenelera? M’malo mwakukhalira waka kughanaghanira vinthu ivyo wangafiska yayi kuchita, iyo wakaŵikapo mtima kuchita milimo iyo wakapika. Kweni chakuzirwa chomene ntchakuti Yosefe wakaŵika mtima wake wose pakukondweska Yehova. Lekani Yehova wakatumbikanga chilichose icho Yosefe wakachitanga.—Gen. 39:21-23.

6. Kasi Yosefe wakwenera kuti wakakhozgeka wuli na maloto ghake?

⁶ Yosefe wakwenera kuti wakakhozgekangaso chomene para waghanaghanira za maloto agho wakalotapo kumanyuma. Chifukwa ghakalongoranga kuti wazamuwonanaso na mbumba yakwawo kweniso umoyo wake uzamusintha. Ndipo ivi ndivyo pamanyuma vikachitika nadi. Apo Yosefe wakaŵa na vyaka pafupifupi 37, maloto ghake ghakamba kufiskika munthowa yakuzizwiska chomene.—Gen. 37:7, 9, 10; 42:6, 9.

7. Kuyana na 1 Petrosi 5:10, kasi ntchivichi chingatovwira kuzizipizga viyezgo?

⁷ Ivyo tikusambirapo. Nkhani ya Yosefe yikutikumbuska kuti mu charu ichi ŵanthu mbankhaza  ndipo ŵangatichitira vinthu mwambura urunji. Nanga ŵangaŵa Ŵakhristu ŵanyithu nawo ŵangatikhuŵazga. Kweni para tiwonenge kuti Yehova ni Jalawe lithu, panji Chiphokwero chithu, tigongowenge yayi na kuleka kumuteŵetera. (Sal. 62:6, 7; ŵazgani 1 Petrosi 5:10.) Kweniso kumbukani kuti Yosefe wakwenera kuti wakaŵa na vyaka 17 apo wakalota maloto ghakufuma kwa Yehova. Ichi chikulongora kuti Yehova wakuŵagomezga ŵateŵeti ŵake ŵachinyamata. Mazuŵa ghano ŵachinyamata ŵanandi ŵali nga ni Yosefe. Nawo ŵali na chipulikano chakukhora mwa Yehova. Ndipo ŵanyake ŵakakikapo chifukwa chakuti ŵakukhumba yayi kuleka kupulikira Chiuta.—Sal. 110:3.

8. Kasi ntchivichi chikachitikira Naomi na Rute?

⁸ Chifukwa cha njara yikuru, Naomi na mbumba yake ŵakasama mu charu chawo cha Yuda na kukakhala mu charu chachilendo cha Mowabu. Apo ŵakaŵa ku charu ichi, Elimeleki mfumu wa Naomi wakafwa, ndipo wakaleka ŵana ŵanalume ŵaŵiri. Pamanyuma ŵana wose ŵaŵiri aŵa ŵakatora ŵanakazi Ŵamowabu, Rute na Oripa. Pati pajumpha vyaka 10, ŵana wose ŵaŵiri ŵa Naomi ŵakafwa ndipo ŵakalekapo ŵana yayi. (Rute 1:1-5) Ntheura ghanaghanirani waka chitima icho ŵanakazi ŵatatu aŵa ŵakaŵa nacho. Mbunenesko kuti Rute na Oripa ŵakaŵa kuti ŵangatengwaso, kweni kasi ninjani wakatenge wapwelelerenge Naomi uyo panyengo iyi wakaŵa muchekuru? Naomi wakasuzgika chomene maghanoghano mwakuti panyengo yinyake wakayowoya kuti: “Munganichemanga Naomi chara. Munichemenge Mara, pakuti Wankhongonozose waŵinyiska umoyo wane.” Wati wakumana na masuzgo ghose agha, Naomi wakaghanaghana kuti wawelere ku Betelehemu, ndipo Rute wakalutira nayo lumoza.—Rute 1:7, 18-20.

9. Kuyana na Rute 1:16, 17, 22, kasi Rute wakamukhozga wuli Naomi?

⁹ Kasi ntchivichi chikawovwira Naomi kuzizipizga? Chitemwa chakugomezgeka. Mwachiyelezgero, Rute wakalongora chitemwa chakugomezgeka kwa Naomi pakulutilira kukhala nayo. (Ŵazgani Rute 1:16, 17, 22.) Ku Betelehemu, Rute wakalimbikiranga kuvulura balere wa iyo na Naomi. Ntheura waliyose wakawonanga kuti Rute wakaŵa mwanakazi muwemi kweniso wakulimbikira.—Rute 3:11; 4:15.

10. Kasi Yehova wakalongoranga wuli lusungu ku ŵanthu ŵakavu nga ni Naomi na Rute?

¹⁰ Yehova wakapeleka dango ku Ŵaisrayeli ilo likalongoranga kuti ngwalusungu ku ŵanthu ŵakavu nga ni Naomi na Rute. Wakaphalira ŵanthu ŵake kuti para ŵakuvuna vyakurya, ŵalekengemo vinyake mumphepete mwa minda yawo mwakuti ŵakavu ŵazakavulurengemo. (Lev. 19:9, 10) Ntheura Naomi na Rute ŵakeneranga kupempheska chakurya yayi. Ŵakachisanganga mu minda.

11-12. Kasi Bowazi wakawovwira wuli kuti Naomi na Rute ŵaŵe ŵakukondwa?

¹¹ Munda uwo Rute wakavulurangamo balere ukaŵa wa munthu munyake musambazi zina lake Bowazi. Bowazi wakakondweskeka chomene wati wawona umo Rute wakaŵira wakugomezgeka kwa Naomi kweniso umo wakamutemweranga. Ntheura pamanyuma Bowazi wakatora Rute na kuguraso malo agho pakwamba ghakaŵa gha mbumba ya Naomi kuti ŵana ŵa Rute ŵaŵe na chiharo. (Rute 4:9-13) Ŵakababa mwana zina lake Obedi uyo pamanyuma wakazakaŵa sekuru wa Themba Davide.—Rute 4:17.

¹² Ghanaghanirani waka umo Naomi wakakondweranga para wakolera Obedi apo wakaŵa muchoko na kuwonga Yehova mu lurombo lwakufumira pasi pamtima. Kweni Naomi na Rute ŵazamukondwa chomene para ŵazakawuskika na kuzakapulika kuti Obedi wakaŵa sekuru wa Mesiya uyo wakalayizgika, Yesu Khristu.

13. Kasi tingasambirapo vichi pa nkhani ya Naomi na Rute?

 ¹³ Ivyo tikusambirapo. Para tasangana na masuzgo, tingagongowa na kukhuŵara. Ndipo panji tingamba kughanaghana kuti masuzgo ghithu ghangamara yayi. Kweni panyengo zanthena izi, tikwenera kugomezga chomene Adada ŵithu ŵakuchanya na kutemwana chomene na ŵabali na ŵadumbu ŵithu mu mpingo. Mbunenesko kuti ni nyengo zose yayi apo Yehova wangawuskapo suzgo lithu. Mwachiyelezgero, wakamuwuskira yayi Naomi mfumu wake na ŵana ŵake kuŵaso ŵamoyo. Ntheura nase watovwirenge kuzizipizga, nyengo zinyake kwizira mu ivyo ŵabali na ŵadumbu ŵithu ŵangatichitira.—Zinth. 17:17.

14. Chifukwa wuli Mulevi wakagongowa chomene?

¹⁴ Uyo wakalemba Salimo 73 wakaŵa Mulevi. Ntheura wakaŵa na mwaŵi wakuteŵetera pa malo yakusoperapo Yehova. Kweni nyengo yinyake wakagongowa chomene. Chifukwa wuli? Chifukwa chakuti wakamba kuchitira sanji ŵanthu ŵaheni na ŵakujikuzga awo ŵakawonekanga kuti ŵakukhala umoyo uwemi kuluska iyo. (Sal. 73:2-9, 11-14) Iwo ŵakawonekanga kuti ŵali na chilichose. Ŵakaŵa ŵasambazi, ŵakhalanga umoyo uwemi kweniso ŵakenjerwanga yayi. Mulevi uyu wakagongowa chomene wati wawona ivi, ndipo wakati: “Nadi natozga mtima wane pawaka na kugeza mawoko ghane kuti nilije mulandu.” Kuyowoya unenesko ivi vikatenge vimupangiskenge kuleka kusopa Yehova.

15. Kuyana na Salimo 73:16-19, 22-25, kasi Mulevi uyo wakalemba salimo ili wakachita wuli kuti waleke kugongowa?

¹⁵ Ŵazgani Salimo 73:16-19, 22-25. Mulevi “wakanjira mu malo ghakupatulika gha Chiuta.” Mu nyumba ya Chiuta iyi, umo wakaŵa na ŵanyake awo ŵakasopanga Yehova, wakaghanaghanirapo makora umo vinthu vikaŵira kwa iyo ndipo wakalomba pa suzgo ilo wakaŵa nalo. Ntheura pamanyuma wakamba kumanya kuti kaghanaghaniro kake kakaŵa kawemi yayi, ndipo kakatenge katimbanizgenge ubwezi wake na Yehova. Kweniso wakamanya kuti ŵanthu ŵaheni ŵali pa “malo ghakutelemuka” ndipo “umaliro wawo” uzamuŵa uheni chomene. Kuti waleke sanji kweniso kugongowa, Mulevi uyu wakeneranga kuwona vinthu nga umo Yehova wakuviwonera. Wati wachita ivi, wakaŵaso na mtende ndipo wakaŵa wakukondwa.  Paumaliro wakati: “Padera pa [Yehova], palije icho nkhudokera pa charu chapasi.”

16. Kasi tingasambirako vichi kwa Mulevi munyake?

¹⁶ Ivyo tikusambirapo. Tingachitiranga sanji ŵanthu ŵaheni yayi awo ŵakuwoneka kuti vinthu vikuŵayendera makora. Kukondwa kwawo nkhwakanyengo ndipo ŵazamukhala kwamuyirayira yayi. (Muph. 8:12, 13) Para tiŵachitirenge sanji, tigongowenge ndipo tingataya ubwezi withu na Yehova. Ntheura usange namwe mwamba kuchitira sanji ŵanthu ŵaheni awo ŵakuwoneka nga vinthu vikuŵayendera makora, chitani nga umo Mulevi wakachitira. Pulikirani ulongozgi wachitemwa wa Chiuta ndipo muchezgenge na ŵanthu awo ŵakuchita khumbo la Yehova. Para mukutemwa Yehova kuluska chilichose, muŵenge ŵakukondwa zanadi. Ndipo mukhalilirenge pa nthowa yakuya ku “umoyo wanadi.”—1 Tim. 6:19.

17. Chifukwa wuli Petrosi wakagongowa?

¹⁷ Petrosi wakaŵa wamwamphu pakuchita vinthu, kweni nyengo zinyake wakayowoyanga na kuchita vinthu kwambura kughanaghanirapo ndipo paumaliro wakadandawuranga navyo. Mwachiyelezgero, Yesu wati waphalira ŵapositole ŵake kuti wasuzgikenge na kufwa, Petrosi wakamususka wakati: “Mungazomerezganga na pachoko chara kuti ichi chimuchitikirani.” (Mat. 16:21-23) Kweni Yesu wakamovwira Petrosi kuti wasinthe maghanoghano ghake. Ndipouli, gulu la ŵasilikari lati liza kuti likake Yesu, Petrosi wakachita vinthu mwambura kughanaghanirapo ndipo wakadumura khutu la muzga wa wasembe mukuru. (Yoh. 18:10, 11) Apaso Yesu wakamovwira mpositole wake uyu. Kweniso nyengo yinyake Petrosi wakayowoya mwakujithemba kuti nanga ŵapositole ŵanyake ŵangamuleka Yesu, kweni iyo wangamuleka yayi. (Mat. 26:33) Kweni Petrosi wakaŵa wakukhora nga umo wakaghanaghaniranga yayi. Pamanyuma, usiku wenewura, wakawopa chomene ndipo wakamukana Yesu katatu kuti wakamumanyanga yayi. Apa Petrosi wakagongowa chomene ndipo “wakaluta kuwaro na kulira chomene.” (Mat. 26:69-75) Wakwenera kuti wakakayikanga kuti Yesu wangamugowokera.

18. Kasi Yesu wakamovwira wuli Petrosi kuti waleke kugongowa?

 ¹⁸ Kweni Petrosi wakagongowa kufika pa kuleka kuteŵetera Yehova yayi. Nangauli wakanangiska, kweni wakalutilira kuteŵetera Yehova pamoza na ŵapositole ŵanyake. (Yoh. 21:1-3; Mil. 1:15, 16) Kasi ntchivichi chikamovwira? Iyo wakakumbuka ivyo Yesu wakaŵa kuti wamulombera waka pa zuŵa ili kuti chipulikano chake chileke kulopwa kweniso kumuchiska kuti para wawelera wakakhozge ŵabali ŵake. Yehova wakazgora lurombo ulu lwakufumira pasi pamtima. Pamanyuma, Yesu wakawonekera kwa Petrosi. Ndipo wakwenera kuti wakakhumbanga kumukhozga. (Luka 22:32; 24:33, 34; 1 Kor. 15:5) Ŵapositole ŵati ŵaloŵa somba usiku wose kweni kwambura kukorapo somba yiliyose, Yesu wakawonekera kwa iwo. Panyengo iyi, Yesu wakamupa m’pata Petrosi kuti wamuphalire umo wakumutemwera. Yesu wakamugowokera mubwezi wake wakutemweka ndipo wakamupa mulimo wakusazgikira.—Yoh. 21:15-17.

19. Kasi lemba la Salimo 103:13, 14, likutovwira wuli kumanya umo Yehova wakutiwonera para tananga?

¹⁹ Ivyo tikusambirapo. Umo Yesu wakachitira na Petrosi, vikulongora kuti Yesu ngwalusungu nga umo ŵaliri Adada ŵake. Ntheura nase para tabudiska, tileke kughanaghana kuti Yehova wangatigowokera yayi. Tikwenera kukumbuka kuti Satana wakukhumba kuti ndimo tighanaghanirenge. Kweni tikwenera kumanya kuti Yehova wakutitemwa kweniso wakumanya ivyo tikutondeka, ndipo ngwakukhumbisiska kutigowokera. Nase tikwenera kumuyezga para ŵanji ŵatikhuŵazga.—Ŵazgani Salimo 103:13, 14.

20. Kasi tizamusambira vichi mu nkhani yakulondezgapo?

²⁰ Ivyo tasambira vyakukhwaskana na Yosefe, Naomi na Rute, Mulevi, na Petrosi vikulongora kuti “Yehova wali pafupi na ŵakusweka mu mtima.” (Sal. 34:18) Nyengo zinyake wakuzomerezga kuti tisangane na masuzgo. Ndipouli, para tazizipizga masuzgo agha na wovwiri wa Yehova, chipulikano chithu chikukhora. (1 Pet. 1:6, 7) Mu nkhani yakulondezgapo, tizamulutilira kuwona umo Yehova wakovwilira ŵateŵeti ŵake ŵakugomezgeka awo ŵagongowa, panji chifukwa cha ivyo ŵakubudiska kweniso panji chifukwa cha masuzgo ghanyake.