1-3. (a) Kasi muwukirano waliyose wakukhumbikwira kuchita vichi? Yowoyani chiyelezgero. (Wonani chithuzi chakwamba.) (b) Ni vichi vingawovwira ŵawukirano kuti ŵasankhe makora?

TIYELEZGERE kuti mukukhumba kuluta ku tawuni yinyake yakutali kuti mukachite chinthu chinyake chakuzirwa, ndipo kuti mukafike ku tawuni iyi mukukhumbikwira kwenda ulendo utali pa basi. Mwati mwafika pa siteji ya basi, mwahangayika dankha chifukwa pali ŵanthu ŵanandi ndiposo mabasi ghanandi. Kweni uwemi ngwakuti muli na chilato, mukumanya uko mukuluta, na basi iyo mungakwera kuti mukafike uko mukuluta. Mukukwera basi ya uko mukuluta. Mungakwera basi yiliyose yayi chifukwa yingaluta namwe uko mundakhumbe.

² Ŵawukirano mazuŵa ghano ŵakuyana waka na munthu uyo wali pa ulendo. Umoyo wa ŵawukirano uli nga ni ulendo utali. Nyengo zinyake ŵangatimbanizgika na vinthu vinandi vyakuti ŵasankhepo ndiposo vinthu vinyake ivyo ŵangakumana navyo. Kweni ŵangasankha makora vyakuchita usange ŵakumanya uko ŵakukhumba kuluta. Ŵawukirano, kasi mukukhumba kuluta nkhu?

³ Nkhani iyi yikuzgora fumbo ili ndipo yikuchiska ŵawukirano kuti  ŵaŵe na chilato cha kukondweska Yehova. Ichi chikung’anamura kuti muleke kuluwa Yehova pa chilichose icho mukuchita, kwali mpha nkhani ya masambiro, ntchito, mbumba, na vinyake. Chikung’anamuraso kuti muŵe na vilato ivyo vikukondweska Chiuta. Ŵawukirano awo mtima wawo wose uli pa kuteŵetera Yehova ŵangaŵa na chigomezgo chose kuti waŵatumbikenge ndipo vinthu viŵayenderenge makora.—Ŵerengani Zintharika 16:3.

4. Kasi tiwonenge vichi mu nkhani iyi?

⁴ Ntchiwemi kuŵa na vilato vyauzimu uku muchali muwukirano. Chifukwa wuli? Tiwonenge vifukwa vitatu. Vifukwa viŵiri vyakwambilira vikulongora kuti ubwezi winu na Yehova ukhorenge para muli na vilato vyauzimu. Chifukwa chachitatu chikulongora uwemi wa kuŵa na vilato vyauzimu pa uwukirano.

5. Kasi chifukwa chikuru icho tikuŵira na vilato vyauzimu ntchakuti wuli?

⁵ Chifukwa chikuru icho tikuŵira na vilato vyauzimu ntchakuti tiwonge Yehova pa ivyo wali kutichitira kweniso chifukwa cha chitemwa chake. Wamasalimo wakayowoya kuti: “Tchiwemi kuwonga Yehova . . . Pakuti mwanikondweska, A Yehova, na ivyo mukuchita. Nkhuchemerezga mwachimwemwe chifukwa cha milimo ya mawoko ghinu.” (Sal. 92:1, 4) Ŵawukirano, ghanaghanirani vyose ivyo Yehova wamuchitirani. Yehova wali kumupani umoyo, chipulikano, Baibolo, mpingo, kweniso mukulindilira umoyo wamuyirayira mu paradiso. Para mukuŵa na vilato vyauzimu, mukulongora kuti mukuwonga Chiuta chifukwa cha kumupani vinthu ivi ndipo mukuŵa nayo paubwezi.

6. (a) Kasi vilato vyauzimu vingakhwaska wuli ubwezi winu na Yehova? (b) Kasi mungaŵa na vilato wuli pa uwukirano?

⁶ Chifukwa chachiŵiri icho mukwenera kuŵira na vilato vyauzimu ntchakuti mukukondweska Yehova ndipo mukuŵa nayo paubwezi apo mukuyezgayezga kufiska vilato vinu. Mpositole Paulosi wakalayizga kuti: “Chiuta ngwambura urunji yayi kuti waluwe mulimo winu na chitemwa icho mukalongora ku zina lake.” (Heb. 6:10) Lekani kughanaghana kuti muchali mwana, ndipo mungaŵa yayi na vilato. Christine wakaŵa na vyaka 10 apo wakajiŵikira chilato chakuti nyengo zose waŵerengenge nkhani zakulongosora umoyo wa Ŵakaboni ŵakugomezgeka. Apo Toby wakaŵa na vyaka 12, wakajiŵikira chilato chakuti wamalizge kuŵerenga Baibolo lose pambere wandabatizike. Maxim wakaŵa na vyaka 11 ndipo mudumbu wake Noemi wakaŵa na vyaka 10 apo ŵakabatizikanga. Wose ŵakajiŵikira chilato cha kukateŵetera pa Beteli. Kuti nyengo zose ŵakumbukenge chilato chawo, ŵakakhoma fomu yakupemphera uteŵeti wa pa Beteli pa chiwumba mu nyumba yawo. Kasi imwe mungaghanaghanira vilato ivyo ni vyakuzirwa kwa imwe na kwamba kuchitapo kanthu kuti muvifiske?—Ŵerengani Ŵafilipi 1:10, 11.

7, 8. (a) Chifukwa wuli ntchakuzirwa kujiŵikira vilato para uchali muwukirano? (b) Chifukwa wuli muwukirano munyake wakasankha kuleka kuluta ku yunivesite?

⁷ Chifukwa chachitatu icho mukwenera kuŵira na vilato apo muchali ŵawukirano ntchakuti pali vinandi ivyo mukwenera kusankha. Ŵawukirano ŵakwenera kusankha masambiro agho ŵasambirenge, ntchito iyo ŵagwirenge, na vinyake. Ivyo mukusankha vikuyana waka na kusankha nthowa yakwenelera para mwafika pa mphatukano. Chikuŵa chakusuzga yayi kusankha nthowa yakwenelera para mukumanya uko mukuya. Ndimo viliri na umoyo winu. Mungasankha makora vyakuchita para mukumanya vilato vinu. Lemba la Zintharika 21:5 likuti: “Maghanoghano gha munthu wachitatata ghakovwira kuti vinthu vyende makora.” Vinthu vizamumuyenderani makora para mwaghanaghana luŵiro ivyo mukukhumba kuzakachita. Ivi ndivyo vikachitikira Damaris apo wakakhumbanga kusankha vyakuchita pa uwukirano.

⁸ Damaris wakakwera makora chomene apo wakamalizganga masambiro gha ku sekondare. Wakaŵa  na mwaŵi wakuluta ku yunivesite kukasambira vya uloya kwambura kulipira fizi yiliyose. Kweni wakasankha kwamba ntchito ku banki. Chifukwa wuli? Iyo wakati: “Nkhasankhirathu nichali mwana kuti nizamuchita upayiniya. Kuti nichite upayiniya, nkhwenera kugwira ntchito mazuŵa ghachoko waka. Niŵenge na digiri ya vya uloya, mphanyi nkhupokera ndalama zinandi chomene, kweni mphanyi ntchakusuzga kusanga ntchito ya mazuŵa ghachoko waka.” Damaris wachita upayiniya vyaka 20. Kasi wakuwona kuti wakajiŵikira chilato chiwemi ndipo wakasankha makora apo wakaŵa muwukirano? Iyo wakati: “Ku banki iyo nkhugwirako ntchito nkhukumana na maloya ghanandi. Nisambirenge vya uloya mphanyi nane nkhugwira ntchito iyo iwo ŵakugwira. Kweni ŵanandi ŵa iwo ŵakukondwa nayo yayi ntchito yawo. Upayiniya wanovwira kuti nileke kukwenyelera nga mbanyane awo ŵakugwira ntchito ya uloya kweni kuti nikondwenge pakuteŵetera Yehova.”

9. Chifukwa wuli ŵawukirano ŵithu ŵakwenera kuwongeka?

⁹ Ŵawukirano ŵithu mu mipingo yakupambanapambana pa charu chose ŵakwenera kuwongeka chomene. Iwo ŵali na vilato vyauzimu ndipo ŵakuŵika Yehova pa malo ghakwamba. Ŵawukirano aŵa ŵakukondwa na umoyo ndipo ŵakusambira kulondezga ulongozgi wa Yehova pa chilichose icho ŵakuchita, kwali mpha nkhani ya masambiro, ntchito, na mbumba. Solomoni wakalemba kuti: “Uthembenge Yehova na mtima wako wose. . . . Mu mendero ghako ghose maso ghako ghaŵe kwa iyo, ndipo wakunyoloskerenge nthowa zako.” (Zinth. 3:5, 6) Yehova wakuzirwiska chomene ŵawukirano awo ŵali mu gulu lake kweniso wakuŵatemwa chomene, kuŵavikilira, kuŵapa ulongozgi, na kuŵatumbika.

10. (a) Chifukwa wuli ntchito ya kupharazga yikwenera kuŵa pakwamba? (b) Mungachita wuli kuti mupharazgenge mwaluso?

¹⁰ Muwukirano uyo wakukhumba kukondweska Yehova pa umoyo wake, wakuphalirako ŵanji vya Yehova. Yesu Khristu wakati “makani ghawemi ghakwenera kupharazgika dankha.” (Mrk. 13:10) Ntchito ya kupharazga yikwenera kuchitika mwaluŵiro chomene, ntheura yikwenera kuŵa pakwamba. Kasi mungaŵa na chilato chakuti mupharazgenge pafupipafupi? Kasi mungamba upayiniya? Wuli usange mukutemwa yayi vyakupharazga? Ndipo mungachita wuli kuti mupharazgenge mwaluso? Pali vinthu viŵiri ivyo vingamovwirani. Nozgekerani makora, ndipo mungalekanga yayi kuphalirako ŵanyinu ivyo mukumanya. Muzamuzizwa kuti kupharazga kwamba kumunozgerani.

11, 12. (a) Kasi ŵawukirano ŵangachita wuli kuti ŵanozgekere kupharazga? (b) Kasi muwukirano munyake wakachita wuli wati wasanga mpata wakupharazgira?

¹¹ Mungamba na kusanga zgoro la fumbo ilo ŵanyinu ku sukulu ŵakutemwa kufumba, nga lakuti, “Chifukwa wuli mukugomezga kuti kuli Chiuta?” Pa webusayiti yithu pali nkhani zakovwira ŵawukirano kuti ŵajisangire ŵekha zgoro la fumbo ili. Wonani pa chigaŵa chakuti IVYO BAIBOLO LIKUSAMBIZGA > ŴACHINYAMATA. Ndipo wonani mutu wakuti, “Chifukwa Wuli Nkhugomezga Kuti Chiuta Waliko?” Chigaŵa ichi chingamovwirani kuti munozgekere kuzgora awo ŵangamufumbani. Chigaŵa ichi chili na Malemba ghatatu agho mungajulira munyinu para mukumulongosolera ivyo mukugomezga—Ŵahebere 3:4, Ŵaroma 1:20; Salimo 139:14. Chigaŵa ichi chingamovwirani kuzgora mafumbo ghakupambanapambana.—Ŵerengani 1 Petrosi 3:15.

¹² Para mwaŵi wasangika, phalirani ŵanyinu ku sukulu kuti ŵajisangirenge ŵekha mazgoro gha mafumbo ghawo pa jw.org. Ndivyo wakachita Luca. Zuŵa linyake ŵakasambiranga vya visopa vyakupambanapambana, ndipo Luca wakawona kuti buku ilo ŵakagwiliskiranga ntchito, mukaŵa fundo zautesi zakukhwaskana na Ŵakaboni ŵa Yehova. Nangauli wakachitanga soni, kweni wakapempha asambizgi kuti wayowoyepo pa  vinthu vyakubudika ivyo vikaŵa mu buku ili. Asambizgi ŵakazomera. Luca wakalongosora ivyo tikugomezga, kweniso wakalongora kilasi lose webusayiti yithu. Asambizgi ŵakaphalira waliyose mu kilasi kuti para wafika ku nyumba wakawonelere vidiyo ya makatuni ya mutu wakuti Kasi Ungachita Wuli na Munthu Uyo Wakukusuzga Kwambura Kutimbana Nayo? Luca wakakondwa chomene kuti wakapharazga makora.

13. Chifukwa wuli mukwenera kugongowa yayi para mwasangana na masuzgo?

¹³ Kugongowa yayi para mwasangana na masuzgo pa ulendo winu. (2 Tim. 4:2) Koleskani vilato vinu para mwakumana na masuzgo. Katharina wakaŵa na vyaka 17 apo wakaŵa na chilato cha kupharazgira munthu waliyose ku ntchito kwake. Munthu yumoza wakamunenanga kanandi waka, kweni wakagongowa yayi. Nkharo iyo Katharina wakalongoranga para ŵakumunena yikamukondweska chomene Hans uyo wakagwiranga nayo ntchito. Ntheura wakamba kuŵerenga mabuku ghithu, kusambira Baibolo, ndipo wakabatizika. Vyose ivi Katharina wakavimanyanga yayi chifukwa wakasama ku malo agha. Pakati pajumpha vyaka 13, Katharina wakaŵa pa maungano na banja lake ndipo wakakondwa chomene kupulika kuti Hans ndiyo ni mulendo uyo wiza kuzakadumba nkhani yachisanisani. Katharina wakakondwa chomene kuti wakagongowa yayi kufiska chilato chake cha kupharazgira waliyose ku ntchito kwake.

14, 15. (a) Kasi mukwenera kukumbuka vichi para mwakumana na masuzgo? (b) Kasi mungachita wuli para mukuyezgeka na ŵanyinu?

¹⁴ Nkhani iyi yamovwirani kuti maghanoghano ghinu ghaŵe pa kuteŵetera Yehova na kujiŵikira vilato vyauzimu. Ŵawukirano ŵanandi ŵa msinkhu winu ŵakuŵika chomene mtima pa kujikondweska, ndipo ŵamukopaninge kuti namwe ndimo muchitire. Nyengo yinyake mukhumbikwirenge kuŵalongora kuti vilato vinu ni vyakuzirwa chomene kwa imwe. Lekani kutimbanizgika na ŵawukirano ŵanyinu. Ghanaghanirani za chiyelezgero chithu chira. Kasi mungakwera basi iyo yikuya kunyake chifukwa chakuti mwawona waka kuti ŵanthu awo ŵalimo ŵakuwoneka kuti ŵakunjoya? Yayi.

¹⁵ Pali vinthu vyakupambanapambana ivyo mungachita kuti muleke kutolera vya ŵanyinu. Mwachiyelezgero,  lekani kuŵira dala pa malo apo mungayezgeka na ŵanyinu. (Zinth. 22:3) Kweniso nyengo zose mukumbukenge masuzgo agho ghangaŵapo para mungachitako vinthu viheni. (Gal. 6:7) Ndipo jiyuyurani na kuzomerezga kuti mukukhumbikwira ulongozgi. Kujiyuyura kumovwiraninge kuti mupulikire ulongozgi uwo ŵapapi ŵinu na ŵanthu ŵanyake awo ŵakutemwa Yehova ŵakumupani.—Ŵerengani 1 Petrosi 5:5, 6.

16. Yowoyani chakuchitika chakulongora uwemi wa kujiyuyura.

¹⁶ Kujiyuyura kukawovwira Christoph kuti wapulikire ulongozgi uwo ŵakamupa. Wakati wabatizika waka, wakamba kutemwa chomene kuluta ku malo ghakuchitirako maseŵero ghakukhozga thupi. Ŵawukirano ŵanyake ku malo agha ŵakamunyengeleranga kuti wanjire kagulu kawo. Wakafumba maghanoghano kwa mulara munyake ndipo mulara uyu wakaphalira Christoph kuti wakwenera kughanaghanira ivyo vingachitika para wanganjira kagulu aka. Wakamuphaliraso kuti para wanganjira kagulu aka, panji nayo wangatolera mtima wa kuphalizgana. Kweni Christoph wakanjira kagulu aka. Nyengo yikati yajumphapo, wakawona kuti maseŵero agho ŵakachitanga ghakaŵa ghambembe kweniso ghakofya. Christoph wakafumbaso ŵalara ŵakupambanapambana ndipo wose ŵakamuphalira ulongozgi wa mu Malemba. Iyo wakati: “Yehova wakanitumira ŵanthu awo ŵakanipa ulongozgi uwemi, ndipo nkhamupulikira, nangauli pakatora nyengo.” Kasi imwe mukujiyuyura na kupulikira ulongozgi?

17, 18. (a) Kasi Yehova wakuŵakhumbira vichi ŵawukirano mazuŵa ghano? (b) Kasi ni vichi vingazakamuchitikirani para mwakura, ndipo mungachita vichi kuti vizakaleke kumuchitikirani? Yowoyani chiyelezgero.

¹⁷ “Sekelera, iwe muwukirano, apo uchali muchoko, ndipo mtima wako ukondwe mu mazuŵa gha uwukirano wako.” (Muph. 11:9) Yehova wakukhumba kuti mwaŵawukirano mukondwenge. Nkhani iyi yalongosora chinthu chimoza icho chingamovwirani kuti muŵe ŵakukondwa. Mukwenera kuŵa na vilato vyauzimu na kuleka kuluwa Yehova pa vyose ivyo mukuchita. Para mukuchita vinthu ivi uku muchali ŵachoko, Yehova wamulongozganinge, kumuvikilirani, na kumutumbikani. Ghanaghanirani ulongozgi uwo wakumupani mu Mazgu ghake, ndipo ulondezgani. Iyo wakuti: “Kumbuka Mlengi wako Mukuru mu mazuŵa gha uwukirano wako.”—Muph. 12:1.

¹⁸ Munthu wakukhalilira pa uwukirano yayi. Ŵawukirano ŵakukura mwaluŵiro na kuŵa ŵalara. Chachitima ntchakuti para ŵanyake ŵakura, ŵakuzakajiyimba mulandu kuti ŵakaŵa na vilato viwemi yayi apo ŵakaŵa ŵawukirano. Ŵanyake ŵakuzakadandawura kuti pa uwukirano ŵakajiŵikira chilato chilichose yayi. Kweni ŵawukirano awo sono ŵali na vilato vyauzimu ŵazamuŵa ŵakukondwa umoyo wawo wose chifukwa cha ivyo ŵakasankha. Ndimo vikaŵira na Mirjana. Apo Mirjana wakaŵa muwukirano, wakachitanga makora chomene pa maseŵero. Wakapempheka kuti wakachiteko chipharizgano cha maseŵero pa charu chose, kweni wakasankha kwamba uteŵeti wanyengozose. Sono pajumpha vyaka 30 ndipo Mirjana na mfumu wake ŵachali kuchita uteŵeti wanyengozose. Iyo wakati: “Kutchuka, mazaza, na usambazi vikumara kweniso ni vyakuzirwa chomene yayi. Chinthu chakuzirwa chomene pa umoyo nkhuteŵetera Chiuta na kovwira ŵanthu kuti ŵamumanye.”

19. Yowoyani uwemi wa kuŵa na vilato vyauzimu apo muchali muwukirano.

¹⁹ Ŵawukirano ŵithu ŵakwenera kuwongeka chomene chifukwa ŵakulutilira kuteŵetera Yehova nangauli ŵakukumana na masuzgo. Ŵawukirano ŵithu ŵali na vilato vyauzimu ndipo ŵakuŵika ntchito yakupharazga pa malo ghakwamba. Kweniso ŵakukana kutimbanizgika na vinthu vya mu charu. Iwo ŵakwenera kumanya kuti ŵakutokatoka pawaka yayi. Ŵakwenera kumanya kuti ŵali na ŵabali na ŵadumbu ŵawo awo ŵakuŵatemwa ndipo ŵaŵawovwirenge. Para ŵajipelekenge kwa Yehova, chilichose icho ŵakuchita chendenge makora.