NKHANI YAKUSAMBIRA 18
‘Chimbirani mu Chiphalizgano M’paka Kuumaliro’
“Nachimbira mu chiphalizgano m’paka kuumaliro.”—2 TIM. 4:7.
SUMU 129 Tilutilirenge Kuzizipizga
CHILATO CHA NKHANI IYI *
1. Kasi tose tikwenera kuchita vichi?
USANGE mukuwona kuti mwalwara panji mwavuka, kasi mungatemwa kuchimbira mu chiphalizgano icho mukumanya kuti ntchakusuzga? Ntchakuwonekerathu kuti mungatemwa yayi. Ndipouli, mpositole Paulosi wakati Ŵakhristu wose ŵaunenesko ŵali pa chiphalizgano. (Heb. 12:1) Ndipo tose, ŵana panji ŵalara, ŵankhongono panji ŵakuvuka, tikwenera kuzizipizga m’paka kuumaliro para tikukhumba kuzakapokera njombe iyo Yehova wazamupeleka.—Mat. 24:13.
2. Kuyana na 2 Timote 4:7, 8, chifukwa wuli Paulosi wakaŵa na wanangwa wakuyowoya?
2 Paulosi wakaŵa na wanangwa wakuyowoya chifukwa ‘wakachimbira mu chiphalizgano m’paka kuumaliro.’ (Ŵazgani 2 Timote 4:7, 8.) Kweni kasi mpositole Paulosi wakayowoyanga vya chiphalizgano wuli?
KASI CHIPHALIZGANO NTCHIVICHI?
3. Kasi mpositole Paulosi wakayowoyanga vya chiphalizgano wuli?
3 Nyengo zinyake Paulosi wakalembanga vinthu ivyo vikachitikanga pa maseŵero ku Girisi kuti wasambizge ŵanthu sambiro lakuzirwa. (1 Kor. 9:25-27; 2 Tim. 2:5) Kanandi waka, wakayelezgera umoyo wa Mkhristu na kuchimbira mu chiphalizgano. (1 Kor. 9:24; Gal. 2:2; Fil. 2:16) Munthu wakwamba kuchimbira mu “chiphalizgano” ichi para wajipeleka kwa Yehova na kubatizika. (1 Pet. 3:21) Ndipo wakumalizga chiphalizgano ichi para Yehova wamupa njombe ya umoyo wamuyirayira.—Mat. 25:31-34, 46; 2 Tim. 4:8.
4. Kasi tidumbiskanenge vichi mu nkhani iyi?
4 Kasi pali kuyana wuli pakati pa kuchimbira mu chiphalizgano na umoyo Wachikhristu? Pali vinandi ivyo vikuyana. Kweni tiyeni tiwonepo waka vitatu pera. Chakwamba, tikwenera kuchimbira pa nthowa yakwenelera; chachiŵiri, tikwenera kuŵa na chilato cha kufika pa mzere waumaliro; ndipo chachitatu, tikwenera kulutilira kuzizipizga nanga tingasangana na masuzgo apo tikuchimbira.
MUCHIMBIRENGE PA NTHOWA YAKWENELERA
Tose tikwenera kulondezga nthowa yakwenelera yakuya ku umoyo (Wonani ndime 5-7) *
5. Kasi tikwenera kulondezga nthowa wuli, ndipo chifukwa wuli?
5 Usange uyo wakuchita chiphalizgano wakukhumba kupokera njombe, wakwenera kuchimbira pa nthowa yakwenelera iyo awo ŵanozga chiphalizgano ŵakukhumba. Mwakuyana waka, para nase tikukhumba kuzakapokera njombe ya umoyo wamuyirayira, tikwenera kulondezga nthowa ya ku umoyo. (Mil. 20:24; 1 Pet. 2:21) Ndipouli, Satana na awo ŵakumulondezga ŵakukhumba yayi kuti tilondezgenge nthowa ya ku umoyo; ŵakukhumba kuti tilutilire “kuchimbira nawo lumoza.” (1 Pet. 4:4) Ŵakutiseka para ŵakuwona umoyo uwo tikukhala, ndipo ŵakuti nthowa iyo iwo ŵakulondezga ndiyo njiwemi chifukwa ŵali na wanangwa. Kweni uwu mbutesi.—2 Pet. 2:19.
6. Kasi mwasambirako vichi ku ivyo vikachitikira Brian?
6 Waliyose uyo wakuchimbira pamoza na awo ŵali kutimbanizgika na charu cha Satana pamanyuma wakuwamo kuti nthowa iyo wali kusankha yikumovwira kusanga wanangwa yayi; kweni yikumuzgora muzga. (Rom. 6:16) Wonani chiyelezgero cha Brian. Ŵapapi ŵake ŵakamuchiskanga kuti walondezge nthowa ya ku umoyo. Kweni wati wafika pa unyamata, wakamba kukayikira usange nthowa iyo wakasankha yingamovwira kuŵa wakukondwa. Brian wakasankha kuchimbira pamoza na awo ŵakwendera maghanoghano gha Satana. Iyo wakuti, “Nkhamanyanga yayi kuti uwo nkhatenge ni wanangwa unizgorenge muzga wankharo ziheni. Pamasinda, nkhamba kutemwa chomene munkhwala wakutimbanizga wongo, kumwa moŵa mwakujumphizga kweniso kuchita uzaghali. Nkhamba kumwa minkhwala yakutimbanizga wongo yankhongono chomene, ndipo yikaninjira chomene na kunizgora muzga. . . . Nkhamba na kuguliska wuwo kuti nisangenge wovwiri pa umoyo wane.” Pamanyuma, Brian wakasankha kuti wambe kwendera fundo za Yehova pa umoyo wake. Iyo wakasintha ndipo wakabatizika mu 2001. Sono ngwakukondwa chomene kuti wakulondezga nthowa yakuya ku umoyo. *
7. Kuyana na Mateyu 7:13, 14, kasi pali nthowa zilinga?
7 Ntchakuzirwa chomene kusankha nthowa yakwenelera yakuti tendengemo. Satana wakukhumba kuti tileke kuchimbira mu nthowa yifinyi “iyo yikuya ku umoyo” ndipo wakukhumba kuti tambe kuchimbira mu nthowa yisani iyo ŵanandi mu charu ichi ŵakwendamo. Nthowa iyi ŵanandi ŵakuyitemwa ndipo njipusu kwendamo. Kweni “yikuya ku pharanyiko.” (Ŵazgani Mateyu 7:13, 14.) Kuti tikhalilire mu nthowa yiwemi na kuleka kupuluskika na awo ŵakulondezga yayi ivyo Yehova wakukhumba, tikwenera kugomezga Yehova na kumupulikira.
ŴIKANIPO MTIMA NDIPO MUNGAKHUŴALANGA YAYI
Tikwenera kuŵikapo mtima kweniso tingakhuŵazganga ŵanji yayi (Wonani ndime 8-12) *
8. Kasi para munthu uyo wakuchita chiphalizgano wawa, wakuchita wuli?
8 Awo ŵakuchita chiphalizgano cha mtunda utali ŵakulaŵiska pa msewu uwo ŵachimbirengemo mwakuti ŵaleke kukhuŵara. Ndipouli, mwangozi ŵangakhuŵara mwa munyawo uyo ŵakuchimbilira lumoza panji ŵangakanda pa kabuwu. Para ŵawa, ŵakuwuka na kwambaso kuchimbira. Ŵakuŵika mtima pa icho ŵangukhuŵarako yayi, kweni pa mzere waumaliro na pa njombe iyo ŵakugomezga kuti ŵamupokera.
9. Kasi tikwenera kuchita vichi para takhuŵara?
9 Mu chiphalizgano chithu, tingakhuŵara kanandi waka, tingabudiska mukayowoyero panji mu vyakuchita. Panji awo tikuchimbira nawo ŵangabudiska vinthu vinyake ivyo vingatikhuŵazga. Tingazizwanga yayi para vyanthena vyachitika. Tose ndise ŵambura kufikapo, ndipo tose tikuchimbira pa nthowa yichoko iyo yikuya ku umoyo. Ntheura kanandi tikukhuŵazgana. Paulosi wakamanya kuti kanandi tikuŵa na “chifukwa chakudandawulira” kwa yumoza na munyake. (Kol. 3:13) Kweni m’malo mwa kughanaghanira chomene icho chatikhuŵazga, tiyeni tilaŵiske pa njombe iyo yili panthazi pithu. Usange takhuŵara, tikwenera kuwukaso na kulutilira kuchimbira. Para takwiya na kuleka kuteŵetera Yehova, tingamalizga yayi chiphalizgano na kukapokera njombe. Chinyake ntchakuti mbwenu tikhuŵazgenge ŵanyithu awo ŵakuyezgayezga kuchimbira pa nthowa yifinyi iyo yikuluta ku umoyo.
10. Kasi tingachita wuli kuti tileke kuŵa “chakukhuŵazga” ku ŵanji?
10 Nthowa yinyake iyo tingalekera kuŵa “chakukhuŵazga” ku ŵabali na ŵadumbu ŵithu, ni para tikuŵaleka kuti ŵachitenge vinthu kuyana na umo iwo ŵakukhumbira m’malo mwakuti nyengo zose ŵenderenge waka ivyo ise tikukhumba. (Rom. 14:13, 19-21; 1 Kor. 8:9, 13) Para tachita nthena tipambanenge na ŵanthu awo ŵakuchita maseŵero gha chiphalizgano. Iwo ŵakuphalizgana na ŵanyawo awo ŵakuchimbilira lumoza, nakuti waliyose wakukhumba kuti iyo ndiyo wakapoke njombe. Ŵanthu aŵa chomene ŵakughanaghanira waka ivyo vingaŵawovwira kuti iwo ndiwo ŵaluske pa chiphalizgano. Ntheura ŵangayezga kututuzgira ŵanyawo kumphepete kuti iwo ndiwo ŵaŵe panthazi. Mwakupambana na ŵanthu aŵa, ise tikuphalizgana yayi. (Gal. 5:26; 6:4) Chilato chithu nkhovwira ŵanthu ŵanandi kuti tikafikire lumoza pa mzere waumaliro na kupokera njombe ya umoyo. Ntheura tikuyezgayezga kulondezga ulongozgi wa Paulosi wakuti “kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Fil. 2:4.
11. Kasi uyo wakuchita chiphalizgano cha kuchimbira wakuŵika mtima pa vichi, ndipo chifukwa wuli?
11 Padera pakulaŵiska pa msewu uwo ŵambenge kuchimbiramo, awo ŵakuchita chiphalizgano ŵakuŵika mtima wawo pa mzere waumaliro. Nanga vingaŵa kuti mzere waumaliro ŵangawuwona yayi na maso yawo, kweni mu maghanoghano ŵakuŵa na chithuzi chakuti ŵakujumpha pa mzere uwu na kupokera njombe. Ŵakulimbikira chomene para ŵakughanaghanira vya njombe iyo ŵamupokera.
12. Kasi Yehova wali kutilayizga vichi?
12 Mu chiphalizgano chithu, Yehova wali kulayizga kuti para tamalizga chiphalizgano wazamutipa njombe ya umoyo wamuyirayira kwali nkhuchanya panji pa charu chapasi kwambura kutondeka. Baibolo likulongosora za njombe iyi mwakuti tiŵe na chithuzi cha umo umoyo uzamuŵira wakunozga. Para tikughanaghanirapo chomene ivyo Yehova watilayizga, tiŵikengepo mtima chomene kuzizipizga.
LUTILIRANI KUCHIMBIRA NANGAULI MUKUSANGANA NA MASUZGO
Tikwenera kulutilira kuchimbira pa chiphalizgano cha ku umoyo nangauli tikusangana na masuzgo (Wonani ndime 13-20) *
13. Kasi ise tili na mwaŵi wuli kuluska awo ŵakuchita chiphalizgano chakuchimbira?
13 Awo ŵakachitanga chiphalizgano ku Girisi ŵakazizipizganga masuzgo, nga nkhuvuka na vyakuŵinya. Kweni ŵakathembanga nkhongono zawo kweniso kunozgekera makora. Nga ni awo ŵakachitanga chiphalizgano ichi, nase tikusambizgika umo tingachimbilira mu chiphalizgano chithu. Kweni ise tili na mwaŵi chomene kuluska awo ŵakachitanga chiphalizgano chakuchimbira. Yehova wangatipa nkhongono, ndipo wovwiri uwo wakutipa ulije mphaka. Para tikuthemba Yehova, iyo wakulayizga kuti watisambizgenge waka yayi kweniso watizgorenge ŵankhongono.—1 Pet. 5:10.
14. Kasi lemba la 2 Ŵakorinte 12:9, 10 likutovwira wuli kuzizipizga masuzgo?
14 Paulosi wakeneranga kumarana na masuzgo ghanandi. Padera pakuti ŵakamunenanga na kumutambuzga, nyengo zinyake wakaŵavyanga nkhongono ndipo wakalimbananga na suzgo ilo wakati ni “munga mu thupi.” (2 Kor. 12:7) M’malo mwakuwona kuti masuzgo agha ni mwaŵi wakuti waleke waka kuteŵetera Yehova, wakaghawonanga kuti ni mwaŵi wakulongolera kuti wakugomezga Yehova. (Ŵazgani 2 Ŵakorinte 12:9, 10.) Chifukwa chakuti Paulosi wakaŵa na maghanoghano agha, Yehova wakamovwira pa masuzgo ghake ghose.
15. Kasi chichitikenge ntchivichi para tayezga Paulosi?
15 Nase ŵangatinena na kutitambuzga chifukwa cha chipulikano chithu. Nyengo zinyake tingaŵa kuti tavuka panji ndise ŵalwari. Kweni para tayezga Paulosi, suzgo lithu lililose lingaŵa mwaŵi wakuti tilongolere kuti tikugomezga Yehova.
16. Nanga mungaŵa kuti ndimwe ŵalwari, kasi mungachita vichi?
16 Kasi mukutandalira waka kugona pasi panji kukhala pa njinga ya ŵanthu ŵakupendera? Kasi muli na suzgo la malundi panji suzgo la maso? Usange ni nthena, kasi mungachimbira pamoza na ŵachinyamata kweniso na awo ŵali na nkhongono? Tikugomezga kuti mungachimbira. Ŵachekuru ŵanandi na ŵanthu ŵanyake awo ŵakulwaralwara ŵakuchimbira munthowa iyo yikuya ku umoyo. Ŵangafiska yayi kuchita ivi na nkhongono zawo. M’malo mwake, ŵakusendelera kwa Yehova kuti waŵape nkhongono kwizira mu maungano agho ŵakuchita kutegherezga pa foni. Ndipo ŵakuchita mulimo wakuzgora ŵanthu kuŵa ŵasambiri mwa kupharazgira madokotala, manesi na ŵabali ŵawo.
17. Kasi Yehova wakuŵawona wuli awo ŵakusuzgikira mu thupi?
17 Usange mukutondeka kuchita ivyo mukukhumba pakuteŵetera Yehova, kugongowa yayi panji kughanaghana kuti mungazizipizga yayi m’paka paumaliro wa charu ichi. Yehova wakumutemwani chifukwa muli na chipulikano mwa iyo kweniso mukuzizipizga. Sono ndipo mukukhumbikwira chomene wovwiri wake kuluska kumasinda kose, ndipo wamusidaninge yayi. (Sal. 9:10) M’malo mwake, wasendelerenge chomene kwa imwe. Wonani ivyo wakayowoya mudumbu munyake uyo ni mulwari. Iyo wakati: “Chifukwa chakuti nkhulwara pafupipafupi, mwaŵi wakuti nipharazgenge ukuŵa uchoko. Kweni nkhumanya kuti vichoko ivyo nkhuchita vikukondweska chomene mtima wa Yehova ndipo nane nkhuŵa wakukondwa.” Usange mwagongowa, kumbukani kuti muli mwekha yayi. Ghanaghanirani chiyelezgero cha Paulosi ndipo kumbukani mazgu ghake ghakukhozga ghakuti: “Nkhukondwa para nkhuŵa wakulopwa, . . . pakuti para nili wakulopwa, apo ndipo nkhuŵa wankhongono.”—2 Kor. 12:10.
18. Kasi ŵanyake ŵangasangana na suzgo wuli likuru?
18 Ŵanyake awo ŵakuchimbira mu nthowa yakuya ku umoyo ŵakusangana na suzgo linyake. Ŵakusangana na masuzgo ghanyake agho ŵanthu ŵakughamanya yayi ndipo ŵangaghapulikiska yayi. Mwachiyelezgero, ŵakusuzgika maghanoghano panji ŵakufipa mtima chomene. Chifukwa wuli ili lingaŵa suzgo likuru ku ŵateŵeti ŵakugomezgeka ŵa Yehova aŵa? Chifukwa para munthu wali na woko lakuphyoka panji wakwenda pa njinga ya ŵakupendera, waliyose wangawona suzgo ilo wakusangana nalo ndipo wangachitapo kanthu. Kweni awo ŵali na suzgo la maghanoghano ŵangalongora nga kuti vyose vili makora waka. Nakuti vyakuŵinya vyawo vikuyana waka na munthu uyo wali na woko panji lundi lakuphyoka. Kweni chifukwa chakuti ŵanji ŵangawona yayi umo ŵakusuzgikira, ŵangaŵapa wovwiri uwo ŵakukhumbikwira nadi yayi.
19. Kasi tikusambirako vichi kwa Mefibosheti?
19 Para mukutondeka kuchita vinyake ndipo mukuwona kuti ŵanyinu ŵakumupulikiskani yayi mungakhozgeka na chiyelezgero cha Mefibosheti. (2 Sam. 4:4) Wakaŵa wakupendera, kweniso Themba Davide likamweruzga mwambura urunji. Kuti ivi vichitike likaŵa suzgo la Mefibosheti yayi. Ndipouli, wakakwiya yayi; wakawonganga chomene vinthu viwemi ivyo vikachitika pa umoyo wake. Wakawonga chomene lusungu ulo Davide wakamulongora kumasinda. (2 Sam. 9:6-10) Ntheura apo Davide wakamweruzga mwambura urunji, Mefibosheti wakayezga kughanaghanira nkhani yose. Wakazomerezga yayi kuti ivyo Davide wakachita vimukwiyiske. Ndipo wakamupa mulandu yayi Yehova chifukwa cha ivyo wakachita Davide. Mefibosheti wakaŵika mtima pa umo wangalongolera kuti wakukolerana na themba lakusankhika na Yehova. (2 Sam. 16:1-4; 19:24-30) Yehova wakazomerezga kuti ivyo vikachitikira Mefibosheti vilembeke mu Mazgu ghake kuti tisambireko.—Rom. 15:4.
20. Kasi suzgo la maghanoghano lingakhwaska wuli ŵanji, kweni ŵangaŵa na chigomezgo wuli?
20 Chifukwa chakuti ŵakusangana na masuzgo ghanandi, ŵabali na ŵadumbu ŵanyake ŵakufwatuka yayi kuŵa pa gulu la ŵanthu. Nangauli chikuŵaŵira chinonono kuŵa pa gulu la ŵanthu, kweni ŵakulutilira kwiza ku maungano gha mpingo, gha dera na gha chigaŵa. Kwa iwo ntchipusu yayi kuyowoya na ŵanthu ŵachilendo, ndipouli ŵakupharazgira ŵanthu mu uteŵeti. Para ndimo viliri nadi kwa imwe, manyani kuti muli mwekha yayi. Ŵanthu ŵanandi nawo ŵali na suzgo lakuyana waka. Kumbukani kuti Yehova wakukondwa na mtima winu wakujipeleka. Pakuti mundagongowe, uwu mbukaboni wakuti Yehova wakumutumbikani kweniso wakumupani nkhongono izo mukukhumbikwira. * (Fil. 4:6, 7; 1 Pet. 5:7) Para mukuteŵetera Yehova nangauli mukulwaralwara panji mukusuzgika maghanoghano, mungaŵa na chigomezgo chose kuti mukukondweska Yehova.
21. Na wovwiri wa Yehova, kasi tose tifiskenge kuchita vichi?
21 Tikuwonga kuti pali mphambano pakati pa maseŵero gha kuphalizgana na chiphalizgano icho Paulosi wakayowoya. Mu nyengo yakale, mu maseŵero gha chiphalizgano munthu yumoza ndiyo wakapokeranga njombe. Kweni chiphalizgano icho Ŵakhristu ŵakuchita, waliyose uyo wakuzizipizga m’paka paumaliro wazamupokera njombe ya umoyo wamuyirayira. (Yoh. 3:16) Ndipo awo ŵakuchita maseŵero gha chiphalizgano ŵakwenera kuŵa na nkhongono za ku thupi, para apo cha mbwenu ŵangaŵa na mwaŵi uchoko wakuti ŵaluske pa chiphalizgano. Ndipouli, mu chiphalizgano chithu taŵanandi tili na masuzgo ghanyake mu thupi, kweni tikulutilira kuzizipizga. (2 Kor. 4:16) Na wovwiri wa Yehova, tichimbirenge mu chiphalizgano ichi m’paka paumaliro.
SUMU 144 Laŵiskaninge pa Njombe
^ ndime 5 Ŵateŵeti ŵa Yehova ŵanandi mazuŵa ghano ŵakusangana na masuzgo agho ghakwiza chifukwa cha uchekuru panji ulwari uwo ukuŵapangiska kuti ŵaŵavye nkhongono. Nakuti tose nyengo zinyake tikuvuka. Ntheura nkhani ya kuchimbira mu chiphalizgano yingawoneka nga njakusuzga chomene. Nkhani iyi yikulongosora umo tose tingachimbilira na chizizipizgo na kumalizga chiphalizgano cha umoyo icho mpositole Paulosi wakayowoya.
^ ndime 6 Wonani nkhani yakuti “Baibolo Likusintha Umoyo wa Ŵanthu” mu Gongwe la Mulinda la Janyuwale 1, 2013.
^ ndime 20 Kuti mumanye masachizgo ghanyake ghakovwira gha umo mungachitira para mukusuzgika maghanoghano kweniso umo ŵanji ŵatondera suzgo ili, wonani pulogiramu ya Meyi 2019 pa jw.org®. Lutani pa LAYIBULARE > JW BROADCASTING®.
^ ndime 63 MAZGU GHAKULONGOSORA VITHUZI: Kuŵa na vyakuchita vinandi mu uteŵeti kukovwira mubali muchekuru uyu kulutilira kuchimbira pa chiphalizgano cha Chikhristu.
^ ndime 65 MAZGU GHAKULONGOSORA VITHUZI:Tingakhuŵazga ŵanji para tingaŵachichizga kuti ŵamwe moŵa unandi panji para ise ndise tingamwa unandi.
^ ndime 67 MAZGU GHAKULONGOSORA VITHUZI: Nanga ni apo wali pa bedi ku chipatala, mubali wakulutilira kuchimbira pa chiphalizgano cha Chikhristu apo wakupharazgira awo ŵakumupwelelera.
