1-2. Kasi chiwombolero ni vichi, ndipo chifukwa wuli ntchakukhumbikwa kwa ise?

MUNTHU wakufikapo Adamu wati wananga, wakataya mwaŵi wakuti iyo na ŵana ŵake wose ŵakhale umoyo wamuyirayira. Adamu wakaŵavya pakugwenthera chifukwa cha ivyo wakachita. Iyo wakanangira dala. Kweni wuli pakuyowoya za ŵana ŵake? Palije icho ŵana ŵake ŵakananga, ndipo ndiwo yayi ŵakamuchitiska Adamu kuti wanange. (Rom. 5:12, 14) Adamu wakeneranga kufwa chifukwa cha ivyo wakachita. Kweni kasi pakaŵa chakuti Yehova wangachita kuti ŵana ŵa Adamu ŵakhale muyirayira? Enya! Adamu wati wananga waka, Yehova wakamba kuvumbura umo wazamuponoskera ŵana ŵa Adamu mamiliyoni ghanandi ku kwananga na nyifwa. (Gen. 3:15) Panyengo yake yakutemeka, Yehova wakatuma mwana wake kufuma kuchanya “na kupeleka umoyo wake kuŵa chiwombolero cha ŵanandi.”​—Mrk. 10:45; Yoh. 6:51.

² Kasi chiwombolero ni vichi? Mu Malemba Ghachigiriki, chiwombolero ni mtengo uwo Yesu wakapeleka kuwombora ivyo Adamu wakataya. (1 Kor. 15:22) Chifukwa wuli chikaŵa chakukhumbikwa kuti paŵe chiwombolero? Chifukwa nga umo vikalembekera mu Dango, malango ghaurunji gha Yehova ghakatenge umoyo pa umoyo. (Eks. 21:23, 24) Adamu wakataya umoyo wake wakufikapo. Kuti wafiske urunji wa Chiuta, Yesu wakapeleka umoyo wake wakufikapo. (Rom. 5:17) Kwizira munthowa iyi wakazgoka “Dada Wamuyirayira” ku wose awo ŵali na chipulikano mu sembe yakuwombora.—Yes. 9:6; Rom. 3:23, 24.

3. Kuyana na Yohane 14:31 na 15:13, chifukwa wuli Yesu wakaŵa wakukhumbisiska kupeleka umoyo wake wakufikapo kuŵa sembe?

³ Yesu wakaŵa wakukhumbisiska kupeleka umoyo wake chifukwa chakutemwa chomene Adada ŵake ŵakuchanya na ise. (Ŵazgani Yohane 14:31; 15:13.) Chifukwa cha chitemwa, wakaŵikapo mtima kulutilira kuŵa wakugomezgeka umoyo wake wose pa charu chapasi na kufiska khumbo la Awiske. Chifukwa cha  ivyo wakachita, khumbo la Yehova ilo wakaŵa nalo pakwamba lakukhwaskana na ŵanthu kweniso charu chapasi lizamufiskika. Mu nkhani iyi, tiwonenge chifukwa icho Chiuta wakazomerezgera kuti Yesu wasuzgike chomene pambere wandafwe. Kweniso tiwelerengemo mwakudumura za mulembi munyake wa Baibolo uyo wakawonga kufumira pasi pamtima sembe yakuwombora. Ndipo paumaliro, tidumbiskanenge umo tingalongolera kuti tikuwonga sembe yakuwombora kweniso umo tingachitira kuti tiwongenge chomene sembe iyi, iyo Yehova na Yesu ŵakatipa.

4. Longosorani umo Yesu wakafwira.

⁴ Ghanaghanirani ivyo vikachitika zuŵa laumaliro pambere Yesu wandakomeke. Wakhumbenge wakatenge wapemphenge wovwiri ku ŵangelo, kuti ŵamuvikilire, kweni wakapempha yayi. M’malo mwake, wakazomerezga kuti ŵasilikari Ŵachiroma ŵamukake na kumutimba. (Mat. 26:52-54; Yoh. 18:3; 19:1) Pakumutimba ŵakagwiliskiranga ntchito luswazu ulo lukagagawuranga thupi para ŵakumufyapura. Kufuma apo ŵakamunyamuliska nkhuni lizito pa msana uku wakufuma ndopa. Yesu wakamba kuguguza khuni ili kuluta nalo pa malo apo ŵakamukomera. Kweni nyengo yichoko waka ŵasilikari Ŵachiroma ŵakaphalira munthu munyake kuti wamuyeghereko. (Mat. 27:32) Yesu wati wafika pa malo apo ŵakamukomera, ŵasilikari ŵakakhoma mawoko ghake na malundi ghake pa khuni. Apa ndikuti uzito wose wa thupi la Yesu, ukakholera waka pa mizumali. Ŵabwezi ŵake ŵakaŵa na chitima chomene ndipo amama ŵake ŵakalira, kweni ŵalara ŵa Ŵayuda ŵakamuhoyanga. (Luka 23:32-38; Yoh. 19:25) Yesu wakasuzgika kwa maora ghanandi. Chifukwa cha umo wakapayikikira, mtima na maphapu vikagwiranga makora yayi ntchito ndipo ivi vikapangiska kuti wathutenge mwakusuzgikira chomene. Yesu wakamanya kuti wagomezgeka, ndipo pambere wandafwe, wakalomba kaumaliro kwa Yehova. Pamanyuma wakasindama na kupeleka mzimu wake. (Mrk. 15:37; Luka 23:46; Yoh. 10:17, 18; 19:30) Yesu wakafwa mwapachokopachoko ndipo yikaŵa nyifwa yakuŵinya chomene kweniso yakukhozga soni.

5. Kasi ntchivichi chikaŵa chakuŵinya chomene kwa Yesu kuluska umo ŵakamukomera?

⁵ Kwa Yesu, umo wakakomekera yikaŵa nkhani yikuru chomene yayi. Kweni iyo wakasuzgika chomene maghanoghano na chifukwa icho ŵakamukomera. Iwo ŵakamupusikizgira kuti ngwakuyuyura Chiuta, ndipo ŵakati wakuchindika yayi Chiuta panji zina la Chiuta. (Mat. 26:64-66) Mazgu ghakuti wakuyuyura Chiuta, Yesu ghakamuŵinya chomene ndipo wakakhazganga kuti Adada ŵake ŵazomerezgenge yayi kuti wakhozgeke soni munthowa iyi. (Mat. 26:38, 39, 42) Kweni chifukwa wuli Yehova wakazomerezga kuti Mwana wake wakutemweka wasuzgike na kufwa? Tiyeni tiwone vifukwa vitatu.

6. Chifukwa wuli Yesu wakeneranga kupayikika pa khuni lakusuzgikirapo?

⁶ Chakwamba, Yesu wakeneranga kupayikika pa khuni kuti wafwature Ŵayuda ku nthembo. (Gal. 3:10, 13) Ŵakaŵa ŵakutembeka chifukwa chakuti ŵakalayizga kuti ŵapulikirenge Dango la Chiuta kweni ŵakapulikira yayi. Ntheura ŵakeneranga kufwa chifukwa chakuti ŵakaŵa ŵana ŵa Adamu, kweniso ŵakaŵa na nthembo iyi. (Rom. 5:12) Dango la Chiuta ku Ŵaisrayeli likatenge usange munthu wachita kwananga kwakwenelera nyifwa wakomeke. Ndipo nyengo zinyake thupi lake ŵakalipayikanga pa khuni. * (Doto. 21:22, 23; 27:26) Ntheura chifukwa chakuti Yesu wakapayikika pa khuni, Ŵayuda ŵakafwatuka ku nthembo iyi ndipo sembe ya Yesu yikaŵawovwira nangauli ŵakamukana.

7. Kasi ntchifukwa wuli chachiŵiri icho Chiuta wakazomerezgera Mwana wake kusuzgika?

⁷ Wonani chifukwa chachiŵiri icho Chiuta wakazomerezgera  Mwana wake kusuzgika. Wakasambizganga Yesu mulimo wake wa munthazi wakuŵa Wasembe Mukuru. Yesu wakawona unonono uwo ukuŵapo kuti munthu wapulikire Chiuta para wasangana na chiyezgo chikuru chomene. Wakasuzgika chomene maghanoghano, mwakuti wakalomba “pamoza na kulira chomene na masozi.” Chifukwa chakuti Yesu nayo wakasuzgika chomene, wakumanya ivyo tikukhumbikwira ndipo ‘wakumanya umo wangatovwilira para tikuyezgeka.’ Tikuwonga chomene Yehova pakwimika Wasembe Mukuru walusungu uyo “wangaleka yayi kutichitira chitima pa kulopwa kwithu.”​—Heb. 2:17, 18; 4:14-16; 5:7-10.

8. Kasi ntchifukwa wuli chachitatu icho Chiuta wakazomerezgera kuti Yesu wayezgeke chomene?

⁸ Chachitatu, Yehova wakazomerezga kuti Yesu wasuzgike kuti wazgore fumbo lakuzirwa chomene lakuti: Kasi ŵanthu ŵangalutilira kugomezgeka kwa Yehova nanga ni para ŵangayezgeka chomene? Satana wakuti yayi! Iyo wakuti ŵanthu ŵakuteŵetera Yehova chifukwa cha uryezi. Ndipo wakugomezga kuti ŵanthu ŵakumutemwa yayi Yehova nga umo vikaŵira na sekuru wawo Adamu. (Yobu 1:9-11; 2:4, 5) Chifukwa cha kumugomezga Mwana wake, Yehova wakazomerezga kuti Yesu wayezgeke mwakukwana. Yesu wakalutilira kuŵa wakugomezgeka na kulongora pakweru kuti Satana ni mutesi.

9. Chifukwa wuli Yohane ntchiyelezgero chiwemi kwa ise?

⁹ Ŵakhristu ŵanandi, chipulikano chawo chakhozgeka chifukwa cha kusambira vya sembe yakuwombora. Ŵakulutilira kupharazga nangauli ŵakususkika ndipo ŵanyake ŵakuzizipizga viyezgo vyakupambanapambana umoyo wawo wose. Mwachiyelezgero, mpositole Yohane. Wakapharazga unenesko wakukhwaskana na Khristu kweniso sembe yakuwombora mwakugomezgeka, pafupifupi vyaka vyakujumpha 60. Ndipo nanga ni apo wakaŵa na vyaka pafupifupi 100, boma la Romu likawonanga kuti ngwakofya chomene mwakuti ŵakamuŵika mu jele pa chirwa cha Patimo. Kasi wakananga vichi? ‘Wakayowoyanga vya Chiuta na kuchitira ukaboni Yesu.’ (Chivu. 1:9) Yohane wakalongora chiyelezgero chiwemi chomene pa nkhani ya chipulikano na kuzizipizga.

10. Kasi ivyo Yohane wakalemba vikulongora wuli kuti wakawonganga sembe yakuwombora?

¹⁰ Mu mabuku gha mu Baibolo agho Yohane wakalemba, wali kulemba umo wakamutemweranga Yesu kweniso umo wakuwongera chifukwa cha sembe iyo wakapeleka. Wali kuyowoya vya chiwombolero panji vinthu viwemi ivyo vilipo chifukwa cha sembe yakuwombora mu malo ghakujumpha 100. Mwachiyelezgero, Yohane wakalemba kuti: “Usange munyake wananga, tili na movwiri kwa Adada, Yesu Khristu, uyo ni murunji.” (1 Yoh. 2:1, 2) Ivyo Yohane wakalemba vikukhozgeraso chomene kuzirwa kwa “kuchitira ukaboni Yesu.” (Chivu. 19:10) Apa ntchakuwonekerathu kuti Yohane wakawonganga chomene sembe yakuwombora. Kasi nase tingalongora wuli kuti tikuwonga sembe yakuwombora?

11. Kasi ntchivichi chingatovwira kuti tileke kuchita kwananga?

¹¹ Kanani kuchita kwananga. Usange tikuwonga sembe yakuwombora, tiŵavyenge maghanoghano ghakuti ‘nkhukhumbikwa kuŵikapo mtima chomene yayi kuti nileke kwananga para nayezgeka. Ningachita kwananga, paumaliro namulomba chigowokero.’ M’malo mwake, para tayezgeka kuchita chinthu chinyake chiheni, tikanenge na kujifumba kuti: ‘Pa vyose ivyo Yehova na Yesu ŵali kunichitira, kasi ningachitirachi kwananga uku?’ Ndipo tikwenera kulomba Yehova kuti watipe nkhongono kuti tileke kuthera para ‘tayezgeka.’​—Mat. 6:13.

12. Kasi tingalondezga wuli ulongozgi uwo uli pa 1 Yohane 3:16-18?

 ¹² Mutemwenge ŵabali na ŵadumbu ŵinu. Para tikutemwa ŵabali na ŵadumbu ŵithu, tikulongora kuti tikuwonga sembe yakuwombora. Chifukwa wuli? Chifukwa Yesu wakapeleka umoyo wake chifukwa cha ise pera yayi, kweniso chifukwa cha ŵabali na ŵadumbu ŵithu. Pakuti Yesu wakaŵa wakukhumbisiska kuŵafwira, wakalongora kuti wakuŵatemwa chomene. (Ŵazgani 1 Yohane 3:16-18.) Tikulongora kuti tikuŵatemwa ŵabali na ŵadumbu ŵithu kuyana na umo tikuchitira nawo vinthu. (Efe. 4:29, 31–5:2) Mwachiyelezgero, tikuŵawovwira para ŵalwara panji para ŵakusangana na masuzgo ghakuru, kusazgapo masoka gha chilengiwa. Kweni kasi tikwenera kuchita wuli usange musopi munyithu wachita panji kuyowoya chithu chinyake icho chatikhuŵazga?

13. Chifukwa wuli tikwenera kuŵa na mtima wa kugowokera?

¹³ Kasi nyengo zinyake vikumusuzgani kugowokera mubali panji mudumbu? (Lev. 19:18) Usange ni nthena, londezgani ulongozgi uwu, wakuti: “Lutilirani kuzizipizgirana na kugowokerana na mtima wose usange munthu wali na chifukwa chakudandawulira na munyake. Nga umo Yehova wakamugowokelerani na mtima wose, ndimo namweso muchitirenge.” (Kol. 3:13) Nyengo yiliyose para tagowokera mubali panji mudumbu withu, tikulongora Yehova kuti tikuwonga sembe yakuwombora kufumira pasi pamtima. Kasi tingachita wuli kuti tilutilire kuwonga chawanangwa chakufuma kwa Chiuta ichi?

14. Kasi ntchivichi chinyake icho chingatovwira kuti tiwongenge chomene sembe yakuwombora?

¹⁴ Wongani Yehova chifukwa cha sembe yakuwombora. Mudumbu munyake wa vyaka 83 zina lake Joanna uyo wakukhala ku India wakuti: “Nkhuwona kuti ntchakuzirwa chomene kuti nizunurenge za sembe yakuwombora zuŵa lililose mu malurombo ghane na kumuwonga Yehova chifukwa cha sembe iyi.” Zuŵa lililose para mukulomba pamwekha, muphalirani Yehova ivyo mukuwona kuti mwanangiska pa zuŵa ilo na kumupempha kuti wamugowokerani. Kweni para mwachita kwananga kukuru, mungakhumbikwiraso wovwiri kufuma ku ŵalara. Iwo ŵamutegherezganinge na kumupani ulongozgi wachitemwa wakufuma mu Mazgu gha Chiuta. Ŵalombenge namwe, na kupempha Yehova kuti wamugowokerani kuti muŵeso nayo paubwezi uwemi.—Yak. 5:14-16.

15. Chifukwa wuli tikwenera kupatura nyengo kuti tiŵazgenge vya sembe yakuwombora na kughanaghanirapo?

¹⁵ Mughanaghanirengepo za sembe yakuwombora. Mudumbu munyake wa vyaka 73 zina lake  Rajamani wakuti: “Para nkhuŵerenga nkhani za umo Yesu wakasuzgikira, masozi ghakuthika waka yekha.” Namweso chitima chingamukorani chomene para mungaghanaghanira umo Mwana wa Chiuta wakasuzgikira. Kweni para mukughanaghanirapo chomene pa sembe ya Yesu, vimovwiraninge kuti mumutemwenge chomene iyo kweniso Adada ŵake. Kuti mughanaghanirengepo chomene pa sembe yakuwombora, mwalekerachi kuti munozge ndondomeko kuti muyisambireso mwapadera nkhani iyi?

16. Kasi kusambizga ŵanji vya sembe yakuwombora kungatovwira wuli?(Wonani chithuzi cha pa chikopi.)

¹⁶ Sambizgani ŵanji vya sembe yakuwombora. Para nyengo zose tikuphalirako ŵanji za sembe yakuwombora, nase vikutovwira kuti tiŵe ŵakuwonga chomene. Tili na mabuku na mavidiyo ghanandi agho ghangatovwira kulongosolera ŵanji chifukwa icho Yesu wakafwira. Mwachiyelezgero, tingagwiliskira ntchito sambiro 4 mu burosha la Chiuta Wakutiphalira Uthenga Uwemi! Sambiro ili lili na mutu wakuti “Kasi Yesu Ni Njani?” Panji mungalutaso pa mutu 5 mu buku la Kasi Baibolo Likutisambizga Vichi? Mutu wake ngwakuti: “Sembe Yakuwombora—Ntchawanangwa Chapadera.” Kweniso chaka chilichose tikulongora kuti tikuwonga chomene sembe yakuwombora para tikusangikapo pa Chikumbusko cha nyifwa ya Yesu kweniso para tikuchemerako ŵanji. Ni mwaŵi wapadera chomene uwo Yehova watipa wakuti tisambizgenge ŵanji za Mwana wake!

17. Chifukwa wuli sembe yakuwombora ntchawanangwa chapadera chomene icho Yehova wali kupa ŵanthu?

¹⁷ Mwambura kukayika, tili na chifukwa chiwemi chakuwongera chomene sembe yakuwombora. Chifukwa cha sembe iyi, tingaŵa paubwezi uwemi chomene na Yehova nangauli tili ŵakwananga. Chifukwa cha sembe yakuwombora, milimo ya Dyabulosi yizamuparanyika. (1 Yoh. 3:8) Kweniso chifukwa cha sembe yakuwombora, khumbo la Yehova la pakwamba kulazga ku charu chapasi lizamufiskika. Charu chose chapasi chizamuŵa paradiso. Waliyose uyo muzamukumananga nayo mu charu ichi wazamutemwanga Yehova na kumuteŵetera. Ntheura tiyeni zuŵa lililose, tisangenge nthowa zakulongolera kuwonga sembe yakuwombora, chawanangwa chapadera chomene icho Chiuta wali kupa ŵanthu!