1-2. Kuyana na Mateyu 5:11, kasi tikwenera kuviwona wuli viyezgo?

YESU wakalayizga ŵalondezgi ŵake kuti ŵazamuŵa ŵakukondwa zanadi. Kweni wakayowoyaso kuti awo ŵakumutemwa ŵazamusangana na masuzgo. (Mat. 10:22, 23; Luka 6:20-23) Tili ŵakukondwa chomene kuti ndise ŵasambiri ŵa Khristu. Kweni kasi tikujipulika wuli para tikughanaghanira vya kususkika na ŵamumbumba yithu, kutambuzgika na boma, panji kuchichizgika kuchita chinthu chinyake chiheni na awo tikugwira nawo ntchito panji awo tikusambira nawo sukulu? Kuyowoya unenesko, para tikughanaghanira vinthu ivi, tingafipa mtima.

² Ŵanthu ŵanandi ŵakuwona kuti kutambuzgika ntchifukwa chakuti munthu wangakondwera yayi. Kweni Mazgu gha Chiuta ghakuti ndivyo tikwenera kuchita. Mwachiyelezgero, Yakobe wakalemba kuti tikwenera kutaya mtima yayi para tasangana na masuzgo, m’malo mwake tikwenera kukondwa. (Yak. 1:2, 12) Ndipo Yesu wakati tikwenera kuŵa ŵakukondwa nanga ni para tikutambuzgika. (Ŵazgani Mateyu 5:11.) Kasi tingalutilira wuli kuŵa ŵakukondwa nanga tingayezgeka? Tingasambira vinandi para tawona fundo zichoko waka mu kalata iyo Yakobe wakalembera Ŵakhristu ŵakwambilira. Chakwamba tiyeni tidumbiskane dankha masuzgo agho Ŵakhristu aŵa ŵakasangana nagho.

3. Kasi chikachitika ntchivichi nyengo yichoko waka Yakobe wati waŵa msambiri wa Yesu?

³ Yakobe munung’una wa Yesu wati waŵa waka msambiri, Ŵakhristu mu Yerusalemu ŵakamba kutambuzgika. (Mil. 1:14; 5:17, 18) Ndipo msambiri Stefano wati wakomeka, Ŵakhristu ŵanandi ŵakachimbira mu msumba ndipo “ŵakambininikira mu vigaŵa  vya Yudeya na Samariya” m’paka ku vigaŵa vyakutali, nga nkhu Kipro na Antiyoke. (Mil. 7:58–8:1; 11:19) Ŵasambiri ŵakakumana na masuzgo ghanandi chomene. Ndipouli, ŵakalutilira kupharazga makani ghawemi kulikose uko ŵakaluta, ndipo mipingo yikapangika mu vigaŵa vyose vya Ufumu wa Romu. (1 Pet. 1:1) Kufuma apa, ŵakasanganaso na masuzgo ghanyake ghanandi chomene.

4. Kasi ni masuzgo wuli ghanyake agho Ŵakhristu ŵakwambilira ŵakasangana nagho?

⁴ Ŵakhristu ŵakwambilira ŵakakumana na masuzgo ghanandi. Mwachiyelezgero, mu 50 C.E., Fumu ya Romu Kilaudiyo wakalangura kuti Ŵayuda wose ŵafumemo mu Romu. Ntheura Ŵayuda awo ŵakazgoka Ŵakhristu ŵakachichizgika kuleka vikaya vyawo na kuluta ku malo ghanyake. (Mil. 18:1-3) Cha mu 61 C.E., mpositole Paulosi wakalemba kuti ŵanthu ŵakatambuzganga ŵabali ŵake pamaso pa ŵanthu, kuŵaŵika mu jele na kuŵapoka vinthu vyawo. (Heb. 10:32-34) Ndipo nga umo vikaŵira na ŵanthu ŵanyake, Ŵakhristu nawo ŵakasuzgikanga na ukavu kweniso ulwari.​—Rom. 15:26; Fil. 2:25-27.

5. Kasi tizgorenge mafumbo wuli?

⁵ Apo Yakobe wakalembanga kalata yake pambere chaka cha 62 C.E. chindakwane, wakamanyanga makora masuzgo agho ŵabali na ŵadumbu ŵake ŵakajumphangamo. Yehova wakalongozga Yakobe kulembera kalata Ŵakhristu aŵa kuti waŵape ulongozgi uwo uŵawovwirenge kulutilira kuŵa ŵakukondwa nangauli ŵakasangananga na masuzgo. Tiyeni tisande ivyo vili mu kalata ya Yakobe na kuzgora mafumbo agha: Kasi kukondwa uko Yakobe wakalemba ni nkhu? Kasi ntchivichi chingamupoka chimwemwe Mkhristu? Ndipo kasi vinjeru, chipulikano na chikanga vingatovwira wuli kulutilira kuŵa ŵakukondwa nanga tingaŵa kuti tikukumana na masuzgo wuli?

6. Kuyana na Luka 6:22, 23, chifukwa wuli Mkhristu wakwenera kukondwa para wakusangana na masuzgo?

⁶ Ŵanthu ŵakughanaghana kuti ŵangaŵa ŵakukondwa pekha para ŵangaŵa na thupi lankhongono, ndalama zinandi na mbumba yakukondwa. Kweni chimwemwe icho Yakobe wakalemba ntchimoza mwa vipambi vyamzimu, ndipo chikuthemba pa umo vinthu viliri pa umoyo wa munthu yayi. (Gal. 5:22) Mkhristu wakuŵa wakukondwa zanadi para wakukondweska Yehova na kuyezga Yesu. (Ŵazgani Luka 6:22, 23; Kol. 1:10, 11) Chimwemwe chithu tingachiyaniska na moto uwo ukulutilira kugolera mukati mwa nyali. Moto uwu ukuŵa wakuvikilirika ku mphepo panji maji mwakuti ulutilire kugolera. Mwakuyana waka, nase tingalutilira kuŵa ŵakukondwa nanga tingakumana na masuzgo wuli pa umoyo withu. Tilutilirenge kuŵa ŵakukondwa nanga tingalwara panji kusoŵa ndalama. Ndipo nanga ŵanthu ŵangatiseka panji ŵamumbumba yithu kutisuska, tilutilirenge nipera kuŵa ŵakukondwa. M’malo mwa kuwelera nyuma, nyengo yiliyose para ŵanthu ŵakutisuska, chimwemwe chithu chikulutilira kugolera chomene. Masuzgo agho tikukumana nagho chifukwa cha chipulikano chithu ghakulongora kuti ndise nadi ŵasambiri ŵaunenesko ŵa Khristu. (Mat. 10:22; 24:9; Yoh. 15:20) Lekani Yakobe wakalemba kuti: “Mukondwenge ŵabali ŵane para mukukumana na viyezgo vyakupambanapambana.”​—Yak. 1:2.

7-8. Chifukwa wuli chipulikano chithu chikukhora para tayezgeka?

⁷ Yakobe wakayowoya chifukwa chinyakeso icho Ŵakhristu ŵakuŵikirapo mtima kuzizipizga viyezgo vikuru. Wakati: “Para chipulikano chinu chayezgeka chikubaba kuzizipizga.” (Yak. 1:3) Viyezgo tingaviyelezgera na moto uwo ŵakotchera visulo kuti ŵavipange kuŵa vyakuthwa. Para chisulo chawotcheka na kupora, chikuŵa chakukhora chomene. Mwakuyana waka, para tazizipizga viyezgo, chipulikano chithu nacho chikukhora chomene. Lekani Yakobe wakalemba kuti: “Zomerezgani kuzizipizga kuti kufiske mulimo wake, mwakuti muŵe ŵakukwana na ŵambura kalema mu vyose, ŵambura kupeleŵera mu kanthu kalikose.” (Yak. 1:4) Kumanya fundo yakuti viyezgo vikovwira kuti chipulikano chithu chiŵe chakukhora, kupangiskenge kuti tizizipizgenge viyezgo mwakukondwa.

⁸ Mu kalata yake, Yakobe wakayowoyaso vinthu ivyo vingapangiska kuti tileke kuŵa ŵakukondwa. Kasi ni vinthu wuli, ndipo tingavitonda wuli?

9. Chifukwa wuli tikukhumbikwira vinjeru?

⁹ Icho chingapangiska kuti tileke kukondwa: Para tikumanya yayi icho tingachita. Usange tikujumpha mu masuzgo, tikwenera kulaŵiska kwa Yehova kuti watovwire kusankha vinthu ivyo wangakondwa navyo, ivyo vingawovwira ŵabali na ŵadumbu ŵithu kweniso ivyo vingatovwira kuti tilutilire kuŵa ŵakugomezgeka kwa Yehova. (Yer. 10:23) Tikukhumbikwira vinjeru kuti timanye  icho tingachita kweniso kumanya ivyo tingaphalira awo ŵakutisuska. Para tikumanya yayi chakuti tingachita, tingagongowa, ndipo tingaleka kuŵa ŵakukondwa.

10. Kasi lemba la Yakobe 1:5, likutiphalira kuti tikwenera kuchita wuli kuti tiŵe na vinjeru?

¹⁰ Icho mungachita: Lombani vinjeru kwa Yehova. Kuti tizizipizge viyezgo na kulutilira kuŵa ŵakukondwa, chakwamba tikwenera kulomba Yehova kuti watipe vinjeru kuti tisankhe makora vinthu. (Ŵazgani Yakobe 1:5.) Kasi tikwenera kuchita wuli para tikuwona kuti Yehova wakuzgora luŵiro yayi lurombo lwithu? Yakobe wakayowoya kuti tikwenera ‘kulutilira kulomba’ Chiuta. Yehova wakuvuka yayi kutegherezga para tikulutilira kumulomba vinjeru. Iyo watikwiyirenge yayi. Dada withu wakuchanya “wakupeleka mwawanangwa” para talomba vinjeru kuti tizizipizge viyezgo. (Sal. 25:12, 13) Iyo wakuwona masuzgo agho tili nagho, kweniso vikumukhwaska para tikusuzgika, ndipo ngwakukhumbisiska kutovwira. Nakuti ivi ndivyo vikutipangiska kuti tiŵenge ŵakukondwa chomene. Kweni kasi Yehova wakutipa wuli vinjeru?

11. Kasi tikwenera kuchitaso vichi kuti tiŵe na vinjeru?

¹¹ Yehova wakutipa vinjeru kwizira mu Mazgu ghake. (Zinth. 2:6) Kuti tiŵe na vinjeru, tikwenera kusambira Mazgu gha Chiuta kweniso mabuku ghithu ghakulongosora Baibolo. Kweni tikwenera kuchita vinandi padera pakusambira waka. Tikwenera kuchita ivyo Chiuta wakutiphalira. Yakobe wakalemba kuti: “Muchitenge ivyo mazgu ghakuyowoya, ŵakupulika waka yayi.” (Yak. 1:22) Para tikulondezga ulongozgi wakufuma kwa Yehova, tikuŵa ŵamtende, ŵakupulikiska vinthu ndiposo ŵalusungu. (Yak. 3:17) Mikhaliro iyi yingatovwira kuzizipizga suzgo lililose uku tikulutilira kuŵa ŵakukondwa.

12. Chifukwa wuli ntchakuzirwa kulimanya makora Baibolo?

¹² Mazgu gha Chiuta ghali nga ni gilasi. Ghakutovwira kumanya apo tikwenera kusintha kweniso umo tingasinthira. (Yak. 1:23-25) Mwachiyelezgero, para tasambira Mazgu gha Chiuta,  tingamanya kuti tikukhumbikwira kukorako ukali withu. Na wovwiri wa Yehova, tingasambira umo tingaŵira ŵakuzika para ŵanthu ŵatikwiyiska panji para masuzgo ghatizingizga. Chifukwa usange tili ŵakuzika tikuzizipizga makora masuzgo agho tikusangana nagho. Tikughanaghana makora kweniso tikusankha makora vinthu. (Yak. 3:13) Ntheura ntchakuzirwa chomene kuti tilimanyenge makora Baibolo.

13. Chifukwa wuli tikwenera kusambira viyelezgero vya ŵanthu awo ŵali kulembeka mu Baibolo?

¹³ Nyengo zinyake tikumanya kuti chinthu ichi ntchiheni pamanyuma pakuti tanangiska kale vinthu. Kweni iyi ni nthowa yiwemi yayi yakusambilira. Nthowa yiwemi yakusangira vinjeru, nkhusambirako ku ivyo ŵanji ŵakachita makora kweniso ivyo ŵakatondeka kuchita makora. Lekani Yakobe wakutichiska kuti tikwenera kusambirako ku ŵanthu ŵa viyelezgero viwemi awo ŵali kulembeka mu Baibolo nga ni Abrahamu, Rahabi, Yobu, na Eliya. (Yak. 2:21-26; 5:10, 11, 17, 18) Ŵateŵeti ŵakugomezgeka ŵa Yehova aŵa, ŵakazizipizga masuzgo agho ghakatenge ghaŵapokenge chimwemwe. Chifukwa chakuti ŵakafiska kuzizipizga, vikulongora kuti na wovwiri wa Yehova nase tingafiska.

14-15. Chifukwa wuli tikwenera kumazga ivyo tikukayikira?

¹⁴ Icho chingapangiska kuti tileke kukondwa. Kukayikira ivyo tikugomezga. Nyengo na nyengo, tingatondeka kupulikiska fundo yinyake iyo Baibolo likuyowoya. Panji Yehova wangazgora malurombo ghithu umo takhazgiranga yayi. Ivi vingatipangiska kuti tambe kukayikira. Para tingalekelera ivyo tikukayikira, vingalopweska chipulikano chithu na kunanga ubwezi withu na Yehova. (Yak. 1:7, 8) Ndipo vingatipangiska nanga nkhutaya chigomezgo chithu cha munthazi.

¹⁵ Mpositole Paulosi wakayaniska chigomezgo chithu cha munthazi na nyanguru. (Heb. 6:19) Nyanguru wakovwira sitima panyengo ya chimphepo kuti yileke kwenda na kutimba ku malibwe. Kweni nyanguru wakovwira pekha para tcheni uyo wakukora ku sitima wakudumuka yayi. Nga umo mlosko ukunangira tcheni wa nyanguru, ivyo tikukayikira navyo para tikuvilekelera waka, mbwenu vilopweskenge chipulikano chithu. Ndipo pamanyuma para tasangana na masuzgo, tingataya chipulikano icho tili nacho mwa Yehova chakuti wazamufiska malayizgo ghake. Para tataya chipulikano, ndikuti chigomezgo nacho tatayaso. Nga umo Yakobe wakayowoyera, uyo wakukayikakayika “wali nga ni jigha la nyanja ilo na mphepo likuyeghekera uku na uku” (Yak. 1:6) Munthu wanthena wangaŵapo wakukondwa yayi.

16. Kasi tikwenera kuchita vichi para tamba kukayikira?

¹⁶ Icho chingawovwira: Sangani nthowa ya umo mungamazgira ivyo mukukayikira na kukhozga chipulikano chinu. Chitanipo kanthu mwaluŵiro. Mu nyengo ya ntchimi Eliya, ŵanthu ŵa Yehova ŵakamba kukayikira ivyo ŵakagomezganga. Eliya wakaŵaphalira kuti: “Kasi mukolenge manthanga m’paka pawuli? Usange Yehova ni Chiuta waunenesko, mulondezgani. Kweni usange ni Baala, mulondezgani!” (1 Mathe. 18:21) Mazuŵa ghano napo tikwenera kuchitapo kanthu mwaluŵiro. Tikwenera kufufuza kuti tikhorwe kuti Yehova ndiyo ni Chiuta waunenesko, Baibolo ni Mazgu ghake, kweniso kuti Ŵakaboni ŵa Yehova mbanthu ŵake. (1 Tes. 5:21) Chitani vyose ivyo mungafiska kuti mumazge ivyo mukukayikira na kukhozga chipulikano chinu. Usange tikukhumba wovwiri, tingapempha ŵalara. Tikwenera kuchitapo kanthu mwaluŵiro mwakuti tilutilire kuŵa na chimwemwe apo tikuteŵetera Yehova.

17. Kasi chikuchitika ntchivichi para tatondeka kuŵa na chikanga?

¹⁷ Icho chingapangiska kuti tileke kuŵa ŵakukondwa: Kulopwa. Mazgu gha Chiuta ghakuti: “Usange ukulopwa mu zuŵa la soka, nkhongono zako ziŵenge zichoko.” (Zinth. 24:10) Lizgu Lachihebere ilo lili kung’anamulika kuti “kulopwa” lingang’anamura “kuleka kuŵa na chikanga.” Para mwatondeka kuŵa na chikanga, mwaluŵiro mulekenge kuŵa ŵakukondwa.

18. Kasi kuzizipizga chikung’anamurachi?

 ¹⁸ Icho chingawovwira: Thembani Yehova kuti wamupani chikanga kuti muzizipizge. Tikwenera kuŵa na chikanga kuti tizizipizge masuzgo. (Yak. 5:11) Lizgu ilo Yakobe wakagwiliskira ntchito pa lemba ili, ilo lili kung’anamulika kuti “kuzizipizga,” likuyowoya za munthu uyo wakulutilira kwimilira pa malo ghamoza kwambura kusunkhunyika. Tingaghanaghanira za msilikari wa chikanga uyo wimilira pa malo ghake kulimbana na mulwani, ndipo wakusuntha yayi nanga vinthu vingaŵa kuti vyathina chomene.

19. Kasi tingasambirako vichi kwa mpositole Paulosi?

¹⁹ Mpositole Paulosi ntchiyelezgero chiwemi pa nkhani ya chikanga na kuzizipizga. Nyengo zinyake wakaŵanga wakulopwa. Kweni wakazizipizganga chifukwa chakuti wakathembanga Yehova kuti wamupenge nkhongono zakuzizipizgira. (2 Kor. 12:8-10; Fil. 4:13) Nase tingaŵa na nkhongono zanthena izi kweniso chikanga usange mwakujiyuyura tazomerezga kuti tikukhumbikwira wovwiri wa Yehova.​—Yak. 4:10.

20-21. Kasi tingaŵa na chigomezgo wuli?

²⁰ Tili na chigomezgo chose kuti masuzgo agho tikukumana nagho ntchilango chakufuma kwa Yehova yayi. Yakobe wakutisimikizgira kuti: “Para munthu wakuyezgeka, waleke kuyowoya kuti: ‘Nkhuyezgeka na Chiuta.’ Pakuti Chiuta wangayezgeka na vinthu viheni yayi, ndipo iyo wakuyezga munthu na vinthu viheni yayi.” (Yak. 1:13) Para takhorwa kuti fundo iyi njaunenesko, tikuŵa paubwezi na Adada ŵithu ŵakuchanya.​—Yak. 4:8.

²¹ Yehova ‘wakusintha yayi.’ (Yak. 1:17) Wakawovwira Ŵakhristu ŵakwambilira apo ŵakasangananga na masuzgo, ndipo nase mazuŵa ghano watovwirenge. Mulombani Yehova kufumira pasi pamtima, kuti wamovwirani kuti muŵe na vinjeru, chipulikano, na chikanga. Wazgorenge malurombo ghinu. Para mwachita nthena, muŵenge na chigomezgo chose kuti wamovwiraninge kuti mulutilire kuŵa na chimwemwe apo mukuzizipizga viyezgo.