Chaka cha 1920 chati chajumpha, ŵapapi ŵane ŵakasambira unenesko. Pa nyengo iyi, ŵakaŵa kuti ŵandatorane. Ine nkhababika mu 1939. Apo nkhaŵa muchoko, tikakhalanga ku England ndipo nkhalutanga ku maungano na ŵapapi ŵane, paumaliro nkhalembeska mu Sukulu ya Uteŵeti wa Chiuta. M’paka muhanya uno nichali kukumbuka nkhani yane yakwamba iyo nkhapika. Nkhachita kwimilira pa bokosi kuti niwonenge makora pa sitandi. Panyengo iyo nkhaŵa na vyaka 6 ndipo nkhaŵa na wofi chomene para nkhulaŵiska ŵategherezgi, chifukwa ŵanyake mwa iwo ŵakaŵa ŵalaraŵalara chomene.

Mu upharazgi, adada ŵakanilemberanga pa pepara ivyo ningadumbiskana na ŵanthu. Apo nkhaŵa na vyaka 8 nkhaluta nekha kakwamba mu upharazgi. Nkhaŵa wakukondwa chomene kuti mweneko wanyumba munyake wakaŵerenga ivyo vikaŵa pa pepara lira adada ŵakanilembera, ndipo nyengo yineyiyo wakazomera kupokera buku la mutu wakuti “Mulungu Akhale Woona”! Nati nafuma apo nkhachimbira kukaŵaphalira adada. Upharazgi na maungano vikanikondweskanga chomene ndipo vikanovwira kuŵa na khumbo la kuteŵetera Yehova nyengo zose.

Nkhamba kulitemwa chomene Baibolo adada ŵati ŵanilembeskera kuti nipokerenge Gongwe la Mulinda mwezi uliwose. Nkhaŵikangapo mtima kuŵerenga nyengo yeneyiyo magazini yiliyose iyo napokera. Nkhamba kumugomezga chomene Yehova ndipo pamanyuma nkhajipeleka kwa iyo.

Mu 1950, ine pamoza na mbumba yakwithu tikaluta ku ungano wa Theocracy’s Increase uwo ukachitikira ku New York. Pa Chinayi, Ogasiti 3 mutu wa ungano ukaŵa wakuti “Missionary Day.” Pa zuŵa ili Mubali Carey Barber, uyo wakateŵeterapo mu Wupu Wakulongozga ndiyo wakayowoya nkhani ya ubatizo. Wati wafumba mafumbo ghaŵiri gha ubatizo agho ghakaŵa kuumaliro wa nkhani yake, tikayimilira  ndipo nane nkhazgora kuti “Enya!” Panyengo iyo nkhaŵa na vyaka 11 kweni nkhamanya kuti nasankha chinthu chakuzirwa chomene. Ndipouli, nkhawopanga kunjira mu maji chifukwa nkhamanyanga yayi kuskamba panji kuti kushuwa. Adada ŵachoko ŵakanipelekezga ku malo ghakubatizikira ndipo ŵakaniphalira kuti vyose vyendenge makora waka. Nakuti vikenda nadi makora nangauli malundi yane yakafikanga yayi pasi pa maji. Mwakuti ŵabali ŵakachitanga kupizgana waka, munyake wakanibatiza, ndipo munyake wakaninyamura kufuma mu maji. Kufuma waka pa zuŵa lakuzirwa ili, Yehova walutilira kunyoloska nthowa zane.

Nati namara sukulu, nkhakhumbanga kwamba upayiniya, kweni ŵasambizgi ŵane ŵakanichiskanga kuti nilute ku yunivesite. Nkhaŵapulikira na kuluta ku yunivesite, kweni pamanyuma nkhawamo kuti ningaŵa yayi na chipulikano chakukhora panyengo yimoza pera na kuchita masambiro ghapachanya, so nkhasankha kuwerako ku yunivesite. Nkhalomba kwa Yehova pa nkhani iyi ndipo mwantchindi nkhalembera kalata asambizgi ŵane kuŵamanyiska kuti nilekenge sukulu. Na chigomezgo chose mwa Yehova, nyengo yeneyiyo nkhamba upayiniya.

Mu Julayi 1957 nkhamba uteŵeti wanyengozose mu tawuni ya Wellingborough. Nkhapempha ŵabali ŵa pa Beteli ya London kuti ŵaniphalireko mubali uyo wachitako upayiniya kwa nyengo yitali kuti nkhaŵire nayo lumoza. Mubali Bert Vaisey wakanisambizga vinthu vinandi. Wakalimbikiranga chomene kupharazga ndipo wakanovwira kuŵa na ndondomeko yiwemi yakupharazgira. Mu mpingo withu mukaŵa ine, Mubali Vaisey na ŵadumbu ŵachilara 6. Kunozgekera maungano na kusangikapo nyengo zose, kukanovwira kugomezga chomene Yehova kweniso kulongora chipulikano chane.

Nati nakhala mu jele nyengo yichoko waka chifukwa chakukana kunjira usilikari, nkhakumana na Barbara, mudumbu uyo wakaŵa mupayiniya wapadera. Tikatorana mu 1959 ndipo tikaŵa ŵakunozgeka kuluta kulikose uko ŵatituma. Pakwamba ŵakatituma ku Lancashire cha kumanjiliro gha dazi kwa England. Pamanyuma, mu Janyuwale 1961, nkhachemeka kuti nkhanjire Sukulu ya Uteŵeti wa Ufumu ku Beteli ya London. Sukulu iyi yikaŵa ya mwezi umoza. Nkhazizwa chomene kuti paumaliro wa sukulu iyi, nkhapika mulimo wakwendakwenda. Kwa masabata ghaŵiri, nkhasambizgika mulimo uwu, na mulaŵiliri wadera mu msumba wa Birmingham, ndipo tikaŵira lumoza na Barbara. Kufuma apo tikaweleraso ku uteŵeti withu kwenekura ku Lancashire na Cheshire

Nyengo yinyake apo tikaŵa pa holide mu Ogasiti 1962, tikapokera kalata kufuma ku ofesi ya munthavi. Mukati mukaŵa mafomu gha Sukulu ya Giliyadi. Tikati talomba, Barbara na ine tikasayina mafomu agha na kughatumaso mwaluŵiro ku ofesi ya munthavi nga umo ŵakatiphalilira. Pakati pajumpha myezi 5, tikanyamuka kuluta ku Brooklyn, New York, kukanjira kilasi la nambara 38 la Sukulu ya Giliyadi iyo tikasambira kwa myezi 10.

Ku Sukulu ya Giliyadi, tikasambira vinandi vyakukhwaskana na Chiuta, gulu lake, kweniso vyakukhwaskana na ŵabali na ŵadumbu pa charu chose. Pa nyengo iyi tikaŵa kuti tichali na vyaka vya m’ma 20, ndipo tikasambirako vinandi ku awo tikanjira nawo kilasi limoza la sukulu iyi. Nkhaŵaso na  mwaŵi wakuteŵetera lumoza na Mubali Fred Rusk uyo wakaŵaso yumoza wa ŵasambizgi ŵithu. Fundo yimoza iyo wakatemwanga kudidimizgapo njakuti nyengo zose para tikupeleka ulongozgi, tikwenera kuwoneseska kuti ukufuma mu Malemba. Pa ŵabali awo ŵakayowoyanga nkhani panyengo ya sukulu, pakaŵa ŵabali awo ŵakaŵa kuti ŵachita vinandi nga Mubali Nathan Knorr, Frederick Franz, na Karl Klein. Kweniso tikasambirako vinandi kwa mubali wakujiyuyura A. H. Macmillan. Mu nkhani iyo wakayowoya, wakatisambizga umo Yehova wakawovwilira ŵanthu ŵake mu vyaka vyakusuzga kufuma mu 1914 m’paka kukwambilira kwa 1919, apo gulu likasangana na masuzgo ghanandi

Apo tikaŵa pafupi kumalizga sukulu, Mubali Knorr wakaphalira Barbara na ine kuti tamuteŵetera ku Burundi ku Africa. Nyengo yeneyiyo tikaluta ku layibulare ya pa Beteli kuti tikawone unandi wa ŵapharazgi ku Burundi mu Buku la Pachaka. Kweni tikazizwa chomene kuti palije apo tikasangapo chiŵelengero cha ŵapharazgi awo ŵakaŵa ku Burundi. Apa tikamanya kuti tikuluta ku malo uko mulimo wakupharazga undachitikeko. Kweniso tikamanyanga vinandi yayi vya ku Africa. Tikafipa mtima chomene. Kweni tikati talomba, mtima ukakhazikika.

Pa uteŵeti withu uphya uwu, chilichose chikaŵa chachilendo. Vinthu nga mphepo za ku malo uku, ukhaliro na chiyowoyero. Kweniso tikeneranga kusambira Chifurenchi. Tikenerangaso kusanga malo ghakukhala. Pati pajumpha mazuŵa ghaŵiri kufuma apo tikafikira ku malo agha, munyithu uyo tikanjilira lumoza Sukulu ya Giliyadi, Harry Arnott, wakatiyendera apo wakaweleranga ku Zambia uko wakateŵeteranga. Wakatovwira kusanga nyumba iyo yikaŵaso nyumba yithu yakwamba pakuŵa ŵamishonale. Kweni nyengo yichoko waka yati yajumphapo, tikamba kususkika na ŵalara ŵa boma, awo ŵakamanyanga chilichose yayi chakukhwaskana na Ŵakaboni ŵa Yehova. Tati tamba waka kukondwa na uteŵeti withu, ŵalara ŵa boma ŵakatiphalira kuti tingakhala yayi mu charu ichi para tilije vikalata vyakuzomerezgeka vyakugwilira ntchito. Chachitima ntchakuti tikafumako nadi ku charu ichi na kuluta ku charu chinyake, ndipo panyengo iyi tikaluta ku Uganda.

Tikachitanga wofi kuluta ku Uganda chifukwa tikaŵavya vikalata vyakwendera, kweni tikagomezga Yehova. Mubali munyake wa ku Canada uyo wakateŵeteranga ku malo ghakusoŵa ku Uganda, wakatovwira kulongosolera ŵalara ŵa boma awo ŵakuwona vya ŵanthu ŵakunjira mu charu umo vinthu vikaŵira, ndipo ŵakatipa myezi yichoko waka kuti tinozge vinthu vyakukhumbikwira kuti tiŵe ŵakwenelera  kukhala mu charu ichi. Ivyo vikachitika apa, vikatovwira kumanya kuti Yehova wakaŵa nase.

Umo vinthu vikaŵira ku Uganda, vikapambananga na ku Burundi. Uku ntchito yakupharazga yikachitikanga kale nangauli mu charu ichi mukaŵa Ŵakaboni 28 pera. Mu chigaŵa chithu chakupharazgako, tikasangananga na ŵanthu ŵanandi awo ŵakayowoyanga Chingelezi. Kweni kuti tovwire makora ŵanthu ŵakunweka kuluta panthazi, tikawona kuti tikwenera kusambirako chiyowoyero chimoza cha ku malo agha. Tikamba kupharazga mu msumba wa Kampala umo ŵanthu ŵanandi ŵakayowoyanga Chiluganda, ndipo tikawona kuti tambe kusambira chiyowoyero ichi. Vikatitolera vyaka vinandi kuti tiyowoyenge makora chiyowoyero ichi, kweni vikatovwira chomene kuti tichitenge makora mulimo wakupharazga. Tikamba kumanya makora ivyo ŵasambiri ŵithu ŵa Baibolo ŵakakhumbikwiranga kusambira. Ŵasambiri ŵithu ŵa Baibolo ŵati ŵamanya kuti tikaŵatemwanga, ŵakamba kutigomezga ndipo ŵakatiphalira umo ŵakajipulikiranga na ivyo ŵakasambiranga.

Tikakondwanga chomene para tawovwira ŵanthu kusambira unenesko. Kweniso chimwemwe chithu chikasazgikira tati tapempheka kuchita mulimo wakwendakwenda mu charu ichi. Mwakuyana na ulongozgi uwo ukafuma ku ofesi ya munthavi ya Kenya, tikenda malo ghanandi mu charu ichi kuti timanye uko ŵapayiniya ŵapadera ŵakakhumbikwiranga chomene. Ndipo chakukondweska chomene ntchakuti nanga ŵangaŵa awo ŵakaŵa kuti ŵandakumanepo na Ŵakaboni, ŵakatipokeleranga makora chomene. Ŵakatipangiskanga kuti tiŵe ŵakufwatuka ndipo ŵakatinozgeranga chakurya

Tikaŵaso na ulendo unyake. Nkhenda mazuŵa ghaŵiri pa sitima ya pamtunda kufuma ku Kampala m’paka ku Kenya ku dowoko la Mombasa, kufuma apo nkhakwera sitima m’paka ku virwa vya Seychelles ivyo vili mu Indian Ocean. Pamanyuma, kufuma mu 1965 m’paka 1972, tikamba kwendera lumoza na Barbara pa kukendera ku Seychelles uko tikalutanga kanandi waka. Panyengo iyi, kukaŵa waka ŵapharazgi ŵaŵiri, kweni nyengo yati yajumphapo kukaŵa kagulu, ndipo pamanyuma ukazgoka mpingo. Maulendo ghanyake nkhalutanga kukendera ŵabali ku Eritrea, Ethiopia, na Sudan.

Ku Uganda, vinthu vikasintha chomene ŵasilikari ŵati ŵapoka boma. Mwakuti vyaka vyakulondezgapo vikaŵa vyakusuzga kukhala makora, kweni vikanisambizga kuti ntchakuzirwa chomene kulondezga fundo ya mu Baibolo yakuti tipulikirenge ŵamazaza. (Mrk. 12:17) Ulendo unyake, ŵanthu wose ŵa mu vyaru vinyake awo ŵakakhalanga mu Uganda ŵakeneranga kuluta kukalembeska ku ofesi yiliyose ya polisi ya kufupi na uko ŵakukhala. Nyengo yeneyiyo tikakalembeska. Mazuŵa ghachoko waka ghati ghajumphapo, apo tikajumphanga mu msumba wa Kampala pa galimoto ine na mishonale munyake, ŵapolisi ŵachisisi ŵakiza pafupi nase. Tikawopa chomene. Iwo ŵakaghanaghananga kuti tiza kuzakafufuza vinthu mwachisisi mu charu chawo ndipo ŵakatitolera ku ofesi yikuru ya polisi uko tikakaŵalongosolera kuti ndise ŵamishonale ndipo tikuchita vinthu mwamtende. Tikaŵaphaliraso kuti tikalembeska kale mazina ghithu ku polisi kweni ŵakatipulika yayi. Ntheura tikakakika ndipo ŵakakatiŵika ku polisi iyo yikaŵa pafupi na nyumba ya ŵamishonale. Mtima withu ukakhala mu malo mpolisi mulara pa ofesi iyi wati watikumbukira kuti tikalembeska, ndipo wakaphalira awo ŵakatikora kuti ŵatileke.

Nyengo iyo, kanandi tikasangananga na masuzgo, chomene para tafika pa lodibuloku izo pali ŵasilikari awo ŵakaŵanga kuti ŵamwa chomene moŵa. Kweni nyengo zose tikalombanga ndipo para tajumpha mitima yikakhalanga pasi. Chachitima ntchakuti mu 1973 ŵamishonale wose ŵa mu vyaru vinyake ŵakaphalirika kuti ŵafumemo mu Uganda.

 Apa uteŵeti withu ukasinthaso, ndipo tikaluta ku Côte d’Ivoire, charu icho chili ku West Africa. Uku kukaŵa kusintha kukuru chomene kwa ise. Apa tikeneranga kuzgoŵeraso umoyo wa ŵanthu ŵa uku, kwambiraso kuyowoya Chifurenchi nyengo zose kweniso kuzgoŵerana na ŵamishonale ŵanyithu awo ŵafuma mu vyaru vyakupambanapambana. Ndipouli, tikawonaso kuti Yehova wakutidangilira, chifukwa ŵanthu ŵa mitima yiwemi mwaluŵiro ŵakamba kuchitapo kanthu para ŵapulika uthenga uwemi. Tose tikawona umo kugomezga Yehova, kukanyoloskera nthowa zithu.

Mwamabuchi Barbara ŵakamusanga na kansa. Tikalutanga kukaya kwithu ku Europe kanandi waka kuti tikasange wovwiri wa chipatala, kweni kufika mu 1983 vikalongolerathu kuti tilutizgenge yayi uteŵeti withu ku Africa. Tose tikadandawura chomene.

Nthenda ya Barbara yikalutilira apo tikateŵeteranga pa Beteli ya London ndipo paumaliro wakafwa. Mbumba ya Beteli yikanovwira chomene. Banja linyake likanovwira kusintha vinyake na kulutilira kugomezga Yehova. Pamanyuma, nkhakumana na mudumbu munyake uyo wakenderanga pa Beteli kweniso wakateŵeterapo nga mupayiniya wapadera ndipo wakamutemwanga chomene Yehova. Ann na ine tikatorana mu 1989, ndipo tateŵetera pa Beteli ya London kufuma waka pa nyengo iyi.

Kufuma mu 1995 m’paka 2018 nateŵeterapo nga wakwimira likuru lithu la pa charu chose (uyo kale wakachemekanga kuti wakwendera maofesi gha munthavi), ndipo nendera vyaru pafupifupi 60. Pa ulendo uliwose, nkhawonanga kuti Yehova wakutumbika ŵanthu ŵake vilije kanthu kuti ŵakusangana na masuzgo wuli pa umoyo wawo.

Mu 2017, ulendo unyake nkhalutaso ku Africa. Nkhakondwa chomene kuluta na Ann ku Burundi kakwamba mu umoyo wake, ndipo tose tikazizwa chomene kuwona unandi wa ŵanthu awo ŵasambira unenesko. Ndipo ku malo gheneghara nkhapharazganga nyumba na nyumba mu 1964, pasono kuli nyumba ya Beteli, ndipo mu charu ichi sono muli ŵapharazgi ŵakujumpha 15,500.

Nkhakondwaso chomene apo nkhapokera ndondomeko ya vyaru ivyo nenderenge mu 2018. Pa ndondomeko iyi pakaŵa charu cha Côte d’Ivoire. Tikati tafika mu msumba ukuru wa Abidjan vikaŵa nga nawelera waka kukwithu. Apo nkhawonanga manambara gha foni gha awo ŵakuteŵetera pa Beteli, nkhasanga kuti mubali uyo wakagonanga mu chipinda cha pafupi na chipinda cha ŵalendo icho tikafikiramo, ni Mubali Sossou. Nkhakumbukira kuti Mubali Sossou wakateŵeterapo nga mulaŵiliri wa msumba apo ine nkhaŵa ku Abidjan. Kweni wakaŵa uyo nkhaghanaghananga yayi, wakaŵa mwana wake.

Yehova wakufiska nadi mazgu ghake. Mu masuzgo ghose agho najumphamo, vyanisambizga kuti para tikugomezga Yehova, wakutinyoloskera nadi nthowa zithu. Sono nkhukhumba kulutilira kwenda pa nthowa iyi, iyo yizamuŵara chomene mu charu chiphya.​—Zinth. 4:18.