1. Chifukwa wuli tikukhumbikwira kulongozgeka na Yehova? Yowoyani chiyelezgero.

 TIYELEZGERE kuti mukwenda mu nkhorongo ndipo mwasoŵa. Ndipo malo agha ngakofya chifukwa muli vinyama vyakofya, minga, vimabuwu na malibwe. Mungawonga chomene usange mungasanga munthu uyo wakumanyako makora kuti wamulongozgani chifukwa wakumanya umo ni mwakofya kweniso umo mungagegera ulwani. Charu ichi chili nga ni nkhorongo iyi. Muli vinthu vyakofya vinandi ivyo vingananga ubwezi withu na Yehova. Kweni ise tili na Mulongozgi wakufikapo, Yehova. Wakutivikilira ku vinthu vyakofya ivi, ndipo wakutilongozgera ku nthowa yakuluta ku umoyo wamuyirayira.

2. Kasi Yehova wakutilongozga wuli?

² Kasi Yehova wakutilongozga wuli? Chakwamba wakutilongozga kwizira mu Mazgu ghake, Baibolo. Ndipouli, wakugwiliskiraso ntchito ŵanthu. Mwachiyelezgero, wakugwiliskira ntchito “muzga wakugomezgeka na wavinjeru,” kuti watipe chakurya chauzimu icho chikutovwira kusankha vinthu mwavinjeru. (Mat. 24:45) Yehova wakugwiliskiraso ntchito ŵanalume ŵanyake ŵakwenelera kutilongozga. Mwachiyelezgero, ŵalaŵiliri ŵadera na ŵalara ŵa mpingo ŵakutikhozga na kutipa ulongozgi uwo ukutovwira kuzizipizga masuzgo. Tikumuwonga chomene Yehova kuti wakutipa ulongozgi wakovwira mu nyengo zakusuzga izi. Ukutovwira kuti tilutilire kuŵa paubwezi na iyo na kulutilira kuŵa pa nthowa yakuya ku umoyo.

3. Kasi tidumbiskanenge vichi mu nkhani iyi?

³ Nangauli vili nthena, nyengo zinyake chingatiŵira chakusuzga kulondezga ulongozgi wa Yehova, chomenechomene usange wafuma ku ŵanthu ŵanyithu awo nawo mbambura kufikapo. Chifukwa wuli? Ulongozgi ungaŵa kuti ukususkana na ivyo ise tikutemwa panji kutinkha. Panji tingawona kuti ulongozgi uwo tapokera ngwambura  kupulikikwa, na kudumura mu mtima withu kuti ulongozgi uwo ukwenera kuti wafuma kwa Yehova yayi. Pa nyengo zanthena izi, ndipo tikukhumbikwira kugomezga chomene kuti Yehova ndiyo wakulongozga ŵanthu ŵake, kweniso kuti nyengo zose ntchiwemi kulondezga ulongozgi wake. Kuti timugomezgenge chomene Yehova, mu nkhani iyi tiwonenge (1) umo Yehova wakalongozgeranga ŵanthu ŵake mu nyengo yakale, (2) umo wakutilongozgera mazuŵa ghano, kweniso (3) uwemi uwo ukuŵapo para tikulondezga ulongozgi wake.

UMO YEHOVA WAKALONGOZGERANGA ŴAISRAYELI

4-5. Kasi Yehova wakalongora wuli kuti wakagwiliskiranga ntchito Mozesi pakulongozga Ŵaisrayeli? (Wonani chithuzi.)

⁴ Yehova wakasora Mozesi kuti wakafumiske Ŵaisrayeli mu Eguputo. Ndipo wakaŵapa Ŵaisrayeli ukaboni wakuwoneka na maso wakuti wakaŵalongozganga kwizira mwa Mozesi. Mwachiyelezgero, muhanya wakaŵalongozganga na mzati wa bingu, ndipo usiku wakaŵalongozganga na mzati wa moto. (Eks. 13:21) Mozesi wakalondezganga mzati uwu, uwo iyo na Ŵaisrayeli wose ukaŵalongozgera ku Nyanja Yiswesi. Ŵaisrayeli ŵakachita wofi chomene chifukwa ŵakawona kuti ŵalije kwakuchimbilira, kunthazi kwawo kukaŵa Nyanja Yiswesi ndipo kumasinda kukizanga ŵasilikari ŵa Ŵaeguputo. Ŵakamba kumulilira Mozesi kuti wakananga kwiza nawo ku Nyanja Yiswesi. Kweni Mozesi wakananga yayi. Yehova ndiyo wakapangiska Mozesi kuti walongozgere ŵanthu ŵake ku malo agha. (Eks. 14:2) Ndipo pamanyuma Chiuta wakaŵaponoska munthowa yakuzizwiska chomene.—Eks. 14:​26-28.

⁵ Kwa vyaka 40, Mozesi wakalutilira kugomezga mzati wa bingu pakulongozga ŵanthu ŵa Chiuta mu mapopa. a Kwakanyengo, Yehova wakaŵika mzati wa bingu pachanya pa hema la Mozesi, apo Ŵaisrayeli wose ŵakawuwonanga. (Eks. 33:​7, 9, 10) Yehova wakayowoyanga na Mozesi kwizira mu mzati uwu, ndipo kufuma apo Mozesi wakaphaliranga Ŵaisrayeli ivyo Yehova wayowoya. (Sal. 99:7) Ŵaisrayeli ŵakaŵa na ukaboni wakukhorweska wakuti Yehova wakaŵalongozganga kwizira mwa Mozesi.

6. Kasi Ŵaisrayeli ŵakachita wuli na ulongozgi uwo ŵakapokera kufuma kwa Yehova? (Maŵazgo 14:​2, 10, 11)

⁶ Chachitima ntchakuti Ŵaisrayeli ŵanandi ŵakakana ukaboni wakuwoneka na maso uwu, wakuti Yehova wakayowoyanga kwizira mwa Mozesi. (Ŵazgani Maŵazgo 14:​2, 10, 11.) Mwakuwerezgawerezga, ŵakakana fundo yakuti Yehova wakuŵalongozga kwizira mwa Mozesi. Pa chifukwa ichi, Yehova wakazomerezga yayi kuti muwiro uwu ukanjire mu Charu cha Layizgano.—Maŵa. 14:30.

7. Yowoyani viyelezgero vya awo ŵakapulikira ulongozgi wakufuma kwa Yehova. (Maŵazgo 14:24) (Wonaniso chithuzi.)

⁷ Ndipouli, Ŵaisrayeli ŵanyake ŵakapulikira ulongozgi wa Yehova. Mwachiyelezgero, Yehova wakati: “Kalebi . . . wakanilondezga na mtima wose.” (Ŵazgani Maŵazgo 14:24.) Chiuta wakamutumbika Kalebi, ndipo wakapika mwaŵi wakuti wasankhe malo agho wamukhala mu Charu cha Layizgano. (Josh. 14:​12-14) Ŵaisrayeli awo ŵakanjira mu Charu cha Layizgano, ŵakalongora chiyelezgero chiwemi pa nkhani ya kupulikira ulongozgi wa Yehova. Joshuwa wati wimikika kuŵa mulongozgi na kunjira m’malo mwa Mozesi, Ŵaisrayeli “ŵakamuchindikanga chomene mazuŵa ghose gha umoyo wake.” (Josh. 4:14) Paumaliro, Yehova wakaŵatumbika chomene na kuŵanjizga mu Charu cha Layizgano.—Josh. 21:​43, 44.

8. Kasi Yehova wakalongozganga wuli ŵanthu ŵake mu nyengo ya mathemba? (Wonaniso chithuzi.)

⁸ Vyaka vyati vyajumphapo, Yehova wakimika ŵeruzgi kuti ŵalongozgenge ŵanthu ŵake. Kufuma apo, mu nyengo ya mathemba, Yehova wakasankha ntchimi kuti zilongozgenge ŵanthu ŵake. Mathemba ghakugomezgeka ghakalondezganga  ulongozgi wa zintchimi. Mwachiyelezgero, Themba Davide likajiyuyura na kuzomera ulongozgi wakufuma kwa ntchimi Natani. (2 Sam. 12:​7, 13; 1 Mid. 17:​3, 4) Themba Yehoshafati likapulikira ulongozgi wakufuma kwa ntchimi Yahaziyeli ndipo likachiska ŵanthu ŵa ku Yuda kuti ‘ŵaŵe na chipulikano mwa ntchimi za Chiuta.’ (2 Mid. 20:​14, 15, 20) Apo Themba Hezekiya likasuzgikanga maghanoghano, likapempha wovwiri kwa ntchimi Yesaya. (Yes. 37:​1-6) Nyengo yose iyo mathemba ghakapulikiranga ulongozgi wakufuma kwa Yehova, ghakatumbikikanga ndipo mtundu wose ukaŵanga wakuvikilirika. (2 Mid. 20:​29, 30; 32:22) Waliyose wakajiwoneranga yekha kuti Yehova wakagwiliskiranga ntchito zintchimi kuti waŵalongozge. Ndipouli, mathemba ghanandi kweniso Ŵaisrayeli ŵanyake, ŵakakana kupulikira ulongozgi wakufuma ku ntchimi za Yehova.—Yer. 35:​12-15.

UMO YEHOVA WAKALONGOZGERANGA ŴAKHRISTU ŴAKWAMBILIRA

9. Kasi Yehova wakagwiliskiranga ntchito anjani kuti walongozge Ŵakhristu ŵakwambilira? (Wonaniso chithuzi.)

⁹ Pa Pentekoste 33 C.E., Yehova wakambiska mpingo Wachikhristu. Kasi wakaŵalongozganga wuli Ŵakhristu ŵakwambilira aŵa? Wakasankha Yesu kuŵa mutu wa mpingo. (Efe. 5:23) Kweni Yesu wakalongozganga mwakudunjika msambiri waliyose payekhapayekha yayi. Wakagwiliskiranga ntchito ŵapositole na ŵanalume ŵalara awo ŵakaŵa ku Yerusalemu kuti ŵalongozgenge. (Mil. 15:​1, 2) Kweniso ŵalara ŵakimikikanga kuti ŵalongozgenge mipingo.—1 Tes. 5:12; Tito 1:5.

10. (a) Kasi Ŵakhristu ŵanandi ŵakwambilira ŵakachita wuli na ulongozgi uwo ŵakapokera? (Milimo 15:​30, 31) (b) Chifukwa wuli ŵanthu ŵanyake mu nyengo yakale ŵakakana kupulikira awo Yehova wakaŵagwiliskiranga ntchito? (Wonani bokosi la mutu wakuti “ Chifukwa Icho Ŵanyake Ŵakukanira Kuti Yehova Wakugwiliskira Ntchito Ŵanthu Kuti Watilongozge.”)

¹⁰ Kasi Ŵakhristu ŵakwambilira ŵakachita wuli na ulongozgi uwo ŵakapokera? Ŵanandi ŵakakondwa na ulongozgi uwo ŵakapokera ndipo ŵakawulondezganga na mtima wose. Nakuti, “ŵakasekelera chifukwa chakuti ŵakakhozgeka” na ulongozgi uwo ŵakapokera. (Ŵazgani Milimo 15:​30, 31.) Kweni kasi Yehova wakulongozga wuli ŵanthu ŵake mu nyengo yithu yino?

UMO YEHOVA WAKUTILONGOZGERA MAZUŴA GHANO

11. Kasi ntchiyelezgero wuli icho chikulongora kuti Yehova wakulongozga awo wimika mazuŵa ghano?

¹¹ Yehova wakulutilira kulongozga ŵanthu ŵake mazuŵa ghano. Wakutilongozga kwizira mu Baibolo, kweniso Mwana wake uyo ni mutu wa mpingo.  Kasi pali ukaboni wakulongora kuti Chiuta wakulutilira kutilongozga kwizira mu ŵanthu awo wimika? Enya. Mwachiyelezgero, ghanaghanirani ivyo vikachitika kuumaliro wa vyaka vya m’ma 1800. Charles Taze Russell na ŵanyake, ŵakamba kupulikiska makora fundo yakuti Ufumu wa Chiuta uzamwamba kuwusa mu 1914. (Dan. 4:​25, 26) Mauchimi gha mu Baibolo ndigho ghakaŵawovwira kuti ŵamanye fundo iyi. Kasi Yehova wakaŵalongozganga apo ŵakachitanga kafukufuku? Ntchakuwonekerathu kuti wakaŵalongozganga. Ivyo vikachitika mu 1914 vikalongora nadi kuti Ufumu wa Chiuta wamba kuwusa. Nkhondo Yakwamba ya pa Charu Chose yikamba, kweniso kukaŵa nthenda zakwambukira, vindindindi na njara. (Luka 21:​10, 11) Yehova wakagwiliskiranga nadi ntchito ŵanalume Ŵachikhristu aŵa kuti wawovwire ŵanthu ŵake.

12-13. Kasi ŵabali awo ŵakalongozganga ŵakapanga ndondomeko wuli kuti ŵalutiske panthazi ntchito yakupharazga mu nyengo ya Nkhondo Yachiŵiri ya pa charu chose?

¹² Ghanaghaniraniso ivyo vikachitika pa Nkhondo Yachiŵiri ya pa Charu Chose. Ŵati ŵasanda lemba la Chivumbuzi 17:​8, ŵabali awo ŵakalongozganga ku likuru lithu ŵakapulikiska fundo yakuti, nkhondo iyi yambiskenge Aramagedoni yayi, kweni yipelekenge mwaŵi wakuti paŵe mtende kwakanyengo mwakuti ntchito yakupharazga yilute panthazi. Nangauli pa nyengo iyo vikawonekanga nga kuti fundo iyi njambura kupulikikwa, kweni gulu la Yehova likambiska Sukulu Yakusambizga Baibolo ya Giliyadi kuti lisambizge ŵamishonale kupharazga na kusambizga mu vyaru vyakupambanapambana. Ŵamishonale ŵakatumizgikanga mu vyaru vinyake nanga ni apo nkhondo yikaŵa mukati. Chinyakeso ntchakuti, muzga wakugomezgeka wakambiska sukulu yapadera b kuti yiwovwire wose mu mpingo kuŵa ŵapharazgi kweniso ŵasambizgi ŵaluso. Nthowa izi zikawovwira ŵanthu ŵa Chiuta kunozgekera ntchito yakupharazga iyo yikaŵa kuti yikwiza munthazi.

¹³ Kufika pasono, tikujiwonera tekha kuti Yehova wakaŵalongozganga ŵanthu ŵake mu nyengo yakusuzga yira. Kufuma waka apo Nkhondo Yachiŵiri ya pa Charu Chose yikamalira, mu vyaru vinandi, ŵanthu ŵa Yehova ŵali pa mtende ndipo ŵali na wanangwa wakuchita ntchito yakupharazga. Nakuti ntchito iyi yikuluta panthazi chomene.

14. Chifukwa wuli tikwenera kugomezga ulongozgi wakufuma ku gulu la Yehova kweniso wakufuma ku ŵalara? (Chivumbuzi 2:1) (Wonaniso chithuzi.)

 ¹⁴ Mazuŵa ghano, ŵabali ŵa mu Wupu Wakulongozga ŵakulutilira kulondezga ulongozgi wakufuma kwa Khristu. Ŵakukhumba kuti ulongozgi uwo ŵakupeleka ku ŵabali na ŵadumbu ukoleranenge na ivyo Yehova wakukhumba. Ŵakugwiliskira ntchito ŵalaŵiliri ŵa dera kweniso ŵalara kuti ŵapeleke ulongozgi ku mipingo. c Ŵalara ŵakuphakazgika, kweniso ŵalara ŵanyake wose mu mpingo, ŵali mu ‘woko lamalyero’ la Khristu. (Ŵazgani Chivumbuzi 2:1.) Ŵalara aŵa mbarunji yayi, ndipo nawo ŵakubudiska. Nga umo vikaŵira na ŵapositole, Mozesi na Joshuwa, nawo ŵakabudiskanga. (Maŵa. 20:12; Josh. 9:​14, 15; Rom. 3:23) M’paka sono, Khristu wakulongozga muzga wakugomezgeka na ŵalara, ndipo walutilirenge kuchita nthena “m’paka umaliro wa charu ichi.” (Mat. 28:20) Ntheura tili na vifukwa vyakukwana vyakugomezgera ulongozgi uwo wakutipa kwizira mu ŵanthu awo ŵali kwimikika kulongozga.

TIKUTUMBIKIKA PARA TIKULUTILIRA KULONDEZGA ULONGOZGI WAKUFUMA KWA YEHOVA

15-16. Kasi tikusambirako vichi ku ivyo vikachitikira ŵanthu awo ŵakalondezga ulongozgi wa Yehova?

¹⁵ Para tikulutilira kulondezga ulongozgi wa Yehova, tikutumbikika chomene nanga ni sono nthena. Mwachiyelezgero, Andy na Robyn ŵakalondezga ulongozgi wakuti tiŵenge na umoyo wambura kukhumba vinandi. Ntheura, ŵakajipeleka kovwirapo pa ntchito ya vyakuzenga. Robyn wakuti: “Nyengo zinyake tikakhalanga mu kanyumba kachoko chomene, mwakuti tikasoŵanga na pakuti tiphikire. Nkhaguliska makamera ghane nangauli nkhatemwanga chomene vyakujambura. Chitima chikanikora chomene nati naghaguliska, mwakuti nkhathiska na masozi wuwo. Kweni nga ni muwoli wa Abrahamu, Sara, nkhaŵika mtima pa kuteŵetera Yehova m’malo mwa kughanaghanira ivyo nasida.” (Heb. 11:15) Kasi mbumba iyi yikatumbikika wuli chifukwa cha ivyo yikasankha? Robyn wakuti: “Ndise ŵakukondwa pakumanya kuti tikumupa Yehova vyose ivyo tingafiska. Para tikuchita ivyo Yehova watituma, vikuŵa nga tikucheta umo umoyo uzamuŵira mu charu chiphya.” Andy wakuzomerezga kuti: “Ndise ŵakukondwa chifukwa tikumalira nyengo kweniso nkhongono zithu zose pakuteŵetera Yehova.”

¹⁶ Kasi tikusangaso chandulo wuli para tikulutilira kupulikira ulongozgi wa Yehova? Marcia wati wamalizga masambiro gha ku sekondare, wakasankha kuti wateŵeterenge Yehova. (Mat. 6:33;  Rom. 12:11) Iyo wakuti: “Nkhapika mwaŵi wakuti nkhasambire ku yunivesite kwa vyaka vinayi kwaulere. Kweni nkhakhumbanga kufiska vilato vyane vyauzimu na kumupa viwemi chomene Yehova. Ntheura nkhasankha kuluta ku koleji kuti nkhasambire ntchito iyo yingazakanovwira pa uteŵeti wane. Nakuti apa nkhasankha makora chomene. Sono nkhukondwa chomene kuchita upayiniya wanyengozose, ndipo ntchito iyo nkhugwira yikunipa mwaŵi wakuti nichitengeko uteŵeti wa pa Beteli kweniso mauteŵeti ghanyake ghapadera.”

17. Kasi tikutumbikika wuli usange tikulondezga ulongozgi wakufuma kwa Yehova? (Yesaya 48:​17, 18)

¹⁷ Nyengo zinyake tikupokera ulongozgi uwo ukutovwira kuti tileke kutemwa chomene vinthu vyakuthupi kweniso kuti tileke kuchita vinthu ivyo vingatipangiska kuswa malango gha Chiuta. Para tikulondezga ulongozgi wa Yehova, tikutumbikika chomene. Tikuŵa na njuŵi yituŵa kweniso tikugega masuzgo ghanandi. (1 Tim. 6:​9, 10) Para tachita nthena, titeŵeterenge Yehova mwakukwana, ndipo paumaliro tiŵenge na chimwemwe, mtende, kweniso ŵakukhorwa.—Ŵazgani Yesaya 48:​17, 18.

18. Chifukwa wuli mwaŵikapo mtima kulutilira kulondezga ulongozgi wa Yehova?

¹⁸ Tikukayika yayi kuti Yehova walutilirenge kugwiliskira ntchito ŵanthu kuti watipe ulongozgi pa nyengo ya suzgo yikuru m’paka mu Muwuso wa Vyaka 1,000. (Sal. 45:16) Kasi tizamulutilira kulondezga ulongozgi uwo tizamupokera, nanga vingaŵa kuti ukupambana na ivyo ise tikukhumba? Vikuthemba pa umo tikuchitira na ulongozgi uwo Yehova wakutipa sono. Ntheura, tiyeni nyengo zose tilondezgenge ulongozgi uwo Yehova wakutipa, kusazgapo uwo tikupokera kufuma ku ŵanalume awo ŵakutilaŵilira. (Yes. 32:​1, 2; Heb. 13:17) Apo tikuchita nthena, tili na vifukwa vyakukwana vyakumugomezgera Mulongozgi withu Yehova, uyo wakutivikilira ku vinthu ivyo vingananga ubwezi withu na iyo, ndipo wakutilongozgera ku nthowa yakuluta ku umoyo wamuyirayira.