1. Chifukwa wuli Yehova wakugwiliskira ntchito ŵanji?

YEHOVA ngwapachanya chomene. Iyo ndiyo wali kulenga chilichose, ndipo wali na mahara ndiposo nkhongono zinandi chomene. Yobu wakati wamanya fundo iyi, wakayowoya kuti: “Sono namanya kuti mungachita vinthu vyose, nakuti chilichose icho mungaghanaghana, palije icho mungatondeka kuchita.” (Yobu 42:2) Payekha Yehova wangachita chilichose icho wakukhumba. Kweni chifukwa cha chitemwa, wakugwiliskira ntchito ŵanji pakufiska khumbo lake.

2. Kasi Yesu wakagwira ntchito wuli na awiske?

² Chiuta wakalenga Yesu pambere wandalenge chilichose. Pamasinda, Yehova wakamba kugwira ntchito na Yesu pakulenga vinthu vinyake vyose. (Yoh. 1:1-3, 18) Pakuyowoya za Yesu, mpositole Paulosi wakalemba kuti: “Vinthu vinyake vyose vikalengeka kuchanya na pa charu chapasi kwizira mwa iyo, vinthu vyakuwoneka na vinthu vyambura kuwoneka, kwali ni  vitengo, maufumu, maboma panji mazaza. Vinthu vinyake vyose vikalengeka kwizira mwa iyo.” (Kol. 1:15-17) Yehova wakuchindika mwana wake, lekani wakagwiranga nayo ntchito yakulenga vinthu vinyake vyose, kweniso lekani wakutiphalira za mulimo wakuzirwa uwo wali kupa mwana wake.

3. Kasi Yehova wakamupa mulimo wuli Adamu, ndipo chifukwa wuli?

³ Yehova wakambaso kugwira ntchito na ŵanthu. Mwachiyelezgero, wakatuma Adamu kuti wathye mazina vinyama. (Gen. 2:19, 20) Adamu wakakondwa chomene kuchita mulimo uwu. Nyama yiliyose wakayipanga zina kuyana na vyakuchita vyake. Yehova ndiyo wakalenga vinyama vyose, nakuti wakhumbenge mphanyi wakathya yekha mazina. Kweni Yehova wakatuma Adamu kuti wathye mazina vinyama chifukwa wakamutemwanga. Yehova wakapaso Adamu mulimo unyake wakuti wasanuzge paradiso pa charu chapasi. (Gen. 1:27, 28) Chachitima ntchakuti Adamu wakaleka kugwira ntchito na Chiuta, ndipo vyakulondezgapo vyake ghakaŵa masuzgo pa iyo na ŵanthu wose.​—Gen. 3:17-19, 23.

4. Kasi ŵateŵeti ŵanyake ŵakagwira ntchito wuli pakufiska khumbo la Yehova?

⁴ Pamasinda, Yehova wakagwiraso ntchito na ŵanthu ŵanyake. Nowa wakapanga chingalaŵa icho iyo na mbumba yake ŵakaponeramo mu nyengo ya chigumula. Mozesi wakafumiska Ŵaisrayeli ku Eguputo. Joshuwa wakanjizga Ŵaisrayeli mu Charu cha Layizgano. Solomoni wakazenga tempile mu Yerusalemu. Mariya wakababa Yesu. Ŵateŵeti aŵa na ŵanyake, ŵakagwira ntchito na Yehova pakufiska khumbo lake.

5. Kasi Yehova watipa mulimo wuli, ndipo chifukwa wuli ni mwaŵi kuchitako mulimo uwu? (Wonani chithuzi chakwamba.)

⁵ Mazuŵa ghano, nase tikugwira ntchito na Yehova pakukhozgera Ufumu wake. Tingateŵetera Yehova munthowa zinandi. Nangauli tose tingateŵetera Yehova mwakuyana yayi, kweni tose tingapharazga makani ghawemi gha Ufumu. Yehova wakhumbenge, wate wachitenge yekha ntchito iyi. Iyo wate wapharazgenge yekha mwakudunjika kufuma kuchanya. Nyengo yinyake Yesu wakati Yehova wangatuma malibwe kuti ghapharazge vya Ufumu wake. (Luka 19:37-40) Kweni Yehova wasankha ise kuti tiŵe “ŵantchito ŵanyake.” (1 Kor. 3:9) Paulosi wakati: “Pakugwira ntchito pamoza na iyo, tikumuŵeyaniso kuti muleke kuzomera lusungu lukuru lwa Chiuta na kuwinda chilato chake.” (2 Kor. 6:1) Tikukondwa chomene para tikugwira ntchito na Yehova. Chifukwa wuli tikukondwa kugwira ntchito na Yehova?

6. Kasi Yesu wakajipulika wuli kugwira ntchito na Yehova?

⁶ Para tikugwira ntchito na Chiuta tikuŵa ŵakukondwa. Pambere Yesu wandize pa charu chapasi, wakati: “Yehova wakanipanga nga nkhwamba kwa nthowa zake, . . . Ine nkhaŵa pafupi nayo nga ni misiri, wakakondwanga nane zuŵa na zuŵa, nane nkhakondwanga pamaso pake nyengo zose.” (Zinth. 8:22, 30) Yesu wakakondwanga kugwira ntchito na Yehova. Wakakondwanga chifukwa wakachitanga khumbo la awiske kweniso wakamanyanga kuti ŵakumutemwa. Kasi nase tikukondwa kugwira ntchito na Yehova?

7. Kasi ntchito yakupharazga yikutipa wuli chimwemwe?

 ⁷ Yesu wakati tikuŵa ŵakukondwa para tikupeleka na kupokera. (Mil. 20:35) Tikakondwa apo tikapokeranga unenesko. Kweniso tikukondwa para tikupeleka panji kuti kusambizga ŵanyithu unenesko. Tikukondwa kuwona ŵanthu awo tikuŵapharazgira ŵakupulikiska ivyo Baibolo likusambizga na kwamba kuteŵetera Yehova. Kweniso tikukondwa chomene para ŵanthu ŵakusintha nkharo yawo. Ntchito yakupharazga njakuzirwa chomene, ndipo palije ntchito yinyake iyo yingatipa chimwemwe kuluska iyi. Ntchito yakupharazga yikovwira ŵanthu kuŵa paubwezi na Chiuta ndiposo kuti ŵazakasange umoyo wamuyirayira.​—2 Kor. 5:20.

8. Kasi ŵanyake ŵayowoya vichi chifukwa chakugwira ntchito na Yehova?

⁸ Tikukondwa para tikovwira ŵanthu kuŵa paubwezi na Yehova, kweniso tikumanya kuti ntchito iyi yikukondweska Chiuta. (Ŵazgani 1 Ŵakorinte 15:58.) Marco wa ku Italy, wakati: “Ndine wakukondwa chomene chifukwa nkhuteŵetera Yehova na mtima wane wose ndipo nkhumanya kuti waluwenge chara ivyo nkhumuchitira.” Franco uyo wakuteŵeteraso ku Italy nayo wakati: “Zuŵa lililose Yehova wakutikumbuska kuti wakutitemwa ndipo kuti ntchito iyo tikuchita njakuzirwa chomene kwa iyo, nangauli taŵeneko tingawona nga tikuphyoka pawaka. Fundo iyi yikunovwira para nkhugwira ntchito na Chiuta.”

9. Chifukwa wuli Yesu na awiske ŵakaŵa ŵakukolerana?

⁹ Para tikugwira ntchito na ŵanthu awo tikuŵatemwa, tikukhozga ubwezi withu ndiposo tikuŵamanya makora. Tikumanya ivyo ŵakukhumba kuchita pakuteŵetera Chiuta. Yesu wakagwira ntchito na Yehova kwa vyaka vinandi chomene, lekani ubwezi wawo ukaŵa wakukhora. Yesu wakati: “Ine na Adada tili ŵamoza.” (Yoh. 10:30) Yesu na awiske ŵakaŵa ŵakukolerana, ndipo nyengo zose ŵakakondwanga kugwira ntchito lumoza.

10. Kasi ntchito yakupharazga yikutovwira wuli kusendelera kwa Chiuta na ŵanyithu?

¹⁰ Yesu wakalomba Yehova kuti wavikilire ŵasambiri ŵake. Chifukwa wuli? Yesu wakati: “Mwakuti ŵaŵenge ŵamoza umo ise tiliri ŵamoza.” (Yoh. 17:11) Mikhaliro ya Chiuta tikuyimanya makora para tikupulikira malango ghake ndiposo para tikupharazga. Tikumanya kuzirwa kwa kugomezga Yehova na kulondezga fundo zake. Para tikusendelera kwa Chiuta nayo wakusendelera kwa ise. (Ŵazgani Yakobe 4:8.) Tikusendeleraso ku ŵabali ŵithu chifukwa tose tikusuzgikira lumoza mu charu ichi, kweniso tili na khumbo limoza la kuteŵetera Chiuta. Enya,  tikugwilira lumoza ntchito yakupharazga, tikukondwa lumoza, na kuzizipizga lumoza. Mudumbu Octavia wa ku Britain, wakati: “Kugwira ntchito na Yehova kwanovwira kukhozga ubwezi na Ŵakhristu ŵanyane, chifukwa tose tikuteŵetera Chiuta.” Kasi nase ndimo tikujipulikira? Tikuŵatemwa chomene ŵanyithu para tikuwona kuti wakulimbikira kuteŵetera Yehova.

11. Kasi ubwezi withu na Chiuta kweniso ŵanyithu uzamuŵa wuli mu charu chiphya?

¹¹ Ubwezi withu na Chiuta ndiposo Ŵakhristu ŵanyithu uzamukhora chomene mu charu chiphya. Ntchito yiliyose iyo tizamugwira yizamuŵa yakukondweska. Tizamupokelera ŵanyithu awo ŵali kufwa na kuŵasambizga nthowa za Yehova. Tizamugwiraso ntchito yakuzgora charu kuŵa paradiso. Mu Ufumu wa Khristu, tizamuŵa ŵakukondwa chomene kugwira ntchito na ŵanyithu, kweniso tizamuŵa ŵarunji. Ŵanthu wose ŵazamuŵa paubwezi na Yehova kweniso yumoza na munyake. Pa nyengo iyi, waliyose wazamuŵa wakukondwa chomene chifukwa Yehova ‘wazamukhorweska chamoyo chilichose.’​—Sal. 145:16.

12. Kasi ntchito yakupharazga yikutivikilira wuli?

¹² Tikwenera kuvikilira ubwezi withu na Yehova. Pakuti tikukhala mu charu cha Satana kweniso ndise ŵambura kufikapo, ntchipusu chomene kutolera makhaliro gha charu. Vili nga ni para tikuskamba mu mlonga ndipo maji ghakutiguzira uko ise tindakhumbe. Para maji ghakutiguza, tikulimbikira kuti ghaleke kutitolera uko ise tindakhumbe. Mwakuyana waka, tikwenera kuŵa maso kuti tileke kuyeyeka na charu cha Satana. Kasi ntchito yakupharazga yikutivikilira wuli? Para tikupharazga, maghanoghano ghithu ghakuŵa pa vinthu vyauzimu ndipo chipulikano chithu chikukhora. (Fil. 4:8) Ntchito yakupharazga yikukhozga chipulikano chithu chifukwa yikutikumbuska ivyo Yehova walayizga ndiposo malango ghake. Yikutovwiraso kuti tilutilire kuŵa maso mwauzimu.​—Ŵazgani Ŵaefeso 6:14-17.

13. Kasi mubali munyake wakati ntchito yakupharazga yamovwira wuli?

¹³ Para tikulimbikira kupharazga, kusambira mazgu gha Chiuta, na kovwira ŵanji mu mpingo, tikuŵa ŵakuvikilirika chifukwa vikutovwira kuti tileke kughanaghanira waka za masuzgo ghithu. Joel, uyo wakukhala ku Australia, wakati: “Ntchito yakupharazga yikunovwira kumanya ivyo vikuchitika mu charu. Yikunikumbuska masuzgo agho ŵanthu ŵakukumana nawo, kweniso vitumbiko ivyo nasanga chifukwa chakulondezga fundo za mu Baibolo. Ntchito yakupharazga yanovwira kuti niŵe wakujiyuyura, nithembenge Yehova ndiposo ŵabali na ŵadumbu.”

14. Kasi pali ukaboni wuli wakuti Yehova wakutovwira na mzimu wake?

¹⁴ Ntchito yakupharazga yikutovwira kumanya kuti Yehova wakutovwira na mzimu wake. Tiyelezgere kuti mukugwira ntchito yakupelekera buledi. Mukupokera malipiro yayi, ndipo mukugwiliskira ntchito ndalama zinu pakuchita ntchito iyi. Ŵanthu ŵanandi ŵakutemwa yayi buledi linu ndipo ŵanji ŵakumutinkhani chifukwa chakuti mukuŵanyamulira buledi. Kasi mungalutilira kuchita ntchito yanthena? Ntchakuwonekerathu kuti mungagongowa na kuyileka. Para  tikupharazga napo, tikugwiliskira ntchito nyengo na ndalama zithu. Kweniso ŵanthu ŵanandi ŵakutitinkha chifukwa tikuŵapharazgira. Ŵanji ŵakutiseka, kutikalipira, na kutinyoza. Ndipouli, tikugongowa na kuleka kupharazga yayi. Uwu mbukaboni wakuti Yehova wakutovwira na mzimu wake.

15. Kasi ntchito yakupharazga yikukolerana wuli na khumbo la Yehova?

¹⁵ Kasi ntchito yakupharazga yikukolerana wuli na khumbo la Yehova? Yehova wakakhumbanga kuti ŵanthu ŵakhalenge kwamuyirayira, ndipo khumbo lake lindasinthe. (Yes. 55:11) Yehova wali kunozga nthowa kuti watiwombore ku kwananga na nyifwa. Wakatuma Yesu kuti wazakapeleke umoyo wake kuŵa sembe. Kuti ŵanthu ŵasange chandulo na sembe iyi, ŵakwenera kupulikira Chiuta. Lekani Yesu wakasambizganga ŵanthu ivyo Chiuta wakukhumba kuti ŵachitenge. Yesu wakatuma ŵasambiri ŵake kuti nawo ŵapharazgenge. Para tikupharazga na kovwira ŵanthu kuŵa paubwezi na Yehova, ndikuti tikukolerana na khumbo la Yehova lakuwombora ŵanthu ku kwananga na nyifwa.

16. Kasi para tikupharazga tikulongora vichi?

¹⁶ Para tikovwira ŵanthu kuti ŵasange nthowa yakuya ku umoyo wamuyirayira, tikulongora kuti tikutemwa Yehova kweniso ŵanyithu. Khumbo la Yehova “ndakuti ŵanthu ŵa mitundu yose ŵamanye makora unenesko na kuponoskeka.” (1 Tim. 2:4) Mufarisi munyake wakafumba Yesu kuti, kasi dango likuru chomene mu malango ni ndi? Yesu wakazgora kuti: “‘Utemwenge Yehova Chiuta wako na mtima wako wose na umoyo wako wose na maghanoghano ghako ghose.’ Ili ndilo ni dango likuru chomene na lakwamba. Lachiŵiri, lakuyanako nalo ni ili: ‘Utemwenge mzengezgani wako nga umo ukujitemwera wamwene.’” (Mat. 22:37-39) Para tikupharazga ndikuti tikupulikira malango agha.​—Ŵazgani Milimo 10:42.

17. Kasi mukujipulika wuli para mukupharazga makani ghawemi?

¹⁷ Tikuwonga chomene kuti Yehova watipa ntchito yakupharazga iyo yikutovwira kuŵa ŵakukondwa, kuŵa paubwezi na iyo ndiposo ŵanyithu, kweniso yikutivikilira mwauzimu. Para tikuchita ntchito iyi tikulongora kuti tikutemwa Chiuta ndiposo ŵanyithu. Yehova wali na ŵateŵeti ŵanandi pa charu chapasi. Kwali ndise ŵalara panji ŵana, ŵasambazi panji ŵakavu, ŵankhongono panji ŵakunyotwa, tose tikuyezgayezga kupharazga na mtima withu wose. Nase tikujipulika nga ni Chantel wa ku France, uyo wakati: “Chiuta wakukondwa, uyo ni Mlengi wa vyose, wakuniphalira kuti: ‘Lutanga! Ukayowoye! Ukayowoye kufuma pasi pa mtima m’malo mwa ine. Nakupa nkhongono, Mazgu ghane Baibolo, wovwiri wakufuma ku ŵangelo, ŵabali na ŵadumbu, masambiro, na ulongozgi wa pa nyengo yake.’ Ni mwaŵi ukuru chomene kuchita ivyo Yehova wakukhumba ndiposo kugwira nayo ntchito lumoza!”