1, 2. Chifukwa wuli Paulosi wakalembera kalata Ŵakhristu Ŵachihebere?

MU CHAKA cha 61 C.E, Ŵakhristu mu Israyeli ŵakaŵa pa mtende. Nangauli Paulosi ŵakaŵa mu jele ku Roma, kweni wakagomezganga kuti wafumenge mwaluŵiro. Pa nyengo iyi Timote wakaŵa kuti wafuma waka mu jele, ndipo Paulosi na Timote ŵakakhumbanga kukawona Ŵakhristu ŵanyawo ku Yudeya. (Heb. 13:23) Nga umo Yesu wakayowoyera, pakakhala waka vyaka 5 kuti ŵankhondo ŵazingilizge Yerusalemu. Ŵakhristu ŵa mu Yudeya, chomenechomene awo ŵakakhalanga mu Yerusalemu, ŵakeneranga kuchitapo kanthu mwaluŵiro. Yesu wakaŵaphalira kuti para ŵawona kuti vinthu ivi vyamba kuchitika, ŵafumemo mu msumba mwaluŵiro.​—Luka 21:20-24.

² Kufuma apo Yesu wakayowoyera mazgu agha, Ŵakhristu ŵakugomezgeka awo ŵakakhalanga mu Israyeli, ŵakaŵa kuti ŵazizipizga nthambuzgo kwa vyaka 28. (Heb. 10:32-34) Ndipouli, Paulosi wakamanya kuti Ŵakhristu ŵali pafupi kusangana na suzgo yikuru. (Mat. 24:20, 21; Heb. 12:4) Paulosi wakakhumbanga kuti ŵanozgeke kulimbana na suzgo yiliyose  iyo yingaŵawira. Ŵakhristu aŵa ŵakakhumbikwiranga chipulikano chakukhora kuti ŵaponoske umoyo wawo. (Ŵazgani Ŵahebere 10:36-39.) Ntheura mzimu wa Yehova ukachiska Paulosi kulembera kalata ŵabali na ŵadumbu aŵa kuti waŵakhozge. Kalata iyi ndiyo sono ni buku la Ŵahebere.

3. Kasi ise tikukhwaskika wuli na buku la Ŵachihebere?

³ Nase tikukhwaskika na kalata iyo Paulosi wakalembera Ŵakhristu Ŵachihebere. Yikutikhwaska wuli? Nase tikukhala mu nyengo yakuyana waka. Mu “nyengo zinonono na zakusuzga” izi, ŵateŵeti ŵa Yehova ŵakususkika na kutambuzgika chomene. (2 Tim. 3:1, 12) Nangauli tikususkika na kutambuzgika, kweni tikulongora kuti tili na chipulikano chakukhora. Ndipouli, taŵanyake palije uyo wakutitambuzga chifukwa cha chipulikano chithu. Kweni nga Mbakhristu mu nyengo ya Paulosi, tose tikwenera kukumbuka kuti sonosono apa tikumanenge na suzgo yikuru.​—Ŵazgani Luka 21:34-36.

4. Kasi lemba la chaka la 2016 ndakuti wuli, ndipo chifukwa wuli ndakwenelera?

⁴ Ni vichi ivyo vingatovwira kunozgekera suzgo yikuru? Mu buku la Ŵahebere, Paulosi wakalemba vinthu ivyo vingatovwira kukhozga chipulikano chithu. Chinthu chinyake chakuzirwa chikusangika pa Ŵahebere 13:1. Lemba ili likuti: “Mulutilire kutemwa ŵabali.” Vesi ili ndilo lasoleka kuŵa lemba la chaka cha 2016.

5. Kasi mazgu ghakuti kutemwa ŵabali ghakung’anamurachi?

⁵ Kasi mazgu ghakuti kutemwa ŵabali ghakung’anamurachi? Lizgu la Chigiriki ilo Paulosi wakagwiriskira ntchito pakulongosora za kutemwa ŵabali (phi·la·del·phiʹa), likuyowoya za chitemwa icho chikuŵa pakati pa ŵanthu awo ŵababika nyumba yimoza kweniso munthu na mubwezi wake wapamtima. (Yoh. 11:36) Ntheura para tikuchema Ŵakhristu ŵanyithu kuti mubali panji mudumbu, tikuyowoya nadi ivyo vili mu mtima withu. (Mat. 23:8) Pakuyowoya za umo tikwenera kutemwera ŵabali ŵithu, lemba la Ŵaroma 12:10 likuti: “Mutemwanenge na mtima wose nga umo ŵanthu ŵakutemwerana paubali. Yambani ndimwe kulongora ntchindi ku ŵanyinu.” Kweniso para tili na mtima wakutemwa munthu waliyose (a·gaʹpe), tiŵenge paubwezi wakukhora na Ŵakhristu ŵanyithu.

6. Chifukwa wuli Ŵakhristu ŵaunenesko ŵakusankhana mitundu chara?

⁶ Munthu munyake wakati mazgu ghakuti kutemwa ŵabali, ghakusangika chomene mu mabuku gha Chikhristu. Kale, mazgu ghakuti “mubali,” nyengo zinyake ghakayowoyangaso za munthu uyo mundababike nyumba yimoza. Ndipouli, munthu uyo Ŵayuda ŵakatenge ni mubali wawo, ŵakanenanga wa mtundu wawo pera. Kweni Ŵakhristu ŵakusankhana mitundu yayi. (Rom. 10:12) Yehova wali kutisambizga kuti titemwanenge na ŵabali ŵithu wose. (1 Tes. 4:9) Chifukwa wuli tikwenera kulutilira kutemwa ŵabali ŵithu?

7. (a) Yowoyani chifukwa chikuru icho tikutemwera ŵabali ŵithu. (b) Chifukwa wuli tikwenera kutemwana zanadi na Ŵakhristu ŵanyithu?

⁷ Yehova wakukhumba kuti titemwenge ŵabali ŵithu. Usange tikuti tikutemwa Chiuta uku tikutinkha ŵabali ŵithu, tikujipusika. (1 Yoh. 4:7, 20, 21) Kweniso tikwenera kukumbuka kuti palije munthu uyo ni  kamphanda pa yekha. Para tasangana na masuzgo, tikukhumba ŵanyithu kuti ŵatovwire. Paulosi wakamanya kuti Ŵakhristu Ŵachihebere awo wakaŵalembera kalata, ŵakaŵa pafupi kuleka nyumba zawo na katundu wawo. Yesu wakayowoyerathu kuti nyengo iyi yizamuŵa yakusuzga chomene. (Mrk. 13:14-18; Luka 21:21-23) Pa nyengo iyi, Ŵakhristu aŵa ŵakeneranga kutemwana zanadi kuluska kumasinda kose.​—Rom. 12:9.

8. Kasi tikwenera kuchita vichi pambere suzgo yikuru yindambe?

⁸ Sonosono apa, ŵangelo ŵalekezgenge mphepo izo zizenge na suzgo yikuru. (Mrk. 13:19; Chivu. 7:1-3) Pa nyengo iyi tizamukhumbikwira kupulikira ulongozgi wakuti: “Lutani ŵanthu ŵane, njirani mu vipinda vinu vyamukati, ndipo jalani vijaro pamanyuma pinu. Bisamani kwa kanyengo kachoko, m’paka ukali ujumphe.” (Yes. 26:20) ‘Vipinda vyamukati’ vikwimira mipingo yithu. Mu mipingo iyi ndimo tikuwungana na ŵabali na ŵadumbu pakusopa Yehova. Padera pakuwungana mwakukhazikika, tikweneraso kukhozga ŵanyithu. Fundo iyi ndiyo Paulosi wakalembera Ŵakhristu Ŵachihebere kuti para ŵali pa maungano, ŵakwenera kulongora kuti ŵakutemwana na kuchiskirana ku milimo yiwemi. (Heb. 10:24, 25) Para tikulutilira kutemwa ŵabali ŵithu, tizizipizgenge masuzgo ghose agho tasangana nawo.

9. (a) Kasi pasono tili na mwaŵi wuli? (b) Kasi ŵateŵeti ŵa Yehova ŵakulongora wuli kuti ŵakutemwana?

⁹ Apo tikulindilira suzgo yikuru, tikwenera kulutilira kutemwana na ŵabali ŵithu. Ŵabali ŵithu ŵanandi ŵakusuzgika na vindindindi, kututuka kwa maji, na masoka ghanyake. Ŵabali ŵithu ŵanyake ŵakususkika na kutambuzgika. (Mat. 24:6-9) Mu charu chiheni ichi, tikusuzgikaso na ukavu. (Chivu. 6:5, 6) Masuzgo agha ghakutipa mwaŵi wakuti tilongore umo tikutemwera ŵabali ŵithu. Nangauli chitemwa cha ŵanthu ŵanandi chazizima, kweni ise tikwenera kulutilira kutemwa ŵabali ŵithu.​—Mat. 24:12. ^[1]

10. Kasi mu nkhani iyi tidumbiskanenge vichi?

¹⁰ Nangauli tikukumana na masuzgo ghanandi, kasi tingachita vichi kuti tilutilire kutemwa ŵabali ŵithu? Kasi tingalongora wuli kuti tikutemwa nadi ŵabali ŵithu? Paulosi wakati wayowoya kuti “mulutilire kutemwa ŵabali,” wakalongosoraso umo tingachitira. Mu nkhani iyi, tidumbiskanenge fundo 6 izo zingatovwira kuti tilutilire kutemwa ŵabali.

11, 12. Kasi mazgu ghakuti kupokelera ŵalendo ghakung’anamurachi? (Wonani chithuzi chakwamba.)

¹¹ “Mungaluwanga yayi kupokelera ŵalendo.” (Ŵazgani Ŵahebere 13:2.) Mazgu ghakuti “kupokelera ŵalendo,” ghakung’anamura kuchitira lusungu ŵanthu ŵachilendo. Mazgu agha ghakutikumbuska ivyo wakachita Abrahamu na Loti. Ŵanalume aŵa ŵakapokelerapo ŵangelo chifukwa chakuti ŵakaŵa na mtima wakuchitira lusungu ŵalendo. (Gen. 18:2-5; 19:1-3) Paulosi wakayowoya ivyo wakachita Abrahamu na Loti kuti wachiske Ŵakhristu Ŵachihebere kuti ŵatemwanenge na kupokelerana.

¹² Kasi nase tili na mtima wakupokelera ŵalendo? Kasi tikuŵachemerako ŵanyithu ku nyumba zithu kuti tikarye nawo chakurya, kuchezga nawo, na kuŵakhozga? Ŵanyithu tingaŵachemera ku nyumba zithu nanga tingaŵa na chakurya chichoko.  Kweniso ntchiwemi yayi kutemwera para tikuchema ŵanthu kuti ŵize ku nyumba zithu. (Luka 10:42; 14:12-14) Para tikuchema ŵanyithu tikwenera kuŵa na mtima wakukhozgana, kurya pera yayi. Kasi mphawuli apo tikachemera mulaŵiliri wa dera ku nyumba kwithu? (3 Yoh. 5-8) Nangauli ndise ŵakutangwanika, kweni ‘tingaluwanga yayi kupokelera ŵalendo,’ chifukwa ni nthowa yimoza iyo tikulongolera chitemwa ku ŵanyithu.

13, 14. Kasi tingaŵakumbuka mbu ŵabali awo ŵali mu jele?

¹³ “Kumbukani awo ŵali mu jele.” (Ŵazgani Ŵahebere 13:3.) Apa Paulosi wakayowoyanga vya mukayidi waliyose yayi, kweni wakayowoyanga vya ŵabali awo ŵakaŵa mu jele chifukwa cha chipulikano chawo. Apo Paulosi wakalembanga mazgu agha, wakaŵa kuti wakhala mu jele vyaka vinayi. (Fil. 1:12-14) Iyo wakalumba ŵabali chifukwa chakuti ŵakafipiranga mtima ŵanyawo “awo ŵakaŵa mu jele.” (Heb. 10:34) Ŵakhristu ŵanyake ŵakamovwiranga Paulosi apo wakaŵa mu jele. Kweni Ŵakhristu Ŵachihebere ŵakaŵa kuti ŵangamovwira yayi chifukwa ŵakaŵa kutali. Kasi Ŵakhristu aŵa ŵakeneranga kuchita vichi? Ŵakeneranga kumulombera Paulosi.​—Heb. 13:18, 19.

¹⁴ Mazuŵa ghano napo, ŵabali ŵithu ŵanyake ŵali mu jele uko ise tingalutako yayi kuti tikaŵawovwire. Ndipouli, tingalongora kuti tikuŵakumbuka awo ŵali mu jele para tikuŵazunura mu malurombo ghithu na kuŵeyelera Yehova kuti waŵawovwire. Tingalombera ŵabali, ŵadumbu, na ŵana awo ŵali mu jele ku Eritrea. Ŵanyake mwa ŵabali aŵa ni Paulos Eyassu, Isaac Mogos, na Negede Teklemariam awo ŵakhala mu jele kwa vyaka vyakujumpha 20.

15. Kasi tingachindika wuli nthengwa yithu?

¹⁵ “Nthengwa yiŵenge yakuchindikika na ŵanthu wose.” (Ŵazgani Ŵahebere 13:4.) Tingalongoraso kuti tikuŵatemwa ŵabali ŵithu para tikulutilira kuŵa na nkharo yituŵa. (1 Tim. 5:1, 2) Usange munyake ‘wakujumpha chipimo chakwenelera na kulyera masuku pa mutu mubali wake’ mwakuchita uzaghali, ŵabali ŵakuleka kumugomezga na kumutemwa munthu wanthena. (1 Tes. 4:3-8) Ghanaghanirani waka umo muwoli wangajipulikira usange wasanga mfumu wake wakuwonelera vithuzi vyamuziro. Kasi mfumu para wakuchita nthena tingati wakuchindika nthengwa yake?​—Mat. 5:28.

16. Chifukwa wuli tikwenera kukhorwa na vinthu ivyo tili navyo?

¹⁶ ‘Mukhorwenge na vinthu ivyo vilipo.’ (Ŵazgani Ŵahebere 13:5.) Usange tikugomezga Yehova, tiŵenge ŵakukhorwa na vinthu ivyo tili navyo, ndiposo tiwonenge vinthu vyakuthupi mwakwenelera. (1 Tim. 6:6-8) Mkhristu uyo wakukhorwa na vinthu ivyo wali navyo, wakumanya kuti chinthu chakuzirwa chomene nkhuŵa paubwezi na Yehova na Ŵakhristu ŵanyake. Mkhristu wanthena wakudinginyika yayi, panji kusanga vifukwa ŵanyake, nesi kuŵachitira bina. Mikhaliro iyi njiheni chifukwa yikunanga chitemwa pakati pa ŵabali. Mkhristu uyo wakukhorwa na vinthu ivyo vilipo, wakuŵa na mzimu wakupa.​—1 Tim. 6:17-19.

17. Chifukwa wuli tikwenera kukhwima mtima?

¹⁷ “Tiŵenge ŵakukhwima mtima.” (Ŵazgani Ŵahebere 13:6.) Para tikugomezga Yehova, tikuŵa na chikanga kwali tisangane  na masuzgo wuli. Chikanga chikutovwira kuti tileke kuŵa na wofi. Para tikutemwa ŵabali na kuwona vinthu mwakwenelera, tipembuzgenge na kukhozga ŵanyithu para ŵasangana na masuzgo. (1 Tes. 5:14, 15) Para tili ŵakukhwima mtima, nanga mpha nyengo ya suzgo yikuru, tizamuyimilira na “kwinuska mitu” yithu chifukwa tizamumanya kuti tili pafupi kupona.​—Luka 21:25-28.

18. Kasi tingalongora wuli kuti tikutemwa ŵalara?

¹⁸ “Kumbukani awo ŵakulongozga.” (Ŵazgani Ŵahebere 13:7, 17.) Ŵalara ŵakujipeleka kuteŵetera mpingo kwambura malipiro. Tikwenera kuŵawonga na kuŵatemwa chomene ŵabali aŵa. Tileke kuŵakwenyerezga. Para tikupulikira na kujilambika ku ŵalara, tikulongora kuti tikuŵaghanaghanira “chomene na kuŵatemwa chifukwa cha mulimo wawo.”​—1 Tes. 5:13.

19, 20. Kasi ni fundo wuli izo zingatovwira kuti tilutilire kutemwa ŵabali?

¹⁹ Ŵateŵeti ŵa Yehova ŵakumanyikwa kuti mbanthu awo ŵakutemwana zanadi. Paulosi nayo wakamanyanga fundo iyi. Ntheura wakachiska Ŵakhristu wose kuti: “Mulutilire kuchita ichi mwakukwana.” (1 Tes. 4:9, 10) Pali nthowa zinandi izo tingakhozgera chitemwa chithu pa ŵabali.

²⁰ Ntheura nyengo zose para tikulaŵiska pa chikhwangwani icho palembeka lemba la chaka, tikwenera kujifumba mafumbo agha: Kasi ningachita wuli kuti nilutilire kuŵa na mtima wakupokelera ŵalendo? Kasi ningaŵakumbuka wuli ŵabali awo ŵali mu jele? Kasi nkhuchindika dango la Yehova pa nkhani ya nthengwa? Kasi ntchivichi chinganovwira kuti niŵe wakukhorwa? Kasi ningachita wuli kuti nilutilire kugomezga Yehova? Kasi awo ŵakulongozga ningaŵakumbuka wuli? Para tilondezgenge fundo 6 izi, lemba lithu la chaka litovwirenge nadi. Liŵenge waka chikhwangwani cha mu Nyumba ya Ufumu yayi, m’malo mwake litichiskenge kulondezga mazgu ghakuti: “Mulutilire kutemwa ŵabali.”​—Heb. 13:1.