NKHANI YAKUSAMBIRA 5
Kasi Kuwungana Kukuvumbura Vichi za Ise?
‘Lutilirani kupharazga nyifwa ya Fumu, m’paka yize.’—1 KOR. 11:26.
SUMU 18 Kuwonga Sembe Yakuwombora
CHILATO CHA NKHANI IYI *
1-2. (a) Kasi Yehova wakuwona vichi para ŵanthu mamiliyoni ghanandi ŵawungana kuti ŵachite Mugonero wa Fumu? (Wonani chithuzi cha pa chikopi.) (b) Kasi tidumbiskanenge vichi mu nkhani iyi?
GHANAGHANIRANI waka ivyo Yehova wakuwona para ŵanthu mamiliyoni ghanandi pa charu chose ŵawungana kuti ŵachite Mugonero wa Fumu. Iyo wakuwona ŵanthu mu chigulu waka yayi, kweni waliyose payekhapayekha. Mwachiyelezgero, wakuwona wose awo ŵakwiza ku Chikumbusko chaka chilichose. Pakati pa ŵanthu aŵa pali ŵanthu ŵanyake awo ŵakwiza ku Chikumbusko nangauli ŵakutambuzgika chomene. Ŵanyake ŵakwiza mwakukhazikika yayi ku maungano gha mpingo, kweni ŵakuwona kuti ntchakuzirwa chomene kwiza ku Chikumbusko. Yehova wakuwonaso awo kakuŵa kakwamba kwiza ku Chikumbusko, panji chifukwa cha kukhumba waka kuzakawona umo vikuŵira pa ungano uwu.
2 Yehova wakukondwa chomene kuwona kuti ŵanthu ŵanandi ŵakwiza ku Chikumbusko. (Luka 22:19) Kweni Yehova wakukondwa waka na unandi wa ŵanthu awo ŵakwiza yayi. Iyo wakukondwa chomene na chifukwa icho iwo ŵakwizira; chilato icho ŵakwizira ndicho ntchakuzirwa chomene kwa Yehova. Mu nkhani iyi, tidumbiskanenge fumbo lakuzirwa chomene lakuti: Chifukwa wuli tikwenera kwiza pa Chikumbusko pera yayi, kweni na pa maungano ghose gha mpingo agho Yehova wakupeleka ku awo ŵakumutemwa?
(Wonani ndime 1-2) *
KUJIYUYURA NDIKO KUKUTITUMA KUTI TISANGIKENGEPO
3-4. (a) Chifukwa wuli tikwiza pa maungano? (b) Kasi kwiza pa maungano kukuvumbura vichi za ise? (c) Pakuwona ivyo lemba la 1 Ŵakorinte 11:23-26 likuyowoya, chifukwa wuli tikwenera kukhala yayi ku Chikumbusko?
3 Chifukwa chikuru icho tikulutira ku maungano gha mpingo ntchakuti ntchigaŵa cha kusopa kwithu. Tikulutaso ku maungano chifukwa chakuti tikusambizgika na Yehova. Ŵanthu ŵakujikuzga ŵakukana kuti ŵakukhumbikwira kusambizgika kanthu kalikose. (3 Yoh. 9) Kweni ise tili ŵakunweka kusambizgika na Yehova ndiposo gulu lake.—Yes. 30:20; Yoh. 6:45.
4 Para tikwiza pa maungano, tikulongora kuti tili ŵakujiyuyura, ndipo tili ŵakunozgeka kweniso ŵakukhumbisiska kusambizgika. Pa usiku wa Chikumbusko cha nyifwa ya Yesu, tikwiza pa ungano wakuzirwa uwu chifukwa chakuti tikuwona waka kuti ni udindo withu kufikapo yayi, kweni chifukwa chakuti tili ŵakujiyuyura ndipo tikukhumba kupulikira dango la Yesu lakuti: “Lutilirani kuchita ichi kuti munikumbukenge.” (Ŵazgani 1 Ŵakorinte 11:23-26.) Ungano uwu ukukhozga chigomezgo chithu cha ivyo tikulindilira munthazi na kutikumbuska umo Yehova wakutitemwera. Kweni Yehova wakumanya kuti tikwenera kuchiskika na kukhozgeka kamoza pera yayi pa chaka. Ntheura wakutipa maungano sabata yiliyose na kutichiska kuti tifikengepo. Kujiyuyura kukutituma kuti tipulikirenge. Sabata yiliyose tikupatura nyengo yinandi kuti tinozgekere maungano na kusangikapo.
5. Chifukwa wuli ŵanthu ŵakujiyuyura wakuzomera para Yehova waŵachema kuti waŵasambizge?
5 Chaka chilichose, ŵanthu ŵanandi ŵakujiyuyura ŵakuzomera para Yehova waŵachema kuti ŵazakasambizgike na iyo. (Yes. 50:4) Ŵakukondwa chomene para ŵiza pa Chikumbusko, ndipo ŵakwamba kufika pa maungano ghanyake. (Zek. 8:20-23) Tose pamoza tikukondwa kusambizgika na kulongozgeka na Yehova, “movwiri [withu] na muthaski [withu].” (Sal. 40:17) Kuyowoya unenesko, palije chinthu chinyake chakukondweska chomene kuluska kuzomera kusambizgika na Yehova na Mwana wake Yesu, awo ŵakutitemwa chomene.—Mat. 17:5; 18:20; 28:20.
6. Kasi kujiyuyura kukawovwira wuli mwanalume munyake kuti wize ku Chikumbusko?
6 Chaka chilichose, tikulimbikira kuchema ŵanthu ŵanandi kuti ŵize ku Chikumbusko cha nyifwa ya Yesu. Ŵanthu ŵanandi ŵakujiyuyura ŵasanga chandulo chifukwa cha kupulikira ntchemo iyi. Wonani chiyelezgero ichi. Vyaka vinandi ivyo vyajumpha, mwanalume munyake wakapokera kapepara kakumuchemera ku Chikumbusko, kweni wakaphalira mubali uyo wakamupa kapepara kuti wizenge yayi. Kweni pa usiku wa Chikumbusko, mubali wakazizwa chomene kuwona kuti mwanalume yura wakunjira mu Nyumba ya Ufumu. Mwanalume uyu wakakondwa chomene chifukwa cha umo ŵabali ŵakamupokelelera mwakuti wakamba kwiza ku maungano sabata yiliyose. Nakuti mu chaka chakulondezgapo, wakakhalapo ku maungano katatu pera. Ntchivichi chikamovwira kuti wambe kufika pa maungano ghose? Wakaŵa wakujiyuyura ndipo chikaŵa chipusu kusintha maghanoghano ghake. Mubali uyo wakamuchema pamanyuma wakati, “Ni munthu wakujiyuyura chomene.” Tikukayika yayi kuti Yehova ndiyo wakamuguza munthu uyu kuti wambe kumusopa, nakuti sono ni mubali wakubatizika.—2 Sam. 22:28; Yoh. 6:44.
7. Kasi ivyo tikusambira pa maungano na ivyo tikuŵazga mu Baibolo vikutovwira wuli kuti tiŵe ŵakujiyuyura?
7 Ivyo tikusambira pa maungano na ivyo tikuŵazga mu Baibolo vikutovwira kuti tiŵe ŵakujiyuyura. Para kwakhala masabata ghachoko waka kuti tichite Chikumbusko, maungano ghithu ghakuyowoya chomene ivyo Yesu wakachita na kujiyuyura uko wakalongora pakupeleka umoyo wake kuŵa sembe. Ndipo para kwakhala mazuŵa ghachoko waka kuti tichite Chikumbusko, tikuchiskika kuti tiŵazgenge nkhani za mu Baibolo zakukhwaskana na nyifwa na chiwuka cha Yesu. Ivyo tikusambira pa maungano agha na ivyo tikuŵazga mu Baibolo vikutovwira kuti tiwongenge chomene sembe iyo Yesu wali kupeleka. Kweniso tikuchiskika kuti nase tiŵe ŵakujiyuyura nga ni Yesu na kuchita khumbo la Yehova nanga chingaŵa chakusuzga.—Luka 22:41, 42.
CHIKANGA CHIKUTOVWIRA KUTI TISANGIKENGEPO
8. Kasi Yesu wakalongora wuli chikanga?
8 Tikuyezgayezgaso kulondezga Yesu pa nkhani ya chikanga. Ghanaghanirani chikanga icho wakalongora apo kukakhala mazuŵa ghachoko waka kuti wafwe. Iyo wakamanyanga makora kuti ŵalwani ŵake ŵakaŵa pafupi kumukhozga soni, kumutimba, na kumukoma. (Mat. 20:17-19) Kweni wakaŵa wakunozgeka kufwa. Nyengo yikati yakwana, iyo wakaphalira ŵapositole ŵake ŵakugomezgeka awo ŵakaŵa na iyo mu Getisemane kuti: “Wukani, tiyeni tilutenge. Wonani, wakunipeleka wali pafupi.” (Mat. 26:36, 46) Kweniso apo gulu la ŵanthu awo ŵakaŵa na vilwero likiza kuzakamukora, iyo wakajivumbura na kuphalira ŵasilikari kuti ŵaŵaleke ŵapositole ŵake kuti ŵalutenge. (Yoh. 18:3-8) Apa Yesu wakalongora chikanga chomene. Mazuŵa ghano, Ŵakhristu ŵakuphakazgika na ŵamberere zinyake ŵakuyezgayezga kulongora chikanga nga ni Yesu. Kasi ŵakulongora wuli?
Ŵanji ŵakukhozgeka para tikulongora chikanga pakufika pa maungano gha mpingo (Wonani ndime 9) *
9. (a) Chifukwa wuli tingakhumbikwira chikanga kuti tifikenge pa maungano nyengo zose? (b) Kasi ivyo tikuchita vingakhwaska wuli ŵabali ŵithu awo ŵali mu jele chifukwa cha chipulikano chawo?
9 Tikukhumbikwira chikanga kuti tifikenge pa maungano nyengo zose usange takumana na masuzgo. Ŵabali na ŵadumbu ŵithu ŵanyake ŵakufika pa maungano nangauli ŵakusuzgika na chitima, vinthu vinyake vyakugongoweska, panji ulwari. Ŵanyake ŵakufika pa maungano mwachikanga nangauli ŵakususkika na ŵamumbumba yawo panji ŵalara ŵa boma. Ghanaghanirani umo vyakuchita vithu vikukhwaskira ŵabali ŵithu awo ŵali mu jele chifukwa cha chipulikano chawo. (Heb. 13:3) Para ŵakupulika kuti tikulutilira kuteŵetera Yehova nangauli tikukumana na viyezgo, ŵakukhozgeka chomene ndipo nawo ŵakulutilira kuŵa na chipulikano chakukhora, chikanga, na kugomezgeka. Ivi ndivyo vikachitikira mpositole Paulosi. Apo wakaŵa mu jele ku Romu, wakaŵanga na chimwemwe para wapulika kuti ŵabali ŵake ŵakuteŵetera Chiuta mwakugomezgeka. (Fil. 1:3-5, 12-14) Wakati wakhala pachoko waka kufumiskika mu jele panji wati wafumiskika waka, Paulosi wakalemba kalata yake ku Ŵahebere. Mu kalata iyi wakachiska Ŵakhristu ŵakugomezgeka kuti ‘ŵalutilire kutemwa ŵabali’ kweniso kuti ŵangalekanga yayi kuwungana pamoza.—Heb. 10:24, 25; 13:1.
10-11. (a) Mbanjani awo tingaŵachemera ku Chikumbusko? (b) Kasi lemba la Ŵaefeso 1:7 likuyowoya chifukwa wuli icho tikuchitira nthena?
10 Tikulongora chikanga usange tikuchemera ku Chikumbusko ŵabali ŵithu, awo tikugwira nawo ntchito, na ŵazengezgani. Chifukwa wuli tikuŵachema ŵanthu aŵa? Chifukwa chakuti tikuwonga chomene ivyo Yehova na Yesu ŵatichitira mwakuti tikukhumba chomene kuti ŵanyithu nawo ŵafike pa Chikumbusko. Tikukhumba kuti nawo ŵazakasambire umo ŵangasangira chandulo na ‘lusungu likuru’ ulo Yehova wakalongora pakutipa sembe yakuwombora.—Ŵazgani Ŵaefeso 1:7; Chivu. 22:17.
11 Para tikulongora chikanga pakuwungana pamoza, tikulongoraso mukhaliro unyake wakuzirwa, uwo Chiuta na Mwana wake ŵakulongora mu nthowa zapadera.
CHITEMWA CHIKUTICHICHIZGA KUTI TISANGIKENGEPO
12. (a) Kasi maungano ghakutovwira wuli kuti timutemwenge chomene Yehova na Yesu? (b) Kasi lemba la 2 Ŵakorinte 5:14, 15 likutichiska kuchitachi pakuyezga Yesu?
12 Kutemwa Yehova na Yesu ndiko kukutituma kuti tifikenge pa maungano. Ndipo pamanyuma, ivyo tikusambira pa maungano vikutovwira kuti titemwenge chomene Yehova na Mwana wake. Nyengo zose pa maungano tikukumbuskika ivyo iwo ŵali kutichitira. (Rom. 5:8) Chikumbusko ndicho chikutikumbuska chomene za chitemwa chikuru icho ŵali nacho kwa ise, nanga nkhu ŵanthu awo ŵakumanya yayi kuzirwa kwa sembe yakuwombora. Chifukwa chakuti tikuwonga, tikuyezga kulongora mikhaliro nga nja Yesu zuŵa lililose. (Ŵazgani 2 Ŵakorinte 5:14, 15.) Kweniso mitima yithu yikukhumba chomene kulumba Yehova chifukwa cha kutipa sembe yakuwombora. Nthowa yimoza iyo tingamulumbira nkhuzgorapo pa maungano.
13. Kasi tingalongora wuli kuti tikutemwa Yehova na Mwana wake? Longosorani.
13 Tingalongora kuti tikutemwa Yehova na Mwana wake usange tili ŵakunozgeka kuleka chilichose chifukwa cha iwo. Kanandi tikuleka vinthu vyakupambanapambana kuti tikaŵepo pa maungano. Mipingo yinandi yikuchita maungano namise apo ŵanandi ŵakuŵa kuti ŵavuka. Maungano ghanyake ghakuchitika kuumaliro wa sabata apo ŵanthu ŵanyake ŵakuŵa kuti ŵakupumura. Kasi Yehova wakuwona para tikufika pa maungano ghithu nangauli tikuŵa kuti tavuka? Enya wakuwona. Nakuti Yehova wakuwonga chomene chitemwa icho tikulongora kwa iyo para tikuyezgayezga kufika pa maungano nangauli tili na masuzgo.—Mrk. 12:41-44.
14. Kasi Yesu wakatipa chakuwonerapo wuli pa nkhani ya kulongora chitemwa chakujipata?
14 Yesu wakatipa chakuwonerapo chiwemi chomene pa nkhani ya chitemwa chakujipata. Iyo wakaŵa wakunozgeka kufwira ŵasambiri ŵake, kweniso kuŵika vyakukhumba vyawo pakwamba. Mwachiyelezgero, wakayowoyanga na ŵasambiri ŵake nanga wangaŵa kuti wavuka panji wakusuzgika maghanoghano. (Luka 22:39-46) Iyo wakaŵika maghanoghano pa ivyo wangapeleka ku ŵanji m’malo mwa kuŵika maghanoghano pa ivyo wangapokera kwa iwo. (Mat. 20:28) Para tikutemwa chomene Yehova na ŵabali ŵithu, tichitenge chilichose icho tingafiska kuti tisangikengepo pa Mugonero wa Fumu na pa maungano ghose gha mpingo.
15. Mbanjani awo tikukhumba chomene kuŵawovwira?
15 Tili paubali wa pa charu chose, ndipo tikukondwa kumalira nyengo yithu pa kuchemerako ŵanji kuti ŵaŵe nase. Kweni tikukhumba chomene kovwira “awo mbamoza na ise mu chipulikano” kweni ŵali kulopwa mwauzimu. (Gal. 6:10) Tikulongora kuti tikuŵatemwa usange tikuŵachiska kuti ŵizenge ku maungano, chomenechomene ku Chikumbusko. Nga ni Yehova na Yesu, tikukondwa chomene para ŵakulopwa ŵawelera kwa Yehova, Dada na Muliska withu wachitemwa.—Mat. 18:14.
16. (a) Kasi tingachiskana wuli, ndipo maungano ghangatovwira wuli? (b) Chifukwa wuli pa Chikumbusko ni nyengo yiwemi mu chaka kukumbukira mazgu gha Yesu gha pa Yohane 3:16?
16 Mu masabata ghakulondezgapo, chemani ŵanthu ŵanandi kuti ŵize ku Chikumbusko pa Chinkhondi namise, Epulero 19, 2019. (Wonani bokosi la mutu wakuti “ Kasi Muŵachemenge?”) Mu chaka chose chakulondezgapo, tiyeni tichite vyose ivyo tingafiska kuti tichiskanenge mwa kufika pa maungano ghose gha mpingo agho Yehova wakutipa. Apo umaliro wa charu ichi ukusendelera, maungano ghatovwirenge kuti tilutilire kuŵa ŵakujiyuyura, ŵachikanga, ndiposo ŵachitemwa. (1 Tes. 5:8-11) Na mtima withu wose, tiyeni tilongore umo tikutemwera Yehova na Mwana wake chifukwa chakuti nawo ŵakutitemwa chomene.—Ŵazgani Yohane 3:16.
SUMU 126 Muŵe Maso, Tchinthani, Muŵe Ŵankhongono
^ ndime 5 Chikumbusko cha nyifwa ya Khristu, icho chizamuchitika pa Chinkhondi namise, Epulero 19, 2019, ni ungano wakuzirwa chomene mu chaka. Ntchivichi chikutituma kuti tisangikengepo pa ungano uwu? Mwambura kukayika, tikusangikapo chifukwa chakuti tikukhumba kukondweska Yehova. Mu nkhani iyi, tidumbiskanenge fumbo lakuti, Kasi kusangikapo pa Chikumbusko na maungano ghose gha sabata na sabata kukuvumbura vichi za ise?
^ ndime 50 CHITHUZI CHA PA CHIKOPI: Ŵanthu mamiliyoni ghanandi pa charu chose ŵakupokelereka pa Mugonero wa Fumu
^ ndime 52 MAZGU GHAKULONGOSORA CHITHUZI: Mubali uyo wali mu jele chifukwa cha chipulikano chake wakhozgeka na kalata yakufuma kwa muwoli wake. Iyo wamanya kuti wandaluwike, ndipo ngwakukondwa chomene kupulika kuti mbumba yake yikulutilira kugomezgeka kwa Yehova nangauli mu chigaŵa chawo muli viwawa chifukwa cha ndyali.
