NKHANI YAKUSAMBIRA 3
Yehova Wakumovwirani Kuti Vinthu Vimwenderaninge Makora
“Yehova wakaŵa na Yosefe . . . , wakatumbikanga chilichose icho wakachitanga.”—GEN. 39:2, 3.
SUMU 30 Dada Wane, Chiuta Wane, na Mubwezi Wane
IVYO VILI MU NKHANI IYI a
1-2. (a) Chifukwa wuli tikuzizwa yayi para tikukumana na masuzgo? (b) Kasi tiwonenge vichi mu nkhani iyi?
TAŴATEŴETI ŵa Yehova tikuzizwa yayi para tikukumana na masuzgo. Tikumanya kuti Baibolo likuti: “Tikwenera kujumpha mu visuzgo vinandi kuti tikanjire mu Ufumu wa Chiuta.” (Mil. 14:22) Kweniso tikumanya kuti masuzgo ghithu ghanyake ghamalenge yayi m’paka tizakanjire mu charu chiphya cha Chiuta, umo “nyifwa yizamuŵakoso yayi. Kuzamuŵavya kutengera panji kulira, kutampha nesi vyakuŵinya.”—Chivu. 21:4.
2 Yehova wakutivikilira yayi kuti tileke kukumana na masuzgo. Ndipouli, wakutovwira kuti tizizipizge. Wonani ivyo mpositole Paulosi wakayowoya ku Ŵakhristu awo ŵakakhalanga mu Romu. Chakwamba wakazunura masuzgo ghanandi agho iyo na ŵabali ŵakakumananga nagho. Pamanyuma wakalemba kuti: “Kweni tikuluska mu vinthu vyose ivi kwizira mwa uyo wakatitemwa.” (Rom. 8:35-37) Apa vikulongora kuti Yehova wangatovwira kuti vinthu vitiyendere makora nanga tingaŵa kuti tili mu masuzgo. Tiyeni tiwone umo Yehova wakawovwilira Yosefe kweniso umo wangamovwilirani imwe.
PARA VINTHU VYASINTHA MWAMABUCHI
3. Kasi ntchivichi chikasintha mwamabuchi kwa Yosefe?
3 Yakhobe wakalongolerathu kuti wakatemwanga chomene mwana wake Yosefe. (Gen. 37:3, 4) Pa chifukwa ichi, ŵakuru ŵake ŵakamuchitiranga sanji. Ŵakati ŵasanga m’pata, ŵakamuguliska Yosefe ku ŵamalonda ŵa ku Midiyani. Ŵamidiyani aŵa ŵakenda nayo mtunda utali Yosefe m’paka ku Eguputo uko ŵakakamuguliskaso kwa Potifara, mulara wa ŵavikiliri ŵa themba. Umoyo wa Yosefe ukasintha mwaluŵiro chomene, kufuma pa kuŵa mwana wakutemweka chomene na kuzgoka muzga wa Mueguputo.—Gen. 39:1.
4. Chifukwa wuli nase tingasangana na suzgo lakuyanako na ilo Yosefe wakakumana nalo?
4 Baibolo likuti “vinthu viheni vikuchitikira waliyose.” (Muph. 9:11, Holy Bible—Easy-to-Read Version) Nase nyengo zinyake tikusangana na masuzgo agho ghakuwiraso “ŵanthu wose.” (1 Kor. 10:13) Panji tingasuzgika chifukwa chakuti ndise ŵasambiri ŵa Yesu. Mwachiyelezgero, ŵanthu ŵangatinyoza, kutisuska, panji na kutitambuzga wuwo chifukwa cha chipulikano chithu. (2 Tim. 3:12) Nanga tingasangana na suzgo wuli, Yehova wangatovwira kuti vinthu vitiyenderenge makora. Kasi wakachita wuli ivi kwa Yosefe?
Yehova wakamovwira Yosefe kuti vinthu vimwendere makora nanga ni apo wakaguliskika kuŵa muzga wa Potifara ku Eguputo (Wonani ndime 5)
5. Kasi Potifara wakamanya vichi pa nkhani yakuti Yosefe vinthu vikamwenderanga makora? (Genizesi 39:2-6)
5 Ŵazgani Genizesi 39:2-6. Potifara wakawona kuti Yosefe ni munyamata wamahara kweniso wakulimbikira ntchito. Wakamanyaso chifukwa chake. Potifara wakawona kuti “Yehova wakatumbikanga chilichose icho [Yosefe] wakachitanga.” b Pamanyuma Mueguputo uyu wakamusora Yosefe kuŵa muteŵeti wake. Kweniso wakamwimika kuŵa mulaŵiliri wa nyumba yake yose. Kasi ntchivichi chikachitika? Potifara vinthu vikamwenderanga makora.
6. Kasi Yosefe wakwenera kuti wakakhumbanga chomene vichi apo wakaŵa muzga wa Potifara?
6 Yezgani kughanaghanira umo vinthu vikaŵira kwa Yosefe. Kasi ntchivichi icho wakakhumbanga chomene? Kasi wakakhumbanga kuti Potifara wawone ivyo wakuchita na kumupa njombe? Mwambura kukayika, Yosefe wakwenera kuti wakakhumbanga chomene kufwatuka na kuwelera kwa awiske. Vili nthena chifukwa chakuti wakaŵa wachali muzga wa munthu uyo wakasopanga Yehova yayi, nangauli wakaŵa na mazaza mu nyumba ya Potifara. Yehova wakapangiska yayi kuti Potifara wamufwature Yosefe. Ndipo vinthu vikaŵa pafupi kuhenipirathu kwa Yosefe.
PARA VINTHU VYAHENIPA CHOMENE
7. Kasi vikenda wuli kuti vinthu vihenipe chomene kwa Yosefe? (Genizesi 39:14, 15)
7 Nga umo lemba la Genizesi chaputara 39 likuyowoyera, muwoli wa Potifara wakamudokeranga Yosefe ndipo wakamunyengeleranga kanandi waka. Kweni nyengo yiliyose Yosefe wakakananga. Paumaliro wakamukwiyira chomene Yosefe mwakuti wakamupusikizgira kuti wakakhumbanga kumukolelera. (Ŵazgani Genizesi 39:14, 15.) Potifara wati wapulika ivi, wakamujalira Yosefe mu gadi umo wakakhalamo kwa vyaka. (Gen. 39:19, 20) Kasi mu gadi mukaŵa wuli? Lizgu la Chihebere ilo Yosefe wakaligwiliskira ntchito pa mazgu ghakuti “mu gadi” lingang’anamura “chizongwe,” panji “chikhululu,” kulongora kuti wakaŵa mu malo gha chisi kweniso wakaŵavya chigomezgo chakuti vinthu vingamwenderaso makora. (Gen. 40:15; mazgu ghamusi) Kweniso Baibolo likuti kwakanyengo Yosefe ŵakamukaka malundi ghake na maunyoro, na kunjizga singo yake mu visulo. (Sal. 105:17, 18) Vinthu vikalutilira kuhenipa kwa Yosefe. Wakafuma pakuŵa muzga wakugomezgeka, na kuŵa mukayidi wapasi chomene.
8. Kasi tingasimikizga vichi nanga suzgo lithu lingafika paheni chomene?
8 Kasi muli kukumanapo na suzgo linyake ilo likalutilira kuhenipirathu nangauli mukafwilirapo chomene kulomba? Vingachitika kuti muli kukumanapo nalo. Yehova wakutivikilira yayi kuti tileke kukumana na masuzgo mu charu cha kuwusika na Satana ichi. (1 Yoh. 5:19) Ndipouli, mungasimikizga kuti: Yehova wakumanya makora ivyo mukukumana navyo, ndipo wakumupwelelerani. (Mat. 10:29-31; 1 Pet. 5:6, 7) Kweniso wali kulayizga kuti: “Nikulekenge yayi napachoko nesi kukutaya munthowa yiliyose.” (Heb. 13:5) Yehova wangamovwirani kuti muzizipizge nanga suzgo linu lingawoneka nga ndikuru chomene. Tiyeni tiwone umo vikaŵira kwa Yosefe.
Yehova wakamovwira Yosefe nanga ni apo wakaŵa mu gadi, ndipo wakimikika kuti walaŵilirenge ŵakayidi ŵanyake wose (Wonani ndime 9)
9. Kasi ntchivichi chikulongora kuti Yehova wakaŵa na Yosefe apo wakaŵa mu gadi? (Genizesi 39:21-23)
9 Ŵazgani Genizesi 39:21-23. Nanga mphanyengo yakusuzga apo Yosefe wakaŵa mu gadi, Yehova wakamovwira kuti vinthu vimwendere makora. Kasi wakamovwira wuli? Nyengo yikati yajumphapo, mulinda mulara wa gadi wakamba kumugomezga na kumuchindika Yosefe nga umo vikaŵira na Potifara. Pamanyuma, mulinda mulara wa gadi wakamwimika Yosefe kuti walaŵilirenge ŵakayidi ŵanyake. Nakuti Baibolo likuyowoya kuti “mulinda mulara wa gadi wakafipanga mtima yayi na chilichose icho Yosefe wakachitanga.” Sono Yosefe wakaŵa na ntchito yakukondweska yakuti wachite. Apa vinthu vikasinthaso mwamabuchi chomene. Kasi vingachitika wuli kuti mukayidi uyo ŵakamupa mulandu wakuti wakukhumba kukolelera muwoli wa mwimiliri wa ŵasilikari ŵamupe udindo ukuru uwu? Zgoro likusangika pa Genizesi 39:23 apo pakuti, “chifukwa Yehova wakaŵa nayo ndipo Yehova wakatumbikanga chilichose icho Yosefe wakachitanga.”
10. Longosorani chifukwa icho Yosefe wakwenera kuti wakawoneranga kuti vinthu vikamwenderanga makora pa chilichose yayi.
10 Yezganiso kughanaghanira umo vinthu vikaŵira kwa Yosefe. Ŵati ŵamupusikizgira na kumujalira mu gadi, kasi mukughanaghana kuti wakawonanga kuti vinthu vikamwenderanga nadi makora pa chilichose? Kasi ntchivichi icho Yosefe wakakhumbanga chomene? Kasi wakakhumbanga kutemweka na mulinda mulara wa gadi? Chomene Yosefe wakwenera kuti wakakhumbanga kufwatulika. Ndipo wakachita na kupempha mukayidi munyake uyo wakaŵa pafupi kufuma kuti wakamuyowoyereko kwa Farawo kuti wamufumiske mu gadi. (Gen. 40:14) Kweni mukayidi yura wakatondeka kukayowoya na Farawo. Ntheura, Yosefe wakakhalaso mu gadi kwa vyaka viŵiri. (Gen. 40:23; 41:1, 14) Kweni nipera Yehova wakalutilira kumovwira Yosefe kuti vinthu vimwenderenge makora. Kasi wakawovwira wuli?
11. Kasi ntchinthu wuli chapadera icho Yehova wakamupa Yosefe, ndipo chikawovwira wuli kuti khumbo la Yehova lifiskike?
11 Apo Yosefe wakaŵa mu gadi, Yehova wakaloteska themba la Eguputo maloto ghaŵiri ghakusuzga. Farawo wakakhumbanga kumanya ivyo maloto agha ghakang’anamuranga. Wati wamanya kuti Yosefe wangapatawura maloto ghake, wakamuchemeska. Na wovwiri wa Yehova, Yosefe wakapatawulira maloto, ndipo Farawo wakakondwa chomene na ulongozgi uwo Yosefe wakamuphalira. Wati wawona umo Yehova wakamovwilira Yosefe, Farawo wakasora Yosefe kuti ndiyo walaŵilirenge vyakurya mu charu chose cha Eguputo. (Gen. 41:38, 41-44) Pamanyuma, kukawa njara yikuru mu charu chose cha Eguputo na ku Kenani wuwo uko ŵabali ŵa Yosefe ŵakakhalanga. Sono Yosefe wakaŵa pa malo ghawemi ghakuti wangaponoska mbumba yakwake, na kovwira kuti mphapu iyo muzamufuma Mesiya yivikilirike.
12. Kasi Yehova wakamovwira wuli Yosefe kuti vinthu vimwendere makora?
12 Ghanaghanirani vinthu vyakuzizika ivyo vikachitika pa umoyo wa Yosefe. Kasi ni njani wakapangiska Potifara kuti waŵikeko mahara kwa Yosefe, uyo wakaŵa waka muzga bweka? Kasi ni njani wakapangiska mulinda mulara wa gadi kuti wamuchitire lusungu Yosefe, uyo wakaŵa mukayidi wapasi chomene? Kasi ni njani wakapangiska kuti Farawo walote maloto ghakusuzga, kweniso kovwira Yosefe kuti waghapatawulire? Kasi ni njani uyo wakapangiska Farawo kuti wasore Yosefe kuŵa mulaŵiliri wa vyakurya mu charu chose cha Eguputo? (Gen. 45:5) Ntchakuwonekerathu kuti Yehova ndiyo wakamovwira Yosefe kuti vinthu vimwendere makora pa chilichose icho wakachitanga. Nangauli ŵakuru ŵake ŵakakhumbanga kumukoma, kweni Yehova wakachizgora chiŵembu icho ŵakamupangira kuŵa nthowa yakufiskira khumbo lake.
UMO YEHOVA WAKUMOVWILIRANI KUTI VINTHU VIMWENDERANI MAKORA
13. Kasi Yehova wakunjilirapo pa suzgo lililose ilo likutichitikira? Longosorani.
13 Kasi tikusambirapo vichi pa nkhani ya Yosefe? Kasi Yehova wakunjilirapo pa suzgo lililose ilo takumana nalo? Kasi wakulongozga chilichose icho chikuchitika pa umoyo withu, mwakuti vinthu vyose viheni ivyo vikutichitikira, vikuchitika pa chifukwa chiwemi? Yayi, ndivyo Baibolo likuyowoya yayi. (Muph. 8:9; 9:11) Kweni icho tikumanya ntchakuti: Para takumana na masuzgo, Yehova wakumanya ndipo wakupulika kulira kwithu para tikulomba wovwiri. (Sal. 34:15; 55:22; Yes. 59:1) Ndipo padera pa kumanya na kupulika waka, Yehova wangatovwira kuti tizizipizge masuzgo. Kasi wangatovwira wuli?
14. Kasi Yehova wakutovwira wuli pa nyengo ya masuzgo?
14 Nthowa yimoza iyo Yehova wakutovwilira, nkhutipembuzga na kutikhozga, ndipo ivi kanandi wakuchita panyengo yakwenelera. (2 Kor. 1:3, 4) Chiyelezgero ni Eziz, mubali wa ku Turkmenistan uyo wakajalirika mu jele kwa vyaka viŵiri chifukwa cha chipulikano chake. Iyo wakati: “Namlenji pa zuŵa ilo ŵakeruzgiranga mulandu wane, mubali munyake wakanilongora lemba la Yesaya 30:15, ilo likuti: ‘Musangenge nkhongono chifukwa cha kukhala mwakufwasa na kugomezga.’ Vesi ili likanovwiranga nyengo zose kuti mtima wane ukhazikike na kugomezga Yehova pa chilichose. Kughanaghanirapo pa vesi ili kukanovwira panyengo yose iyo nkhaŵira mu jele.” Kasi namwe mungakumbuka nyengo iyo Yehova wakamovwirani na kumukhozgani apo mukakhumbikwiranga chomene wovwiri?
15-16. Kasi mukusambirako vichi ku ivyo vikachitikira Tori?
15 Kanandi, tikumanya kuti Yehova wakatovwira para suzgo ilo lajumphapo. Mudumbu munyake zina lake Tori wakuwona kuti fundo iyi njaunenesko. Mwana wake, Mason, wakasuzgika na kansa kwa vyaka 6 m’paka apo wakafwira. Ntchakupulikikwa kuti Tori wakaŵa na chitima chomene. Iyo wakuti, “Nkhumanya yayi usange pali suzgo linyake lakuŵinya chomene kwa ine nga mama kuluska ili.” Iyo wakutiso, “Nkhugomezga kuti ŵapapi ŵanyake nawo ŵangazomerezga kuti ntchakuŵinya chomene kuwona mwana wako wakulwara kuluska kuti ulware wamwene.”
16 Nangauli Tori wakaŵa na chitima chomene chifukwa cha suzgo ilo wakasangana nalo, kweni pamanyuma wakaghanaghaniraso umo Yehova wakamovwilira kuti wazizipizge. Iyo wakuti, “Para nkhughanaghanira nyengo iyo, nkhuwona umo Yehova wakanovwilira panyengo yose iyo mwana wane wakalwaranga. Mwachiyelezgero, nanga mphanyengo iyo Masoni wakaŵa mulwari chomene mwakuti wangawonana nawo yayi ŵanthu awo ŵiza kuzakamuwona, kweni ŵabali na ŵadumbu ŵakendanga kwa maora ghaŵiri pa galimoto kwiza ku chipatala. Nyengo zose pakaŵanga munthu pa malo ghakufikira ŵalendo, uyo wakaŵanga wakunozgeka na wakukhumbisiska kutovwira. Kweniso ŵabali na ŵadumbu ŵakatipanga ivyo tikakhumbikwiranga mwakuthupi. Nanga mphanyengo yakusuzga chomene, nyengo zose tikaŵanga navyo vyakukhumbikwira.” Yehova wakamupa Tori vyose ivyo wakakhumbikwiranga kuti wazizipizge, ndimoso wakachitira na Mason.—Wonani bokosi lakuti “ Yehova Wakatipa Ivyo Tikakhumbikwiranga Nadi.”
KULUWA YAYI VIWEMI VYOSE IVYO YEHOVA WAMUCHITIRANI
17-18. Kasi ntchivichi chingatovwira kumanya kweniso kuwonga wovwiri uwo Yehova wakutipa pa nyengo yakusuzga? (Salimo 40:5)
17 Ŵazgani Salimo 40:5. Munthu uyo wakutemwa kukwera mapiri, chilato chake chikuŵa chakuti wakafike pachanya pa phiri. Ndipouli, apo wakukwera, munthowa mukuŵa malo ghanandi ghakutowa umo wakwima dankha na kughawona. Mwakuyana waka, nase para tasangana na suzgo linyake, mwakuyelezgera, tiŵenge na malo agho tingima na kughanaghanirapo umo Yehova wakutovwilira pa suzgo ilo. Paumaliro wa zuŵa lililose jifumbani kuti: ‘Kasi ni vichi ivyo Yehova wanichitira mwahuno? Nangauli suzgo lane lindamare, kasi Yehova wakunovwira wuli kuzizipizga?’ Yezgani kusanga chinthu chimoza icho Yehova wachita kuti wamovwirani.
18 Panji mukulomba kuti suzgo linu limare. Ntchakwenelera nadi kuchita nthena ndipo ntchakupulikikwa. (Fil. 4:6) Kweni tikweneraso kuwona vitumbiko ivyo tikusanga pasono. Nakuti, Yehova wakutilayizga kuti watikhozgenge na kutovwira kuti tizizipizge. Ntheura nyengo zose muwongenge kuti Yehova wakumovwirani. Para mwachita nthena, muzamuwona kuti Yehova wakumovwirani kuti vinthu vimwenderani makora, nga umo wakachitira na Yosefe, nanga mphanyengo iyo wakasuzgikanga.—Gen. 41:51, 52.
SUMU 32 Muŵe ku Chigaŵa cha Yehova!
a Para takumana na suzgo likuru, tingawona nga vinthu ‘vikutiyendera’ makora yayi. Tingaghanaghana kuti vinthu vingazakatiyendera para suzgo ilo lajumpha. Ndipouli, tingasambirako sambiro lakuzirwa ku ivyo vikachitikira Yosefe. Yehova wangatovwira kuti vinthu vitiyendere makora nanga tingaŵa mu masuzgo. Nkhani iyi yilongosorenge umo wangatovwilira.
b Baibolo likulongosora mu mavesi ghachoko waka umo vinthu vikasinthira kakwamba pa umoyo wa Yosefe apo wakaŵa muzga, kweni pakwenera kuti pakatora vyaka vinandi kuti vinthu ivi vichitike.
