1, 2. Chifukwa wuli tikwenera kudumbiskana umo tingapembuzgira awo ŵali na chitima? (Wonani chithuzithuzi chakwamba.)

SUSI wakati: “Mwana withu mwanalume wakati wafwa, tikaŵa na chitima chikuru chomene pafupifupi chaka.” Mubali munyake uyo muwoli wake wakafwa mwamabuchi wakati “vikaniŵinyanga chomene mu mtima.” Chachitima ntchakuti mbanandi chomene awo ŵakujipulika nthena. Ŵabali na ŵadumbu ŵanandi mu mpingo ŵakakhazganga yayi kuti ŵakutemweka ŵawo ŵangafwa pambere Aramagedoni yindize. Kwali munyinu wali kufwa, panji mukumanya munyake uyo mubali panji mubwezi wake wali kufwa, nyengo zinyake mungajifumba kuti: ‘Kasi awo ŵali na chitima ŵangapembuzgika wuli?’

² Panyake muli kupulikapo kuti chitima chikumara para pajumpha nyengo. Kweni kasi mbunenesko nadi kuti vyakuŵinya vikumara vyekha para pajumpha nyengo? Chokoro chinyake chikati: “Ine nawona kuti ivyo munthu wakuchita pa nyengo iyo wali na chitima ndivyo vikovwira kuti chichepe.” Uwu mbunenesko nadi. Chilonda chikupora pachokopachoko para tikuchipwelelera na kuŵikapo munkhwala  wakwenelera. Chitima nacho chingamara pachokopachoko para tikuchitapo kanthu. Kasi ni vichi vingawovwira awo ŵali na chitima kuti chichepeko?

3, 4. Chifukwa wuli tikugomezga kuti Yehova wakumanya makora umo munthu uyo wali na chitima wakujipulikira?

³ Tili na chigomezgo chose kuti Adada ŵithu Ŵakuchaya, Yehova, ndiwo ŵakutisanguluska chomene chifukwa mbalusungu. (Ŵerengani 2 Ŵakorinte 1:3, 4.) Yehova, uyo wakutilengera chomene chitima, wakutisimikizgira kuti: “Ine ndine nkhukusanguluska.”—Yes. 51:12; Sal. 119:50, 52, 76.

⁴ Adada ŵithu ŵalusungu nawo ŵali kutayapo ŵabwezi ŵawo. Ŵanyake mwa ŵabwezi ŵawo ni Abrahamu, Yisake, Yakhobe, Mozesi, na Themba Davide. (Maŵa. 12:6-8; Mat. 22:31, 32; Mil. 13:22) Baibolo likutisimikizgira kuti Yehova wakulindilira mwakunweka apo wazamuwuska ŵateŵeti ŵake ŵakugomezgeka aŵa. (Yobu 14:14, 15) Ŵazamukondwa chomene kweniso ŵazamuŵa na umoyo uwemi. Kweniso ghanaghanirani umo Chiuta wakajipulikira apo Mwana wake wakutemweka, uyo ‘wakakondwanga nayo,’ wakafwa nyifwa yakuŵinya chomene. (Zinth. 8:22, 30) Palije uyo wangalongosora umo Yehova vikamuŵinyira.—Yoh. 5:20; 10:17.

5, 6. Kasi Yehova wangatipembuzga wuli?

⁵ Tili na chigomezgo chose kuti Yehova wachitengepo kanthu kuti watovwire. Ntheura para tili na chitima tikwenera kumupungulira vyose ivyo vili ku mtima withu mu lurombo. Tikujipulikako makora kumanya kuti Yehova wakumanya makora umo vikutiŵinyira, kweniso wakutipa chisangulusko icho tikukhumbikwira. Kweni kasi wakutisanguluska wuli?

⁶ Nthowa yimoza iyo Yehova wakutisanguluskira njakuti wakutipa “mzimu utuŵa.” (Mil. 9:31) Mzimu utuŵa ngwankhongono chomene ndipo ungatipembuzga. Yesu wakatilayizga kuti Adada ŵakuchanya ‘ŵazamupeleka mzimu utuŵa ku awo ŵakuŵalomba.’ (Luka 11:13) Susi uyo tangumuzunura kukwambilira wakati: “Kanandi tikagwadanga pasi na kulomba kwa Yehova kuti watipembuzge. Nyengo zose para tachita nthena, mtende wakufuma kwa Chiuta ukavikiliranga mitima na maghanoghano ghithu.”—Ŵerengani Ŵafilipi 4:6, 7.

7, 8. Chifukwa wuli tikugomezga kuti Yesu wangatipembuzga?

⁷ Apo Yesu Mwana wa Chiuta wakaŵa pa charu chapasi, wakalongora lusungu nga ni Yehova. Ivyo wakayowoyanga na kuchita vikalongora kuti wakaŵa na mukhaliro uwu. (Yoh. 5:19) Chiuta wakatuma Yesu kuti wazakapembuzge “ŵakuphyoka mtima” na “wose awo ŵakutengera.” (Yes. 61:1, 2; Luka 4:17-21) Ntheura Yesu wakalengeranga lusungu ŵanthu, kweniso wakamanyanga masuzgo ghawo. Wakakhumbisiskanga chomene kuŵawovwira.—Heb. 2:17.

⁸ Ntchakuwonekerathu kuti apo Yesu wakaŵa mwana muchoko, nayo wakasuzgikanga na chitima chifukwa cha nyifwa ya ŵabali na ŵabwezi ŵake. Adada ŵake a Yosefe ŵakwenera kuti ŵakafwa apo iyo wakaŵa muchoko. * Ghanaghanirani waka umo Yesu wakajipulikira, uyo panyengo iyo wakwenera kuti wakaŵa na vyaka vya m’ma 20. Iyo wakwenera kuti wakaŵa na chitima, kweniso vikamupwetekanga kuwona chitima icho amama ŵake, ŵanung’una ŵake, na ŵadumbu ŵake ŵakaŵa nacho.

9. Kasi Yesu wakalongora wuli kuti wakaŵa na chitima apo Lazaro wakafwa?

 ⁹ Apo Yesu wakambanga uteŵeti wake, wakamanyanga masuzgo ghaŵanyake na kuŵalengera lusungu. Mwachiyelezgero, wonani ivyo wakachita apo mubwezi wake Lazaro wakafwa. Nangauli Yesu wakamanya kuti wamuwuskenge mubwezi wake, kweni wakaŵa na chitima chikuru kuwona Mariya na Malita ŵali na chitima. Chitima chikakwera chomene kuwona kuti ŵakulira ndipo nayo wakathiska masozi.—Yoh. 11:33-36.

10. Chifukwa wuli tikugomezga kuti Yesu wakutichitira chitima mazuŵa ghano?

¹⁰ Kasi tingapembuzgika wuli kumanya kuti Yesu wakalongoranga chitima kweniso wakapembuzganga ŵanthu? Malemba ghakutisimikizgira kuti “Yesu Khristu njumoza pera, mayiro, muhanya uno na muyirayira.” (Heb. 13:8) Pakuti “Mulongozgi Mulara wa umoyo” wakumanya makora umo vikuŵira para munthu wali na chitima, “wakumanya kuŵawovwira awo ŵakuyezgeka.” (Mil. 3:15; Heb. 2:10, 18) Lekani tili na chigomezgo chose kuti chitima chichali kumukora Khristu para wakuwona ŵanthu ŵakusuzgika. Wakuŵapulikiska para ŵali na chitima, ndipo wakuŵapembuzga “pa nyengo yakwenelera.”—Ŵerengani Ŵahebere 4:15, 16.

11. Kasi ni Malemba wuli agho imwe ghakumupembuzgani?

¹¹ Nkhani yakuyowoya umo Yesu wakaŵira na chitima apo mubwezi wake Lazaro wakafwa, njimoza mwa nkhani zakupembuzga chomene mu Baibolo. Lekani tikuzizwa yayi kuti, “vinthu vyose ivyo vikalembeka kale, vikalembeka kuti vitisambizge, kuti para tazizipizga na kusanguluskika na Malemba, tiŵe na chigomezgo.” (Rom. 15:4) Para muli na chitima, namwe mungapembuzgika na Malemba ghakulondezgapo agha:

• “Yehova wali pafupi na ŵakusweka mu mtima. Wakuponoska awo mzimu wawo wateketeka.”—Sal. 34:18, 19.

• “Para vyenjezgo vyaninyekezga, imwe [Yehova] mukunisanguluska na kunizikiska mtima.”—Sal. 94:19.

• “Mphanyi Fumu yithu Yesu Khristu na Chiuta, Adada ŵithu, awo ŵakatitemwa na kutipa chisangulusko chamuyirayira na chigomezgo chiwemi kwizira mu lusungu lukuru, ŵasanguluska mitima yinu na kumukhozgani.”—2 Tes. 2:16, 17. *

12. Kasi ni nthowa wuli yiwemi chomene iyo tingapembuzgira ŵanyithu?

¹² Ŵabali na ŵadumbu awo ŵali na chitima ŵangapembuzgikaso na mpingo. (Ŵerengani 1 Ŵatesalonika 5:11.) Kasi mungachita wuli kuti mukhozge na kupembuzga awo ŵali na “mzimu wakuphyoka”? (Zinth. 17:22) Kuluwa yayi kuti pali “nyengo ya kukhala chete na nyengo ya kuyowoya.” (Muph. 3:7) Chokoro chinyake, zina lake Dalene chikati: “Awo ŵali na chitima ŵakutemwa kuyowoya maghanoghano ghawo na umo ŵakujipulikira. Ntheura chinthu chakuzirwa icho imwe mungachita nkhutegherezga waka kwambura kuŵadumulizga.” Junia, uyo mudumbu wake wakajikoma, wakati: “Nangauli mungamanya yayi umo munthu uyo wali na chitima wakujipulikira, kweni chakuzirwa ntchakuti mukukhumba kumanya umo wakujipulikira.”

13. Kasi tikwenera kumanya vichi pakuyowoya za munthu uyo wali na chitima?

¹³ Tikwenera kukumbukaso kuti taŵanthu tikulongora chitima munthowa zakupambana. Nyengo zinyake, munthu uyo wali na chitima ndiyo wakumanya makora umo wakujipulikira. Kweniso chingaŵa chakusuzga kuti wayowoye umo wakujipulikira nadi. Mazgu gha Chiuta ghakuti:  “Mtima ukumanya kuŵinya kwake. Ndipo munthu munyake wangasangwako yayi na chimwemwe chake.” (Zinth. 14:10) Nanga munthu wangayowoya umo wakujipulikira, kweni nyengo zinyake chikuŵa chakusuzga kupulikiska ivyo wakung’anamura.

14. Kasi tingapembuzga wuli munthu uyo wali na chitima?

¹⁴ Ntchakupulikikwa kuti tingasoŵa chakuyowoya kwa munthu uyo wali na chitima chomene. Kweni Baibolo likuti, “lulimi lwa wavinjeru lukuchizga.” (Zinth. 12:18) Ŵanandi ŵakupembuzgika para tadumbiskana nawo fundo za mu kabuku ka Para Uyo Mukumutemwa Wapotera. * Kweni chakuzirwa chomene icho tingachita ‘nkhulira na ŵanthu awo ŵakulira.’ (Rom. 12:15) Gaby, uyo mfumu wake wakafwa wakati: “Para nathiska masozi ndikuti nayowoya umo nkhujipulikira. Lekani nkhupembuzgika para nawona ŵabwezi ŵane ŵakulira nane. Para vyaŵa nthena, nkhujipulika kuti ndine pera yayi nili na chitima.”

15. Para vikutisuzga kupembuzga munthu maso na maso, kasi tingachita wuli? (Wonani Bokosi lakuti, “ Mazgu Ghakupembuzga Ghakuzikiska Mtima.”)

¹⁵ Para mwawona kuti vikumusuzgani kupembuzga munthu maso na maso, chingaŵa makora kumutumira kadi, kumulembera imelo, meseji, panji kalata. Mungalembamo lemba lakupembuzga, mungayowoyapo vinthu viwemi ivyo wakachitanga uyo wali kufwa, panji mungamuphalirako vinthu ivyo mukachitiranga lumoza na uyo wali kufwa. Junia wakati: “Nkhujipulika makora chomene para munthu wanilembera meseji yakunikhozga, panji para ŵabali na ŵadumbu ŵanichema kuti tikachezgere lumoza. Para ŵachita nthena, nkhujipulika kuti ŵanyane ŵakunitemwa kweniso ŵakunighanaghanira.”

16. Kasi nthowa yiwemi chomene iyo tingakhozgera munthu wachitima njakuti wuli?

 ¹⁶ Ntchakuzirwa chomene kulomba lumoza na Mkhristu munyithu uyo wali na chitima. Kweniso tingamulombera. Nangauli chingaŵa chakusuzga kuyowoya vyakupulikikwa chifukwa chakuti chitima chakwera, kweni wangapembuzgika para tingamulombera mwakufumira pasi pa mtima nanga tingaŵa kuti tikulira panji tikuyowoya mwakugotagota. Dalene wakati: “Para ŵadumbu ŵiza kuzakanipembuzga, nkhuŵafumba usange ŵanganilombera. Para ŵamba waka kulomba, ŵakulomba mwakugotagota kweniso ŵakusoŵa chakuyowoya. Kweni pamanyuma, mazgu ghawo ghakuŵa ghankhongono ndipo ŵakulomba kufumira pasi pa mtima. Nkhukhozgeka chomene chifukwa cha chipulikano chawo chakukhora, chitemwa chawo, kweniso chifukwa cha kunighanaghanira.”

17-19. Chifukwa wuli tikwenera kulutilira kupembuzga ŵanyithu?

¹⁷ Ŵanyake pakutora nyengo kuti chitima chimare apo ŵanyake yayi. Ntheura kuleka luŵiro yayi kuŵapembuzga. Mungachezganga nawo mu mazuŵa ghakwambilira pera yayi apo ŵabwezi ŵawo na ŵabali ŵawo ŵanandi ŵakuŵapo. Kweni myezi yose yakunthazi para ŵanthu ŵawelera mu zinyumba zawo ndipo ŵakutangwanika na milimo yawo. Baibolo likuti: “Mubwezi wanadi wakutemwa nyengo zose, ndipo ni mubali uyo wali kubabikira kovwira mu suzgo.” (Zinth. 17:17) Tingalutilira kupembuzga Mkhristu munyithu m’paka apo tikuwona kuti chitima chikuchepa ndipo wakukhala makora.—Ŵerengani 1 Ŵatesalonika 3:7.

¹⁸ Kuluwa yayi kuti ŵanthu ŵangachita chitima chifukwa cha nyifwa ya mubali wawo mu nthowa zinandi. Ŵanyake ŵangaŵa na chitima pa zuŵa ilo ŵakatolerana na uyo wali kufwa, para ŵapulika sumu zinyake, ŵawona vithuzithuzi, ŵakumbuka ivyo ŵakachitiranga lumoza, ŵapulika sungu linyake, panji ŵawona vinthu vinyake. Awo munyawo wa mu nthengwa wali kufwa vingaŵaŵinya chomene para ŵamba kuchita ŵekha vinthu vinyake, nga nkhuluta ŵekha ku maungano gha dera, panji ku chikumbusko. Mubali munyake wakati: “Muwoli wane wakati wafwa, chitima chikanikora chomene apo zuŵa ilo tikatolerana likafika. Kweni ŵabali na ŵadumbu ŵanyake ŵakanozga phwando na kunichemerako pamoza na ŵabwezi ŵane kuti nileke kuchita phukwa pa zuŵa ili.”

¹⁹ Kweni kuluwa yayi kuti nyengo zose awo ŵali na chitima ŵakukhumbikwira kuŵakhozga. Junia wakati: “Kanandi wamunthu ukukhozgeka chomene para ŵanyako ŵakuchezga nawe panyengo iyo palije chakuchitika chilichose chapadera. Kuchita nthena nkhwakuzirwa chomene ndipo awo ŵali na chitima ŵakupembuzgika chomene.” Unenesko ngwakuti tingamazga yayi chitima chose icho munthu wakuŵa nacho para wakutemweka wake wafwa. Kweni tingaŵapembuzga na kuŵasanguluska usange tingachita vinthu vinyake ivyo tadumbiskana mu nkhani iyi. (1 Yoh. 3:18) Gaby wakati: “Nkhuwonga chomene Yehova chifukwa cha kutipa ŵabali ŵalara. Iwo ŵakanovwira kuti nizizipizge masuzgo agho nkhakumana nagho. Ŵanovwira kuwona kuti Yehova wakunitemwa ndipo wakunikora na woko lake.”

20. Chifukwa wuli tikupembuzgika na ivyo Yehova watilayizga?

²⁰ Ntchakupembuzga chomene kumanya kuti Yehova, Chiuta wachisangulusko chose, wazamumazga vitima vyose na kutisanguluska zanadi, apo “wose awo ŵali mu madindi ŵazamupulika mazgu [gha Khristu] na kufumira kuwaro.” (Yoh. 5:28, 29) Chiuta wakutilayizga kuti “wazamumilimitizga nyifwa muyirayira, ndipo Fumu Yikuru Yehova yizamufyura masozi ghose ku visko vyawo.” (Yes. 25:8) Panyengo iyo, m’malo mwa ‘kulira na awo ŵakulira,’ ŵanthu wose pa charu chapasi ‘ŵazamusekelera na wose awo ŵakusekelera.’—Rom. 12:15.