NKHANI YAKUSAMBIRA 30
Lutilirani Kwenda mu Unenesko
“Palije chinyake icho chikunikondweska chomene kuluska ichi, chakuti nipulikenge kuti ŵana ŵane ŵakulutilira kwenda mu unenesko.”—3 YOH. 4.
SUMU 54 “Nthowa Ni Iyi”
CHILATO CHA NKHANI IYI *
1. Kuyana na lemba la 3 Yohane 3, 4, kasi ntchivichi chikutikondweska?
MPOSITOLE YOHANE wakwenera kuti wakakondwa chomene kupulika kuti ŵanthu awo wakaŵasambizga unenesko ŵakulutilira kuteŵetera Yehova mwakugomezgeka. Ŵakhristu ŵakugomezgeka aŵa ŵakasangananga na masuzgo ghanandi, ndipo Yohane wakafwilirapo kukhozga chipulikano chawo chifukwa ŵakaŵa nga mbana ŵake. Nase tikukondwa para ŵana awo tili kubaba, panji ŵana ŵithu ŵauzimu ŵajipeleka kwa Yehova ndipo ŵakulutilira kumuteŵetera.—Ŵazgani 3 Yohane 3, 4.
2. Kasi chilato cha makalata gha Yohane chikaŵa chakuti wuli?
2 Mu 98 C.E, Yohane wakwenera kuti wakakhalanga ku Efeso panji kufupi na Efeso. Wakwenera kuti wakamba kukhala uku wati wafumiskika mu jele pa chirwa cha Patimo. Pakwenera kuti pakaŵa pa nyengo iyi apo mzimu wa Yehova ukamovwira kulemba makalata ghatatu. Chilato cha makalata agha chikaŵa chakuti ghakhozge Ŵakhristu ŵakugomezgeka kuti ŵalutilire kuŵa na chipulikano mwa Yesu na kulutilira kwenda mu unenesko.
3. Kasi tizgorenge mafumbo wuli?
3 Yohane wakaŵa mpositole waumaliro uyo wakakhalako, ndipo wakafipanga mtima kuti ŵasambizgi ŵatesi ŵangananga mpingo. * (1 Yoh. 2:18, 19, 26) Ŵanthu ŵakugaluka aŵa ŵakatenge ŵakumumanya Chiuta, kweni ŵakalondezganga yayi malango gha Yehova. Tiyeni tiwone ulongozgi uwo Yohane wakapeleka mwakovwirika na mzimu utuŵa. Apo tikudumbiskana, tizgorenge mafumbo ghatatu: Kasi kwenda mu unenesko chikung’anamurachi? Kasi ni vichi ivyo vingatitondeska kwenda mu unenesko? Ndipo kasi tingawovwirana wuli kuti tilutilire kwenda mu unenesko?
KASI KWENDA MU UNENESKO CHIKUNG’ANAMURACHI?
4. Kuyana na lemba la 1 Yohane 2:3-6 na 2 Yohane 4, 6, kasi tikwenera kuchita wuli kuti tende mu unenesko?
4 Kuti tende mu unenesko, tikwenera kumanya unenesko uwo uli mu Mazgu gha Chiuta, Baibolo. Kweniso tikwenera ‘kusungilira malango ghake,’ icho chikung’anamura kughalondezga. (Ŵazgani 1 Yohane 2:3-6; 2 Yohane 4, 6.) Yesu ntchiyelezgero chiwemi chomene pa nkhani ya kupulikira Yehova. Nthowa yimoza iyo tingalongolera kuti tikupulikira Yehova nkhulondezga mendero gha Yesu mwakugomezgeka.—Yoh. 8:29; 1 Pet. 2:21.
5. Kasi tikwenera kukhorwa kuti vichi?
5 Kuti tilutilire kwenda mu unenesko, tikwenera kukhorwa kuti Yehova ni Chiuta uyo nyengo zose wakuyowoya unenesko, ndipo chilichose icho wakutiphalira mu Baibolo ntchaunenesko. Kweniso tikwenera kukhorwa kuti Yesu ndiyo ni Mesiya uyo wakalayizgika kuti wizenge. Ŵanandi mazuŵa ghano ŵakukayika kuti Yesu wali kuphakazgika kuŵa Fumu ya Ufumu wa Chiuta. Yohane wakachenjezga kuti pakaŵa “ŵapusikizgi ŵanandi,” awo ŵakate ŵapuluskenge awo ŵakagomezganga chomene yayi unenesko wakukhwaskana na Yehova na Yesu. (2 Yoh. 7-11) Yohane wakalemba kuti: “Kasi mutesi ni njani, asi ni uyo wakukana kuti Yesu ni Khristu?” (1 Yoh. 2:22) Kuti tileke kupuluskika, tikwenera kusambira Mazgu gha Chiuta. Para tichitenge nthena, timumanyenge makora Yehova na Yesu. (Yoh. 17:3) Ndipo tikhorwenge kuti tili na unenesko.
KASI NI VICHI IVYO VINGATITONDESKA KWENDA MU UNENESKO?
6. Kasi ntchivichi chingatondeska Ŵakhristu ŵachinyamata kwenda mu unenesko?
6 Ŵakhristu wose ŵakwenera kuŵa maso kuti ŵaleke kupuluskika na vinjeru vya ŵanthu. (1 Yoh. 2:26) Ŵakhristu ŵachinyamata ndiwo ŵakwenera kuŵa maso chomene. Alexia, * mudumbu wa ku France uyo wali na vyaka 25 wakuti: “Apo nkhaŵa muchoko, nkhatimbanizgikanga chomene na vinjeru vya charu, nga ntchisambizgo chakuti vinthu vikachita kusintha kufuma ku vinthu vinyake. Nyengo zinyake nkhakolerananga navyo visambizgo vyanthena. Kweni nkhawona kuti chingaŵa makora yayi kusulako ivyo Baibolo likusambizga na kugomezga chilichose icho asambizgi ŵakayowoyanga.” Alexia wakasambira buku la Life—How Did It Get Here? By Evolution or by Creation? Wati wasambira masabata ghachoko waka, wakaleka kukayikira ivyo wakasambiranga mu Baibolo. Alexia wakuti: “Nkhakhorwa kuti Baibolo likusambizga unenesko. Ndipo nkhamanya kuti para nkhulondezga ivyo likuyowoya, mbwenu niŵenge na mtende kweniso nikhalenge mwakukondwa.”
7. Kasi ni umoyo wuli uwo tikwenera kukana, ndipo chifukwa wuli?
7 Ŵakhristu wose, kwali mbana panji ŵalara, ŵakwenera kukana umoyo waupusikizgi. Yohane wakayowoya kuti ntchiwemi yayi kuti tijilongorenge nga tikwenda mu unenesko uku tikuchitaso nkharo zaukazuzi. (1 Yoh. 1:6) Kuti tichitenge vinthu vyakuti vingamukondweska Yehova, nyengo zose tikumbukenge fundo yakuti Yehova wakuwona vyose ivyo tikuchita. Nakuti nanga ŵanthu ŵangaleka kuwona ivyo tikuchita, Yehova wakutiwona.—Heb. 4:13.
8. Kasi ni maghanoghano wuli agho tikwenera kukana?
8 Tikane kuwona kwananga nga umo charu chikuwonera. Mpositole Yohane wakalemba kuti: “Usange tikuyowoya kuti: ‘Tilije zakwananga,’ tikujipuluska tekha.” (1 Yoh. 1:8) Mu nyengo ya Yohane, ŵakugaluka ŵakayowoyanga kuti nanga munthu wanganangira dala, wangalutilira kuŵa paubwezi na Chiuta. Mazuŵa ghano napo ŵanthu ŵakughanaghana nthena. Ŵanandi ŵakuti ŵakugomezga mwa Chiuta, kweni ŵakukolerana yayi na maghanoghano gha Yehova, chomene pa nkhani ya kugonana. Pali kugonana kunyake uko Yehova wakukanizga kweni iwo ŵakuti pa nkhani iyi, munthu wakwenera kusankha yekha ivyo wakukhumba kuchita.
Ŵachinyamata, kuti muvikilire makora chipulikano chinu mukwenera kumanya chifukwa icho Yehova wakutiphalilira icho ntchiwemi na chiheni (Wonani ndime 9) *
9. Kasi ŵachinyamata ŵakusanga chandulo wuli para ŵalondezga ivyo Baibolo likuyowoya?
9 Chingaŵa chakusuzga chomene kuti Mkhristu wachinyamata wawonenge nkhani ya kugonana nga umo Yehova wakuyiwonera para ŵanyake ku sukulu ŵakumuchichizga kuti wendere maghanoghano ghawo. Ivi ndivyo vikachitikira Aleksandar. Iyo wakuti: “Ŵasungwana ŵanyake pa sukulu ŵakaninyengeleranga kuti nigonane nawo. Iwo ŵakatenge pakuti nkhaŵavya chibwezi, ndikuti nkhugonana na ŵanalume ŵanyane.” Para namwe mukulimbana na chiyezgo ichi, kumbukani kuti para mwalondezga ivyo Baibolo likuyowoya, mujisungirenge ntchindi, mugegenge matenda, musuzgikenge yayi maghanoghano, ndipo Yehova walutilirenge kumutemwani. Ndipo nyengo yiliyose para mwatonda chiyezgo, muŵenge ŵakukhora ndipo chiŵenge chipusu kwa imwe kuchita icho ntchiwemi. Kweniso kumbukani kuti Satana ndiyo wakupangiska kuti ŵanthu mu charu ichi ŵawonenge kuti kugonana uko Chiuta wakukana nkhuwemi waka. Ntheura para mwakana kuthera, ndikuti ‘mwatonda muheni.’—1 Yoh. 2:14.
10. Kasi lemba la 1 Yohane 1:9 likutovwira wuli kuteŵetera Yehova na njuŵi yituŵa?
10 Tikumanya kuti Yehova ndiyo ngwakwenelera kutiphalira icho ntchambura kwenelera. Ndipo tikwenera kufwilirapo kuti tileke kubuda. Kweni para tachita kwananga, tikwenera kumuphalira Yehova mu lurombo. (Ŵazgani 1 Yohane 1:9.) Ndipo para tachita kwananga kukuru, tikwenera kupempha wovwiri ku ŵalara awo Yehova wali kwimika kuti ŵatovwire. (Yak. 5:14-16) Kweni tileke kukhalira waka kujiyimba mulandu chifukwa cha zakwananga izo tikachita kumanyuma. Chifukwa wuli? Chifukwa Adada ŵithu ŵachitemwa ŵakapeleka sembe ya Mwana wawo kuti zakwananga zithu zigowokereke. Para talapa ndipo Yehova watigowokera, wakuluwako nadi ivyo tabuda. Ntheura palije icho chingatitondeska kuteŵetera Yehova na njuŵi yituŵa.—1 Yoh. 2:1, 2, 12; 3:19, 20.
11. Kasi tingachita wuli kuti tijivikilire ku visambizgo ivyo vingananga chipulikano chithu?
11 Tikwenera kukana visambizgo vya ŵakugaluka. Kufuma waka apo mpingo Wachikhristu ukambira, Dyabulosi wakugwiliskira ntchito ŵakugaluka kuti ŵalopweske chipulikano cha ŵateŵeti ŵa Chiuta. Ntheura tikwenera kumanya umo tingapambaniskira pakati pa unenesko na utesi. * Ŵalwani ŵithu ŵangagwiliskira ntchito intaneti panji malo ghakuchezgerapo gha pa intaneti kuti ŵalopweske chipulikano chithu mwa Yehova kweniso kuti tileke kutemwa ŵabali ŵithu. Tikwenera kumanya kuti Satana ndiyo wakupangiska vyose ivi, ndipo tikwenera kuŵa navyo maso.—1 Yoh. 4:1, 6; Chivu. 12:9.
12. Chifukwa wuli tikwenera kukhozga chipulikano chithu mu ivyo tasambira?
12 Kuti titonde Satana apo wakulimbana na chipulikano chithu, tikwenera kumugomezga chomene Yesu kweniso kumanya udindo uwo wali nawo pakufiska khumbo la Yehova. Kweniso tikwenera kugomezga awo Yehova wakuŵagwiliskira ntchito kulongozga gulu lake mazuŵa ghano. (Mat. 24:45-47) Tingakhozga chipulikano chithu para nyengo zose tikuŵazga Mazgu gha Chiuta. Para tichitenge nthena, chipulikano chithu chiŵenge nga ni khuni ilo misisi yake yili kujintha pasi chomene. Paulosi wakayowoya fundo yakuyanako na iyi apo wakalembera kalata mpingo wa Ŵakolose. Iyo wakati: “Pakuti mwazomera Fumu Khristu Yesu, lutilirani kwenda mu umoza na iyo, kujintha misisi na kuzengeka mwa iyo na kukhazikika mu chipulikano.” (Kol. 2:6, 7) Para Mkhristu wakhozga chipulikano chake, palije icho Satana panji ŵanthu ŵake ŵangachita kuti ŵamulekeske kwenda mu unenesko.—2 Yoh. 8, 9.
13. Kasi tikwenera kukhazga vichi, ndipo chifukwa wuli?
13 Tikwenera kukhazga kuti charu chititinkhenge. (1 Yoh. 3:13) Yohane wakutikumbuska kuti “charu chose chikugona mu nkhongono za muheni.” (1 Yoh. 5:19) Apo charu ichi chili pafupi kumara, Satana ni mukali chomene. (Chivu. 12:12) Iyo wakugwiliskira ntchito nthowa zauchenjezi nga nkhutikopa na uzaghali kweniso mautesi agho ŵakugaluka ŵakuyowoya. Kweniso wakutiwukira mwakudunjika. Satana wakumanya kuti wakhala na kanyengo kachoko chomene ndipo wakuyezgayezga kuti watondeske ntchito yithu yakupharazga panji kunanga chipulikano chithu. Lekani tikuzizwa yayi kuti mu vyaru vinyake milimo yithu yose panji yinyake njakukanizgika. Nangauli vili nthena, kweni ŵabali na ŵadumbu ŵithu mu vyaru ivi ŵakuzizipizga. Iwo ŵakulongora kuti tingalutilira kugomezgeka nanga Satana wangatiwukira wuli.
WOVWIRANANI KUTI MULUTILIRE KWENDA MU UNENESKO
14. Kasi ni nthowa wuli iyo tingawovwilira ŵabali na ŵadumbu ŵithu kuti ŵalutilire kwenda mu unenesko?
14 Kuti tovwire ŵabali na ŵadumbu ŵithu kuti ŵalutilire kwenda mu unenesko, tikwenera kuŵalongora lusungu. (1 Yoh. 3:10, 11, 16-18) Tikwenera waka kutemwana para vinthu vili makora pera yayi, kweni na para vyasuzga. Mwachiyelezgero, kasi mukumanyapo munyake uyo wakutemweka wake wali kufwa, ndipo wakukhumbikwira kupembuzgika panji wovwiri pa vinthu vinyake? Panji kasi muli kupulika kuti ŵabali panji ŵadumbu ŵithu ŵanyake ŵali kuluza katundu wawo chifukwa cha masoka gha chilengiwa, ndipo ŵakukhumbikwira kuŵazengera Nyumba za Ufumu panji nyumba zawo? Tingalongora lusungu na chitemwa ku ŵabali na ŵadumbu ŵithu mwa kuleka kuyowoya waka pamlomo kuti tikuŵatemwa, kweni kuchitapo kanthu.
15. Kuyana na mazgu agho ghali pa 1 Yohane 4:7, 8, kasi tikwenera kuchita wuli?
15 Para tikulongorana chitemwa ndikuti tikuyezga Adada ŵithu ŵakuchanya. (Ŵazgani 1 Yohane 4:7, 8.) Nthowa yiwemi chomene iyo tingalongolera chitemwa nkhugowokerana. Mwachiyelezgero, munyake wangatikhuŵazga ndipo pamanyuma wangatiphepiska. Tingalongora kuti tili na chitemwa usange tingamugowokera na kuluwako ivyo watibudira. (Kol. 3:13) Mubali munyake zina lake Aldo wakayezgeka pa nkhani iyi. Wakapulika mubali munyake uyo wakamuchindikanga chomene wakuyowoya vinthu viheni vyakukhwaskana na mtundu wake. Aldo wakuti: “Kanandi nkhalombanga Yehova kuti wanovwire kuti nileke kumuwona uheni mubali uyu.” Kweni Aldo wakachitaso chinthu chinyake. Wakapempha mubali uyu kuti ŵendere lumoza mu upharazgi. Apo ŵakapharazgiranga lumoza, Aldo wakalongosolera mubali uyu umo ivyo wakayowoya vikamuŵinyira. Aldo wakuti: “Nati namuphalira mubali uyu umo mazgu ghake ghakanipwetekera, wakaphepiska. Mazgu ghake ghakalongolerathu kuti wakuphepiska kufuma pasi pa mtima. Tikamba kutemwana chomene ndipo tikaluwako vya nkhani iyi.”
16-17. Kasi tikwenera kuŵikapo mtima kuchita vichi?
16 Mpositole Yohane wakaŵatemwanga chomene ŵabali na ŵadumbu ŵake ŵauzimu, ndipo wakakhumbanga kuti ŵaŵe na chipulikano chakukhora. Makalata ghatatu agho wakaŵalembera mwakovwirika na mzimu utuŵa ndigho ghakulongora kuti wakaŵatemwanga nadi. Ntchakukhozga chomene kumanya kuti ŵanalume na ŵanakazi awo ŵamuwusa na Yesu kuchanya nawo mbachitemwa chomene nga umo wakaŵira Yohane.—1 Yoh. 2:27.
17 Mphanyi taŵikapo mtima kulondezga ulongozgi uwo tadumbiskana. Tiyeni tifwilirepo kwenda mu unenesko. Ichi chikung’anamura kuti tikwenera kupulikira Yehova pa chilichose. Sambirani Mazgu ghake na kughagomezga. Khozgani chipulikano chinu mwa Yesu. Kanani vinjeru vya ŵanthu na visambizgo vya ŵakugaluka. Lekani kuŵa na umoyo waupusikizgi na kwananga. Ŵani na nkharo iyo Yehova wakukhumba. Ndipo tiyeni tovwire ŵabali na ŵadumbu ŵithu kuti ŵalutilire kuŵa ŵakukhora. Tingachita nthena usange tikugowokera awo ŵatibudira na kovwira awo ŵali mu suzgo. Para tichitenge nthena, tilutilire kwenda mu unenesko nanga tingakumana na masuzgo ghakuru wuli.
SUMU 49 Kukondweska Mtima wa Yehova
^ ndime 5 Tikukhala mu charu icho chikuwusika na wiske wa utesi, uyo ni Satana. Ntheura ntchakusuzga chomene kwenda mu unenesko. Ŵakhristu ŵakwambilira nawo ŵakasangana na suzgo ili. Kuti Yehova waŵawovwire na kovwiraso ise, wakakhuŵilizga mpositole Yohane kuti walembe makalata ghatatu. Ivyo vili mu makalata agha vingatovwira kumanya ivyo vingatitondeska kwenda mu unenesko na umo tingatondera.
^ ndime 3 Wonani bokosi lakuti “ Chifukwa Icho Yohane Wakalembera Makalata Ghake.”
^ ndime 6 Mazina ghanyake ghasinthika.
^ ndime 11 Wonani nkhani yakuti “Kasi Ni Vyaunenesko?” mu Gongwe la Mulinda la Ogasiti 2018.
^ ndime 59 MAZGU GHAKULONGOSORA CHITHUZI: Apo mudumbu muwukirano wali ku sukulu, wakupulika na kuwona vinthu ivyo vikulongora nga kugonana kwa ŵanalume panji ŵanakazi pera nkhuwemi waka. (Mu vyaru vinyake, mitundu ya chiŵingavura yikwimira kugonana kwa ŵanalume panji ŵanakazi pera.) Pamanyuma wakuchita kafukufuku kuti wakhozge chipulikano chake. Kuchita nthena kukumovwira kuti wasankhe vinthu mwamahara.
