“MONIRE! Muli wuli?”

Tikugomezga kuti muli kuyowoyapo mazgu agha pakutawuzga ŵanyinu. Nyengo zinyake pakuŵatawuzga mukuŵakora chasa panji kuŵavumbatira. Nangauli katawuzgiro kakupambana mu malo na malo, kweni chilato ntchimoza. Nakuti para tikuleka kutawuzga ŵanyithu panji tikuleka kuzgora para ŵanyithu ŵatitawuzga, tikulongora kuti tilije chitemwa panji nkharo.

Kweni ni ŵanthu wose yayi awo ŵakutemwa kutawuzga ŵanyawo. Ŵanyake ŵakutondeka kutawuzga chifukwa cha soni panji ŵakujiwona kuti mbapasi. Ŵanyake chikuŵaŵira chakusuzga kutawuzga ŵanthu awo ŵakupambana nawo mtundu, fuko, panji maudindo. Kweni ntchakuzirwa chomene kutawuzgana nanga kungaŵa kwakudumura.

Jifumbani kuti: ‘Chifukwa wuli ntchakuzirwa kutawuzga ŵanyithu? Ndipo Mazgu gha Chiuta ghanganisambizga vichi pa nkhani ya kutawuzgana?’

Apo mpositole Petrosi wakapokeleranga Koroneliyo uyo wakaŵa munthu wakwamba Wamitundu kuzgoka Mkhristu, wakati: “Chiuta wakutemwera yayi.” (Mil. 10:34) Kufuma apo, Petrosi wakalemba kuti Chiuta “wakukhumba kuti wose ŵang’anamuke mtima.” (2 Pet. 3:9) Panji tingaghanaghana kuti mazgu agha ghakuyowoya za munthu uyo wakusambira sono unenesko. Kweni Petrosi wakachiska Ŵakhristu kuti: “Chindikani ŵanthu ŵa mtundu uliwose, mutemwenge ŵabali wose.” (1 Pet. 2:17) Ipo kasi ntchiwemi yayi kuti titawuzgenge ŵanyithu kwali mbamtundu unyake, fuko linyake, panji tikupambana uko tikufumira? Para tichitenge nthena tilongorenge kuti tikuŵachindika na kuŵatemwa.

Mpositole Paulosi wakachiska awo ŵakaŵa mu mpingo kuti: “Ntheura pokeleranani, umo Khristu nayo wakamupokelerani.” (Rom. 15:7) Nakuti Paulosi wakazunura ŵabali awo “ŵakamukhozganga.” Ntheura mazuŵa ghano ndipo ntchakukhumbikwa chomene kuti ŵabali na ŵadumbu ŵakhozganenge pakuti sono Satana wakuwukira chomene ŵanthu ŵa Chiuta.—Kol. 4:11, mazgu ghamusi; Chivu. 12:12, 17.

Viyelezgero vya mu Malemba vikulongora kuti para tikutawuzga ŵanyithu tikulongora kuti taŵapokelera.

Nyengo yikati yakwana kuti umoyo wa Mwana wa Chiuta usamire mu nthumbo ya Mariya, Yehova wakatuma mungelo kuti wazakayowoye na Mariya. Mungelo wakamba kumutawuzga kuti: “Monire iwe wakutumbikika chomene, Yehova wali nawe.” Mariya “wakasuzgika chomene maghanoghano,” wakamanyanga yayi chifukwa icho mungelo wakamuyowoyeskeranga. Pakuwona nthena, mungelo wakati: “Kopa chara Mariya, pakuti watumbikika na Chiuta.” Wakalongosora kuti likaŵa khumbo la Chiuta kuti Mesiya wababikire mwa iyo. M’malo mwa kulutilira kusuzgika maghanoghano, Mariya wakazgora mwantchindi kuti: “Wonani, muzgakazi wa Yehova! Vichitike kwa ine kuyana na mazgu ghinu.”—Luka 1:26-38.

Mungelo wakapika mulimo wapadera nadi pakuŵa thenga la Yehova; kweni wakawona kuti chingaŵa chifukwa yayi chakuti walekere kuyowoya na munthu wambura kufikapo. Pakuyowoya na Mariya wakamba dankha kumutawuzga. Kasi tikusambirapo vichi apa? Tikwenera kuŵa ŵakunozgeka kutawuzga ŵanyithu na kuŵakhozga. Na mazgu ghachoko waka, tingawovwira ŵanyithu na kuŵakhozga kuti ŵajipulikenge kuti ŵali mu gulu la Yehova.

Paulosi wakamanyanga ŵabali ŵanandi mu mipingo ya mu Asiya yose na Europe. Ŵanyake wakaŵazunura mazina mu makalata ghake pakuŵatawuzga. Fundo iyi tikuyisanga mu Ŵaroma chipaturo 16. Paulosi  wakatawuzga Ŵakhristu ŵanyake ŵanandi. Wakazunura “mudumbu withu” Febe, ndipo wakachiska ŵabali kuti ‘ŵamupokelere mu Fumu nga umo ŵakuchitira na ŵatuŵa, ndiposo kuti ŵamovwire pa chilichose icho wangakhumba.’ Paulosi wakatawuzga Prisika na Akwila, ndipo wakati ‘ndiyo pera yayi wakuŵawonga kweniso mipingo yose iyo yili mu ŵamitundu yikuŵawonga.’ Kweniso wakazunura ŵanthu ŵanyake awo tikuŵamanya yayi nga ni ‘Epayineto wakutemweka wake’ kweniso “Turufina na Turufosa, ŵanakazi awo ŵakufukafuka chomene mu Fumu.” Nadi, Paulosi wakaŵa wakunozgeka kutawuzga ŵabali na ŵadumbu.—Rom. 16:1-16.

Kasi mukughanaghana kuti ŵakakondwa yayi kuti wakaŵakumbukanga na mazina wuwo? Ntheura ŵakamutemwanga chomene Paulosi ndipo nawo ŵakatemwananga chomene. Ndipo Ŵakhristu ŵanyake ŵakwenera kuti ŵakakhozgeka chomene ŵati ŵapulika kuti Paulosi wakuŵatawuzga kufumira pasi pa mtima, ndipo vikaŵawovwira kuti ŵalutilire kuŵa ŵakugomezgeka. Nadi, para tikutawuzga ŵanyithu kufumira pasi mtima na kuŵawonga, tikukhozga ubwezi withu ndipo tikuŵa ŵakukolerana.

Paulosi wakati wafika pa dowoko la Puteyoli na kuluta ku Romu, ŵabali ŵakiza kuzakakumana nayo. Wakati waŵawona ŵakwiza chapataliko, Paulosi “wakawonga Chiuta na kukhwima mtima.” (Mil. 28:13-15) Nyengo zinyake kuti titawuzge ŵanyithu, tingamwemwetera waka panji kuŵabayibiska. Para tingachita nthena, tingakhozga ŵanthu ŵanyake, chomenechomene awo ŵasuzgika maghanoghano panji ŵali na chitima.

Msambiri Yakobe wakakhumbanga kupeleka ulongozgi wankhongono. Ŵakhristu ŵanyake ŵakaŵa ŵaleŵi mwauzimu, ŵakaŵa paubwezi na charu. (Yak. 4:4) Kweni wonani umo Yakobe wakayambira kalata yake.

“Ine Yakobe, muzga wa Chiuta na wa Fumu Yesu Khristu, ku mafuko 12 agho ghali kumbininika: Monire!” (Yak. 1:1) Ntchakuwonekerathu kuti chikaŵa chipusu kwa awo wakaŵalembera kalata iyi kuzomera ulongozgi wake ŵakati ŵaŵazga mazgu ghake ghakwamba ghakuti wose mbakuyana kwa Chiuta. Nadi, para tingatawuzga ŵanyithu tingajura nthowa yakuti tambe kudumbiskana nawo nanga zingaŵa nkhani zakusuzga.

Para tikutawuzga ŵanyithu, nanga tingaŵatawuzga mwakudumura, vikwenera kufumira pasi pa mtima kweniso vilongorenge kuti tikuŵatemwa. Vili nthena nanga ni para ŵanyake ŵangaŵa nga ŵakuŵikako mahara yayi. (Mat. 22:39) Mudumbu munyake ku Ireland wakafika pa Nyumba ya Ufumu maungano ghali pafupi kwamba. Apo wakanjiranga, mubali munyake wakamwemwetera ndipo wakati: “Tamupokelerani. Takondwa chomene kumuwonani.” Mudumbu wakakhala waka pasi.

Masabata ghachoko waka ghakati ghajumphapo, mudumbu uyu wakiza kwa mubali uyu na kumuphalira kuti wakaŵa na suzgo linyake ilo wasuzgika nalo maghanoghano kanyengo kataliko. Mudumbu uyu wakati: “Zuŵa lira nkhiza wakukhuŵara chomene, ndipo nkhakhala pachoko kukhala ku Nyumba ya Ufumu. Nkhukumbuka vinandi yayi ivyo tikasambira pa maungano zuŵa lira, kweni monire winu pera. Nkhawona kuti napokelereka nadi. Nawonga chomene.”

Mubali uyu wakamanyanga yayi umo mudumbu uyu wakakhwaskikira chifukwa cha kumutawuzga mwakudumura. Mubali uyu wakati: “Nkhakondwa chomene wakati waniphalira umo wakakhozgekera na mazgu ghachoko waka agho nkhayowoya. Nane nkhajipulika makora.”

Solomoni wakalemba kuti: “Ponya chingwa chako pa maji, pakuti uzamuchisangaso para pajumpha mazuŵa ghanandi.” (Muph. 11:1) Para tikutemwa kutawuzga ŵanyithu, chomenechomene Ŵakhristu ŵanyithu, tikuŵakhozga ndipo nase tikukhozgeka. Ntheura tingalekanga yayi kutawuzga ŵanyithu.