1. Kasi kopa Chiuta chikung’anamurachi, ndipo chifukwa wuli awo ŵakumutemwa Yehova ŵakwenera kuŵa na wofi uwu?

ŴAKHRISTU ŵakumutemwa Chiuta kweniso ŵakumopa. Ŵanyake ŵangawona nga fundo izi zikususkana. Kweni apa tikuyowoya wofi wa kopa chilwani yayi. Mu nkhani iyi tidumbiskanenge za wofi unyake. Ŵanthu awo ŵali na wofi uwu, ŵakumopa Yehova na kumuchindika. Ŵakukhumba yayi kukwiyiska Adada ŵawo ŵakuchanya chifukwa chakuti ŵakukhumba yayi kunanga ubwezi wawo na iwo.—Sal. 111:10; Zinth. 8:13.

2. Kuyana na mazgu gha Themba Davide agho ghali pa Salimo 86:11, kasi ni vinthu wuli viŵiri ivyo tiwonenge mu nkhani iyi?

² Ŵazgani Salimo 86:11. Apo mukughanaghanirapo mazgu agha, mungawona kuti Themba Davide likamanyanga kuzirwa kwa kopa Chiuta. Tiyeni tiwone umo tingalondezgera ivyo Davide wakayowoya mu lurombo lwake. Chakwamba, tiwonenge vifukwa ivyo tikwenera kuchindikira chomene zina la Chiuta. Chachiŵiri, tiwonenge umo tingalongolera kuti tikuchindika zina la Chiuta pa umoyo withu.

3. Kasi ntchivichi icho chikwenera chikawovwira Mozesi kulutilira kuchindika zina la Chiuta?

³ Ghanaghanirani umo Mozesi wakajipulikira apo wakaŵa ku mphanji wati wawona mboniwoni ya uchindami wa Yehova uwo ukajumphanga. Ichi chikwenera kuti chikaŵa chinthu chakuzizwiska chomene, ndipo pambere Yesu wandize  pa charu chapasi palije uyo wakaŵa kuti wawonapo vyanthena ivi. Mozesi wakapulika mazgu ghakulondezgapo agha agho ghakwenera kuti ghakayowoyeka na mungelo, ghakuti: “Yehova, Yehova, Chiuta walusungu na wachiwuravi, wakukalipa luŵiro chara, wakuzara na chitemwa, na unenesko. Wakulongora lusungu ku vikwi, wakugowokera ubudi, uheni, na kwananga.” (Eks. 33:17-23; 34:5-7) Para wakuzunura zina la Yehova, Mozesi wakwenera kuti wakakumbukanga ivyo vikamuchitikira apa. Lekani ntchakuzizika yayi kuti pamanyuma Mozesi wakachenjezga Ŵaisrayeli kuti ‘wopani zina ili lauchindami na lakofya.’—Doto. 28:58.

4. Kasi ntchivichi chingatovwira kuti timuchindikenge chomene Yehova?

⁴ Para tikughanaghanira vya zina lakuti Yehova, tingachitaso makora kughanaghanira vya mweneko wa zina ili. Tikwenera kughanaghanira mikhaliro yake nga ni nkhongono zake, vinjeru vyake, urunji wake, na chitemwa chake. Para tingaghanaghanirapo mikhaliro iyi na yinyake timuchindikenge chomene.—Sal. 77:11-15.

5-6. (a) Kasi zina la Chiuta likung’anamurachi? (b) Kuyana na Ekisodo 3:13, 14 na Yesaya 64:8, kasi Yehova wakuchita wuli kuti wafiske khumbo lake?

⁵ Kasi tikumanya vichi vya ng’anamuro la zina la Chiuta? Nkhwantha zinandi zikuzomerezga kuti zina lakuti Yehova likwenera kuti likung’anamura kuti “Wakuchitiska Kuti Viŵeko.” Ng’anamuro ili likutikumbuska kuti palije icho chingamutondeska Yehova kuchita icho wakukhumba. Munthowa wuli?

⁶ Yehova wangaŵa chilichose icho wakhumba mwakuti wafiske khumbo lake. (Ŵazgani Ekisodo 3:13, 14.) Mu mabuku ghithu, kanandi tikukumbuskika kuti tikwenera kughanaghanirapo pa mikhaliro ya Chiuta. Yehova wangazgora ŵanthu ŵambura kufikapo awo ŵakumuteŵetera kuŵa icho iyo wakukhumba mwakuti wafiske khumbo lake. (Ŵazgani Yesaya 64:8.) Kwizira munthowa izi, Yehova wakupangiska khumbo lake kuchitika, ndipo palije icho chingamutondeska kufiska khumbo lake.—Yes. 46:10, 11.

7. Kasi tingachita wuli kuti tiŵachindikenge chomene Adada ŵithu ŵakuchanya?

 ⁷ Tingalutilira kuŵawonga Adada ŵithu ŵakuchanya para tikughanaghanirapo pa ivyo ŵali kuchita kweniso umo ŵakutovwilira. Mwachiyelezgero, para tikughanaghanirapo pa vinthu vyose ivyo ŵali kulenga, tikuzukuma chomene na chilichose icho ŵali kuchita. (Sal. 8:3, 4) Kweniso para tighanaghanirengepo pa umo Yehova watovwilira kuti tichite khumbo lake, timuchindikenge chomene. Zina la Yehova likwenera kuchindikika nadi. Zina ili likusazgapo mikhaliro yose iyo Adada ŵithu ŵakuchanya ŵali nayo, vyose ivyo ŵachita, kweniso vyose ivyo ŵachitenge munthazi.—Sal. 89:7, 8.

8. Kuyana na Dotoronome 32:2, 3, kasi Yehova wakukhumba kuti ŵateŵeti ŵake ŵachitenge wuli na zina lake?

⁸ Pambere Ŵaisrayeli ŵandanjire mu Charu cha Layizgano, Yehova wakasambizga Mozesi sumu. (Doto. 31:19) Mozesi nayo wakeneranga kusambizga ŵanthu sumu iyi. (Ŵazgani Dotoronome 32:2, 3.) Apo tikughanaghanirapo vesi 2 na 3, tikuwona kuti Yehova wakukhumba yayi kuti zina lake libisikenge, panji liŵenge nga ndakusuzga kulizunura. Wakukhumba kuti ŵanthu wose ŵalimanye zina lake. Ŵaisrayeli ŵakwenera kuti ŵakakondwa chomene kuwona kuti Mozesi wakuŵasambizga vya Chiuta na zina lake lapadera. Ivyo Mozesi wakaŵasambizga vikaŵakhozga chomene. Kasi tingachita wuli kuti nase tisambizgenge nthena?

9. Kasi tingawovwirapo wuli kuti zina la Yehova lituŵiskike?

⁹ Para tikupharazga ku nyumba na nyumba panji ku malo uko kukusangika ŵanthu ŵanandi, ŵanthu tikwenera kuŵalongora zina la Chiuta mu Baibolo. Tingaŵapa buku, kuŵalongora vidiyo, kweniso fundo zinyake pa webusayiti yithu izo zikuchindika Yehova. Ku ntchito, ku sukulu, panji para tili paulendo, tingaŵaphalirako ŵanyithu vya Chiuta withu wachitemwa kweniso ivyo wakukhumba. Para ŵanthu awo tikukumana nawo tikuŵaphalira vinthu viwemi ivyo Chiuta wachitirenge ŵanthu pa charu chapasi, nyengo zinyake ŵanyake kakuŵa kakwamba kupulika fundo izi. Fundo izi zikulongora kuti Yehova wakutitemwa chomene. Kweniso para tikuŵaphalirako ŵanthu unenesko wakuyowoya za Adada ŵithu ŵachitemwa, ndikuti tikovwirapo kuti zina la Yehova lituŵiskike. Tikovwira ŵanthu kumanya kuti ŵali kusambizgika mautesi ghakukhwaskana na Yehova. Ivyo ŵanthu tikuŵasambizga mu Baibolo ni vinthu vyakuzirwa chomene ivyo vingaŵakhozga.—Yes. 65:13, 14.

10. Chifukwa wuli ntchakukwana yayi kuŵasambizga waka malango gha Chiuta awo tikusambira nawo Baibolo?

¹⁰ Para tikuchitiska masambiro gha Baibolo, tikwenera kuŵawovwira ŵasambiri kumanya zina la Yehova kweniso kuti ŵalizunurenge. Kweniso tikwenera kuŵawovwira kuti ŵamumanye makora Yehova. Kasi tingaŵawovwira makora usange tingaŵasambizga waka malango gha Chiuta? Msambiri wangaghamanya malango gha Chiuta na kughatemwa, kweni kasi wakupulikira Yehova chifukwa chakuti wakumutemwa? Kumbukani kuti Eva wakaghamanyanga malango gha Chiuta, kweni wakamutemwanga zanadi yayi Chiuta; Adamu nayoso wakamutemwanga zanadi yayi Chiuta. (Gen. 3:1-6) Ntheura tikwenera kuchita vinandi kuluska kuŵasambizga waka malango gha Chiuta.

11. Apo tikusambizga ŵasambiri ŵithu malango gha Chiuta na fundo zake, kasi tingaŵawovwira wuli kuti ŵamutemwenge Chiuta?

¹¹ Malango gha Yehova nyengo zose ngawemi kwa ise. (Sal. 119:97, 111, 112) Kweni ŵasambiri ŵithu ŵangamanya kuti ngawemi pekha para ŵangamanya dankha kuti Yehova wakapeleka malango chifukwa chakuti wakutitemwa.  Ntheura ŵasambiri ŵithu tikwenera kuŵafumba kuti: “Chifukwa wuli mukughanaghana kuti Chiuta wakukhumba kuti tichitenge ivi na kugega kuchita ivi? Kasi fundo izi zikutiphalirachi vya iyo?” Ŵasambiri ŵithu tiŵafikenge pamtima para tiŵawovwirenge kughanaghanira vya Chiuta na kuŵawovwira kuti ŵalitemwenge zanadi zina lake. Ivi viwovwirenge kuti ŵamutemwenge Yehova kweniso malango ghake. (Sal. 119:68) Chipulikano chawo chikurenge ndipo chiŵawovwirenge kuzizipizga viyezgo ivyo ŵakumanenge navyo.—1 Kor. 3:12-15.

12. Chifukwa wuli nyengo yinyake Davide mtima wake ukagaŵikana, ndipo ntchivichi chikachitika?

¹² Fundo yakuzirwa chomene iyo tikuyisanga pa Salimo 86:11 njakuti “lungani mtima wane.” Themba Davide ndilo likalemba mazgu agha. Mu umoyo wake, Davide wakawona kuti ntchipusu kuzomerezga mtima kuŵa wakugaŵikana. Zuŵa linyake wakaŵa pachanya pa nyumba yake ndipo wakawona mwanakazi wa munthu munyake wakugeza. Panyengo iyi, mtima wa Davide ukaŵa wambura kugaŵikana. Wakamanyanga dango la Yehova lakuti: “Ungadokeranga muwoli wa munyako chara.” (Eks. 20:17) Kweni iyo wakalutilira kumulaŵiska mwanakazi uyu. Mtima wake ukagaŵikana, lwande linyake wakamudokera mwanakazi, lwande linyake wakakhumbanga kukondweska Yehova. Nangauli Davide wakamutemwanga Yehova na kumopa, kweni wakathera ku makhumbiro gha thupi. Pa chifukwa ichi, Davide wakachita vinthu viheni. Wakabinkhiska zina la Yehova. Kweniso wakapwetekeska ŵanthu ŵambura mulandu, kusazgapo mbumba yake.—2 Sam. 11:1-5, 14-17; 12:7-12.

13. Kasi tikumanya wuli kuti Davide mtima wake ukaŵaso wambura kugaŵikana?

¹³ Yehova wakamulanga Davide, ndipo pamanyuma wakaŵaso paubwezi na Yehova. (2 Sam. 12:13; Sal. 51:2-4, 17) Davide wakakumbukanga masuzgo agho ghakaŵapo chifukwa chakuti wakazomerezga mtima wake kugaŵikana. Mazgu ghake gha pa Salimo 86:11 ghangaŵazgikaso kuti: “Nipani mtima wambura kugaŵikana.” Kasi Yehova wakamovwira Davide kuti mtima wake uleke kugaŵikanaso? Enya, chifukwa chakuti Mazgu gha Yehova ghakuti Davide wakaŵa munthu uyo “mtima wake ukaŵa wakufikapo . . . kwa Yehova Chiuta wake.”—1 Mathe. 11:4; 15:3.

14. Kasi tikwenera kujifumba vichi, ndipo chifukwa wuli?

¹⁴ Nkhani ya Davide njakukhozga kweniso njakuchenjezga. Kwananga kukuru uko wakachita ni chenjezgo kwa ise mazuŵa ghano. Kwali tateŵetera Yehova vyaka vinandi panji  yayi, tikwenera kujifumba kuti, ‘Kasi nkhugega vipingo vya Satana kuti vileke kugaŵaniska mtima wane?’

15. Kasi kopa Yehova kungativikilira wuli para tawona vithuzi vyamuziro?

¹⁵ Mwachiyelezgero, kasi mukuchita wuli para mwawona chithuzi pa TV panji pa Intaneti icho chingawuska makhumbiro ghakugonana? Ntchipusu kughanaghana kuti chithuzi ichi panji filimu iyi njamuziro viŵi yayi. Kweni panji yingaŵa nthowa iyo Satana wakukhumba kugwiliskira ntchito kuti wagaŵaniske mtima winu. (2 Kor. 2:11) Chithuzi ichi tingachiyaniska na kanthu (weji) ako munthu wakugwiliskira ntchito para wakukhumba kuŵandura khuni. Chakwamba wakutora kanthu aka na kukafyatika pakati. Pamanyuma wakukhomelera mukati ndipo khuni likuŵanduka pakati. Kasi chithuzi icho chikuwuska khumbiro lakugonana chingayana na kanthu aka? Para munthu wangalutilira kulaŵiska vinthu ivyo vingawoneka nga vyakofya viŵi yayi, vingamupangiska kuti wanangire Yehova. Ntheura kanizgani chinthu chilichose chambura kwenelera kunjira mu mtima winu. Lutilirani kopa zina la Yehova.

16. Kasi tikwenera kujifumba mafumbo wuli para tayezgeka kuti tichite viheni?

¹⁶ Padera pa vithuzi vyakuwuska khumbiro lakugonana, Satana wakugwiliskiraso ntchito vinthu vinyake vinandi kuti watikope tichite viheni. Kasi mukuchita wuli? Ntchipusu kughanaghana kuti vinthu ivi ni viheni viŵi yayi. Mwachiyelezgero, tingaghanaghana kuti: ‘Para ningachita ivi ningasezgekerapo yayi, mbubudi ukuru yayi.’ Kweni kaghanaghaniro aka nkhaheni chomene. Tingachita makora kujifumba kuti: ‘Kasi Satana wakukhumba kugwiliskira ntchito nthowa iyi kuti wagaŵaniske mtima wane? Usange ningazomerezga makhumbiro ghaheni, kasi nitukiskenge zina la Yehova? Kasi ivi vinganovwira kuti niŵe paubwezi na Chiuta panji yayi?’ Ghanaghaniranipo mafumbo agha. Lombani vinjeru kuti muzgore  mwaunenesko mafumbo agha kwambura kujikhungulufya. (Yak. 1:5) Para muchitenge nthena mujivikilirenge. Kweniso mutondenge viyezgo nga umo wakachitira Yesu apo wakati: “Fumapo Satana!”—Mat. 4:10.

17. Chifukwa wuli ntchiwemi yayi kuŵa na mtima wakugaŵikana? Yowoyani chiyelezgero.

¹⁷ Ntchiwemi yayi kuŵa na mtima wakugaŵikana. Ghanaghanirani vya timu ya bola iyo yikukolerana yayi. Ŵanyake ŵakukhumba waka kuti iwo ndiwo ŵalumbikenge, ŵanji ŵakuseŵera mwambura kulondezga malango gha maseŵero, ndipo ŵanyakeso ŵakumuchindika yayi kochi. Ntchakukayikiska usange timu yanthena yingawina maseŵero. Kweni timu iyo njakukolerana ndiyo yingawina. Mtima winu ungaŵa nga ni timu iyo njakukolerana para ivyo mukughanaghana, ivyo mukukhumba kweniso umo mukujipulikira vikukolerana na kuteŵetera Yehova. Kumbukani kuti Satana wakukhumba kuti muŵe na mtima wakugaŵikana. Wakukhumba kuti ivyo mukughanaghana, ivyo mukutemwa, kweniso umo mukujipulikira vileke kukolerana na malango gha Yehova. Ndipouli, imwe mukwenera kuŵa na mtima wambura kugaŵikana kuti muteŵetere Yehova. (Mat. 22:36-38) Mungazomerezganga yayi kuti Satana wagaŵaniske mtima winu.

18. Kuyana na mazgu agho ghali pa lemba la Mika 4:5, kasi mwaŵikapo mtima kuchitachi?

¹⁸ Lombani Yehova nga ni umo wakachitira Davide. Iyo wakati: “Lungani mtima wane kuti wopenge zina linu.” Chitani vyose ivyo mungafiska kuti muchitenge vinthu kuyana na lurombo lwinu. Zuŵa lililose, ŵikanipo mtima kuti mu vyakusankha vinu kwali ni vikuru panji vichoko, mulongore kuti mukuchindika zina lituŵa la Yehova. Para muchitenge nthena, pakuŵa yumoza wa Ŵakaboni ŵa Yehova, mukhalenge mwakukolerana na zina ilo mukumanyikwa nalo. (Zinth. 27:11) Ndipo tose tingayowoya nga ni ntchimi Mika, iyo yikati: “Ise tendenge mu zina la Yehova Chiuta withu muyirayira swii.”—Mika 4:5.