1, 2. (a) Kasi ŵapapi ŵanyake ŵakuchita wuli para mwana wawo waŵaphalira kuti wakukhumba kubatizika? (b) Chifukwa wuli awo ŵakukhumba kubatizika ŵakufumbika usange ŵali kujipeleka kwa Yehova? (Wonani chithuzi chakwamba.)

MWANA msungwana wa vyaka 9 uyo timuchemenge Maria, wakayimilira na ŵanyake awo ŵakaŵa pafupi kubatizika nayo lumoza. Ŵapapi ŵake ŵakalaŵiliranga. Maria wakazgora mwankhongono kweniso mwakupulikikwa makora mafumbo ghaŵiri agho muyowoyi wakafumba. Pamanyuma, Maria wakabatizika.

² Ŵapapi ŵa Maria ŵakakondwa chomene mwana wawo wati wajipeleka kwa Yehova na mtima wose na kubatizika. Kweni pambere wandabatizike, amama ŵake ŵakafipanga mtima. Ŵakajifumbanga kuti: ‘Kasi Maria wachali muchoko chomene yayi kuti wabatizike? Kasi wakumanya kuti kujipeleka kwa Yehova ni nkhani yikuru chomene? Kasi chingaŵa chiwemi kuti walindilirepo dankha pambere wandabatizike?’ Agha ni mafumbo agho ŵapapi ŵanandi ŵakutemwa kujifumba para mwana wawo waŵaphalira kuti wakukhumba kubatizika. (Muph. 5:5) Nakuti chinthu chakuzirwa chomene icho  waliyose wakwenera kuchita, nkhujipeleka na kubatizika.—Wonani bokosi lakuti, “ Kasi Muli Kujipeleka kwa Yehova?”

3, 4. (a) Kasi mpositole Petrosi wakayowoya vichi kuti walongore kuti ubatizo ngwakuzirwa? (b) Chifukwa wuli ubatizo ukuyana na kupanga chingalaŵa cha mu nyengo ya Nowa?

³ Mpositole Petrosi wakayaniska ubatizo na mulimo uwo Nowa wakachita wa kuzenga chingalaŵa. Wakati: “Ubatizo ndiwo ukuyana na ichi, uwo ukumuponoskani sono.” (Ŵerengani 1 Petrosi 3:20, 21.) Chingalaŵa chikaŵa ukaboni wakuti Nowa wakajipeleka kuti wachite khumbo la Chiuta. Nowa wakachita mwakugomezgeka mulimo uwo Yehova wakamupa. Chifukwa chakuti Nowa wakalongora chipulikano, Yehova wakamuponoska pamoza na banja lake pa Chigumula. Kasi fundo yikuru ya Petrosi yikaŵa yakuti wuli?

⁴ Nga umo chingalaŵa chikalongolera kuti Nowa wali na chipulikano, kubatizika pamaso pa ŵanthu ŵanandi kukupeleka ukaboni unyake. Ukaboni wuli? Ukaboni wakuti msambiri wajipeleka kwa Yehova ndipo wali na chipulikano mwa Khristu. Ŵasambiri awo ŵajipeleka ŵakuchita mwakugomezgeka ntchito iyo Chiuta waŵapa nga umo wakachitira Nowa. Yehova wakamuponoska Nowa pa Chigumula. Ŵateŵeti ŵakubatizika awo mbakugomezgeka, nawo Chiuta wazamuŵaponoska apo charu chiheni ichi chizamuparanyikira. (Mrk. 13:10; Chivu. 7:9, 10) Lekani kujipeleka na kubatizika nkhwakuzirwa chomene. Munthu uyo wakuchedwera dala kubatizika wangazakasanga yayi umoyo wamuyirayira.

5. Kasi mu nkhani iyi tidumbiskanenge vichi?

⁵ Pakuti ubatizo ngwakuzirwa chomene, tikwenera kughanaghanirapo mafumbo ghatatu agha: Kasi Baibolo likuti wuli pa nkhani ya ubatizo? Kasi munthu wakwenera kuchita vichi pambere wandabatizike? Chifukwa wuli msambizgi wakwenera kukumbuka kuti ubatizo  ngwakuzirwa chomene para wakusambizga mwana wake panji msambiri wa Baibolo?

6, 7. (a) Kasi ubatizo wa Yohane ukalongoranga vichi? (b) Kasi ni ubatizo wuli wapadera uwo Yohane wakachita?

⁶ Ubatizo wakwamba uwo tikuŵerenga mu Baibolo ni uwo wakachitanga Yohane Mubatizi. (Mat. 3:1-6) Awo ŵakabatizika na Yohane ŵakachita nthena kulongora kulapa zakwananga izo ŵakaŵa nazo chifukwa cha kuswa Dango la Mozesi. Kweni ubatizo unyake uwo Yohane wakachita ukaŵa wapadera chifukwa munthu uyo Yohane wakabatiza wakeneranga kulapa yayi. Yohane wakaŵa na mwaŵi wa kubatiza Yesu, Mwana wa Chiuta. (Mat. 3:13-17) Yesu wakaŵa wambura zakwananga, ndipo wakeneranga yayi kulapa. (1 Pet. 2:22) Yesu wakabatizika kuti walongore kuti wajipeleka kuchita khumbo la Chiuta.—Heb. 10:7.

⁷ Yesu wakati wamba uteŵeti wake pa charu chapasi, ŵasambiri ŵake nawo ŵakamba kubatiza ŵanthu. (Yoh. 3:22; 4:1, 2) Ŵanthu awo ŵasambiri ŵa Yesu ŵakaŵabatizanga, nawo ŵakalongoranga kuti ŵalapa zakwananga izo ŵakaŵa nazo chifukwa cha kuswa Dango la Mozesi. Kweni pamanyuma pakuti Yesu wafwa na kuwuskika, ng’anamuro la ubatizo likasintha ku ŵalondezgi ŵake.

8. (a) Pamanyuma pakuti Yesu wawuskika, kasi wakaŵaphalira vichi ŵalondezgi ŵake? (b) Longosorani kuzirwa kwa ubatizo Wachikhristu.

⁸ Mu 33 C.E., Yesu uyo wakaŵa kuti wawuskika, wakawonekera ku wumba wa ŵanthu ŵakujumpha 500. Pa ŵanthu aŵa pakaŵa ŵanalume, ŵanakazi ndipo panji pakaŵaso ŵana. Pakwenera kuti pakaŵa pa nyengo iyi apo Yesu wakati: “Ntheura, lutaninge mukazgore ŵanthu ŵa mitundu yose kuŵa ŵasambiri, mukaŵabatize mu zina la Adada na la Mwana na la mzimu utuŵa, mukaŵasambizge kusungilira vinthu vyose ivyo namuphalirani.” (Mat. 28:19, 20; 1 Kor. 15:6) Vikuwoneka kuti ŵanthu ŵanandi awo ŵakamulondezganga ŵakaŵapo apo Yesu wakapelekanga mulimo uwu ku ŵasambiri ŵake. Apo Yesu wakayowoya mazgu agha, wakalongora kuti munthu uyo wakukhumba kuŵa Mkhristu wakwenera kubatizika. (Mat. 11:29, 30) Uyo wakukhumba kuteŵetera Chiuta mu nthowa yakuzomerezgeka wakwenera kumanya na kuzomera mulimo uwo Yesu wali nawo pakufiska khumbo la Yehova. Para wamanya fundo izi ndipo wakwenera kubatizika. Ubatizo wa mu maji ndiwo wekha uwo Chiuta wakuzomerezga. Mu Baibolo muli maukaboni ghanandi ghakulongora kuti mu nyengo yakale, ŵasambiri ŵaphya ŵa Khristu ŵakamanyanga kuti ubatizo ngwakuzirwa chomene. Ŵakaghanaghanapo yayi kuti ŵakwenera kuchedwera dala kubatizika.—Mil. 2:41; 9:18; 16:14, 15, 32, 33.

9, 10. Kasi tikusambirako vichi kwa nduna ya ku Etiyopiya na kwa mpositole Paulosi pa nkhani ya ubatizo?

⁹ Ŵerengani Milimo 8:35, 36. Wonani ivyo yikachita nduna yinyake ya ku Etiyopiya iyo yikaweranga kukasopa ku Yerusalemu. Mungelo wa Yehova wakatuma Filipu kuti wakakumane na munthu wa ku Etiyopiya uyu kuti ‘wakamupharazgire makani ghawemi ghakuyowoya vya Yesu.’ Kasi munthu wa ku Etiyopiya uyu wakachita wuli? Wakawonga chomene unenesko uwo wakasambira. Kuti walongore kuwonga, wakachita ivyo Yehova wakukhumba ndipo wakabatizika kwambura kuchedwa.

¹⁰ Wonaniso ivyo wakachita Muyuda munyake uyo wakatambuzganga Ŵakhristu. Wakababika mu mtundu uwo Chiuta wakawusankha. Kweni nyengo yikati yajumphapo, Ŵayuda ŵakaleka kumupulikira Chiuta ndipo Yehova wakaleka kuŵatemwa. Munthu uyu wakatemwanga chomene kuchitako tumaluso twa chisopa cha Chiyuda, kweni pamanyuma  wakasambira unenesko. Yesu Khristu uyo wakaŵa kuti wawuskika ndiyo wakamupharazgira. Kasi Muyuda uyu wakachita wuli? Wakazomera wovwiri wakufuma kwa Mkhristu munyake zina lake Hananiya. Baibolo likuti pamanyuma Muyuda uyu: “Wakawuka na kubatizika.” (Mil. 9:17, 18; Gal. 1:14) Mukwenera kuti mwamumanya Muyuda uyo tikunena apa. Ni uyo wakamba kuchemeka kuti mpositole Paulosi. Kweni ghanaghaniranipo fundo yakuti, Paulosi wakachitapo kanthu wakati wamanya unenesko wakukhwaskana na mulimo wa Yesu pakufiska khumbo la Chiuta. Wakabatizika kwambura kuchedwa.—Ŵerengani Milimo 22:12-16.

11. (a) Kasi ntchivichi icho chikutuma ŵasambiri ŵa Baibolo kuti ŵabatizike? (b) Kasi tikujipulika wuli para tikuwona ŵaphya awo ŵakujipeleka na kubatizika?

¹¹ Ndimo vikuŵiraso mazuŵa ghano na ŵasambiri ŵa Baibolo, kwali mbana panji ŵalara. Awo ŵali na chipulikano ndipo ŵakuzirwiska nadi unenesko wa mu Baibolo ŵakusintha na kujipeleka kwa Yehova kweniso kubatizika. Nkhani ya ubatizo yikuŵa yapadera chomene pa maungano gha dera na gha chigaŵa. Ŵakaboni ŵa Yehova ŵakukondwa chomene para msambiri wa Baibolo wazomera unenesko na kulimbikira m’paka kubatizika. Ŵapapi awo Mbakhristu nawo ŵakukondwa chomene para ŵawona ŵana ŵawo ŵali pa gulu la ŵasambiri ŵaphya awo ŵakubatizika. Mu chaka cha uteŵeti cha 2017, ŵanthu ŵakujumpha 284,000 awo “ŵakaŵa na maghanoghano ghakwenelera” ŵakabatizika, kulongora pakweru kuti ŵali kujipeleka kwa Yehova. (Mil. 13:48) Ŵasambiri ŵaphya aŵa ŵakapulikiska kuti munthu wakwenera kubatizika kuti waŵe Mkhristu. Kasi ni vinthu wuli ivyo ŵakachita kuti ŵabatizike?

12. Kasi uyo wakusambira Baibolo wakwenera kuchita vichi pambere wandabatizike?

¹² Pambere msambiri wandabatizike, wakwenera kuŵa dankha na chipulikano. Chipulikano ichi chikuŵapo chifukwa cha kumanya makora Chiuta, khumbo lake, na ndondomeko yake yakuponoskera ŵanthu. (1 Tim. 2:3-6) Chipulikano ndicho chikuchiska msambiri kuti wakane nkharo iyo yikukwiyiska Chiuta na kwamba kulondezga malango gha Yehova. (Mil. 3:19) Ntchakuwonekerathu kuti para munthu wachali kuchita nkharo za ŵanthu awo ŵazamunjiramo yayi mu Ufumu ndikuti wajipeleka zanadi yayi kwa Chiuta. (1 Kor. 6:9, 10) Kweni wakwenera kuchitaso vinyake padera pa kulondezga malango gha Yehova. Uyo wakupenja urunji wakwenera kufika pa maungano gha mpingo na kuchitako ntchito ya kupharazga iyo yikuponoska umoyo. Yesu wakati ŵasambiri ŵake ŵakugomezgeka ŵazamuchita ntchito iyi. (Mil. 1:8) Msambiri wakwenera kuchita vinthu vyose ivi. Ndipo pamanyuma wangajipeleka kwa Yehova mu lurombo kwayekha na kubatizika.

13. Chifukwa wuli awo ŵakusambizga ŵanji Baibolo ŵakwenera kukumbuka kuti munthu wakwenera kubatizika kuti waŵe Mkhristu?

¹³ Para tikovwira ŵana ŵithu panji ŵasambiri ŵa Baibolo kuti ŵachite ivyo vikukhumbikwa, tikwenera kukumbuka kuti msambiri wanadi wakubatizika. Usange tikukumbuka fundo iyi, tiŵasambizgenge makora ŵasambiri ŵithu. Pa nyengo yakwenelera, tiŵalongosolerenge makora kuzirwa kwa kujipeleka na kubatizika. Nadi, tikukhumba kuti ŵana ŵithu na ŵasambiri ŵanyake ŵa Baibolo ŵalimbikire m’paka ŵabatizike.

14. Chifukwa wuli tikuchichizga waliyose yayi kuti wabatizike?

¹⁴ Munthu wakwenera kuchichizgika yayi na ŵapapi, msambizgi wake, panji na waliyose mu mpingo kuti wabatizike. Yehova wakuchichizga munthu yayi. (1 Yoh. 4:8) M’malo mwake, para tikuŵasambizga tikwenera kuŵawovwira kumanya kuti ntchakuzirwa chomene kuti ŵaŵe paubwezi  na Chiuta. Para msambiri wa Baibolo wakukhumbisiska kuti wamanye unenesko wa Chiuta ndipo wakukhumba nadi kuchita chilichose icho Mkhristu wakwenera kuchita, wazamuŵa na khumbo lakuti wabatizike.—2 Kor. 5:14, 15.

15, 16. (a) Kasi pali vyaka vyakuŵikika ivyo munthu wakwenera kubatizikira? Longosorani. (b) Chifukwa wuli msambiri wakwenera kubatizika na kuŵa Kaboni wa Yehova nanga ni para wakabatizika kale mu chisopa chinyake?

¹⁵ Palije vyaka vyakuŵikika ivyo munthu wakwenera kubatizikira. Ŵasambiri ŵakukura mwauzimu mwakupambanapambana. Ŵanandi ŵakubatizika ŵachali ŵachoko ndipo ŵakulutilira kugomezgeka kwa Yehova. Ŵanyake ŵakumanya kuzirwa kwa ubatizo para mbalara. Ŵanyake ŵa iwo para ŵali na vyaka vyakujumpha 100.

¹⁶ Msambiri munyake mulara mu vyaka wakafumba msambizgi wake usange chikaŵa chakwenelera nadi kuti wabatizikeso, chifukwa wakabatizika kale kanandi waka mu visopa vyakupambanapambana. Msambiri na msambizgi wake ŵakaweleramo malemba gha mu Baibolo. Msambiri wakapulikiska ivyo Baibolo likuyowoya pa nkhani iyi, ndipo wakabatizika kwambura kuchedwa. Nangauli wakaŵa na vyaka vyakujumpha 70, wakaghanaghanapo yayi kuti ubatizo ngwambura kuzirwa kwa iyo. Nadi, munthu wakwenera kumanya makora khumbo la Yehova kuti ubatizo wake uŵe wakwenelera. Ntheura ŵasambiri ŵaphya ŵakwenera kubatizika nanga ni para ŵakabatizika kale mu chisopa chinyake.—Ŵerengani Milimo 19:3-5.

17. Kasi munthu wakwenera kughanaghanirapo vichi pa zuŵa lakubatizikira?

¹⁷ Zuŵa lakubatizikira ndakukondweska chomene. Kweniso ni nyengo yakughanaghanirapo. Munthu wangaghanaghanirapo ivyo wangachita kuti walutilire kuchita vinthu mwakuyana na kujipeleka kwake. Wakwenera kufwilirapo kuti wachite nthena. Lekani Yesu wakayaniska Ukhristu na joko. Ŵasambiri ŵa Yesu ŵakwenera kuleka “kujikhalira ŵekha, kweni ŵakondweskenge uyo wakaŵafwira na kuwuskika.”—2 Kor. 5:15; Mat. 16:24.

18. Kasi mu nkhani yakulondezgapo tizamusambira vichi?

¹⁸ Fundo izi ndizo amama ŵa Maria ŵakaghanaghaniranga apo ŵakajifumbanga mafumbo agho ghali kukwambilira kwa nkhani iyi. Usange ndimwe mupapi, panji muli kujifumbapo kuti: ‘Kasi mwana wane ngwakunozgeka nadi kubatizika? Kasi wakuwumanya makora unenesko wa mu Baibolo mwakuti wangajipeleka zanadi? Kasi wasambire dankha masambiro gha charu kuti wazakasange ntchito yiwemi? Wuli usange mwana wane wazakachita zakwananga zikuru pamasinda pa kubatizika?’ Mafumbo agha ghazamuzgoreka mu nkhani yakulondezgapo. Kweniso tizamudumbiskana umo ŵapapi awo Mbakhristu ŵangachitira kuti ŵawonenge ubatizo mwakwenelera.