1. Kasi Ŵakhristu ŵakwambilira ŵakakumana na masuzgo wuli?

PAKATI pa 62 na 64 C.E., mpositole Petrosi wakalemba kalata yake ku ‘ŵalendo ŵambura kukhaliska, awo ŵakambininikira ku Ponto, Galatiya, Kapadokiya, Asiya, na Bitiniya.’ (1 Pet. 1:1) Mipingo ya ŵanthu ŵakupambana mitundu iyi ya ku Asia Minor yikakhumbikwiranga kukhozgeka na kulongozgeka. Mipingo iyi yikatambuzgikanga chomene na kunyozeka. Yikakumananga na ‘viyezgo ivyo vikaŵa nga ni moto.’ Kweniso ŵakakhalanga mu nyengo zinonono. Petrosi wakalemba kuti: “Umaliro wa vinthu vyose waneng’enera.” Nadi, kukakhala vyaka vyambura kukwana 10 kuti mgonezi uheni wa Ŵayuda uparanyike. Kasi ntchivichi chikate chiwovwirenge Ŵakhristu mu nyengo zakusuzga izi?—1 Pet. 4:4, 7, 12.

2, 3. Chifukwa wuli Petrosi wakakumbuska ŵabali kuti ŵapokeleranenge? (Wonani chithuzi chakwamba.)

² Petrosi wakakumbuska ŵabali kuti: “Mupokeleranenge.” (1 Pet. 4:9) Lizgu Lachigiriki ilo lili kung’anamulika kuti “kupokelera ŵalendo” likung’anamura “kutemwa, panji kulongora lusungu ku ŵanthu ŵachilendo.” Petrosi wakachiska ŵabali na ŵadumbu kuti ‘ŵapokeleranenge’ nangauli ŵakamanyananga kale kweniso ŵakachitiranga  vinthu lumoza. Kasi pakaŵa uwemi wuli chifukwa chakuti ŵakapokelerananga?

³ Ŵakatemwananga chomene. Kasi imwe ŵanyake ŵali kumuchemanipo kuti mulute ku nyumba kwawo? Usange ni nthena, kasi mukakondwa yayi? Para mukachema munthu wa mu mpingo winu, kasi ubwezi winu ukakura yayi? Para tachemerako ŵabali na ŵadumbu ku nyumba yithu, tikuŵamanya makora chomene kuluska para tasangana nawo kunyake. Ŵakhristu ŵa mu nyengo ya Petrosi ŵakakhumbikwiranga kutemwana chomene apo vinthu vikahenipirangahenipiranga. Ndimo viliriso na Ŵakhristu mu “mazuŵa ghaumaliro” agha.—2 Tim. 3:1.

4. Kasi ni mafumbo wuli agho ghazgorekenge mu nkhani iyi?

⁴ Kasi tili na mipata wuli yakupokelera ŵalendo? Kasi tingamazga wuli vinthu ivyo vingatigongoweska kupokelera ŵalendo? Kasi ntchivichi icho chingatovwira kuti tiŵe mulendo muwemi?

5. Kasi pa maungano tingapokelera wuli ŵalendo?

⁵ Pa maungano: Tikupokelera ŵanthu wose awo ŵakwiza pa maungano ghithu kuti tilyere lumoza chakurya chauzimu. Yehova na gulu lake ndiwo ŵakutichema. (Rom. 15:7) Para piza ŵaphya, nase tikovwira Yehova pakuŵapokelera. Tikwenera kuchitapo kanthu mwaluŵiro kuti tipokelere ŵaphya, nanga ŵangaŵa kuti ŵavwara mwambura kwenelera panji ŵandajipwelelere makora. (Yak. 2:1-4) Usange mulendo wakhala payekha, kasi mungamuchema kuti wakhale pafupi namwe? Wangawonga chomene usange mungamovwira kujura malemba agho ghakuŵazgika kweniso kuti wapulikiske ivyo vikuchitika. Iyi ni nthowa yiwemi yakulondezgera ulongozgi wakuti “mupokelerenge ŵalendo.”—Rom. 12:13.

6. Kasi tingamba kuchema anjani kuti ŵize ku nyumba kwithu?

⁶ Chakurya: Mu nyengo yakale, para munthu wapokelera ŵalendo kanandi wakaŵapangaso chakurya. (Gen. 18:1-8; Ŵeru. 13:15; Luka 24:28-30) Para munthu wachema munyake kuti ŵalyere lumoza chakurya, wakakhumbanga kuti waŵe nayo paubwezi kweniso pamtende. Kasi tingamba kuchema anjani? Ŵabali na ŵadumbu ŵa mu mpingo withu chifukwa ndiwo kanandi tikuchitira nawo lumoza vinthu. Para vinthu vyasuzga, asi ndiwo tikugomezga? Tikukhumbikwira ŵabwezi ŵakugomezgeka na kuŵa nawo pamtende. Mu 2011 Wupu Wakulongozga ukasintha nyengo yakwambira Sambiro la Gongwe la Mulinda la pa Beteli ya United States kufuma pa 6:45 namise kufika pa 6:15 namise. Chifukwa wuli? Chipharazgo chikati para sambiro lamara luŵiro ŵanandi ŵasangenge nyengo ya kuchemerana ku nyumba. Maofesi ghanyake gha munthavi nagho ndimo ghali kuchitira. Ndondomeko iyi yawovwira chomene kuti ŵabali na ŵadumbu awo ŵakuteŵetera pa Beteli ŵatemwanenge chomene.

7, 8. Kasi ŵimiliri ŵa gulu la Yehova tingaŵapokelera wuli?

⁷ Tikupokelera ŵabali awo ŵakufuma ku mipingo yinyake kuzakayowoya nkhani zachisanisani mu mpingo withu, ŵalaŵiliri ŵa dera, ndiposo nyengo zinyake ŵimiliri ŵa ofesi ya munthavi. Para ŵabali aŵa ŵiza ku mpingo withu ni mwaŵi wakuti tilongolere kuti taŵapokelera. (Ŵerengani 3 Yohane 5-8.) Tingaŵanozgera chakurya. Kasi namwe mungawovwirapo?

⁸ Mudumbu munyake wa ku United States wakati: “Kwa vyaka vinandi ivyo vyajumpha, ine na afumu ŵane tikapokeleranga ŵabali ŵanandi pamoza na ŵawoli ŵawo, awo ŵakizanga kuzakayowoya nkhani. Nyengo yiliyose iyo tapokelera mubali na mudumbu yikaŵanga yakukondweska, kweni chakuzirwa chomene ntchakuti tikakhozgekanga chomene mwauzimu. Tikudandawurapo yayi chifukwa cha kuŵapokelera.”

9, 10. (a) Kasi mbanjani awo tingakhala nawo kwa nyengo yitaliko? (b) Kasi awo ŵali na nyumba yichoko nawo ŵangawovwira? Yowoyani chiyelezgero.

⁹ Kupokelera ŵalendo awo ŵakhaliskenge: Kale, pakupokelera ŵalendo kanandi ŵakapelekangaso chipinda ku ŵalendo ŵakugomezgeka  kuti ŵakhalengemo. (Yobu 31:32; Filim. 22) Lero napo nyengo zinyake chikuŵa chakukhumbikwa kuchita nthena. Kanandi mpingo ndiwo ukupeleka malo ghakugona ku ŵalaŵiliri ŵa dera. Awo ŵakuluta ku masukulu ghakusambizga Baibolo ŵangakhumba malo ghakuti ŵakhaleko. Ŵateŵeti ŵakujipeleka awo ŵakuzenga, nawo ŵangakhumba malo gha nthena agha. Para kwachitika masoka gha chilengiwa, mabanja ghanandi ghangasoŵa pakukhala ndipo ghangakhumba kuti tighapeko malo ghakukhala m’paka magulu agho ghakovwira pa ngozi ghaŵanozgere malo. Tileke kughanaghana kuti awo ŵali na nyumba zikuru pera ndiwo ŵangawovwira. Iwo ŵangaŵa kuti ŵali kovwirapo kanandi waka. Kasi imwe mungapeleka yayi malo ghakuti ŵabali na ŵadumbu ŵakhalepo nangauli nyumba yinu yingaŵa yichoko?

¹⁰ Mubali munyake ku South Korea wakukumbuka apo wakapeleka malo ghakugona ku awo ŵakiza ku masukulu ghakusambizga Baibolo. Iyo wakalemba kuti: “Pakwamba nkhagongowanga chifukwa tikaŵa kuti tatorana waka kweniso tikakhalanga mu nyumba yichoko. Kweni chikaŵa chakukondweska chomene kukhala na ŵasambiri aŵa. Pakuti tikaŵa kuti tatorana sonosono, tikajiwonera tekha umo banja lingaŵira lakukondwa para likuteŵetera Yehova na kuŵa na vilato vyauzimu.”

11. Chifukwa wuli awo ŵasamukira mu mpingo winu ŵangakhumbikwira kuŵapokelera?

¹¹ Awo ŵasamukira mu mpingo withu: Munthu yumoza panji mabanja ghangasamukira mu mpingo withu. Ŵanyake ŵangiza kuti ŵateŵetere uko ŵapharazgi mbachoko. Ŵapayiniya ŵangatumika kuti ŵawovwire mpingo winu. Wose aŵa ŵakusangana na mikhaliro yinyake yachilendo. Ghangaŵa malo ghachilendo, mpingo wachilendo, chiyowoyero, panji kakhaliro kachilendo. Para tingaŵachemera kunyumba yithu kuti ŵazakamweko tumaji, panji kukatembeya nawo, vingaŵawovwira kusanga ŵabwezi ŵaphya panji kuzgoŵera malo ghachilendo.

12. Longosorani chakuchitika icho chikulongora kuti pakupokelera ŵalendo tikukhumbikwira vinthu vinandi yayi.

¹² Tingapokelera ŵalendo para tili na vinthu vinandi pera yayi. (Ŵerengani Luka 10:41, 42.) Pakulongosora ivyo vikachitika mu mazuŵa ghakwambilira wakati waŵa mishonale, mubali munyake wakati: “Tikaŵa ŵana ŵachoko, tikamanyanga vinandi yayi, kweniso tikakumbukanga kukaya. Mise yinyake muwoli wane wakakumbuka chomene kukaya, nangauli nkhayezgayezga kumukhozga kweni vikasuzga. Mbwenu cha m’ma hafu 7 namise, tikapulika kugogoda pa chijaro. Msambiri wa Baibolo wakiza na maorenji ghatatu. Wakiza kuti wazakatipokelere. Tikamuphalira kuti wanjire ndipo tikamupa tambulara ya maji. Kufuma apo tikaphika tiyi na kunozga chokoleti. Tikachimanyanga yayi Chiswahili, nayo wakachimanyanga yayi Chingelezi. Kweni mulendo uyu ndiyo wakawovwira chomene kuti tiŵe paubwezi na ŵabali ŵa ku malo agha.”

13. Kasi pakuŵa uwemi wuli para mwapokelera ŵalendo?

¹³ Kasi muli kugongowapo kupokelera ŵalendo? Usange ni nthena, mukataya mwaŵi wakuchezga na kuŵa na ŵabwezi ŵawemi. Kupokelera ŵalendo ni munkhwala wakumazgira phukwa. Kweni mungajifumba kuti, ‘Chifukwa wuli munthu wangagongowa kupokelera ŵalendo?’ Pangaŵa vifukwa vyakupambanapambana.

14. Kasi tingachita wuli usange nyengo tilije yakupokelera ŵalendo panji kuluta ku nyumba za ŵabali na ŵadumbu para ŵatichema?

¹⁴ Nyengo na nkhongono: Ŵateŵeti ŵa Yehova mbakutangwanika chomene ndipo kanandi ŵakuŵa na milimo yinandi yakuti ŵachite. Ŵanyake ŵangawona kuti ŵalijirethu nyengo na nkhongono zakupokelelera ŵalendo. Usange ndimo viliri kwa imwe, mungakhumbikwira kusandaso ndondomeko yinu. Kasi mungasintha vinyake mwakuti muŵenge na nyengo yakupokelera ŵalendo panji kuzomera para ŵabali na ŵadumbu ŵamuchemani ku nyumba yawo? Malemba  ghakutichiska kuti tipokelerenge ŵalendo. (Heb. 13:2) Ntchiheni yayi kuchita nthena, ndicho chinthu chiwemi chomene. Mukwenera kuŵa ŵakunozgeka kuchepeskako milimo yinyake kuti mupokelere ŵalendo.

15. Kasi ŵanyake ŵakufipa mtima na vichi pa nkhani ya kupokelera ŵalendo?

¹⁵ Umo mukujiwonera: Kasi muli kukhumbapo kupokelera ŵalendo kweni mukajiwona kuti muli ŵambura kwenelera? Ŵanyake ŵali na soni ndipo ŵakopa kuti ŵazamusoŵa nkhani kweniso kuti ŵalendo ŵangazakajipulika kuti ŵapokelereka makora yayi. Ŵanyake mbakavu ndipo ŵakuwona kuti ŵangafiska yayi kupeleka vinthu ivyo ŵabali na ŵadumbu ŵanyake mu mpingo ŵangapeleka. Kweni kumbukani kuti, chakuzirwa ni ukuru wa nyumba panji unandi wa vinthu ivyo vilimo yayi, kweni kuŵika makora vinthu, kuyipwelelera makora kuti ŵalendo ŵafwasenge.

16, 17. Ni vichi vingawovwira munthu kuti waleke kufipa mtima na ŵalendo?

¹⁶ Usange mukufipa mtima kuti muŵapokelerenge wuli ŵalendo, manyani kuti muli mwekha yayi. Mulara munyake ku Britain wakati: “Nyengo zinyake para ukughanaghana za kupokelera ŵalendo ukufipa mtima. Kweni para wamunthu wapokelera ŵalendo ukukondwa kweniso ukusanga vyandulo vinandi ivyo vikuluska wofi uwo ungaŵapo. Nkhukondwa na ŵalendo nanga ni para namwa nawo waka khofi na kuchezga nawo.” Kumbukani kuti kulaŵiska pa ivyo ŵalendo ŵakukhumba nkhwakovwira nyengo zose. (Fil. 2:4) Pafupifupi waliyose wakukondwa kuphalirako ŵanyake ivyo vyamuchitikira pa umoyo. Nyengo ya ntchezgo ni m’pata uwemi wakuphalirako ŵanyithu ivyo vyatichitikira pa umoyo. Mulara munyake wakalemba kuti: “Para nachemerako ŵabali na ŵadumbu ŵa mu mpingo withu ku nyumba kwane, vikunovwira kuti niŵamanye makora, chomenechomene kumanya umo ŵakambira unenesko.” Para mukukondwa na ŵanyinu ntchezgo zinu zikuŵa zakukondweska.

¹⁷ Mudumbu munyake uyo ni mupayiniya wakapokelera ŵabali na ŵadumbu awo ŵakasambirako masukulu gha uteŵeti wa Chiuta, ndipo wakazomerezga kuti: “Pakwamba nkhafipanga mtima chifukwa mu nyumba yane mukaŵavya vinandi. Nkhaŵa na mipando yakale. Muwoli wa msambizgi wa masukulu agha wakanizikiska mtima. Iyo wakati para ŵakuchezgera mipingo na mfumu wake, ŵakukondwa chomene para ŵafikira kwa munthu uyo wakutemwa vinthu vyauzimu, nanga wangaŵavya vinthu vinandi vyakuthupi, munthu uyo wakudangizga kuteŵetera Yehova nga ndiwo, kweniso wambura kukhumba vinandi pa umoyo. Ivi vikanikumbuska ivyo amama ŵakatemwanga kutiphalira apo tikaŵa ŵachoko, ŵakatenge: ‘Ntchiwemi kurya mphangwe apo pali chitemwa.’” (Zinth. 15:17) Mphanyi chitemwa ndicho chamutumani kupokelera ŵalendo, ndipo kufipa mtima na chilichose yayi.

18, 19. Kasi kupokelera ŵalendo kungatovwira wuli kuti tambeso kuŵawona mwakwenelera ŵanyithu?

¹⁸ Umo mukuwonera ŵanyinu: Kasi walipo munyake mu mpingo winu uyo mukukolerana nayo viŵi yayi? Para walipo, mungamba kumughanaghanira viheni, ndipo ivi vingalutilira usange mukutondeka kuchitapo kanthu. Para mwapambana maghanoghano na munyinu mungatondeka kumuchemerako ku nyumba yinu. Kweniso panji munyake wakamubudirani kumasinda ndipo mukuwona kuti ntchinonono kuti muluwe.

¹⁹ Baibolo likuti kupokelera ŵanthu kungawovwira kuti muŵeso nawo paubwezi, nanga ŵangaŵa ŵalwani ŵinu. (Ŵerengani Zintharika 25:21, 22.) Para mwamupokelera munthu, mphindano zingachepa ndipo vyakusingo vingamara. Vingawovwira kuti mikhaliro yiwemi ya mulendo withu yiwonekere, mikhaliro iyo Yehova wakawona apo wakamuguziranga mu unenesko. (Yoh. 6:44) Para munthu mwamuchemera ku nyumba yinu chifukwa chakuti mukumutemwa ndipo iyo wakhazganga yayi, ubwezi winu ungakondaso. Kasi mungachita wuli kuti muchemenge ŵanyinu  chifukwa chakuti mukuŵatemwa? Nthowa yimoza ndiyo kulondezga ulongozgi uwo ukusangika pa Ŵafilipi 2:3 wakuti: “Muŵe ŵakujiyuyura na kuwona ŵanyinu kuti ŵakumuluskani.” Kumanya ivyo ŵabali na ŵadumbu ŵithu ŵakutiluska, nga ntchipulikano chawo, kuzizipizga, chikanga, panji mikhaliro yinyake iyo Mkhristu wakwenera kuŵa nayo, vingawovwira kuti tiŵatemwenge chomene na kuŵapokelera makora ku nyumba zithu.

20. Chifukwa wuli tikwenera kugomezgeka para talayizga kuti tilutenge ku nyumba ya mubali panji mudumbu, ndipo tingalongora wuli kugomezgeka?

²⁰ Wamasalimo Davide wakafumba kuti: “A Yehova, kasi ni njani wangaŵa mulendo mu hema linu?” (Sal. 15:1) Pamanyuma, wakalongosora mikhaliro yauzimu iyo Chiuta wakukhumba ku ŵalendo ŵake. Mukhaliro umoza nkhuchita ivyo talayizga, wakati: “Wakusintha yayi pa ivyo walayizga, nanga ni para vimuŵikenge paheni.” (Sal. 15:4) Usange tazomera para mubali panji mudumbu watichemera ku nyumba yake, tikwenera kusintha yayi pa vifukwa vyambura kwenelera. Uyo watichema wangaŵa kuti wanozgerathu vyose, ndipo wangasuzgika pawaka usange ise tasintha. (Mat. 5:37) Ŵanyake ŵakutondeka kuluta kwa uyo wakaŵachema pakwamba chifukwa chakuti ŵachemekaso ku nyumba yinyake uko kukuwoneka kuti nkhwakuthukira. Kuchita nthena ntchitemwa yayi kweniso nkhuŵavya ntchindi. Kweni para tikuzomera para tachemeka tikwenera kuŵa na mtima wakuwonga ivyo ŵanyithu ŵatinozgera. (Luka 10:7) Para vinthu vyamabuchi vyatiwira mwakuti tingafiska yayi kuluta uko ŵakatichema, tikwenera kuŵamanyiska mwakutendekera.

21. Chifukwa wuli tingaŵa ŵalendo ŵawemi para tingalondezga kakhaliro ka ku malo agho tili?

²¹ Kweniso ntchakuzirwa kulondezga kakhaliro ka uko tili. Ku malo ghanyake munthu ŵakumupokelera para wiza kwambura kulayizga; kweni kunyake, munthu wakwenera kulayizga dankha. Ku malo ghanyake, mulendo ŵakumupa vyakurya viwemi chomene, apo banja lawo ŵakuliŵika pachiŵiri. Kweni kunyake ŵalendo na ŵeneko chikaya wose ŵakurya vyakuyana waka. Ku malo ghanyake, kanandi ŵalendo nawo ŵakuyeghako chakurya kuti ŵasazge pa chakurya icho chinozgekenge. Apo kunyake, ŵalendo ŵakukhumbikwira viŵi yayi kuyegha chakurya. Ku malo ghanyake, para munthu wachemeka wakukanapo dankha kamoza panji kaŵiri kulongora ntchindi. Kweni kunyake para wakana ndikuti ngwambura kuwonga. Tiyeni tichite vyose ivyo tingafiska kuti awo ŵatichema ŵajipulike makora.

22. Chifukwa wuli ‘kupokelerana’ nkhwakuzirwa?

²² Sono ndipo “umaliro wa vinthu vyose waneng’enera” chomene kuluska kumanyuma kose. (1 Pet. 4:7) Suzgo yikuru iyo yindachitikepo kumanyuma kose yili pafupi chomene. Apo masuzgo ghakusazgikira, tikwenera kutemwana chomene na ŵabali na ŵadumbu ŵithu. Sono ndipo ulongozgi wa Petrosi ku Ŵakhristu wakuti: “Mupokeleranenge,” ngwakuzirwa chomene. Kupokelera ŵalendo nkhwakukondweska kweniso nkhwakuzirwa chomene ndipo kuzamumara yayi.—1 Pet. 4:9.