1. Kuyana na Mateyu 24:9, chifukwa wuli tikwenera kuzizwa yayi para charu chikutitinkha?

YEHOVA wali kutilenga munthowa yakuti titemwenge ŵanji kweniso kuti ŵanji nawo ŵatitemwenge. Ntheura para munyake wakutitinkha tikujipulika makora yayi kweniso panji tikwamba kopa. Mwachiyelezgero, mudumbu munyake zina lake Georgina uyo wakukhala ku Europe wakuti: “Apo nkhaŵa na vyaka 14, amama ŵane ŵakanitinkhanga chifukwa chakuti nkhateŵeteranga Yehova. Chitima chikanikora ndipo nkhajiwonanga kuti nili ndekha kweniso nkhamba kughanaghana kuti panji nkhaŵa munthu muwemi yayi.” * Mubali munyake zina lake Danylo wakalemba kuti: “Apo ŵasilikari ŵakanitimbanga, kuninyoza na kunofya chifukwa chakuti ndine Kaboni wa Yehova, nkhawopa chomene ndipo nkhakhozgeka soni.” Nangauli vikutiŵinya chomene para ŵanthu ŵakutitinkha, kweni tikuzizwa yayi. Yesu wakayowoyerathu kuti tizamutinkhika.​—Ŵazgani Mateyu 24:9.

2-3. Chifukwa wuli awo ŵakulondezga Yesu ŵakutinkhika?

² Charu chikutinkha awo ŵakulondezga Yesu. Chifukwa wuli? Chifukwa nga ni Yesu, nase tili “chigaŵa cha charu chara.” (Yoh. 15:17-19) Nangauli tikuchindika maboma gha ŵanthu, kweni tikukana kughasopa panji kusopa vinthu vinyake ivyo vikwimira igho. Tikusopa Yehova pera. Tikukhozgera kuti Chiuta ndiyo ngwakwenelera kuwusa ŵanthu, apo Satana na “mphapu” yake ŵakukana kuti Chiuta ndiyo ngwakwenelera. (Gen. 3:1-5, 15) Tikupharazga kuti Ufumu wa Chiuta ndiwo wekha uzamumazga masuzgo gha ŵanthu, kweniso uzamuparanya wose awo ŵakususkana nawo. (Dan. 2:44;  Chivu. 19:19-21) Uwu ni uthenga uwemi chomene ku ŵakuzika, kweni nguheni ku ŵaheni.​—Sal. 37:10, 11.

³ Tikutinkhikaso chifukwa chakuti tikupulikira malango gha Chiuta. Malango agha ghakupambana chomene na fundo izo charu chiheni ichi chikwendera. Mwachiyelezgero, ŵanandi mazuŵa ghano ŵakuwona kuti ntchiheni yayi kugonana kwambura kwenelera, mukhaliro uwo Chiuta wakaparanyirapo ŵanthu ŵa mu Sodomu na Gomora. (Yuda 7) Chifukwa chakuti tikwendera fundo za mu Baibolo pa nkhani izi, ŵanthu ŵanandi ŵakutiseka ndipo ŵakuti ndise ŵakujitemwa.​—1 Pet. 4:3, 4.

4. Kasi ni mikhaliro wuli iyo yingatovwira para ŵanthu ŵakutitinkha?

⁴ Kasi ntchivichi chingatovwira kuzizipizga para ŵanthu ŵakutinyoza na kutitinkha? Tikwenera kuŵa na chipulikano chakukhora kuti Yehova watovwirenge. Nga ntchiskango, chipulikano chithu chingatovwira ‘kuzimya mivi yose yakugolera ya muheni.’ (Efe. 6:16) Kweni tikukhumbikwira vinandi padera pakuŵa waka na chipulikano. Tikukhumbikwiraso chitemwa. Chifukwa wuli? Chifukwa chitemwa “chikukwiya luŵiro yayi.” Chikubenekelera vinthu vyose ndipo chikuzizipizga vinthu vyose. (1 Kor. 13:4-7, 13) Tiyeni sono tiwone umo chitemwa chithu pa Yehova, ŵasopi ŵanyithu kweniso nanga ŵangaŵa ŵalwani ŵithu, chikutovwilira kuzizipizga para tikutinkhika.

5. Kasi Yesu wakafiska kuchita vichi chifukwa chakuti wakatemwanga Adada ŵake?

⁵ Pa usiku waumaliro pambere ŵalwani ŵake ŵandamukome, Yesu wakaphalira ŵalondezgi ŵake ŵakugomezgeka kuti: “Ine nkhutemwa Adada, ntheura nkhuchita nga umo Adada ŵaniphalilira.” (Yoh. 14:31) Chifukwa chakuti Yesu wakatemwanga Yehova, wakafiska kuzizipizga masuzgo ghakuru. Usange nase tikutemwa Yehova, tichitenge mwakuyana waka.

6. Kuyana na Ŵaroma 5:3-5, kasi ŵateŵeti ŵa Yehova ŵakujipulika wuli para ŵakuzizipizga apo ŵakutambuzgika na charu?

⁶ Kutemwa Chiuta nyengo zose ndiko kwawovwira ŵateŵeti ŵa Yehova kuzizipizga para ŵakutambuzgika. Mwachiyelezgero, ŵapositole ŵati ŵaphalirika na khoti likuru la Ŵayuda kuti ŵaleke kupharazga, chitemwa chawo pa Chiuta chikaŵachiska “kupulikira Chiuta nga muwusi m’malo mwa ŵanthu.” (Mil. 5:29; 1 Yoh. 5:3) Chitemwa chanadi pa Chiuta ndicho chikovwiraso ŵabali ŵithu mazuŵa ghano kulutilira kugomezgeka para ŵakutambuzgika na maboma ghankhongono na ghankhaza. Para charu chikutitinkha, tikugongowa yayi, kweni tikukondwa.​—Mil. 5:41; ŵazgani Ŵaroma 5:3-5.

7. Kasi tikwenera kuchita wuli para ŵamumbumba yithu ŵakutisuska?

⁷ Usange ŵamumbumba yithu ndiwo ŵakutisuska, chingaŵa chakusuzga chomene kuzizipizga. Para tikulongora kuti tikukhumba kwamba kusambira unenesko, ŵamumbumba yithu ŵanyake ŵangamba kughanaghana kuti tapuluskika. Ŵanyake ŵangamba kuwona kuti tafuntha. (Yaniskani na Mariko 3:21.) Ndipo ŵangamba kutisuska chomene panji na kutipweteka wuwo. Kweni tikwenera kuzizwa yayi para tikususkika. Yesu wakati: “Ŵalwani ŵa munthu ŵazamuŵa ŵanthu ŵamunyumba yake.” (Mat. 10:36) Mulimose umo vingaŵira, vilije kanthu umo ŵabali ŵithu ŵakutiwonera, kweni ise tikuŵatinkha yayi. Nakuti apo chitemwa chithu pa Yehova chikukura, chitemwa chithu pa ŵanthu nacho chikukura. (Mat. 22:37-39) Ndipo tizamulekapo yayi kupulikira malango na fundo za Yehova izo zikusangika mu Baibolo chifukwa chakuti waka tikukhumba kukondweska munthu.

8-9. Kasi ntchivichi chikawovwira mudumbu munyake kuti waleke kusunkhunyika nangauli wakasuskikanga chomene?

⁸ Georgina, uyo tamuzunura kale mu nkhani iyi, wakasunkhunyika yayi nangauli amama ŵake ŵakamususkanga chomene. Georgina wakuti: “Ine na amama tikamba kusambira Baibolo na  Ŵakaboni. Kweni pati pajumpha myezi 6, apo nkhakhumbanga kwamba kuluta ku maungano, amama ŵakamba kunisuska chomene. Pamanyuma nkhazakamanya kuti amama ŵakachezganga na ŵakugaluka, ndipo ivyo ŵakadumbiskananga nawo ndivyo ŵakizanga navyo nakwamba kunisuska ine. Kweniso ŵakaninyozanga, kuniguza sisi, kunifyenya pasingo na kutaya magazini ghane. Nati nakwaniska vyaka 15, nkhabatizika. Amama ŵakayezgayezga kuti ŵanitondeske kuteŵetera Yehova, ŵakaniŵika ku malo agho ŵakusungirako ŵasungwana ŵakusuzga, awo ŵandakwaniske vyaka 20, ndipo ŵanyake mwa iwo ŵakamwanga minkhwala yakutimbanizga wongo kweniso ŵakaŵa na milandu yinyake. Chikuŵa chakusuzga chomene kuzizipizga para uyo wakukususka ni munthu uyo ukumutemwa chomene.”

⁹ Kasi ntchivichi chikamovwira Georgina kuzizipizga? Iyo wakuti: “Zuŵa ilo amama ŵakaniwukira, likaŵaso zuŵa ilo nkhamalizgira kuŵerenga Baibolo lose. Nkhaŵa kuti nakhorwa kale kuti nasanga unenesko, ndipo nkhajiwonanga kuti nili pafupi chomene na Yehova. Kanandi nkhalombanga ndipo wakanipulikanga. Apo nkhakhalanga ku malo uko amama ŵakaniŵika, mudumbu munyake wakanichemera kunyumba kwake, ndipo tikasambira Baibolo lumoza. Pa nyengo iyi nkhakhozgeka chomene na ŵabali na ŵadumbu ku Nyumba ya Ufumu. Ŵakanipangiska kujipulika kuti tose tili mbumba yimoza. Apa vikaŵa vyakuwonekerathu kuti Yehova ngwankhongono chomene kujumpha awo ŵakutisuska, vilije kanthu kuti mbanjani.”

10. Kasi tili na chigomezgo wuli mwa Yehova Chiuta withu?

¹⁰ Mpositole Paulosi wakalemba kuti palije ‘icho chingatipatura ku chitemwa cha Chiuta icho chili mwa Khristu Yesu Fumu yithu.’ (Rom. 8:38, 39) Nanga tingasuzgika kwanyengo yitaliko, kweni nyengo zose Yehova waŵenge ku chigaŵa chithu, kutipembuzga na kutikhozga. Kweniso nga umo vikaŵira na Georgina, nase Yehova wakutovwira kwizira mu mbumba yithu yakuzirwa yauzimu.

11. Kasi chitemwa icho Yesu wakayowoya pa Yohane 15:12, 13, chikawovwira wuli ŵasambiri ŵake? Pelekani chiyelezgero.

¹¹ Pa usiku wakuti namachero wafwenge, Yesu wakaphalira ŵasambiri ŵake kuti ŵatemwanenge. (Ŵazgani Yohane 15:12, 13.) Yesu wakamanyanga kuti chitemwa cha kujipata ndicho chiŵawovwirenge kuti ŵalutilire kuŵa ŵakukolerana na kuzizipizga para charu chikuŵatinkha. Mwachiyelezgero, ghanaghanirani za mpingo wa ku Tesalonika. Kufuma waka pa nyengo iyo ukapangikira, ŵanthu mu mpingo uwu ŵakatambuzgikanga chomene. Kweni ŵabali na ŵadumbu ŵakazizipizga,  ndipo ŵakalutilira kugomezgeka na kutemwana. (1 Tes. 1:3, 6, 7) Ndipo Paulosi wakaŵachiska kuti ŵalutilire kulongorana chitemwa “mwakukwana.” (1 Tes. 4:9, 10) Wakamanyanga kuti chitemwa ndicho chingaŵawovwira kuti ŵapembuzgenge na kovwira awo mbakulopwa. (1 Tes. 5:14) Ŵakhristu aŵa ŵakalondezga ulongozgi wa Paulosi. Tikuyowoya nthena chifukwa mu kalata iyo wakalemba pati pajumpha chaka, Paulosi wakalemba kuti: “Chitemwa cha waliyose wa imwe kwa yumoza na munyake chikusazgikira.” (2 Tes. 1:3-5) Chifukwa chakuti ŵakatemwananga vikaŵawovwira kuzizipizga masuzgo kweniso nthambuzgo izo ŵakakumananga nazo.

12. Pa nyengo ya nkhondo, kasi ŵabali na ŵadumbu mu charu chinyake ŵakalongora wuli kuti ŵakutemwana?

¹² Wonani ivyo vikachitikira Danylo na muwoli wake. Nkhondo iyo yikachitika mu charu chawo yati yafika mu tawuni iyo ŵakakhalanga, iwo ŵakalutilira kuwungana, kupharazga umo ŵangafiskira, na kugaŵirako ŵabali na ŵadumbu chakurya icho ŵakaŵa nacho. Zuŵa linyake, kunyumba kwa Danylo kukiza ŵasilikari ndipo ŵakanyamura futi. Danylo wakuti: “Ŵakaniphalira kuti niyowoye kuti Naleka kuŵa Kaboni. Nkhati nakana, ŵakanitimba na kunofya kuti ŵanilasenge na futi, ndipo ŵakalasanga muchanya kuti niwope. Pambere ŵandalute, ŵakanofya kuti ŵizengeso ndipo ŵazamukolelera muwoli wane. Kweni ŵabali mwaluŵiro ŵakatikwezga sitima ya pamtunda na kuluta mu tawuni yinyake. Nizamuluwa yayi chitemwa cha ŵabali aŵa. Tati tafika ku tawuni iyi, ŵabali ŵakatipa chakurya ndipo ŵakanovwira kusanga ntchito na pakukhala. Ndipo pamanyuma nase tikamba kupokelera Ŵakaboni ŵanyithu awo nawo ŵakachimbira nkhondo.” Chitemwa icho tili nacho kwa yumoza na munyake chingatovwira kuzizipizga para tikutinkhika.

13. Kasi mzimu utuŵa ukutovwira wuli kuzizipizga apo tikuteŵetera Yehova nanga ŵanthu ŵangatitinkha?

¹³ Yesu wakaphalira ŵalondezgi ŵake kuti ŵatemwenge ŵalwani ŵawo. (Mat. 5:44, 45) Kasi ntchipusu kuchita nthena? Yayi, napachoko pose! Kweni ntchamachitiko na wovwiri wa mzimu utuŵa wa Yehova. Vinyake mwa vipambi vya mzimu utuŵa wa Chiuta, ntchitemwa, kuzikira, kuzika na kujikora. (Gal. 5:22, 23) Mikhaliro iyi yikutovwira kuzizipizga para tikutinkhika. Ŵanthu ŵanandi ŵali kuleka kutisuska chifukwa chakuti mfumu wawo, muwoli wawo, mwana wawo, panji mzengezgani wawo wakalongora mikhaliro iyi. Ndipo ŵanandi awo ŵakasuskanga pakwamba, pasono mbabali na ŵadumbu. Ntheura usange vikumusuzgani kutemwa awo ŵakumutinkhani chifukwa chakuti mukuteŵetera Yehova,  lombani mzimu utuŵa. (Luka 11:13) Ndipo khorwani kuti kupulikira Chiuta nyengo zose nkhuwemi chomene.​—Zinth. 3:5-7.

14-15. Kasi lemba la Ŵaroma 12:17-21, likamovwira wuli Yasmeen kulongora chitemwa mfumu wake, nangauli wakamususkanga chomene?

¹⁴ Wonani ivyo vikachitikira Yasmeen, uyo wakukhala Middle East. Wati waŵa yumoza wa Ŵakaboni ŵa Yehova, mfumu wake wakaghanaghananga kuti wapusikika, ndipo wakayezga kumulekeska kuteŵetera Chiuta. Wakamunyozanga, ndipo wakachiska ŵachibali na muliska wa tchalitchi kweniso ng’anga kumofya kuti ŵamuchitirenge vyakofya kweniso ŵakamunenanga kuti wakutimbanizga nthengwa yake. Ndipo mfumu wake wakapomeranga ŵabali na kuŵanyoza pa nyengo ya maungano. Yasmeen kanandi wakaliranga chifukwa chakuti ŵakamuchitiranga vinthu mwambura lusungu.

¹⁵ Ku Nyumba ya Ufumu, ŵabali na ŵadumbu ŵakamupembuzganga Yasmeen na kumukhozga. Ŵalara ŵakamuchiska kuti walondezge mazgu gha pa Ŵaroma 12:17-21. (Ŵazgani.) Yasmeen wakuti: “Chikaŵa chakusuzga chomene. Kweni nkhalomba Yehova kuti wanovwire ndipo nkhachita vyose ivyo ningafiska kuti nilondezge ivyo Baibolo likuyowoya. Ntheura para mfumu wane mwadala wabinkhiskako ku khichini, nkhanozgangako waka. Para wakuninyoza nkhazgoranga mwakuzikira. Ndipo para walwara nkhamupweleleranga.”

16-17. Kasi mukusambirako vichi kwa Yasmeen?

¹⁶ Yasmeen wakatumbikika chifukwa chakulongora chitemwa mfumu wake. Iyo wakuti: “Mfumu wane wakamba kunigomezga chomene chifukwa wakamanyanga kuti nyengo zose nkhuyowoya unenesko. Wakamba kunitegherezga mwantchindi para tikuyowoyeskana vya chisopa, ndipo wakazomerezga kuti wayezeskenge kuti panyumba paŵe mtende. Sono ndiyo wakunichiska kuti nilutenge ku maungano. Kweniso sono, ine na mfumu wane tikutemwana chomene ndipo kunyumba tikukhala mwamtende. Nili na chigomezgo kuti zuŵa linyake mfumu wane wazamuzomera unenesko ndipo tizamwamba kuteŵetera lumoza Yehova.”

¹⁷ Ivyo vikachitikira Yasmeen vikulongora kuti chitemwa “chikubenekelera vinthu vyose, . . . chikugomezga vinthu vyose, chikuzizipizga vinthu vyose.” (1 Kor. 13:4, 7) Ŵanthu ŵangatitinkha chomene ndipo vingatiŵinya chomene, kweni chitemwa ntchankhongono chomene. Para tikutemwa ŵanji, ŵangasintha umo ŵakutiwonera ise kweniso Yehova, ndipo ŵangaleka kutisuska. Nakuti para vyaŵa nthena Yehova wakukondwa. Kweni nanga ŵakususka ŵangalutilira kutitinkha, ise tilutilirenge kuŵa ŵakukondwa. Kasi vingachitika wuli nthena?

18. Chifukwa wuli tikwenera kukondwa para tikutinkhika?

¹⁸ Yesu wakati: “Ŵakukondwa ndimwe para ŵanthu ŵakumutinkhani.” (Luka 6:22) Tikuchita kukhumba yayi kuti titinkhikenge. Nase vikutiŵinya para tikutambuzgika. Ipo chifukwa wuli tikwenera kukondwa para tikutinkhika? Wonani vifukwa vitatu ivi. Chakwamba, para tazizipizga Chiuta wakukondwa nase. (1 Pet. 4:13, 14) Chachiŵiri, chipulikano chithu chikukhora chomene. (1 Pet. 1:7) Ndipo chachitatu, tizamupokera chawanangwa chapadera chomene icho mbumoyo wamuyirayira.​—Rom. 2:6, 7.

19. Chifukwa wuli ŵapositole ŵakakondwa ŵati ŵathyapulika?

¹⁹ Yesu wati wawuskika, ŵapositole ŵake ndipo ŵakapulikiska za kukondwa uko Yesu wakang’anamuranga. Ŵati ŵathyapulika na kuphalirika kuti ŵaleke kupharazga, iwo ŵakaŵa ŵakukondwa. Chifukwa wuli? Chifukwa “ŵakapimika ŵakwenelera kuyuyulika chifukwa cha zina la Yesu.” (Mil. 5:40-42) Chitemwa pa Fumu yawo chikaŵa chankhongono chomene kuluska wofi uwo ŵakaŵa nawo pa ŵalwani ŵawo. Ndipo ŵakalongora chitemwa ichi mwakupharazga makani ghawemi “kwambura kuleka.” Ŵabali na ŵadumbu ŵithu mazuŵa ghano, ŵakulutilira kuteŵetera mwakugomezgeka nangauli ŵakusangana na masuzgo. Iwo ŵakumanya kuti Yehova waluwenge yayi mulimo wawo na chitemwa icho ŵakulongora ku zina lake.​—Heb. 6:10.

20. Kasi tizamusambira vichi mu nkhani yakulondezgapo?

²⁰ Charu chilutilirenge kutitinkha m’paka apo chizamuparanyikira. (Yoh. 15:19) Kweni tikwenera kuchita wofi yayi. Nga umo tiwonerenge mu nkhani yakulondezgapo, Yehova ‘wakhozgenge na kuvikilira ŵakugomezgeka ŵake.’ (2 Tes. 3:3) Ntheura tiyeni tilutilire kutemwa Yehova, kutemwa ŵabali na ŵadumbu ŵithu kweniso awo ŵakutisuska. Para tilondezgenge ulongozgi uwu, tilutilirenge kuŵa ŵakukolerana, chipulikano chithu chiŵenge chakukhora, tipelekenge uchindami kwa Yehova, kweniso tilongorenge pakweru kuti chitemwa ntchankhongono chomene kuluska thinkho.