1. Chifukwa wuli Yesu wakalomba Yehova kuti waŵavikilire ŵasambiri ŵake?

PA USIKU waumaliro wa umoyo wake pa charu chapasi, Yesu wakaghanaghaniranga za masuzgo agho ŵasambiri ŵake wasanganenge nagho. Chifukwa chakuti wakaŵatemwanga chomene ŵasambiri ŵake, Yesu wakalomba Adada ŵake kuti ‘ŵaŵavikilire kwa muheni.’ (Yoh. 17:14, 15) Yesu wakamanya kuti para wawelera kuchanya, Satana Dyabulosi walutilirenge kulimbana na waliyose uyo wakukhumba kuteŵetera Yehova. Ntheura chikaŵa chakumanyikwirathu kuti ŵanthu ŵa Yehova ŵakhumbikwirenge kuvikilirika.

2. Chifukwa wuli tikugomezga kuti Yehova wazgorenge malurombo ghithu?

² Yehova wakazgora lurombo lwa Yesu chifukwa chakuti wakumutemwa Mwana wake. Para tikuyezgayezga kukondweska Yehova, nase watitemwenge ndipo wazgorenge malurombo ghithu kuti watovwire na kutivikilira. Pakuŵa Dada wachitemwa, Yehova walutilirenge kupwelelera ŵana ŵake. Chifukwa para wangaleka kuchita nthena, ndikuti zina lake lichindikikenge yayi kweniso mbiri yake yinangikenge.

3. Chifukwa wuli sono ndipo tikukhumbikwira chomene kuti Yehova wativikilire?

³ Pasono ndipo tikukhumbikwira chomene kuti Yehova wativikilire kuluska kumanyuma kose. Satana wali kuchimbizgika kuchanya, ndipo “wali na ukali ukuru.” (Chivu. 12:12) Iyo wapangiska ŵanthu ŵanyake kughanaghana kuti para ŵakutitambuzga ndikuti “ŵakuchitira Chiuta uteŵeti wakupatulika.” (Yoh. 16:2) Ŵanyake awo ŵakugomezga yayi mwa Chiuta, ŵakutitambuzga chifukwa chakuti ise tikupambana na ŵanthu ŵa mu charu ichi. Kwali ŵanthu ŵakutitambuzga pa vifukwa wuli, kweni tikopa yayi.  Chifukwa wuli? Chifukwa Mazgu gha Chiuta ghakuti: “Fumu njakugomezgeka, ndipo yimukhozganinge na kumuvikilirani kwa muheni.” (2 Tes. 3:3) Kasi Yehova wakutivikilira wuli? Tiyeni tidumbiskane nthowa ziŵiri.

4. Kuyana na Ŵaefeso 6:13-17, kasi Yehova watipa vichi kuti wativikilire?

⁴ Yehova wali kutipa vyankhondo vyose vyauzimu ivyo vingativikilira para Satana watiwukira. (Ŵazgani Ŵaefeso 6:13-17.) Vyankhondo vyauzimu ivi ni vyankhongono kweniso vikugwira makora ntchito. Kweni kuti vyankhondo ivi vitivikilire, tikwenera kuvigwiliskira ntchito nyengo zose. Kasi chankhondo chilichose chikwimira vichi? Tiyeni tidumbiskane chilichose pachekhapachekha.

5. Kasi lamba wa unenesko ni vichi, ndipo chifukwa wuli tikwenera kumuvwara?

⁵ Lamba wa unenesko wakwimira unenesko uwo tikuwusanga mu Mazgu gha Chiuta, Baibolo. Chifukwa wuli tikwenera kuvwara lamba uyu? Chifukwa chakuti Satana ni “wiske wa utesi.” (Yoh. 8:44) Wakhala wakuyowoya utesi kwa vyaka masauzandi ghanandi kweniso kupuluska “charu chose.” (Chivu. 12:9) Kweni unenesko uwo tikuwusanga mu Baibolo ukutivikilira kuti tileke kupuluskika. Kasi tikuvwara wuli lamba wa unenesko uyu? Tikuvwara para tikusambira unenesko wakukhwaskana na Yehova, para “tikumusopa mu mzimu na mu unenesko,” kweniso para tikuchita vinthu mwakugomezgeka pa chilichose.​—Yoh. 4:24; Efe. 4:25; Heb. 13:18.

6. Kasi chakujivikilira pa chifuŵa cha urunji ni vichi, ndipo chifukwa wuli tikwenera kuchivwara?

⁶ Chakujivikilira pa chifuŵa cha urunji chikwimira fundo zaurunji za Yehova. Chifukwa wuli tikwenera kuvwara chakujivikilira pa chifuŵa? Chakujivikilira pa chifuŵa chikavikiliranga mtima wa msilikari kuti uleke kulasika. Mwakuyana waka, chakujivikilira pa chifuŵa cha urunji nacho, chikutivikilira ku vinthu viheni vya mu charu ichi kuti vileke kunanga wunthu withu wamukati. (Zinth. 4:23) Yehova wakukhazga kuti timutemwenge na kumuteŵetera na mtima wose. (Mat. 22:36, 37) Kweni Satana wakutipangiska kuti titemwenge vinthu ivyo vili mu charu chake ichi mwakuti tileke kuteŵetera Yehova na mtima wose. (Yak. 4:4; 1 Yoh. 2:15, 16) Para nthowa iyi yatondeka, wakwamba kutofya kuti watipangiske kuchita vinthu ivyo Yehova wakutinkha.

7. Kasi tikuvwara wuli chakujivikilira pa chifuŵa cha urunji?

⁷ Tikuvwara chakujivikilira pa chifuŵa cha urunji para tikupulikira fundo za Yehova pa nkhani ya icho ntchiwemi na icho ntchiheni, kweniso para zuŵa na zuŵa tikulondezga fundo izi. (Sal. 97:10) Ŵanyake ŵakughanaghana kuti fundo za Yehova zikutipoka wanangwa. Kweni para taleka kulondezga fundo za mu Baibolo pa umoyo withu tiŵenge nga ni msilikari uyo wawuskapo chakujivikilira pa chifuŵa uku nkhondo yanunkha, chifukwa wakughanaghana kuti ntchizito chomene. Uwu ungaŵa uchindere ukuru chomene. Awo ŵakutemwa Yehova, ŵakuwona kuti malango ghake, “ngazito yayi” kweni ghakuponoska umoyo.​—1 Yoh. 5:3.

8. Kasi mazgu ghakuti kuvwalika malundi ghithu skapato pakunozgekera kupharazga makani ghawemi ghakung’anamurachi?

⁸ Paulosi wakutichiskaso kuti tivwalike malundi ghithu skapato pakunozgekera kupharazga makani ghawemi gha mtende, kung’anamura kuti nyengo zose tikwenera kuŵa ŵakunozgeka kupharazga makani ghawemi gha Ufumu. Para tikuphalirako ŵanji uthenga wa mu Baibolo, nase chipulikano chithu chikukhozgeka. Ntchakukhozga chomene kuwona ŵanthu ŵa Yehova pa charu chose chapasi ŵakupenjerezga mipata kuti ŵapharazgenge makani ghawemi. Iwo ŵakupharazga kwali nkhu ntchito, ku sukulu, ku malo gha bizinesi, kunyumba na nyumba, para ŵaluta kukagura vinthu, para ŵendera ŵabali ŵawo awo Mbakaboni yayi, panji na ŵanthu waka awo  ŵakumanyana nawo. Para tingamba kuchita wofi na kuleka kupharazga, tiŵenge nga ni msilikari uyo wavura skapato zake nyengo ya nkhondo. Malundi ghake ghangachedwa yayi kupwetekeka. Nakuti chingaŵa chakusuzga kuti wajivikilire para ŵalwani ŵamuwukira kweniso vingamusuzga kulondezga ivyo mulara wawo wa nkhondo wakuyowoya.

9. Chifukwa wuli tikukhumbikwira kuyegha chiskango chikuru cha chipulikano?

⁹ Chiskango chikuru cha chipulikano chikwimira chipulikano icho tili nacho mwa Yehova. Tili na chipulikano kuti wazamufiska malayizgo ghake ghose. Chipulikano ichi ndicho chitovwirenge ‘kuzimya mivi yose yakugolera ya muheni.’ Chifukwa wuli tikukhumbikwira kuyegha chiskango chikuru ichi? Chifukwa chikutivikilira ku visambizgo vya ŵakugaluka ivyo vingatipuluska, kweniso chikutovwira kuti tileke kugongowa para ŵanthu ŵakutinena chifukwa cha ivyo tikugomezga. Kwambura chipulikano, tiŵavyenge nkhongono zakuzizipizgira usange ŵanji ŵakutichichizga kuti tileke kumupulikira. Kweni para nyengo zose tikukana kuchita chinthu chinyake ku ntchito panji ku sukulu, icho Yehova wangakondwa nacho yayi, chipulikano chithu ndicho chikuŵa kuti chikutivikilira. (1 Pet. 3:15) Ndipo nyengo yiliyose para tikukana ntchito ya ndalama zinandi iyo yingatimbanizga uteŵeti withu na  Yehova, chipulikano chithu ndichoso chikuŵa kuti chikutivikilira. (Heb. 13:5, 6) Kweniso para tikulutilira kuteŵetera Yehova nangauli tikususkika, chikuŵaso chipulikano chithu icho chikutivikilira.​—1 Tes. 2:2.

10. Kasi chisoti cha chiponosko ni vichi, ndipo chifukwa wuli tikwenera kuchivwara?

¹⁰ Chisoti cha chiponosko ntchigomezgo icho Yehova watipa, chakuti wazamuŵapa njombe wose awo ŵakuchita khumbo lake, ndipo nanga tingafwa wazamutiwuska. (1 Tes. 5:8; 1 Tim. 4:10; Tito 1:1, 2) Nga umo chisoti chikuvikililira mutu wa msilikari, chigomezgo cha chiponosko nacho chikuvikilira maghanoghano ghithu. Kasi chikuvikilira wuli? Chigomezgo ichi chikutovwira kuti tiŵikenge chomene mahara pa malayizgo gha Chiuta ndiposo kuti tileke kufipa mtima chomene na masuzgo. Kasi tingavwara wuli chisoti ichi? Tingavwara para tikuwona vinthu nga umo Chiuta wakuviwonera. Mwachiyelezgero, chigomezgo chithu chili mu usambazi wambura kutchintha yayi, kweni mwa Chiuta.​—Sal. 26:2; 104:34; 1 Tim. 6:17.

11. Kasi lupanga lwa mzimu ni vichi, ndipo chifukwa wuli tikwenera kuligwiliskira ntchito?

¹¹ Lupanga lwa mzimu ni Mazgu gha Chiuta, Baibolo. Lupanga ulu luli na nkhongono yakuvumbura utesi uliwose na kufwatura ŵanthu ku visambizgo vyautesi na vizgoŵi viheni. (2 Kor. 10:4, 5; 2 Tim. 3:16, 17; Heb. 4:12) Tikusambira umo tingaligwiliskira ntchito makora lupanga ulu, para tikusambira patekha, kweniso kwizira mu ivyo tikusambira kufumira ku gulu la Yehova. (2 Tim. 2:15) Padera pa vyankhondo vyose, Yehova wakutipaso chivikiliro chinyake chankhongono chomene. Kasi ntchivichi?

12. Kasi ntchivichi chinyake icho tikukhumbikwira, ndipo chifukwa wuli?

¹² Msilikari waluso wakumanya kuti wangarwa yayi nkhondo yekha kulimbana na ŵankhondo ŵanandi na kutonda. Kweni wakumanya kuti wakukhumbikwira wovwiri wa ŵasilikari ŵanyake. Mwakuyana waka, patekha tingalimbana nayo yayi Satana na awo ŵakumulondezga. Tikukhumbikwira wovwiri kufuma ku ŵabali na ŵadumbu ŵithu. Yehova watipa “ŵabali” pa charu chose kuti ŵatovwire.​—1 Pet. 2:17.

13. Kuyana na Ŵahebere 10:24, 25, kasi maungano ghithu ghakutovwira wuli?

¹³ Nthowa yimoza iyo tingapokelera wovwiri, nkhusangikapo pa maungano nyengo zose. (Ŵazgani Ŵahebere 10:24, 25.) Tose tikugongowa nyengo zinyake. Para vyanthena vyachitika, maungano ghangatikhozga. Tikukhozgeka chomene na mazgoro ghakufumira pasi pamtima gha ŵabali na ŵadumbu. Nkhani zakufuma mu Baibolo kweniso viyelezgero ivyo ŵabali na ŵadumbu ŵakupanga ku maungano vikutovwira kuti tilutilire kuteŵetera Yehova. Kweniso tikukhozgeka kuchezga nawo pambere maungano ghandambe na para ghamara. (1 Tes. 5:14) Mwakusazgirapo, maungano ghakutipa mwaŵi wakuti tovwire ŵanji, ndipo ivi vikutovwira kuti tiŵe ŵakukondwa. (Mil. 20:35; Rom. 1:11, 12) Maungano ghakutovwiraso munthowa zinyake. Ghakutovwira kuti tipharazgenge na kusambizga makora. Mwachiyelezgero, tikusambira umo tingagwiliskira ntchito makora ivyo tikusambizgira ŵanthu Baibolo. Ntheura munozgekerenge makora maungano. Panyengo ya maungano mutegherezgenge chomene. Kufuma apo, muchitenge ivyo mwasambira. Para mukuchita vinthu ivi, muŵenge “msilikari muwemi wa Khristu Yesu.”​—2 Tim. 2:3.

14. Kasi tiliso na wovwiri wuli unyake?

¹⁴ Tiliso na wovwiri wa ŵangelo mamiliyoni ghanandi awo mbankhongono chomene. Ghanaghanirani waka ivyo mungelo yumoza wangachita. (Yes. 37:36) Ghanaghaniraniso ivyo gulu lankhongono la ŵangelo lingafiska kuchita. Palije munthu panji chiŵanda icho chingatonda gulu lankhondo la Yehova ilo ndankhongono chomene. Yehova ndiyo ngwankhongono chomene.  Ntheura usange wali nase, nyengo zose tiŵenge ŵankhongono kuluska awo ŵakutisuska nanga ŵangaŵa ŵanandi wuli. (Ŵeru. 6:16) Tikugomezga kuti uwu mbunenesko nadi. Ntheura nyengo zose mughanaghanirenge unandi wa awo ŵangamovwirani para awo mukugwira nawo ntchito, awo mukusambira nawo sukulu, panji ŵabali ŵinu awo Mbakaboni yayi ŵakumofyani. Kumbukani kuti muli mwekha yayi pa nkhondo iyi. Imwe muli na Yehova.

15. Kuyana na Yesaya 54:15, 17, chifukwa wuli tingati palije munthu uyo wangalekeska ŵanthu ŵa Chiuta kupharazga?

¹⁵ Charu chakuwusika na Satana ichi, chili na vifukwa vinandi vyakutitinkhira. Tikunjilirapo yayi pa vya ndyali na nkhondo. Tikupharazga za zina la Chiuta na Ufumu wake kuti ndiwo uzamwiziska mtende, kweniso tikupulikira fundo zake zaurunji. Tikuvumbura pakweru ku ŵanthu kuti muwusi wa charu ichi ni mutesi na wakukoma. (Yoh. 8:44) Ndiposo tikupharazga kuti sonosono apa charu cha Satana ichi chiparanyikenge. Kweni Satana na ŵanthu ŵake ŵangatondeska yayi mulimo withu wakupharazga. Ise tilutilirenge kulumba Yehova munthowa yiliyose. Nangauli Satana nayo ngwankhongono, kweni watondeka kutondeska makani ghawemi gha Ufumu kufikira ŵanthu pa charu chose. Vyaŵa nthena chifukwa chakuti Yehova wakutivikilira.​—Ŵazgani Yesaya 54:15, 17.

16. Kasi Yehova wazamuponoska wuli ŵanthu ŵake pa suzgo yikuru?

¹⁶ Kasi ntchivichi chichitikenge munthazi? Panyengo ya suzgo yikuru, Yehova wazamutiponoska kwizira munthowa ziŵiri. Yakwamba, wazamuponoska ŵateŵeti ŵake ŵakugomezgeka panyengo iyo wazamupangiska mathemba gha charu chapasi kuparanya Babuloni Mukuru, nyina wa chisopa chautesi. (Chivu. 17:16-18; 18:2, 4) Ndipo yachiŵiri, wazamuponoska ŵanthu ŵake apo wazamuparanya charu chose cha Satana pa nkhondo ya Aramagedoni.​—Chivu. 7:9, 10; 16:14, 16.

17. Kasi pakuŵa uwemi wuli para tikulutilira kuŵa pafupi na Yehova?

¹⁷ Para tikulutilira kuŵa pafupi na Yehova, Satana wangatipwetekerathu yayi muyirayira. Nakuti unenesko ngwakuti iyo ndiyo wazamuparanyikirathu muyirayira. (Rom. 16:20) Ntheura vwarani vyankhondo vyose na kulutilira kuvigwiliskira ntchito. Kulimbana na Satana pamoza na charu chake pamwekha yayi. Wovwirani ŵabali na ŵadumbu ŵinu. Ndipo mulondezgenge ulongozgi wa Yehova. Para muchitenge nthena, muŵenge na chigomezgo chose kuti Adada ŵinu ŵakuchanya awo mbachitemwa, ŵamukhozganinge na kumuvikilirani.​—Yes. 41:10.