1-2. Kasi ni vichi vingapangiska kuti Chiuta wazomerenge kusopa kwithu?

 KASI mu maghanoghano ghinu mukwiza vichi para mwapulika mazgu ghakuti “kusopa”? Panyake mu maghanoghano ghinu mukwiza mubali uyo wajikama pasi kuti walombe kwa Yehova pambere wandagone. Panji mukughanaghanira za mbumba ya chimwemwe iyo yikuchita sambiro la Baibolo.

² Pose paŵiri, wose ŵakuchitako vigaŵa vinyake vya kusopa. Kweni fumbo ndakuti, kasi Yehova wazomerenge kusopa kwawo? Wazomerenge para ŵakuchita nthena mwakuyana na khumbo lake, kweniso para ŵakumutemwa na kumuchindika. Tikumutemwa chomene Yehova. Ndipo tikumanya kuti ngwakwenelera nadi kumusopa, nakuti ndise ŵakukhumbisiska kuchita nthena munthowa yiwemi chomene.

3. Kasi tiwonenge vichi mu nkhani iyi?

³ Mu nkhani iyi, tiwonenge kusopa uko Yehova wakazomeranga mu nyengo yakale ndipo tiwonenge nthowa 8 za umo Yehova wakukhumbira kuti timusoperenge mazuŵa ghano. Apo tikuchita nthena, tingachita makora kughanaghanira umo ise tikuchitira pakumusopa Yehova na kuwona apo tingakhumbikwira kusintha. Tiwonengeso vifukwa ivyo kusopa kwaunenesko kukutovwilira kuŵa ŵakukondwa.

4. Kasi ŵanthu awo ŵakasopanga Yehova pambere Yesu wandize pa charu chapasi, ŵakalongora wuli kuti ŵakamutemwanga Yehova na kumuchindika?

⁴ Mu nyengo yakale pambere Yesu wandize, ŵanalume ŵakugomezgeka nga Abelu, Nowa, Abrahamu, na Yobu, ŵakalongora kuti ŵakumuchindika Yehova kweniso kumutemwa. Kasi ŵakalongora  wuli? Ŵakamupulikiranga, ŵakaŵa na chipulikano mwa iyo, kweniso ŵakapelekanga sembe kwa iyo pera. Baibolo likutiphalira vyose yayi ivyo ŵakeneranga kuchita pakusopa. Kweni ntchakuwonekerathu kuti ŵakachita vyose ivyo ŵangafiska kuti ŵachindike Yehova, ndipo kusopa kwawo kukaŵa kwakuzomerezgeka kwa iyo. Pamanyuma Yehova wakapeleka Dango ku Ŵaisrayeli kwizira mwa Mozesi. Mu malango agha mukaŵaso fundo za umo ŵakeneranga kusopera Yehova munthowa yakuzomerezgeka.

5. Kasi Yehova wakakhumbanga kuti ŵanthu ŵamusopenge wuli pamanyuma pakuti Yesu wafwa na kuwuskika?

⁵ Yesu wati wafwa na kuwuskika, Yehova wakakhumbangaso kuti ŵanthu ŵamusopengeso kuyana na Dango la Mozesi yayi. (Rom. 10:4) Ŵakhristu sono ŵakeneranga kulondezga dango liphya, “dango la Khristu.” (Gal. 6:2) Ŵakeneranga kupulikira “dango” ili, mwakuyezga Yesu na kulondezga ivyo wakasambizga. Ŵakeneranga kulisunga waka pa mtima yayi, panji kulondezga waka mundandanda wa malango ghanandinandi. Mazuŵa ghano napo, Ŵakhristu ŵakuchita vyose ivyo ŵangafiska mwakuti ŵakondweske Yehova na ‘kupumuzgika.’—Mat. 11:29.

6. Kasi tingachita wuli kuti tisange chandulo na nkhani iyi?

⁶ Apo tikuwona chigaŵa chilichose cha umo tikwenera kusopera, jifumbani kuti, ‘Kasi ine nkhuchita wuli pa chigaŵa ichi?’ Mungajifumbaso kuti, ‘Kasi ni mpha apo nkhwenera kusintha pa nkhani ya umo nkhusopera?’ Mukondwenge na ivyo mukukwaniska kuchita pasono, ndipouli mukweneraso kupempha Yehova kuti wamovwirani kuwona ivyo mukwenera kusintha kuti muchitenge makora chomene.

7. Kasi Yehova wakughawona wuli malurombo ghithu ghakufumira pasi pa mtima?

⁷ Tikusopa Yehova para tikulomba kwa iyo. Malemba ghakuyaniska malurombo ghithu na vyakununkhira ivyo vikapelekekanga pa chihema ndipo pamanyuma ŵakapelekanga pa tempile. (Sal. 141:2) Vyakununkhira ivi vikafumiskanga kasungu kawemi ako kakakondweskanga Chiuta. Mwakuyana waka, malurombo ghithu ghakufumira pasi pa mtima ‘ghakumukondweska,’ nanga ni para tingayowoya mazgu ghapusu waka. (Zinth. 15:8; Doto. 33:10) Tili na vifukwa vyakupulikikwa vyakugomezgera kuti Yehova wakukondwa para tikulongora chitemwa chithu kwa iyo kweniso kumuwonga kwizira mu lurombo. Wakukhumba kuti timuphalirenge masuzgo ghithu kweniso ivyo tikukhumba. Ntheura pambere mundamulombe Yehova, mwalekerachi kuti mughanaghanirepo dankha ivyo muyowoyenge? Para muchitenge nthena, mupelekenge “vyakununkhira” viwemi chomene kwa Adada ŵinu ŵakuchanya.

8. Kasi ni mwaŵi wuli uwemi chomene uwo tili nawo wakulumbira Chiuta?

⁸ Tikusopa Yehova para tikumulumba. (Sal. 34:1) Tikulumba Yehova para tikuphalirako ŵanji umo tikumutemwera, kweniso para tikuŵaphalirako vya mikhaliro yake yakukondweska na milimo yake. Tiŵenge na vinthu vinandi vyakuyowoya vyakukhwaskana na Yehova para tikumuwonga. Para tikupatura nyengo ya kughanaghanirapo vinthu viwemi vyose ivyo Yehova watichitira, tiŵenge na vifukwa vinandi vyakumulumbira. Chomenechomene mulimo wakupharazga, ukutipa mwaŵi uwemi chomene wakupeleka kwa “Chiuta sembe ya malumbo nyengo zose, icho ntchipambi cha milomo yithu.” (Heb. 13:15) Nga umo tikwenera kuchitira pa nkhani ya lurombo, kuti tikwenera kughanaghanirapo mwakupwelelera ivyo tiyowoyenge pambere tindamulombe Yehova, mwakuyana waka, tikweneraso kughanaghanirapo mwakupwelelera ivyo tiyowoyenge ku ŵanthu awo tiŵapharazgirenge. Tikukhumba kuti sembe zithu za malumbo ziŵenge ziwemi chomene. Lekani tikuyowoya kufumira pasi pa mtima para tikuphalirako ŵanyithu unenesko wa mu Baibolo.

9. Nga Mbaisrayeli mu nyengo yakale, kasi tikupindura wuli para tikuwungana pamoza? Yowoyani umo imwe pamwekha maungano ghamovwilirani.

 ⁹ Tikusopa Yehova para tikusangikapo pa maungano. Ŵaisrayeli ŵakaphalirika kuti: “Katatu pa chaka, ŵanalume wose pakati pinu ŵalutenge kukawonekera pamaso pa Yehova Chiuta winu ku malo agho wasora.” (Doto. 16:16) Iwo ŵakeneranga kuleka nyumba zawo na minda yawo kwambura munthu waliyose wakulinda vinthu ivi. Ndipo Yehova wakaŵalayizga kuti: “Pamuŵavya uyo wamudokera charu chinu pa nyengo iyo mukukwera kukawona chisko cha Yehova Chiuta winu katatu pa chaka.” (Eks. 34:24) Chifukwa chakuti ŵakaŵa na chipulikano chikuru mwa Yehova, Ŵaisrayeli ŵakasangikangapo pa viphikiro vya pa chaka ivi. Ntheura ŵakapinduranga mu nthowa zinandi; ŵakalipulikiskanga makora Dango la Chiuta, ŵakaghanaghanirangapo pa uwemi wa Chiuta, kweniso ŵakakhozgananga na ŵasopi ŵanyawo. (Doto. 16:15) Nase tikusanga vyandulo vyakuyana waka, para tikujinora vinthu vinyake panji kuleka vinthu vinyake mwakuti tikasangikepo pa maungano Ghachikhristu. Ndipo ghanaghanirani umo Yehova wakukondwera para tikunozgekera kuti tikazgorepo pa maungano fundo zakudumura kweni zakupulikikwa makora.

10. Chifukwa wuli kwimba sumu ntchigaŵa chakuzirwa chomene pakusopa kwithu?

¹⁰ Tikusopa Yehova para nase tikwimbako sumu za Ufumu. (Sal. 28:7) Ŵaisrayeli ŵakawonanga kwimba kuŵa chigaŵa chakuzirwa chomene pakusopa Yehova. Themba Davide likasora Ŵalevi 288 kuti ŵimbenge pa tempile. (1 Mid. 25:1, 6-8) Mazuŵa ghano napo, tingalongora kuti tikumutemwa Chiuta para tikwimba sumu zakumulumba. Umo mazgu ghithu ghakupulikikwira pakwimba sumu ndicho ntchinthu chakuzirwa chomene yayi. Ghanaghanirani fundo iyi: Para tikuyowoya, “tose tikukhuŵara nyengo zinandi,” kweni ivi vikutitondeska yayi kuyowoya pa maungano kweniso mu uteŵeti. (Yak. 3:2) Mwakuyana waka, tingazomerezganga yayi kuti tileke kwimba sumu zakulumba Yehova chifukwa chakuti mazgu ghithu ghakupulikikwa makora yayi panji kuti ngamangwalara.

11. Kuyana na Salimo 48:13, chifukwa wuli tikwenera kuŵa na nyengo yakusambilira Baibolo na mbumba yithu?

¹¹ Tikusopa Yehova para tikusambira Mazgu ghake na kusambizga ŵana ŵithu vyakukhwaskana na iyo. Zuŵa la Sabata likapelekanga mwaŵi ku Ŵaisrayeli kuti ŵaŵike mtima pakukhozga ubwezi wawo na Yehova, chifukwa pa zuŵa ili ŵakapumuranga ku milimo yawo ya zuŵa na zuŵa. (Eks. 31:16, 17) Ŵapapi ŵakugomezgeka ŵakasambizganga ŵana ŵawo vyakukhwaskana na Yehova na uwemi wake. Mazuŵa ghano napo, tikwenera kupatura nyengo yakuŵazga na kusambira Mazgu gha Chiuta. Tikwenera kuchita nthena chifukwa ichi nacho ntchigaŵa cha kusopa Yehova, ndipo chingatovwira kuti tiŵe nayo paubwezi wakukhora. (Sal. 73:28) Ndipo para tikusambira lumoza nga mbumba, tingawovwira ŵana ŵithu kuti ŵaŵe paubwezi wakukhora na Adada ŵithu ŵakuchanya.—Ŵazgani Salimo 48:13.

12. Kasi tikusambirapo vichi pa umo Yehova wakawoneranga mulimo wa awo ŵakapanganga vinthu vya mu chihema?

¹² Tikusopa Yehova para tikuzenga na kunozga malo ghithu ghakusoperapo. Baibolo likuti mulimo wakupanga chihema na vyose vyamukati mwake yikaŵa “ntchito yakupatulika.” (Eks. 36:1, 4) Mazuŵa ghano napo, Yehova wakuwona kuti mulimo wakuzenga Nyumba za Ufumu na malo ghanyake ghakusoperapo ni uteŵeti wakupatulika. Ŵabali na ŵadumbu ŵanyake ŵakumalira nyengo yawo yinandi kuchitako milimo iyi. Tikuŵawonga chomene chifukwa cha ivyo ŵakuchita pakukhozgera mulimo wa Ufumu. Kweniso nawo ŵakuchitakoso mulimo wakupharazga. Mwakuti ŵanyake ŵakukhumba na kuchita upayiniya. Ŵalara ŵangalongora kuti ŵakukhozgera mulimo wakuzenga uwu mwakuzomerezga  mwaluŵiro ŵabali na ŵadumbu ŵakulimbikira aŵa kuŵa ŵapayiniya para mbakwenelera. Kwali tili na maluso ghapadera panji yayi, kweni tose tingawovwirapo kusungilira nyumba zithu izi kuŵa zakutowa na zakuwoneka makora.

13. Kasi tikwenera kuviwona wuli vyakupeleka vithu ivyo tingapeleka kuti tikhozgere mulimo wa Ufumu?

¹³ Tikusopa Yehova para tikukhozgera mulimo wa Ufumu na vyakupeleka vithu. Ŵaisrayeli ŵakeneranga kunyamura chawanangwa kwa Yehova para ŵakwiza pa viphikiro vya pa chaka. (Doto. 16:16) Ŵakeneranga kunyamura chawanangwa kuyana na umo munthu wakusangira. Para ŵachita nthena, ŵakalongoranga kuti ŵakuwonga Yehova pa chilichose icho wakaŵachitiranga. Kasi nase tingalongora wuli kuti tikumutemwa Yehova na kumuwonga pa chilichose icho wakutichitira kusazgapo vinthu vyauzimu? Nthowa yimoza nkhupeleka ndalama kuyana na umo vinthu viliri kwa ise, kuti ziwovwire pa mpingo withu kweniso pa mulimo wa pa charu chose. Mpositole Paulosi wakati: “Chawanangwa icho munthu wakupeleka kufumira pasi pa mtima ndicho Chiuta wakukondwa nacho, chifukwa Chiuta wakukhumba kuti munthu wapelekenge ivyo wangafiska, ivyo wangatondeka kufiska yayi.” (2 Kor. 8:4, 12) Yehova wakuzirwiska chakupeleka chithu chilichose chakufumira pasi pa mtima icho tingapeleka, nanga chingaŵa chichoko wuli.—Mrk. 12:42-44; 2 Kor. 9:7.

14. Kuyana na Zintharika 19:17, kasi Yehova wakuwuwona wuli wovwiri uwo tikupeleka ku ŵabali ŵithu awo mbakusoŵerwa?

¹⁴ Tikusopa Yehova para tikovwira Ŵakhristu ŵanyithu awo mbakusoŵerwa. Yehova wakalayizga kuti waŵatumbikenge Ŵaisrayeli awo ŵakalongoranga lusungu ku ŵakavu. (Doto. 15:7, 10) Nadi, nyengo yiliyose iyo tawovwilira musopi munyithu uyo ngwakusoŵerwa, Yehova wakuwona kuti tamupa iyo chawanangwa. (Ŵazgani Zintharika 19:17.) Mwachiyelezgero, apo Ŵakhristu ŵa ku Filipi ŵakatumizga chawanangwa kwa Paulosi uyo wakaŵa mu jele, Paulosi wakati chawanangwa icho wakapika ni “sembe yakuzomerezgeka, yakukondweska Chiuta.” (Fil. 4:18) Ghanaghanirani ŵanthu ŵa mu mpingo winu na kujifumba kuti, ‘Kasi walipo uyo ningamovwira?’ Yehova wakukondwa chomene para wakuwona kuti tikugwiliskira ntchito nyengo yithu, nkhongono zithu, maluso ghithu, na vinthu vithu kovwira awo mbakusoŵerwa. Wakuwona kuti ntchigaŵa cha kusopa kwithu.—Yak. 1:27.

15. Nangauli kusopa kwaunenesko kukukhumbikwa nyengo na nkhongono, kweni chifukwa wuli nkhwakusuzga yayi?

¹⁵ Kusopa kwaunenesko kukhumbikwira nyengo kweniso kuŵikapo mtima, kweni nkhwakusuzga yayi. (1 Yoh. 5:3) Chifukwa wuli? Chifukwa ntchakuti tikusopa Yehova chifukwa chakuti tikumutemwa. Tiyelezgere kuti mwana muchoko wakukhumba kupeleka chawanangwa kwa Adada ŵake, ndipo chawanangwa ichi ntchithuzithuzi. Iyo wakumalira maora ghanandi kujambura chithuzi icho wakukhumba kuŵapa. Mwana wakudandawura yayi na nyengo iyo wamalirapo pakujambura chithuzi ichi. Vili nthena chifukwa chakuti wakuŵatemwa chomene adada ŵake, ndipo ngwakukondwa kuŵapa chawanangwa ichi. Mwakuyana waka, chifukwa chakuti tikumutemwa Yehova, nase tikuŵa ŵakukondwa kugwiliskira ntchito nyengo yithu na nkhongono zithu pakumusopa.

16. Kuyana na Ŵahebere 6:10, kasi Yehova wakuwona wuli ivyo tikumuchitira mwakuti timukondweske?

¹⁶ Ŵapapi ŵachitemwa ŵakukhazga kuti ŵapokerenge chawanangwa chakuyana yayi ku ŵana ŵawo. Ŵakumanya kuti ŵana mbakupambana, ndipo munyake wangafiska kuchita vinthu ivyo mwana munyake wangafiska yayi. Mwakuyana waka, Adada ŵithu ŵakuchanya ŵakumanya ivyo waliyose wa ise wangafiska kuchita. Nyengo zinyake mungachita vinandi kuluska ŵanandi awo mukuŵamanya na kuŵatemwa. Panji mungatondeka  kuchita vinandi nga umo ŵanji ŵakuchitira, chifukwa cha uchekuru, ulwari, panji mulimo wakupwelelera mbumba. Kweni kugongowa yayi. (Gal. 6:4) Yehova waluwenge yayi mulimo winu. Usange mukuchita vyose ivyo mungafiska kweniso na chilato chiwemi, wakondwenge namwe. (Ŵazgani Ŵahebere 6:10.) Yehova wakumanya ivyo vili mu mtima withu. Wakukhumba kuti tikondwenge na kuŵa ŵakukhorwa na ivyo tikumuchitira apo tikumuteŵetera.

17. (a) Usange vikutisuzga kuchita vinthu vinyake vyakukhwaskana na kusopa kwithu, kasi tikwenera kuchita wuli? (b) Kasi mwawovwirika wuli na chimoza cha vinthu ivyo vyalongoreka pa bokosi lakuti “ Vingamovwirani Kuti Muŵe ŵakukondwa Chomene”?

¹⁷ Kasi tingachita wuli usange vikutisuzga kuchita vinthu vinyake ivyo tadumbiskana mu nkhani iyi, nga nkhusambira Baibolo patekha panji kupharazga? Tikwenera kuchita vinthu ivi pafupipafupi, ndipo para tichitenge nthena, tiwonenge kuti vikunozga chomene kweniso tipindurenge chomene. Tingayaniska kusopa kwithu na vyakuchitika vinyake nga nkhuchita maseŵero ghanyake panji kusambira kulizga gitara. Para tingachitanga waka mwa apo na apo, tingakwaniska yayi kusambira vinthu ivi. Kweni kasi vingaŵa wuli usange tingachitanga zuŵa lililose? Pakwamba tingamba kuchita kwa maminiti ghachoko waka, ndipo pamanyuma tingamba kusazgirako nyengo pachokopachoko. Ndipo para tikuwona kuti tikuluta panthazi chifukwa chakuti tikuchita pafupipafupi, mbwenu tiŵenge ŵakunweka kuchita vinthu ivi zuŵa lililose. Mwakuyana waka, ndimoso viliri pakusopa kwithu.

18. Kasi ntchinthu wuli chakuzirwa icho tikwenera kuchita, ndipo chichitikenge ntchivichi para tachita nthena?

¹⁸ Chinthu chakuzirwa chomene icho tingachita pa umoyo withu nkhusopa Yehova na mtima wose. Para tichitenge nthena, tiŵenge ŵakukondwa na ŵakukhorwa, kweniso tiŵenge na chilindizga cha kuzakasopa Yehova kwamuyirayira. (Zinth. 10:22) Pasono tili kale na mtende wa mu mtima chifukwa tikumanya kuti Yehova wakovwira ŵateŵeti ŵake para ŵakusangana na masuzgo. (Yes. 41:9, 10) Ntheura tili na vifukwa vyakupulikikwa vyakuŵira ŵakukondwa apo tikusopa Adada ŵithu ŵachitemwa, awo mbakwenelera ‘kupokera uchindami na ntchindi’ kufuma ku chilengiwa chose.—Chivu. 4:11.