NKHANI YAKUSAMBIRA 22
SUMU 127 Mtundu wa Munthu Uwo Nkhwenera Kuŵa
Ivyo Mungachita Kuti Chibwezi Chinu Chende Makora
“Munthu wakubisika wa mu mtima . . . [ndiwo] ngwakuzirwa chomene”—1 PET. 3:4.
FUNDO YIKURU
Ivyo ŵanthu awo ŵakukhumba kutorana ŵangachita kuti chibwezi chawo chende makora, kweniso umo ŵanji mu mpingo ŵangawovwilirapo.
1-2. Kasi ŵanyake ŵakujipulika wuli para ŵali pa chibwezi?
CHIBWEZI ni nyengo yakukondweska chomene. Para muli pa chibwezi, tikukayika yayi kuti mukukhumba vinthu vimwenderani makora. Nakuti ŵanandi vikuŵayendera makora. Tsion, a mudumbu wa ku Ethiopia, wakuti: “Yimoza mwa nyengo zakukondweska chomene pa umoyo wane, ni iyo ine na mfumu wane tikaŵa pa chibwezi. Tikadumbiskananga nkhani zakuzirwa chomene, ndipo tikaŵangaso na nyengo yakuseka. Nkhaŵa wakukondwa chomene kuwona kuti nasanga munyane uyo wakanitemwanga chomene kweniso naneso nkhamutemwanga chomene.”
2 Ndipouli, Alessio, mubali wa ku Netherlands, wakuti: “Yikaŵa nyengo yakukondweska chomene kumumanya makora muwoli wane apo tikaŵa pa chibwezi, kweni masuzgo nagho ghakaŵangapo.” Mu nkhani iyi, tidumbiskanenge masuzgo ghanyake agho ghangaŵapo kweniso fundo zinyake za mu Baibolo izo zingawovwira awo ŵali pa chibwezi kuti vinthu viŵayendere makora. Tiwonengeso umo ŵanji mu mpingo ŵangawovwilira awo ŵali pa chibwezi.
CHILATO CHA CHIBWEZI
3. Kasi chilato cha kuŵa pa chibwezi ntchakuti wuli? (Zintharika 20:25)
3 Nangauli chibwezi ni nyengo yakukondweska chomene, kweni ni nkhani yakupepuka yayi chifukwa awo ŵali pa chibwezi paumaliro ŵangatorana. Pa zuŵa la ukwati wawo, awo ŵakunjira mu nthengwa ŵakuchita chilapo pamaso pa Yehova kuti ŵatemwanenge na kuchindikana umoyo wawo wose. Pambere tindapange chilapo chilichose, tikwenera kughanaghanirapo dankha mwakupwelelera. (Ŵazgani Zintharika 20:25.) Ndimo viliriso na chilapo cha nthengwa. Chibwezi chikovwira kuti ŵanthu ŵamanyane makora kweniso kuti ŵasankhe vinthu mwamahara. Nyengo zinyake ŵangasankha kutorana, ndipo nyengo zinyakeso ŵangasankha kumazga waka chibwezi. Para chibwezi chamara, chikung’anamura kuti awo ŵakaŵa pa chibwezi mbakutondeka yayi. M’malo mwake, ndikuti ŵafiska chilato icho ŵakambira chibwezi, chifukwa vyaŵawovwira kusankha makora vinthu.
4. Chifukwa wuli tikwenera kuwona chibwezi mwakwenelera?
4 Chifukwa wuli ntchakuzirwa kuwona chibwezi mwakwenelera? Usange awo ŵandanjire mu nthengwa ŵakuwona chibwezi mwakwenelera, viŵawovwirenge kuleka kwamba chibwezi na munthu uyo ŵakumanyirathu kuti ŵangazakatorana nayo yayi. Ndipouli, ni awo ŵandanjire mu nthengwa pera yayi awo ŵakwenera kuwona chibwezi mwakwenelera. Tose tikwenera kuwona chibwezi mwakwenelera. Mwachiyelezgero, ŵanyake ŵakughanaghana kuti usange ŵanthu ŵali pa chibwezi, ŵakwenera kutorana. Kasi kaghanaghaniro aka kakukhwaska wuli Ŵakhristu awo ŵandanjire mu nthengwa? Melissa, mudumbu wambura kutengwa wa ku United States, wakuti: “Ŵakaboni ŵanyake ŵakukhazga kuti usange mubali na mudumbu ŵali pa chibwezi ndikuti mulimose umo vingaŵira, ŵakwenera kutorana. Ivi vikupangiska kuti ŵanyake awo ŵali pa chibwezi ŵaleke kumazga chibwezi chawo nanga vingaŵa kuti vikwenda yayi. Ndipo ŵanyake ŵakusankha kulekerathu waka kuŵa pa chibwezi. Ivi vingapangiska kuti ŵanyake ŵambe kusuzgika maghanoghano.”
MUMANYANI MAKORA MUNYINU
5-6. Kasi awo ŵali pa chibwezi ŵakwenera kuyezgayezga kumanya vichi vyakukhwaskana na munyawo? (1 Petrosi 3:4)
5 Para muli pa chibwezi, ntchivichi chingamovwirani kusankha usange mutoranenge panji yayi? Mumanyani makora munyinu. Mukwenera kuti mukamanyako kale vinyake vyakukhwaskana na munthu uyo pambere mundambe chibwezi. Kweni sono muli na mwaŵi wakumanya “munthu wakubisika wa mu mtima.” (Ŵazgani 1 Petrosi 3:4.) Ivi vikusazgapo kumanya makora umo wakuchitira mwauzimu, wunthu wake, na kaghanaghaniro kake. Para nyengo yajumphapo, mungasanga mazgoro gha mafumbo nga agha: ‘Kasi munthu uyu ngwakwenelera kuti nitorane nayo?’ (Zinth. 31:26, 27, 30; Efe. 5:33; 1 Tim. 5:8) ‘Kasi tizamukhorweskana pa ivyo waliyose wa ise wakukhumba? Kasi tingasulako waka tunthu tuchokotuchoko uto tingakhuŵazgana?’ b (Rom. 3:23) Apo mukumanyana makora, kumbukani kuti: Chakuzirwa chomene ni vinthu ivyo mukuyana yayi, kweni ni umo waliyose wakuchitira kuti wasinthe kuyana na vyakukhumba vya munyake.
6 Kasi ni vinthu wuli vinyake ivyo mukwenera kumanya vyakukhwaskana na munthu uyo muli nayo pa chibwezi? Pambere chitemwa chinu chindagolere, mukwenera kudumbiskana vinthu vyakuzirwa chomene nga ni vilato ivyo munyinu wali navyo. Wuli pakuyowoya za vinthu nga umo munthu waliri muthupi, masuzgo gha vyachuma, panji ivyo vikamuchitikirapo kumasinda ivyo vyakhwaska kaghanaghaniro kake panji nkharo yake? Ni nkhani zose yayi izo mukukhumbikwira mudumbiskane apo chibwezi chikwamba waka. (Yaniskani na Yohane 16:12.) Usange mukuwona kuti mafumbo ghanyake mungazgora dankha yayi pa nyengo iyo, muphalirani munyinu. Ndipouli, para nyengo yajumphapo muzamukhumbikwira kumuphalira munyinu na chilato chakuti wasankhe makora vinthu. Ntheura pa nyengo iyo kuzakamubisira chilichose yayi munyinu.
7. Kasi awo ŵali pa chibwezi ŵangachita wuli kuti ŵamanyane makora? (Wonaniso bokosi lakuti “ Usange Mukukhala Kutali na Kutali.”) (Wonaniso vithuzi.)
7 Kasi mungachita wuli kuti mumanye makora umo munyinu waliri nadi? Nthowa yimoza yiwemi chomene, nkhuyowoyeskana mwakufwatuka kweniso mwaunenesko, kufumba mafumbo na kutegherezgana chomene. (Zinth. 20:5; Yak. 1:19) Panji mungasankha kuchitira lumoza vinthu vinyake kuti muyowoyeskanenge, nga nkhulyera lumoza chakurya, kukatembeya lumoza ku malo uko kuli ŵanthu ŵanandi, na kukapharazgira lumoza. Mungamanyanaso makora usange mukuŵa na nyengo yakuchezgera lumoza na ŵabwezi kweniso ŵachibali ŵinu. Kweniso nozgani vyakuchitika ivyo vingawovwira kuti mumanye umo munyinu wakuchitira vinthu pa vigaŵa vyakupambanapambana kweniso na ŵanthu ŵakupambanapambana. Wonani ivyo Aschwin wa ku Netherlands wakayezga kuchita. Pakuyowoya za chibwezi chake na Alicia, wakuti: “Tikachitanga vinthu vinyake ivyo vikatovwira kuti timanyane makora. Kanandi vikaŵanga vinthu vipusu waka, nga nkhuphikira lumoza chakurya panji kugwilira lumoza ntchito zinyake zapanyumba. Kwizira mu vyakuchitika ivi, tikamanyana ivyo waliyose wakuchita makora kweniso wakutondeka kuchita makora.”
Usange pa chibwezi mukuchitira lumoza vinthu ivyo vingamupani mwaŵi wakuyowoyeskana, ntchakuwonekerathu kuti mbwenu mumanyanenge makora (Wonani ndime 7-8)
8. Kasi awo ŵali pa chibwezi ŵangapindura wuli para ŵakusambira pamoza?
8 Mungamanyanaso makora usange mukusambilira lumoza fundo za mu Baibolo. Para mwazakatorana, muzamukhumbikwira kunozga nyengo yakuchitira kusopa kwa mbumba, mwakuti Chiuta ndiyo wamulongozganinge mu nthengwa yinu. (Muph. 4:12) Ipo mwalekerachi pasono kunozga ndondomeko yakuti musambilirenge lumoza pa nyengo iyo muli pa chibwezi? Mbunenesko kuti ŵanthu awo ŵali pa chibwezi ni mbumba yayi, ndipo mubali wandaŵe mutu wa mudumbu uyu. Ndipouli, kusambira pamoza nyengo zose, kungawovwira kuti mumanye umo umoyo wauzimu wa waliyose uliri. Max na Laysa, ŵa ku United States, ŵakasangaso phindu linyake chifukwa cha kuchita nthena. Max wakuti: “Tikati taŵa waka pa chibwezi, mwaluŵiro tikamba kusambira lumoza mabuku ghithu pa nkhani zakukhwaskana na chibwezi, nthengwa, na umoyo wamumbumba. Kusambira mabuku agha kukatijulira mwaŵi wakuti tidumbiskane nkhani zakuzirwa izo mphanyi tikadumbiskana yayi patekha.”
VINTHU VINYAKE IVYO MUKWENERA KUGHANAGHANIRAPO
9. Kasi ni vinthu wuli ivyo awo ŵali pa chibwezi ŵakwenera kughanaghanirapo usange ŵakukhumba kusankha awo ŵangaŵaphalira vya chibwezi chawo?
9 Kasi mukwenera kuphalira njani vya chibwezi chinu? Vili kwa imwe kusankha mwekha. Para mwamba waka chibwezi, nyengo zinyake mungasankha kuphalirapo ŵanthu ŵachoko waka. (Zinth. 17:27) Kuchita nthena kungamovwirani kuti mugege kufumbika mafumbo ghanandinandi panji kuchichizgika kusankha chakuchita. Ndipouli, usange mundaphalirepo waliyose, mungamba kujipatura kuti ŵanji ŵaleke kumanya kuti muli pa chibwezi. Kweni kuchita nthena kungaŵa kwakofya chomene. Ntheura ntchamahara kuphalirapo ŵanthu ŵanyake awo ŵangamovwirani panji kumupani ulongozgi uwemi. (Zinth. 15:22) Mwachiyelezgero, mungaphalira ŵanyake ŵamumbumba yinu, ŵabwezi ŵinu awo mbakukhwima, panji ŵalara Ŵachikhristu.
10. Kasi awo ŵali pa chibwezi ŵangachita wuli kuti chibwezi chawo chilutilire kuŵa chakuchindikika? (Zintharika 22:3)
10 Kasi mungachita wuli kuti chibwezi chinu chiŵe chakuchindikika? Apo mukutemwana chomene, mukwamba kumudokera chomene munyinu. Kasi mungachita wuli kuti mugege kuchita chilichose icho chingamukwiyiska Yehova? (1 Kor. 6:18) Gegani kuchezga nkhani zawakawaka, kuŵa kwamwekha, na kumwa chomene moŵa. (Efe. 5:3) Vinthu ivi vingapangiska kuti makhumbiro ghinu ghakugonana ghakure chomene, ndipo paumaliro chingaŵa chakusuzga kuti mujikore na kuchita icho ntchakwenelera. Mwalekerachi kuti nyengo zose mudumbiskanenge ivyo mungachita kuti chibwezi chinu chilutilire kuŵa chakuchindikika? (Ŵazgani Zintharika 22:3.) Wonani ivyo vikawovwira Dawit na Almaz ŵa ku Ethiopia. Iwo ŵakuti: “Tikachezganga ku malo uko kuli ŵanthu ŵanandi panji uko tili lumoza na ŵabwezi ŵithu. Tikakhalangapo yayi kwatekha, kwali ni mu galimoto panji mu nyumba. Ivi vikatovwira kuti tigege kuwira mu chiyezgo.”
11. Kasi ni vinthu wuli ivyo awo ŵali pa chibwezi ŵakwenera kughanaghanirapo para ŵakusankha umo ŵangalongolerana chitemwa?
11 Wuli pa nkhani ya kulongorana chitemwa? Apo chibwezi chinu chikuya munthazi, nthowa zinyake zingaŵa ziwemi waka. Ndipouli, para makhumbiro ghagolera, vingamusuzgani kuti musankhe makora vinthu pa munthu uyo muli nayo pa chibwezi. (Sumu. 1:2; 2:6) Nthowa zinyake zingapangiskaso kuti mutondeke kujikora ndipo paumaliro mungachita vinthu ivyo vingamukwiyiska Yehova. (Zinth. 6:27) Ntheura para mukwamba waka chibwezi, dumbiskanani mphaka iyo mujiŵikirenge pa nkhani ya kulongorana chitemwa, kuyana na fundo za mu Baibolo. c (1 Tes. 4:3-7) Mose mwaŵaŵiri, jifumbani kuti: ‘Kasi uko tikukhala ŵanthu ŵatiwonenge wuli pa umo tikulongolerana chitemwa? Kasi nthowa izi zingawuska makhumbiro ghaheni pakati pa yumoza wa ise?’
12. Kasi awo ŵali pa chibwezi ŵakwenera kumanya vichi pa nkhani ya masuzgo na kupambana maghanoghano pa nyengo iyo ŵali pa chibwezi?
12 Kasi mungamazga wuli masuzgo panji kupambana maghanoghano? Wuli usange mukukhalira waka kwambana nyengo na nyengo? Kasi uwu mbukaboni wakuti mungakakhara lumoza yayi mu nthengwa? Viŵi yayi; chifukwa ŵakutorana wose nyengo zinyake ŵakupambana maghanoghano. Nthengwa yakukhora yikupangika na ŵanthu ŵaŵiri awo ŵakuchindikana ndipo mbakukhumbisiska kumazga masuzgo agho ghangawuka mu nthengwa mwawo. Ntheura umo mukuchitira kuti mumazge masuzgo agho mwasangana nagho pasono, vikuvumbura waka usange nthengwa yinu yizamwendanga makora panji yayi. Mose mwaŵaŵiri, jifumbani kuti: ‘Kasi tikudumbiskana mwakuzika kweniso mwantchindi para tapambana maghanoghano? Kasi tikuzomera mwaluŵiro ivyo tabudiska na kuyezgayezga kusintha? Kasi tikuphepiskana mwaluŵiro, kugowoka, na kusulako ivyo munyithu wabudiska?’ (Efe. 4:31, 32) Ndipouli, para mukukhalira waka kugazgana pa chibwezi, lekani kughanaghana kuti vinthu vizamusintha para mwatorana. Usange mwawona kuti munyinu ngwambura kwenelera kuti mutorane, mungachita makora kumazga waka chibwezi. d
13. Kasi ni vichi vingawovwira awo ŵali pa chibwezi kumanya utali wa nyengo iyo ŵangaŵira pa chibwezi?
13 Kasi mukwenera kukhala nyengo yitali wuli pa chibwezi? Kanandi kuchimbilira kusankha chakuchita pa nkhani yinyake, kukuŵa na masuzgo. (Zinth. 21:5) Ntheura mukwenera kuŵa na nyengo yakukwana yakuŵira pa chibwezi kuti mumumanye makora munyinu. Ndipouli, chibwezi chinu chikwenera kukhaliska chomene yayi kwambura vifukwa vyakupulikikwa. Nakuti Baibolo likuti: “Mtima ukulwara usange icho wakhazganga chindize.” (Zinth. 13:12) Kweniso apo nyengo yikujumphapo muli pa chibwezi, chingamba kuŵa chakusuzga kukanizga makhumbiro gha kugonana. (1 Kor. 7:9) M’malo mwa kughanaghanira waka utali wa nyengo iyo mwakhalira pa chibwezi, jifumbani kuti, ‘Kasi ni vinthu wuli vinyake ivyo nkhweneraso kumanya kuti nimumanye makora munyane pambere nindasankhe chakuchita?’
KASI ŴANJI ŴANGAWOVWIRA WULI AWO ŴALI PA CHIBWEZI?
14. Kasi ŵanji ŵangachita vichi kuti ŵawovwire awo ŵali pa chibwezi? (Wonaniso chithuzi.)
14 Usange tikumanya ŵanyake awo ŵali pa chibwezi, kasi tingaŵawovwira wuli? Tingaŵachema kuti tizakalyere lumoza chakurya, tizakachitire lumoza kusopa kwa mbumba, panji vyakusanguluska. (Rom. 12:13) Vinthu nga ivi, vingawovwira kuti ŵamanyane makora chomene. Kasi ŵakukhumba munthu wakuti waŵalinde, thirasipoti, panji malo ghakuti ŵangadumbiskiranapo vinthu vinyake vyachisisi? Usange ni nthena, kasi tingawovwirapo? (Gal. 6:10) Alicia uyo tamuzunura kukwambilira, wakukumbuka ivyo ŵabali ŵanyake ŵakaŵachitira apo ŵakaŵa pa chibwezi na Aschwin. Iyo wakuti: “Tikakondwanga chomene para ŵabali na ŵadumbu ŵatiphalira kuti tingaluta ku nyumba kwawo usange tikukhumba malo ghakuchezgerako.” Usange mwapempheka kuti mukaŵalinde, wonani kuti ni mwaŵi wakuti namwe muwovwirepo. Lekani kuŵaleka ŵekha ŵaŵiriŵiri, kweniso manyani usange ŵakukhumba nyengo yakudumbiskana vinthu vyachisisi.—Fil. 2:4.
Usange mukumanyapo ŵanyake awo ŵali pa chibwezi, sangani nthowa zakuŵawovwilira (Wonani ndime 14-15)
15. Kasi ŵabwezi ŵangachitaso vichi kuti ŵawovwire awo ŵali pa chibwezi? (Zintharika 12:18)
15 Tingawovwiraso awo ŵali pa chibwezi kwizira mu ivyo tikuchita na kuyowoya. Nyengo zinyake tingakhumbikwira kujikora mu kayowoyero. (Ŵazgani Zintharika 12:18.) Mwachiyelezgero, tingaŵa ŵakukhumbisiska kuphalira ŵanji kuti mubali na mudumbu ŵali pa chibwezi, kweni ŵeneko ŵangaŵa kuti ŵakukhumba ŵaŵaphalire ŵekha. Tikwenera yayi kusesa awo ŵali pa chibwezi panji kuŵasuska pa ivyo ŵenecho ŵasankha. (Zinth. 20:19; Rom. 14:10; 1 Tes. 4:11) Kweniso awo ŵali pa chibwezi ŵangatemwa yayi kuti tiyowoyenge panji kuŵafumba mafumbo agho ghangaŵapangiska kuchichizgika kunjira mu nthengwa. Mudumbu munyake zina lake Elise na mfumu wake, ŵakuti, “Soni zikatikoranga usange ŵanji ŵakutifumba vyakukhwaskana na ukwati withu apo ise taŵenecho tikaŵa kuti tindadumbiskanepo.”
16. Kasi tikwenera kuchita wuli para awo ŵali pa chibwezi ŵasankha kumazga chibwezi chawo?
16 Wuli usange awo ŵali pa chibwezi ŵasankha kuti ŵamazge chibwezi chawo? Tikwenera kugega kunjilirapo panji kukhozgera yumoza wawo. (1 Pet. 4:15) Mudumbu munyake zina lake Lea wakuti: “Nkhapulika kuti ŵanyake ŵakathandazganga vyakukhwaskana na vifukwa ivyo tikamazgira chibwezi chithu. Vikaniŵinya chomene.” Nga umo tayowoyera kale, para chibwezi chamara ndikuti awo ŵakaŵa pa chibwezi ŵatondeka yayi kusankha makora vinthu. Kanandi vikung’anamura kuti ŵafiska chilato icho ŵakambira chibwezi, chifukwa vyaŵawovwira kusankha makora vinthu. Ndipouli, ivi vingapangiska kuti ŵaŵe na chitima kweniso kuŵa na phukwa. Ntheura tingapenjerezga nthowa za umo tingaŵawovwilira.—Zinth. 17:17.
17. Kasi awo ŵali pa chibwezi ŵakwenera kulutilira kuchita vichi?
17 Nga umo tawonera, chibwezi chingaŵa na masuzgo ghake, kweni yingaŵaso nyengo yakukondweska chomene. Jessica wakuti: “Kuyowoya unenesko, kuŵa pa chibwezi ni nkhani yamaseŵera yayi. Kweni chakukondweska ntchakuti nyengo iyi yikatovwira kuti timanyane makora.” Usange muli pa chibwezi, lutilirani kuchitira lumoza vinthu kuti mumanyane makora. Para mwachita nthena, chibwezi chinu chendenge makora ndipo paumaliro mose muzamusankha makora vinthu.
SUMU 49 Kukondweska Mtima wa Yehova
a Mazina ghanyake ghasinthika.
b Kuti muwone mafumbo ghanyake agho mungajifumba, wonani buku la Mayankho a Zimene Achinyamata Amafunsa, Buku Lachiwiri, peji 39-40.
c Kuseŵereska viŵaro vyakubisika vya munthu uyo ni mfumu panji muwoli wako yayi, ni mtundu unyake wa uzaghali, ndipo awo ŵakuchita ivi ŵangakhumbikwira kovwirika panji kuti kweruzgika na ŵalara. Kukasakasa mabere na kudumbiskana vinthu vya kugonana kwali mpha meseji panji pa foni, nakoso kungakhumbikwira kovwirika panji kuti kweruzgika na ŵalara kuyana na umo vinthu viliri.
d Kuti mumanye vinandi, wonani nkhani yakuti “Mafunso Ochokera kwa Oŵerenga” mu Gongwe la Mulinda la Chicheŵa la Ogasiti 15, 1999.
