CHIPULIKANO ntchankhongono chomene. Mwachiyelezgero, nangauli Satana wakukhumba kunanga ubwezi withu na Yehova, kweni chipulikano chikutovwira kuzimwa “mivi yose yakugolera ya muheni.” (Efe. 6:16) Para tili na chipulikano, tingazizipizga masuzgo agho ghali nga ni mapiri. Yesu wakaphalira ŵasambiri ŵake kuti: “Usange mungaŵa na chipulikano ukuru nga ni njere ya sinapi, muyowoyenge ku phiri ili, ‘Wukapo pano luta para,’ liwukengepo.” (Mat. 17:20) Pakuti tikumanya kuti chipulikano chingatovwira kukhozga ubwezi withu na Yehova, tingachita makora kughanaghanirapo mafumbo agha: Kasi chipulikano ntchivichi? Kasi mtima withu ungananga wuli chipulikano chithu? Kasi tingakhozga wuli chipulikano chithu? Ndipo kasi tikwenera kuŵa na chipulikano mwa njani?—Rom. 4:3.

Chipulikano chikung’anamura vinandi padera pa kugomezga waka ivyo Baibolo likuyowoya, chifukwa nanga ni “viŵanda navyo vikugomezga [kuti Chiuta waliko] ndipo vikutenthema.” (Yak. 2:19) Ipo kasi chipulikano ntchivichi?

Baibolo likulongosora chipulikano mu vigaŵa viŵiri. Chakwamba, “chipulikano ntchilindizga chanadi cha vinthu ivyo tikugomezga.” (Heb. 11:1a) Para muli na chipulikano, mukugomezga kuti vyose ivyo Yehova wakuyowoya ni vyaunenesko ndipo vizamufiskika. Mwachiyelezgero, Yehova wakaphalira Ŵaisrayeli kuti: “Usange mungaswa phangano lane lakuyowoya vya muhanya na phangano lane lakuyowoya vya usiku, kutondeska muhanya na usiku kwiza pa nyengo yake yakwenelera, apo ndipo ningaswa phangano ilo nili kuchita na muteŵeti wane Davide.” (Yer. 33:20, 21) Kasi muli kuwopapo kuti nyengo yinyake kuzamuŵavya muhanya panji usiku chifukwa chakuti zuŵa lizamutondeka kufuma panji kunjira? Para mukuleka kukayikira malango gha chilengiwa agho ghakovwira kuti kuŵenge muhanya na usiku, ipo mukwenera kugomezgaso kuti Mlengi uyo wakavipa malango vinthu ivi wazamufiska ivyo wali kulayizga.—Yes. 55:10, 11; Mat. 5:18.

Chachiŵiri, chipulikano ni “ukaboni wakukhorweska wa vinthu vyenecho ivyo ni vyambura kuwoneka.” Chipulikano chikuyowoyeka kuti ni “ukaboni wakuwoneka,” panji “ukaboni wakukhorweska” wa vinthu vyambura kuwoneka na maso kweni vyanadi. (Heb. 11:1b; mazgu ghamusi) Munthowa wuli? Tiyelezgere mwana wakumufumbani kuti, ‘Kasi mukumanya wuli kuti mphepo yiliko?’ Nangauli mphepo mundayiwonepo, kweni mungamuphalira vinthu ivyo vikulongora kuti mphepo yiliko, nga nkhuthuta, kuputa, na vinyake vyantheura. Para mwana wakhorwa na maukaboni agha, wangagomezga kuti vinthu ivyo wakuviwona yayi na maso viliko nadi. Mwakuyana waka, chipulikano chikujintha pa ukaboni wenecho.—Rom. 1:20.

Pakuti chipulikano chikujintha pa ukaboni, ntheura kuti munthu waŵe na chipulikano wakwenera kumanya “makora unenesko.” (1 Tim. 2:4) Kweni ntchakukwana yayi kumanya waka unenesko. Mpositole Paulosi wakalemba kuti: “Munthu wakuŵa na chipulikano mu mtima.” (Rom. 10:10) Munthu wakwenera kumanya waka unenesko yayi kweni wakweneraso kuwuwona kuti ngwakuzirwa. Para wachita nthena ndipo wangaŵa na chipulikano, icho chikung’anamura kuti wachitenge vinthu  ivyo vikukolerana na unenesko uwo wasambira. (Yak. 2:20) Munthu uyo wakuzirwiska yayi unenesko, wangakana ukaboni wakukhorweska chifukwa chakuti wakukhumba yayi kusintha vigomezgo vyake, panji chifukwa chakuti wakukhumba kuti wachitenge makhumbiro ghake ghathupi. (2 Pet. 3:3, 4; Yuda 18) Lekani mu nyengo yakale, ni wose yayi awo ŵakawona minthondwe ŵakaŵa na chipulikano. (Maŵa. 14:11; Yoh. 12:37) Mzimu utuŵa wa Chiuta ukovwira ŵanthu ŵekha awo ŵakutemwa unenesko kuti ŵaŵe na chipulikano.—Gal. 5:22; 2 Tes. 2:10, 11.

Themba Davide wakaŵa yumoza wa ŵanthu awo ŵakaŵa na chipulikano chakukhora chomene. (Heb. 11:32, 33) Ndipouli, ni wose yayi ŵamumbumba yakwake awo ŵakaŵa na chipulikano chakukhora. Mwachiyelezgero, pa nyengo yinyake Eliyabu, mukuru wake mulara, wakalongora kuti wakaŵavya chipulikano apo wakakwiyira Davide chifukwa cha kulimbana na Goliyati. (1 Sam. 17:26-28) Palije munthu uyo wakubabika na chipulikano panji kuchita kuhara ku ŵapapi ŵake, ntheura Davide wakaŵa na chipulikano chifukwa cha kuŵa paubwezi na Chiuta.

Mu Salimo 27, Davide wakuyowoya vinthu ivyo vikamovwira kuti waŵe na chipulikano chakukhora. (Vesi 1) Davide wakaghanaghanirangapo ivyo vikamuchitikirapo kumanyuma na umo Yehova wakamovwilira kuthereska ŵalwani ŵake. (Mavesi 2, 3) Wakatemwanga chomene chihema cha Yehova. (Vesi 4) Davide wakasopanga Chiuta pamoza na ŵateŵeti ŵanyake pa chihema. (Vesi 6) Wakafwilirapo kulomba kwa Yehova. (Mavesi 7, 8) Kweniso Davide wakakhumbanga kusambizgika munthowa ya Chiuta. (Vesi 11) Ntheura chipulikano chikaŵa chakuzirwa chomene kwa Davide lekani wakafumba kuti: “Kasi mphanyi nili nkhu niŵavyenge chipulikano?”—Vesi 13.

Mungaŵa na chipulikano nga ntcha Davide para mungayezga ivyo Davide wakachita ivyo vikulongosoreka mu Salimo 27. Pakuti chipulikano chikujintha pa kumanya makora unenesko, ntheura para tikuŵazga chomene Mazgu gha Chiuta na mabuku ghakulongosora Baibolo, chiŵenge chipusu kuti tiŵe na chipulikano icho ntchipambi cha mzimu wa Chiuta. (Sal. 1:2, 3) Mughanaghanirengepo para mukusambira. Para tikughanaghanirapo pa ivyo tikusambira, timuwongenge chomene Yehova. Usange mukumuwonga chomene Yehova, mutemwenge chomene kuwungana na kupharazgira ŵanji chifukwa mukukhumba kulongora kuti muli na chipulikano mwa iyo. (Heb. 10:23-25) Kweniso, tikulongora kuti tili na chipulikano para tikulutilira ‘kulomba kwambura kuleka.’ (Luka 18:1-8) Ntheura “nyengo zose mulombenge” kwa Yehova na kugomezga kuti “wakumupwelelerani.” (1 Tes. 5:17; 1 Pet. 5:7) Chipulikano chikutovwira kuti tichite icho ntchiwemi, ndipo para tikuchita icho ntchiwemi, chipulikano chithu chikukhora.—Yak. 2:22.

Pa usiku wakuti machero wafwenge, Yesu wakaphalira ŵasambiri ŵake kuti: “Muŵe na chipulikano mwa Chiuta, muŵeso na chipulikano  mwa ine.” (Yoh. 14:1) Ntheura tikwenera kuŵa na chipulikano mwa Yehova na Yesu. Kasi mungalongora wuli chipulikano mwa Yesu? Tiyeni tiwone nthowa zitatu.

Yakwamba, muwonenge sembe yakuwombora kuti ntchawanangwa icho Chiuta wali kumupani pamwekha. Mpositole Paulosi wakati: “Nkhukhalira chipulikano icho chili mwa Mwana wa Chiuta, uyo wakanitemwa ndipo wakajipeleka chifukwa cha ine.” (Gal. 2:20) Para muli na chipulikano mwa Yesu, mukulongora kuti sembe yakuwombora yikumovwirani kuti zakwananga zinu zigowokereke, muŵe na chigomezgo cha umoyo wamuyirayira, kweniso mbukaboni ukuru wakuti Chiuta wakumutemwani. (Rom. 8:32, 38, 39; Efe. 1:7) Para mukugomezga nadi kuti sembe yakuwombora yingamovwirani, mujipenge mulandu yayi.—2 Tes. 2:16, 17.

Chachiŵiri, sendelerani kwa Yehova mu lurombo kwizira mu sembe ya Yesu. Chifukwa cha sembe yakuwombora, tingalomba kwa Yehova “na wanangwa wa kuyowoya, [kuti] tisendelere ku chitengo cha uyo wali na lusungu lukuru mwakuti tipokere lusungu na kusanga lusungu lukuru kuti vitovwire pa nyengo yakwenelera.” (Heb. 4:15, 16; 10:19-22) Lurombo lukutovwira kuti tiŵikepo mtima kuleka kuthera para tikuyezgeka.—Luka 22:40.

Chachitatu, pulikirani Yesu. Mpositole Yohane wakalemba kuti: “Uyo wakupulikana mwa Mwana wali na umoyo wamuyirayira. Uyo wakuleka kupulikira Mwana wazamuwona umoyo chara, kweni ukali wa Chiuta ukukhalilira pa iyo.” (Yoh. 3:36) Wonani kuti Yohane wakayaniska kuŵa na chipulikano na kuleka kupulikira. Ntheura mukuŵa na chipulikano mwa Yesu para mukumupulikira. Mukulongora kuti mukupulikira Yesu para mukulondezga “dango la Khristu,” ilo ni vyose ivyo wakasambizga. (Gal. 6:2) Mukulongoraso kuti mukupulikira Yesu para mukulondezga ulongozgi uwo wakupeleka kwizira mwa “muzga wakugomezgeka na wavinjeru.” (Mat. 24:45) Para mukupulikira Yesu, muzamuŵa na nkhongono zakuzizipizgira masuzgo agho ghali nga ntchimphepo.—Luka 6:47, 48.

Nyengo yinyake, mwanalume munyake wakachemerezga kwa Yesu kuti: “Nili nacho chipulikano! Novwirani apo nkhupeleŵera chipulikano!” (Mrk. 9:24) Wakaŵako nacho chipulikano, kweni mwanalume uyu wakaŵa wakujiyuyura ndipo wakamanya kuti wakakhumbikwiranga chipulikano chakusazgikira. Nga ni mwanalume uyu, tose panyengo yinyake tizamukhumbikwira kuŵa na chipulikano chikuru. Ndipo tose tingakhozga chipulikano chithu sono. Nga umo tawonera, tikukhozga chipulikano chithu para tikusambira Mazgu gha Chiuta na kughanaghanirapo, ndipo ivi vitovwirenge kuti timuwongenge chomene Yehova. Chipulikano chithu chikurengeso para ise pamoza na Ŵakhristu ŵanyithu tikusopa Yehova, tikuphalirako ŵanyithu chigomezgo chithu, na para tikukosera mu lurombo. Nakuti para tikukhozga chipulikano chithu, tikutumbikika chomene. Mazgu gha Chiuta ghakutichiska kuti: ‘Ŵakutemweka, jizengani pa chipulikano chinu chituŵa nkhanira . . . mwakuti mujisungilire mu chitemwa cha Chiuta.’—Yuda 20, 21.