NKHANI YAKUSAMBIRA 33
Chiwuka Chikulongora Kuti Chiuta Ngwachitemwa, Ngwavinjeru, Kweniso Ngwakuzikira
“Kuzamuŵa chiwuka.”—MIL. 24:15.
SUMU 151 Wazamuchema
CHILATO CHA NKHANI IYI *
1. Chifukwa wuli Yehova wakamba kulenga vinthu?
NYENGO yinyake Yehova wakaŵa yekha. Kweni wakachitanga phukwa yayi. Iyo wakuthemba munthu yayi kuti waŵe wakukondwa. Kweni wakakhumbanga waka kuti ŵanji nawo ŵaŵe na umoyo. Chitemwa ndicho chikamutuma kuti wambe kulenga vinthu.—Sal. 36:9; 1 Yoh. 4:19.
2. Kasi Yesu na ŵangelo ŵakajipulika wuli ŵati ŵawona vinthu ivyo Yehova wakalenga?
2 Chakwamba, Yehova wakalenga Mwana wake, Yesu. Pamanyuma, ‘wakalenga vinthu vinyake vyose’ kwizira mwa iyo, kusazgapo ŵangelo mamiliyoni ghanandi. (Kol. 1:16) Yesu wakaŵa wakukondwa chomene kugwira ntchito na Awiske. (Zinth. 8:30) Ŵangelo nawo ŵakaŵa ŵakukondwa. Ŵakawonanga apo Yehova na Misiri wake, Yesu, ŵakalenganga kuchanya na charu chapasi. Kasi ŵangelo ŵakachita wuli? Ŵakamba ‘kuchemerezga pamoza mwachimwemwe’ ŵati ŵawona kuti charu chalengeka, ndipo tikukayika yayi kuti ŵakalutilira kulumba Yehova ŵati ŵawona vyose ivyo wakalenga, chomenechomene munthu. (Yobu 38:7; Zinth. 8:31; mazgu ghamusi) Chilengiwa chilichose chikuvumbura kuti Yehova ngwachitemwa kweniso ngwavinjeru.—Sal. 104:24; Rom. 1:20.
3. Kuyana na 1 Ŵakorinte 15:21, 22, kasi sembe ya Yesu yili kupeleka mwaŵi wuli?
3 Yehova wakakhumbanga kuti ŵanthu ŵakhale kwamuyirayira mu charu chakutowa icho wakalenga. Kweni Adamu na Eva ŵati ŵagalukira Yehova, kwananga na nyifwa vikanjira pa charu chapasi. (Rom. 5:12) Kasi Yehova wakachita wuli? Mwaluŵiro, wakayowoya ivyo wachitenge kuti wawombore ŵanthu. (Gen. 3:15) Yehova wakanozga kuti wapelekenge Mwana wake, Yesu, kuŵa sembe yakuwombora mwakuti ŵana ŵa Adamu na Eva ŵafwatuke ku kwananga na nyifwa. Ndipo pamanyuma wakapeleka mwaŵi kwa munthu waliyose kusankha kumuteŵetera panji yayi. Kweni awo ŵasankha kumuteŵetera wazamuŵapa umoyo wamuyirayira.—Yoh. 3:16; Rom. 6:23; ŵazgani 1 Ŵakorinte 15:21, 22.
4. Kasi tidumbiskanenge mafumbo wuli mu nkhani iyi?
4 Pali mafumbo ghanandi agho tingajifumba pa nkhani ya chiwuka. Mwachiyelezgero, kasi chiwuka chikwenera kuti chizamuchitika wuli? Kasi tizamuŵamanya ŵakutemweka ŵithu para ŵazakawuskika? Kasi chiwuka chizamutipangiska wuli kuŵa ŵakukondwa? Ndipo kasi chiwuka chikutisambizga vichi vya chitemwa cha Yehova, vinjeru, na kuzikira kwake? Tiyeni sono tidumbiskane mafumbo agha.
KASI CHIWUKA CHIKWENERA KUTI CHIZAMUCHITIKA WULI?
5. Chifukwa wuli tikukhazga kuti ŵanthu ŵazamuwuskika nyengo yimoza yayi?
5 Para Yehova wakuzakawuska ŵanthu mamiliyoni ghanandi kwizira mwa Mwana wake, tileke kukhazga kuti wose ŵazamuwuka nyengo yimoza. Chifukwa wuli? Chifukwa ntchakuti para pa charu chapasi pangaŵa ŵanthu ŵanandi pa nyengo yimoza, mbwenu paŵenge chipwirikiti. Yehova wakuchita vinthu mwandondomeko. Wakumanya kuti vinthu vikwenera kuchitika mwandondomeko kuti ŵanthu ŵakhale mwamtende. (1 Kor. 14:33) Yehova Chiuta wakachita vinthu mwavinjeru kweniso mwakuzikira apo wakagwiranga ntchito na Yesu pakulenga charu chapasi pambere wandalenge ŵanthu. Mwakuyana waka, Yesu nayo wazamulongora mikhaliro iyi mu vyaka 1,000 vya muwuso wake apo wazamugwira ntchito pamoza na awo ŵazamupona pa Aramagedoni. Ntchito iyi yizamuŵa yakunozga charu na kupokelera awo ŵali kufwa.
Awo ŵazamupona pa Aramagedoni, ŵazamusambizga ŵanthu awo ŵazamuwuskika vinthu vyakukhwaskana na Ufumu wa Chiuta kweniso ivyo Yehova wakukhumba (Wonani ndime 6) *
6. Kuyana na Milimo 24:15, kasi mbanjani ŵanyake awo ŵazamuwuskika na Yehova?
6 Chakuzirwa chomene kuluska vyose ntchakuti ŵanthu awo ŵazamupona pa Aramagedoni ŵazamukhumbikwira kuti ŵasambizge ŵanthu awo ŵazamuwuskika vinthu vyakukhwaskana na Ufumu wa Chiuta kweniso ivyo Yehova wakukhumba. Chifukwa wuli? Chifukwa ntchakuti ŵanthu ŵanandi awo ŵazamuwuskika ŵali mu gulu la ŵanthu “ŵambura urunji.” (Ŵazgani Milimo 24:15.) Kuti ŵapindure na sembe ya Khristu, ŵanthu aŵa ŵazamukhumbikwira kusintha nkharo zawo. Pazamuŵa ntchito yikuru chomene yakusambizga ŵanthu mamiliyoni ghanandi awo ŵakumanya chilichose yayi chakukhwaskana na Yehova. Kasi munthu waliyose wazamuŵa na msambizgi wake nga umo tikuchitira mazuŵa ghano pakusambizga ŵanthu Baibolo? Kasi awo ŵasambizgika ŵazamugaŵirika mipingo kuti ŵasambizgike umo nawo ŵangawovwilira ŵanyawo awo ŵazamuwuskika pamanyuma pa iwo? Pa nkhani iyi, tiyeni tilindilire. Kweni icho tikumanya ntchakuti paumaliro wa vyaka 1,000, “charu chapasi chizamuzura na kumanya Yehova.” (Yes. 11:9) Tizamuŵa na ntchito yakukondweska chomene mu nyengo ya vyaka 1,000.
7. Chifukwa wuli ŵanthu ŵa Chiuta ŵazamuŵa na lusungu apo ŵakusambizga awo ŵazamuwuskika?
7 Mu nyengo ya vyaka 1,000, ŵanthu wose ŵa Yehova ŵazamukhumbikwira kuti ŵalutilire kusintha kuti ŵakondweske Yehova. Pa chifukwa ichi ŵazamuŵa na lusungu pakovwira awo ŵazamuwuskika kuti ŵasinthe nkharo zawo ziheni mwakuti ŵakolerane na malango gha Yehova. (1 Pet. 3:8) Tikukayika yayi kuti awo ŵazamuwuskika ŵazamukolerana na ŵanthu ŵa Yehova awo mbakujiyuyura, awo nawo ŵazamuŵa kuti ŵakulutilira kusintha kuti ‘ŵasange chiponosko.’—Fil. 2:12.
KASI TIZAMUŴAMANYA AWO ŴAZAMUWUSKIKA?
8. Chifukwa wuli tikukhazga kuti tizamuŵamanya ŵamumbumba yithu na ŵabwezi ŵithu awo ŵazamuwuskika?
8 Pali vifukwa vinandi ivyo tingagomezgera kuti awo ŵazamupokelera awo ŵawuskika ŵazamuŵamanya ŵakutemweka ŵawo. Mwachiyelezgero, para tikuwona umo Yehova wakawuskirapo ŵanthu mu nyengo yakale, tikugomezga kuti wazamuŵalengaso kuti ŵawonekenge, kuyowoya, na kughanaghana nga umo ŵakaŵira pambere ŵandafwe. Kumbukani kuti Yesu wakayaniska nyifwa na tulo ndipo chiwuka wakachiyaniska na kuwuka mu tulo. (Mat. 9:18, 24; Yoh. 11:11-13) Para munthu wawuka mu tulo, wakuwoneka na kuyowoya nga umo wanguŵira pambere wandagone kweniso wakukumbukira ivyo waghanaghananga pambere wandalute kukagona. Mwachiyelezgero, ghanaghanirani vya Lazaro. Wakafwa kwa mazuŵa ghanayi, ndipo thupi lake likaŵa kuti lamba kuvunda. Kweni Yesu wati wamuwuska, ŵadumbu wake nyengo yeneyiyo wakamumanya, ndipo ntchakuwonekerathu kuti Lazaro nayo wakaŵamanya.—Yoh. 11:38-44; 12:1, 2.
9. Chifukwa wuli awo ŵali kufwa ŵazamuwuskika ŵambura kufikapo?
9 Yehova wali kulayizga kuti mu Paradiso, palije uyo wazamuti: “Nalwara.” (Yes. 33:24; Rom. 6:7) Ntheura awo ŵazamuwuskika ŵazamuŵa na mathupi ghawemi. Kweni kuti ŵazamuzgoka ŵakufikapo nyengo yeneyiyo yayi. Para vingaŵa nthena, ŵamumbumba na ŵabwezi ŵawo ŵangazakaŵamanya yayi. Vikuwoneka kuti ŵanthu wose ŵazamusinthanga pachokopachoko kuti ŵazakaŵe ŵakufikapo mu nyengo ya vyaka 1,000. Para vyaka 1,000 vyamara, ndipo Yesu wazamuwezgera Ufumu kwa Awiske. Panyengo iyi Ufumu uzamuŵa kuti wachita vyose ivyo Yehova wakakhumbanga, kusazgapo kuti ŵanthu ŵaŵe ŵakufikapo.—1 Kor. 15:24-28; Chivu. 20:1-3.
KASI CHIWUKA CHIZAMUTIPANGISKA WULI KUŴA ŴAKUKONDWA?
10. Kasi chiwuka chizamumupangiskani kuti mujipulike wuli?
10 Ghanaghanirani umo vizamuŵira kupokeleraso ŵakutemweka ŵithu. Kasi muzamuseka panji kulira chifukwa cha chimwemwe icho muzamuŵa nacho? Kasi muzamuŵa ŵakukondwa chomene mwakuti muzamwimba sumu zakulumba Yehova? Kweni icho tingasimikizga ntchakuti tizamuŵa na chitemwa chikuru pa Adada ŵithu ŵachitemwa a Yehova, na Mwana wawo, Yesu, chifukwa chakupangiska kuti kuŵe chiwuka.
11. Kuyana na mazgu gha Yesu gha pa Yohane 5:28, 29, kasi ntchivichi chizamuchitikira awo ŵakupulikira Chiuta?
11 Ghanaghanirani chimwemwe icho ŵazamuŵa nacho awo ŵazamuwuskika apo ŵakuvura wunthu wawo wakale na kulondezga fundo za Chiuta. Awo ŵazamusintha ŵazamukhala kwamuyirayira mu Paradiso. Kweni Yehova wazamuzomerezga yayi awo ŵatondeka kusintha kuti ŵalutilire kuŵa na umoyo mu Paradiso na kutimbanizga mtende.—Yes. 65:20; ŵazgani Yohane 5:28, 29.
12. Kasi awo ŵazamukhala pa charu chapasi ŵazamutumbikika wuli?
12 Mu Ufumu wa Chiuta, ŵanthu ŵa Chiuta wose ŵazamuwona mazgu gha pa Zintharika 10:22 kuti ngaunenesko nadi. Pa lemba ili, pali mazgu ghakuti: “Thumbiko la Yehova ndilo likusambazga munthu, ndipo wakusazgako vyakuŵinya yayi.” Na wovwiri wa mzimu utuŵa wa Yehova, ŵanthu ŵa Chiuta ŵazamulutilira kusintha kuti ŵaŵe nga ni Khristu kweniso kufika pa urunji. (Yoh. 13:15-17; Efe. 4:23, 24) Kweniso zuŵa lililose mathupi ghawo ghazamulutilira kuŵa ghankhongono, ndipo ŵazamuŵa ŵanthu ŵawemi. Umoyo uzamuŵa wakukondweska chomene. (Yobu 33:25) Kweni kasi kughanaghanirapo nkhani ya chiwuka kungamovwirani wuli sono?
WONGERANI CHITEMWA CHA YEHOVA
13. Kuyana na Salimo 139:1-4, kasi chiwuka chizamulongora wuli kuti Yehova wakutimanya makora?
13 Nga umo tadumbiskirana kale, para Yehova wazakaŵawuska ŵanthu, ŵazamuŵa na maghanoghano na wunthu uwo ŵakaŵa nawo pakwamba. Fundo iyi yikutisambizga kuti Yehova wakutitemwa chomene mwakuti wakumanya na kukumbuka vyose ivyo tikughanaghana, umo tikujipulikira, kweniso ivyo tikuyowoya na kuchita. Ntheura apo wazamutiwuska, vizamumusuzga yayi kuwezgerapo umo tikaŵira pakwamba. Themba Davide likamanyanga kuti Yehova wakumanya waliyose wa ise. (Ŵazgani Salimo 139:1-4.) Kasi mukujipulika wuli pakuti Yehova wakutimanya makora?
14. Kasi tikwenera kujipulika wuli para tikughanaghanira kuti Yehova wakutimanya makora?
14 Tikwenera kufipa mtima yayi apo tikughanaghanirapo kuti Yehova wakutimanya makora. Chifukwa wuli? Kumbukani kuti Yehova wakutipwelelera. Tose wakutiwona kuti tili ŵakuzirwa. Wakukumbuka vyose ivyo tikukumana navyo pa umoyo withu. Fundo iyi njakupembuzga chomene. Tileke kujiwona kuti tili tekha. Zuŵa lililose Yehova wakuŵa nase ndipo wakukhumba kutovwira.—2 Mid. 16:9.
IVYO TIKUSAMBIRA PA NKHANI YA VINJERU VYA YEHOVA
15. Kasi chiwuka chikulongora wuli kuti Yehova ngwavinjeru?
15 Para ŵanthu ŵakopa nyifwa, kanandi ŵalwani ŵawo ŵangaŵapangiska kuchita vinthu ivyo ŵatenge ŵachitenge yayi usange ŵalekenge kofyeka kuti ŵakomekenge. Ŵanthu awo ŵakuwusika na Satana ŵakugwiliskira ntchito nthowa iyi kuti ŵachichizge ŵanthu kuti ŵagalukire ŵanyawo panji kuchita chinthu icho chikususkana na fundo za mu Baibolo. Kweni ise ŵangatipangiska yayi kuchita nthena. Tikumanya kuti para ŵalwani ŵithu ŵatikoma, Yehova wazamutiwuska. (Chivu. 2:10) Tili ŵakukhorwa kuti palije icho chingatipatuska kwa Yehova. (Rom. 8:35-39) Yehova walongora kuti ngwavinjeru chomene pakutipa chigomezgo cha chiwuka. Pa chifukwa ichi, tikopa yayi para ŵalwani ŵithu ŵatofya kuti ŵatikomenge usange tatondeka kuchita ivyo ŵakukhumba. Kweniso ivi vikutipa chikanga kuti tilutilire kugomezgeka kwa Yehova.
Kasi ivyo mukusankha vikulongora kuti mukugomezga layizgo la Yehova lakuti wamupaninge ivyo mukukhumbikwira? (Wonani ndime 16) *
16. Kasi ni mafumbo wuli agho mukwenera kujifumba, ndipo mazgoro gha mafumbo agha ghangamovwirani kumanya vichi?
16 Para ŵalwani ŵa Yehova ŵamofyani kuti ŵamukomaninge, kasi mugomezgenge kuti Yehova wazamumuwuskani? Kasi mungamanya wuli kuti muzamumugomezga Yehova pa nyengo iyi? Nthowa yimoza iyo mungamanyira nkhujifumba kuti, ‘Kasi vyakusankha vichokovichoko ivyo nkhupanga zuŵa lililose vikulongora kuti nkhugomezga Yehova?’ (Luka 16:10) Fumbo linyake lingaŵa lakuti, ‘Kasi ivyo nkhuchita pa umoyo wane vikulongora kuti nkhugomezga layizgo la Yehova lakuti wanipenge ivyo nkhusoŵerwa para nkhudangizga Ufumu wake?’ (Mat. 6:31-33) Usange zgoro ndakuti enya, mbwenu mukulongora kuti mukugomezga Yehova, ndipo ndimwe ŵakunozgeka kulimbana na suzgo lililose ilo musanganenge nalo munthazi.—Zinth. 3:5, 6.
WONGANI KUZIKIRA KWA YEHOVA
17. (a) Kasi chiwuka chikulongora wuli kuti Yehova ngwakuzikira? (b) Kasi tingalongora wuli kuwonga chifukwa chakuti Yehova ngwakuzikira?
17 Yehova wali kunozga kale nyengo iyo wazamuparanyira charu chiheni ichi. (Mat. 24:36) Walutilirenge kuzikira m’paka nyengo iyo yikwane dankha. Iyo ngwakukhumbisiska chomene kuwuska ŵakufwa, kweni wakulutilira kuzikira. (Yobu 14:14, 15) Wakulindilira kuti nyengo yakwimikika yikwane kuti wazakawuske ŵakufwa. (Yoh. 5:28) Tili na vifukwa vinandi vyakuwongera Yehova chifukwa cha kuzikira. Ghanaghanirani fundo iyi: Chifukwa chakuti Yehova wazikira, ŵanthu ŵanandi kusazgapo ise, taŵa na mwaŵi wakuti ‘ting’anamuke mtima.’ (2 Pet. 3:9) Yehova wakukhumba kuti ŵanthu ŵanandi ŵawe na mwaŵi wa kuzakasanga umoyo wamuyirayira. Ntheura tiyeni tilongorenge kuti tikuwonga kuzikira kwake. Kasi tingalongora wuli? Para taŵikapo mtima kupenja awo ŵali na “maghanoghano ghakwenelera umoyo wamuyirayira” na kuŵawovwira kuti ŵatemwenge Yehova na kumuteŵetera. (Mil. 13:48) Para tachita nthena nawo ŵasangenge chandulo na kuzikira kwa Yehova nga umo viliri na ise.
18. Chifukwa wuli tikwenera kuzikira nawo ŵanyithu?
18 Yehova wazamuzikira nase m’paka paumaliro wa vyaka 1,000 kuti tizakaŵe ŵakufikapo. Para vyaka ivi vyazakamara ndipo wazamutigowokera zakwananga zithu. Ntheura nase tikwenera kuwona viwemi mu ŵanyithu na kuzikira nawo. Wonani ivyo wakachita mudumbu munyake uyo mfumu wake wakamba kusuzgika chomene maghanoghano ndipo wakaleka kuwungana. Iyo wakuti: “Chikaŵa chakusuzga chomene kwa ine. Vinthu vikasintha mwamabuchi, ndipo tikatondekanga kuchita vinthu ivyo tikakhumbanga kuchita.” Nangauli vikaŵa nthena, kweni mudumbu uyu wakalutilira kuzikira nayo mfumu wake. Wakathemba Yehova, ndipo wakawelera nyuma yayi. Nga ni Yehova, wakawonangamo viwemi mwa mfumu wake. Mudumbu uyu wakuti: “Mfumu wane wali na mikhaliro yiwemi, ndipo wakuyezgayezga kuti wamazge suzgo lake lakusuzgika maghanoghano.” Ntheura ntchakuzirwa chomene kuti tizikirenge na ŵamumbumba yithu kweniso ŵabali na ŵadumbu mu mpingo awo ŵakulimbana na masuzgo ghakuru.
19. Kasi tikwenera kuŵikapo mtima kuchita vichi?
19 Yesu na ŵangelo ŵakakondwa chomene charu chikati chalengeka. Kweni ŵazamuŵa ŵakukondwa chomene kuwona kuti charu ntchakuzura na ŵanthu ŵakufikapo, ŵakutemwa Yehova na kumuteŵetera. Awo ŵazamuluta kuchanya nawo ŵazamukondwa chomene kuwona ŵanthu ŵakupindura chifukwa cha mulimo wawo. (Chivu. 4:4, 9-11; 5:9, 10) Ndipo ghanaghanirani umo umoyo uzamuŵira para masuzgo nga ni vyakuŵinya, ulwari, chitima, na nyifwa vyazakamara muyirayira. (Chivu. 21:4) Ntheura, tiyeni tiŵikepo mtima kuyezga Yehova, Dada withu wachitemwa, wavinjeru na wakuzikira. Para tichitenge nthena, tilutilirenge kuŵa ŵakukondwa nanga tingakumana na masuzgo wuli. (Yak. 1:2-4) Tikuwonga chomene Yehova chifukwa cha kulayizga kuti “kuzamuŵa chiwuka.”—Mil. 24:15.
SUMU 141 Umoyo Ntchawanangwa
^ ndime 5 Yehova ni Dada wachitemwa, wavinjeru kweniso wakuzikira. Tikuwona mikhaliro iyi kwizira mu vinthu vyose ivyo wali kulenga, kweniso para tikuwona layizgo lake lakuti wazamuwuska awo ŵali kufwa. Mu nkhani iyi, tidumbiskanenge mafumbo ghanyake agho tingajifumba pa nkhani ya chiwuka. Kweniso tidumbiskanenge ivyo chiwuka chikutisambizga pa nkhani ya chitemwa cha Yehova, vinjeru, kweniso kuzikira kwake.
^ ndime 59 MAZGU GHAKULONGOSORA CHITHUZI: Mwanalume uyo ni mu mwenye wa ku America, uyo wakafwa vyaka vinandi kumasinda wawuskika mu nyengo ya Muwuso wa Khristu wa Vyaka 1,000. Mubali uyo wapona pa Aramagedoni ngwakukondwa kusambizga mwanalume uyu ivyo wakwenera kuchita kuti wapindure na sembe ya Khristu.
^ ndime 61 MAZGU GHAKULONGOSORA CHITHUZI: Mubali wakuphalira bwana wake kuti wangasazgirako yayi nyengo yakugwilira ntchito chifukwa mazuŵa ghakugwilira ntchito mu sabata ngakukwana. Wakulongosora kuti para waŵeruka ku ntchito, namise wakuchita milimo yakukhwaskana na kusopa Yehova. Kweni wakulongosoraso kuti para pali ntchito iyo yikukhumbikwa kuti yichitike mwaluŵiro ngwakunozgeka kusazgirako nyengo yakugwilira ntchito.
