1. Ntchivichi icho Yehova wachitira muteŵeti wake waliyose wakugomezgeka?

CHIFUKWA cha chitemwa, Yehova wazomerezga muteŵeti wake waliyose wakugomezgeka kuŵa mu mpingo wake. Nangauli tikuchita milimo yakuyana yayi mu mpingo, kweni tose tili ŵakuzirwa ndipo waliyose ngwakukhumbikwa kwa munyake. Mpositole Paulosi wakutovwira kuti tipulikiske fundo iyi. Kasi wakutovwira wuli?

2. Kuyana na Ŵaefeso 4:16, chifukwa wuli tikwenera kuchindikana na kuteŵetera lumoza?

² Pa vesi ilo pajintha nkhani iyi, Paulosi wakalongora kuti palije waliyose wa ise uyo wangayowoya ku muteŵeti munyake kuti “nkhukukhumba yayi.” (1 Kor. 12:21) Para tikukhumba kuti mu mpingo muŵe mtende, tikwenera kuchindikana na kugwilira ntchito lumoza. (Ŵazgani Ŵaefeso 4:16.) Para tikuchita vinthu mwakukolerana, mpingo ukukhozgeka na kuzengeka mu chitemwa.

3. Kasi tiwonenge vichi mu nkhani iyi?

³ Kasi tingalongora wuli kuti tikuchindika Ŵakhristu ŵanyithu mu mpingo? Mu nkhani iyi, tiwonenge umo ŵalara ŵangalongolera kuti ŵakuchindika ŵalara ŵanyawo. Kufuma apo, tiwonenge umo tose tingalongolera kuti tikuchindika ŵabali na ŵadumbu awo ŵandanjire mu nthengwa. Ndipo paumaliro, tiwonenge umo tingalongolera kuti tikuchindika awo ŵakutondeka kuyowoya makora chiyowoyero chithu.

4. Kasi ni ulongozgi wuli wa Paulosi uwo uli pa Ŵaroma 12:10 uwo ŵalara ŵakwenera kulondezga?

⁴ Ŵalara wose mu mpingo ŵakwimikika na mzimu utuŵa wa Yehova. Kweni wose ŵali na vyawanangwa na maluso ghakuyana yayi. (1 Kor. 12:17, 18) Ŵanyake ŵangaŵa kuti ŵimikika waka sonosono ndipo ŵangaŵa kuti ŵakumanya vinandi yayi. Ŵanyake ŵangaŵa kuti ŵakutondeka kuchita vinandi chifukwa cha uchekuru panji masuzgo ghanyake gha muthupi. Kweni paŵavye mulara munyake waghanaghane kuti mulara munyake ngwambura ntchito. M’malo mwake, mulara waliyose wakwenera kulondezga ulongozgi wa Paulosi wa pa Ŵaroma 12:10.—Ŵazgani.

5. Kasi ŵalara ŵangalongora wuli kuti ŵakuchindikana, ndipo chifukwa wuli kuchita nthena nkhwakuzirwa?

⁵ Ŵalara ŵakulongora kuti ŵakuchindikana para ŵakutegherezgana. Kuchita nthena nkhwakuzirwa chomene para wupu wa ŵalara ukukumana kuti udumbiskane nkhani zinyake zakuzirwa. Chifukwa wuli? Wonani ivyo Gongwe la Mulinda Lachingelezi la Okutobala 1, 1988, likayowoya: “Ŵalara ŵakwenera kumanya kuti Khristu wangagwiliskira ntchito mzimu utuŵa kovwira mulara waliyose pa wupu, kuti wapeleke fundo ya mu Baibolo iyo yingawovwira pa suzgo linyake panji pa nkhani yinyake yakuzirwa chomene. (Mil. 15:6-15) Palije mulara uyo wali na mzimu utuŵa unandi kujumpha ŵanyake pa wupu.”

6. Kasi ŵalara ŵangachita wuli kuti ŵakoleranenge, ndipo kuchita nthena kungawovwira wuli mpingo?

⁶ Mulara uyo wakuchindika ŵalara ŵanyake, wakupeleka m’pata ku ŵalara ŵanyake kuti nawo nyengo zinyake ndiwo ŵambenge kuyowoyapo pa ungano wa ŵalara. Wakukhalira waka kuyowoya yayi pa wupu, ndipo wakukakamira waka pa maghanoghano ghake yayi. Kweni wakuyowoya maghanoghano ghake mwantchindi. Wakutegherezga chomene para ŵanyake ŵakuyowoya. Chakuzirwa chomene ntchakuti wakuyezgayezga kuyowoya fundo za mu Baibolo na kulondezga ulongozgi wakufuma kwa “muzga wakugomezgeka na wavinjeru.” (Mat. 24:45-47) Para ŵalara ŵakulongorana chitemwa na ntchindi apo ŵakudumbiskana, mzimu wa Chiuta ukuŵa nawo, ndipo ukuŵawovwira  kusankha vinthu ivyo vingakhozga mpingo.—Yak. 3:17, 18.

7. Kasi Yesu wakaŵawonanga wuli awo ŵandanjire mu nthengwa?

⁷ Mu mpingo mazuŵa ghano muli ŵakutorana awo ŵali na ŵana na awo ŵalije ŵana. Kweni muliso ŵabali na ŵadumbu awo ŵandanjire mu nthengwa. Kasi tikwenera kuŵawona wuli ŵabali na ŵadumbu aŵa? Wonani umo Yesu wakaŵawoneranga awo ŵandanjire mu nthengwa. Yesu nayo wakaŵa wambura kutora. Ivi vikawovwira kuti waŵe na nyengo yinandi yakuchitira uteŵeti kweniso kuti mtima wake wose uŵe pa uteŵeti. Yesu wakasambizgapo yayi kuti Mkhristu wakwenera kuŵa pa nthengwa panji yayi. Kweni wakayowoya kuti Mkhristu wangasankha kuleka kutora panji kutengwa. (Mat. 19:11, 12, 12) Yesu wakachindikanga awo ŵandanjire mu nthengwa. Wakaŵawonanga kuti mbapasi yayi panji kuti ŵakusoŵeka chinthu chinyake.

8. Kuyana na 1 Ŵakorinte 7:7-9, kasi Paulosi wakaŵachiska vichi Ŵakhristu?

⁸ Nga ni Yesu, mpositole Paulosi nayo wakaŵa wambura kutora apo wakachitanga uteŵeti wake. Paulosi wakasambizgapo yayi kuti ntchiheni kuti Mkhristu wanjire mu nthengwa. Wakamanya kuti iyi ni nkhani ya waliyose payekha. Kweni Paulosi wakachiska Ŵakhristu kuteŵetera Yehova kwambura kutora panji kutengwa usange ŵangafiska. (Ŵazgani 1 Ŵakorinte 7:7-9.) Paulosi wakawonanga Ŵakhristu awo ŵandanjire mu nthengwa kuti mbapasi yayi. Nakuti wakasankha Timote, mubali wambura kutora, kuchita milimo yikuru mu mpingo. * (Fil. 2:19-22) Ntheura ntchambura kwenelera kughanaghana kuti mubali ngwakwenelera panji yayi kupika mauteŵeti chifukwa chakuti waka ngwakutora panji ngwambura kutora.—1 Kor. 7:32-35, 38.

9. Kasi tikwenera kuyiwona wuli nkhani ya kunjira mu nthengwa panji yayi?

⁹ Yesu na Paulosi ŵakasambizgapo yayi kuti Ŵakhristu ŵakwenera kutora panji kuleka kutora. Ipo kasi tikwenera kuyiwona wuli nkhani ya kunjira mu nthengwa panji yayi? Gongwe la Mulinda la Okutobala 1, 2012, likuzgora fumbo ili. Likuti: “Pose paŵiri, kunjira mu nthengwa panji yayi, ntchawanangwa chakufuma kwa Chiuta. . . . Yehova wakuwona kuti kuleka kunjira mu nthengwa ntchinthu chakukhozga soni panji chakuchitiska chitima yayi.” Ntheura tikwenera kuchindika ŵabali na ŵadumbu awo ŵandanjire mu nthengwa.

10. Kasi tingalongora wuli kuti tikuchindika ŵabali na ŵadumbu awo ŵandanjire mu nthengwa?

 ¹⁰ Kasi tingalongora wuli kuti tikuchindika ŵabali na ŵadumbu awo ŵandanjire mu nthengwa? Tikwenera kukumbuka kuti Ŵakhristu ŵanyake ŵali kusankha kuleka kunjira mu nthengwa. Ŵakhristu ŵanyake ŵakukhumba kunjira mu nthengwa, kweni ŵakumusanga yayi munthu wakwenelera wakuti ŵatorane nayo. Ŵanyake munyawo wa mu nthengwa wali kufwa. Mulimose umo vingaŵira, kweni kasi ntchakwenelera kuti awo ŵali mu mpingo ŵafumbenge Ŵakhristu aŵa chifukwa icho ŵaliri pa nthengwa yayi panji kuŵasangira uyo ŵangatorana nayo? Yayi. Nyengo zinyake Ŵakhristu ŵanyake awo ŵandanjire mu nthengwa ŵangapempha kuti muŵasangireko wakuti ŵangatorana nayo. Kweni para ŵandatipemphe, kasi ŵangajipulika wuli usange tikuŵapenjera mubali panji mudumbu? (1 Tes. 4:11; 1 Tim. 5:13) Tiyeni tiwone ivyo ŵali kuyowoya ŵabali na ŵadumbu ŵanyake ŵakugomezgeka awo ŵandanjire mu nthengwa.

11-12. Kasi ni vichi ivyo vingakhuŵazga awo ŵandanjire mu nthengwa?

¹¹ Mulaŵiliri wa dera munyake uyo ngwambura kutora uyo wakuchita makora uteŵeti wake, wakuwona kuti pali mawuwemi ghanandi para munthu wandanjire mu nthengwa. Kweni wakatiso vikuŵa vyakugongoweska para ŵabali na ŵadumbu awo ŵakuŵa nga ŵakumukhumbira viwemi ŵakumufumba kuti: “Chifukwa wuli mundatore?” Mubali munyake uyo wakuteŵetera pa Beteli uyo nayo wandatore wakati: “Nyengo zinyake nkhuwona kuti ŵabali na ŵadumbu ŵakughanaghana kuti ŵakwenera kuchitira chitima awo ŵandanjire mu nthengwa. Ivi vingalongora nga kuti kuleka kunjira mu nthengwa ni suzgo, ntchawanangwa yayi.”

¹² Mudumbu munyake uyo wakuteŵetera pa Beteli wakati: “Ŵapharazgi ŵanyake ŵakughanaghana kuti wose awo ŵandanjire mu nthengwa ndikuti ŵakupenja wakuti ŵatorane nayo. Kweniso ŵakughanaghana kuti para awo ŵandanjire mu nthengwa ŵakuchezga na ŵanthu ŵanyake ndikuti ŵakupenja munthu wakuti ŵangatorana nayo. Zuŵa linyake apo nkhaluta ku charu chinyake kukachita uteŵeti wane, nkhafika pa maungano nausiku. Mudumbu uyo nkhafikirako wakaniphalira kuti pali ŵabali ŵaŵiri mu mpingo awo ŵakaŵa ŵamsinkhu wane. Wakaniphalira kuti wakanisangiranga munthu wakuti nitorane nayo yayi. Kweni tikati tanjira waka mu Nyumba ya Ufumu, wakanitolera apo pakaŵa ŵabali ŵara kuti nikumane nawo. Ichi chikaŵa chakukhozga soni kwa tose taŵatatu.”

13. Kasi mudumbu munyake wambura kutengwa wakakhozgeka na anjani?

¹³ Mudumbu munyakeso wambura kutengwa uyo wakuteŵetera pa Beteli wakati: “Nkhumanya ŵadumbu ŵanyake awo mbapayiniya awo mbalara mu vyaka ndipo ŵandatengwe. Ŵadumbu aŵa mbakukhora, mbakujipeleka, mbakukondwa, ndipo mbakovwira chomene mu mpingo. Ŵakudandawura yayi kuti mbambura kutengwa. Kweniso ŵakughanaghana kuti ŵakuluska ŵanyawo yayi chifukwa chakuti mbambura kutengwa. Ŵakughanaghanapo yayi kuti ŵangaŵa ŵakukondwa yayi pakuti ŵalije ŵanalume na ŵana.” Ntheura ntchakukondweska chomene kuŵa mu mpingo uwo ŵakukuchindika na kukuwona kuti uli wakuzirwa. Ukumanya kuti ŵabali na ŵadumbu ŵakukuchitira chitima yayi pakuti undanjire mu nthengwa, kukuchitira sanji, kukusura, panji kukuwona kuti ukuluska ŵanyako. Ukumanya waka kuti ŵabali na ŵadumbu ŵakukutemwa.

14. Kasi tingalongora wuli kuti tikuŵachindika ŵabali na ŵadumbu awo ŵandanjire mu nthengwa?

¹⁴ Ŵabali na ŵadumbu awo ŵandanjire mu nthengwa ŵakuwonga chomene para ŵanthu  ŵakuŵachindika chifukwa cha mikhaliro yawo yiwemi, na kuleka kuŵachitira chitima chifukwa chakuti ŵali pa nthengwa yayi. M’malo mwa kuŵachitira chitima, tingachita makora kuŵawonga chifukwa cha kugomezgeka kwawo. Para tichitenge nthena ŵabali na ŵadumbu ŵithu awo ŵandanjire mu nthengwa ŵajipulikenge yayi nga tikuŵaphalira kuti: ‘Tikumukhumbani yayi.’ (1 Kor. 12:21) Kweni ŵamanyenge kuti tikuŵachindika kweniso tikuŵawona kuti mbakuzirwa.

15. Kasi ŵanyake ŵachita wuli kuti ŵasazgireko uteŵeti wawo?

¹⁵ Mazuŵa ghano, ŵapharazgi ŵanandi ŵakusambira chiyowoyero chinyake mwakuti ŵasazgireko uteŵeti. Kuti ŵafiske chilato ichi, ŵasintha vinyake pa umoyo wawo. Ŵabali na ŵadumbu aŵa ŵaleka mipingo ya chiyowoyero chawo mwakuti ŵateŵetere mipingo ya chiyowoyero chinyake kweniso uko ŵapharazgi ŵanandi ŵakukhumbikwa. (Mil. 16:9) Ivi ndivyo ŵabali ŵakuchita mwakuti ŵateŵetere Yehova mwakukwana. Nangauli vikuŵatolera vyaka kuti ŵambe kuyowoya makora chiyowoyero chiphya, kweni ŵakovwira mipingo munthowa zinandi. Ŵabali na ŵadumbu mu mpingo ŵakukhozgeka na mikhaliro yawo yiwemi kweniso vinthu ivyo vyaŵachitikira pa umoyo wawo. Tikuŵatemwa chomene ŵabali na ŵadumbu ŵakujipeleka aŵa.

16. Kasi ŵalara ŵakwenelera kuchita wuli para ŵakusanda mubali kuti waŵe mulara panji muteŵeti wakovwira?

¹⁶ Ŵalara ŵaleke kudumura kuti mubali wakwenelera yayi kuŵa mulara panji muteŵeti wakovwira chifukwa chakuti waka wakutondeka kuyowoya makora chiyowoyero cha mpingo uwo. Ŵalara para ŵakusanda mubali ŵakwenera kuwona ivyo Malemba ghakuyowoya kuti munthu waŵe mulara panji muteŵeti wakovwira, umo wakuyowoyera chiyowoyero cha mpingo uwo yayi.—1 Tim. 3:1-10, 12, 13; Tito 1:5-9.

17. Kasi ŵapapi ŵakwenera kughanaghanira vichi para ŵakusamira ku charu chinyake?

¹⁷ Mbumba zinyake za Ŵakhristu zasamira vyaru vinyake chifukwa cha masuzgo ghanyake panji kupenja ntchito. Ivi vyapangiska kuti ŵana ŵawo ŵasambire sukulu za chiyowoyero cha charu icho ŵasamirako. Kweniso kuti ŵapapi ŵasange ntchito, nawo ŵakwenera kusambira chiyowoyero cha charu icho. Kweni wuli usange mu charu icho, muli mpingo panji kagulu ka chiyowoyero chawo? Kasi mbumba yikwenera kuwungana mpingo ngu? Kasi yikwenera kuwungana mpingo wa chiyowoyero chawo panji wa chiyowoyero cha charu icho ŵasamirako?

18. Kuyana na Ŵagalatiya 6:5, kasi tikwenera kuchita wuli na ivyo mutu wa mbumba wasankha?

¹⁸ Mutu wa mbumba ukwenera kusankha mpingo uwo mbumba yake yiwunganenge. Pakuti iyi ni nkhani ya waliyose payekha, wakwenera kuwona ivyo vingawovwira mbumba yake. (Ŵazgani Ŵagalatiya 6:5.) Tikwenera kuchindika ivyo mutu wa mbumba wasankha.  Chilichose icho wangasankha tikwenera kuzomerezga. Para ŵasamira mu mpingo withu, tiŵapokelere na kuŵalongora chitemwa.—Rom. 15:7.

19. Kasi mitu ya mbumba yikwenera kulomba na kughanaghanira vichi?

¹⁹ Mbumba zinyake zingaŵa mu mpingo wa chiyowoyero chawo nangauli ŵana ŵangaŵa kuti ŵakuchimanya makora yayi. Usange mpingo uwu uli mu chigaŵa icho ŵanthu ŵanandi ŵakuyowoya chiyowoyero cha mu charu icho, ŵana ŵangatondeka kupulikiska ivyo tikusambira pa maungano ndipo ŵangatondeka kukura mwauzimu. Chifukwa wuli? Chifukwa ntchakuti ŵana ŵangaŵa kuti ŵakusambira sukulu za mu chiyowoyero cha mu charu icho, chiyowoyero cha ŵapapi ŵawo yayi. Para vili nthena, mitu ya mbumba yikwenera kulomba vinjeru na kughanaghanirapo ivyo ŵakwenera kuchita kuti ŵawovwire ŵana ŵawo kuŵa paubwezi na Yehova na ŵanthu ŵake. Ŵapapi ŵangasambizga ŵana ŵawo chiyowoyero chawo panji ŵangasamira mu mpingo wa chiyowoyero icho ŵana ŵawo ŵakuchimanya makora. Mulimose umo vingaŵira, mpingo uwo ŵasamiramo ukwenera kuchindika ivyo mbumba yasankha.

20. Kasi tingalongora wuli kuti tikuchindika ŵabali na ŵadumbu ŵithu awo ŵakusambira chiyowoyero chiphya?

²⁰ Chifukwa cha ivyo talongosora, mu mipingo yinandi mulutilirenge kuŵa ŵanthu awo ŵakusambira chiyowoyero. Viŵenge vyakusuzga kuti ŵayowoye maghanoghano ghawo. Kweni para tilekenge kughanaghanira waka umo ŵakusuzgikira kuyowoya chiyowoyero chiphya, tiwonenge kuti ŵakumutemwa Yehova ndipo mbakukhumbisiska kumuteŵetera. Para tikuwona mikhaliro iyi mwa iwo, tiŵachindikenge chomene ŵabali na ŵadumbu aŵa. Ndipo tiyowoyenge yayi kuti ‘tikumukhumbani yayi’ chifukwa chakuti waka ŵakutondeka kuyowoya makora chiyowoyero chithu.

21-22. Kasi Yehova watipa vichi?

²¹ Tikumuwonga chomene Yehova chifukwa cha kutipa milimo yakuzirwa mu mpingo wake. Kwali ndise mwanalume panji mwanakazi, tili pa nthengwa panji yayi, ndise muwukirano panji muchekuru, tikuyowoya makora chiyowoyero chinyake panji yayi, tose tili ŵakuzirwa kwa Yehova ndiposo kwa yumoza na munyake.—Rom. 12:4, 5; Kol. 3:10, 11.

²² Tiyeni tilutilire kulondezga ivyo tasambira ku chiyelezgero cha thupi icho mpositole Paulosi wakayowoya. Para tichitenge nthena, vitovwirenge kuwona ivyo nase tingachita kuti tikhozge ŵabali na ŵadumbu, kweniso kuti tiŵatemwenge na kuŵachindika.