NKHANI YAKUSAMBIRA 34
‘Lutilirani Kwenda mu Unenesko’
‘Lutilirani kwenda mu unenesko.’—3 YOH. 4.
SUMU 111 Vifukwa Vyakuŵira na Chimwemwe
IVYO VILI MU NKHANI IYI *
1. Kasi pakuŵa uwemi wuli para tikudumbiskana na ŵanyithu umo tikasambilira “unenesko”?
“KASI imwe mukasambira wuli unenesko?” Tikukayika yayi kuti mwazgorapo fumbo ili kanandi waka. Ni fumbo ilo kanandi Mkhristu munyithu wakutifumba kuti timanyane makora. Tikukondwa chomene kumanya umo ŵabali na ŵadumbu ŵithu ŵakamanyira Yehova na kumutemwa, ndipo nase tikukondwa kuphalirako ŵanyithu chifukwa icho tikutemwera unenesko. (Rom. 1:11) Para tikudumbiskana nkhani iyi na ŵabali ŵithu yikutikumbuska waka umo tikukondwera pakuŵa yumoza wa Ŵakaboni ŵa Yehova. Yikutovwiraso kuŵikapo mtima ‘kulutilira kwenda mu unenesko,’ icho chikung’anamuraso kulutilira kulondezga ivyo tikusambira kuti Yehova watitumbike kweniso kutitemwa.—3 Yoh. 4.
2. Kasi tidumbiskanenge vichi mu nkhani iyi?
2 Mu nkhani iyi, tiwonenge vifukwa vinyake ivyo tikutemwera unenesko. Pamanyuma tizamuwona umo tingachitira kuti tilutilire kutemwa chawanangwa chapadera ichi. Tikukayika yayi kuti nkhani iyi yitovwirenge chomene kuwonga Yehova kuti wali kutiguzira mu unenesko. (Yoh. 6:44) Yitovwirengeso chomene kuti tilutilire kuphalirako ŵanyithu unenesko wa mu Baibolo.
CHIFUKWA WULI TIKUTEMWA “UNENESKO”?
3. Kasi ntchifukwa wuli chikuru icho tikutemwera unenesko?
3 Pali vifukwa vinandi ivyo tikutemwera unenesko. Chifukwa chakuzirwa chomene ntchakuti tikutemwa Yehova Chiuta, Mwenecho waunenesko. Mazgu ghake, Baibolo, ghatovwira kumanya kuti iyo ngwankhongono chomene ndipo ndiyo wali kulenga kuchanya na charu chapasi, kweniso ni Dada withu wachitemwa, uyo wakutipwelelera. (1 Pet. 5:7) Tikumanya kuti Chiuta withu ‘ngwalusungu na wachiwuravi, wakukalipa luŵiro chara, wakuzara na chitemwa, na unenesko.’ (Eks. 34:6) Yehova wakutemwa urunji. (Yes. 61:8) Wakukwenyelera chomene para wakuwona kuti tikusuzgika, ndipo ngwakunozgeka, kweniso ngwakukhumbisiska chomene kumazga masuzgo ghose agho tikusangana nagho, panyengo iyo wali kutemerathu. (Yer. 29:11) Nakuti tikulindilira mwakunweka nyengo yakukondweska iyi. Lekani tikumutemwa chomene Yehova.
Unenesko wa mu Baibolo Uli nga Ni . . . Nyanguru
Nga umo nyanguru wakovwilira boti kuti limilire pa malo ghamoza, chigomezgo chithu cha mu Baibolo nacho chingatovwira kuti tileke kusunkhunyika para tasangana na masuzgo. Unenesko wa mu Baibolo ukutovwiraso kuti tiphalirengeko ŵanyithu za chilindizga chithu cha munthazi (Wonani ndime 4-7)
4-5. Chifukwa wuli mpositole Paulosi wakayaniska chigomezgo chithu na nyanguru?
4 Kasi ntchifukwa wuli chinyake icho tikutemwera unenesko? Unenesko ukutovwira chomene ise. Tiyeni tiwone chiyelezgero ichi. Unenesko wa mu Baibolo ukusazgaposo chigomezgo chithu cha munthazi. Kuti tipulikiske makora kuzirwa kwa chigomezgo ichi, mpositole Paulosi wakalemba kuti: “Chigomezgo icho tili nacho chili nga ni nyanguru wa umoyo withu, ntchanadi na chakukhora.” (Heb. 6:19) Nga umo nyanguru wakovwilira boti kuti limilire pa malo ghamoza, chigomezgo chithu cha mu Baibolo nacho chingatovwira kuti tileke kusunkhunyika para tasangana na masuzgo.
5 Apa Paulosi wakayowoyanga za chigomezgo chakuluta kuchanya icho Ŵakhristu ŵakuphakazgika ŵali nacho. Kweni mazgu agho wakayowoya ghakukhwaskaso Ŵakhristu ŵanyake awo ŵali na chilindizga cha kuzakakhala pa charu chapasi kwamuyirayira mu paradiso. (Yoh. 3:16) Kusambira za chigomezgo cha kuzakakhala na umoyo kwamuyirayira kukutovwira kumanya kuti umoyo withu uli na chandulo.
6-7. Kasi kusambira unenesko kwamovwira wuli Yvonne?
6 Wonani ivyo vikachitikira mudumbu munyake zina lake Yvonne. Iyo wakakulira mu unenesko yayi, ndipo apo wakaŵa mwana, wakawopanga chomene nyifwa. Iyo wakukumbuka mazgu ghanyake agho wakatemwanga kughasunga pamtima, ghakuti: “Mwahuno tiliko kwe namachero kuzamuŵavya.” Iyo wakuti: “Mazgu agha ghakanipangiskanga kuti nisoŵenge tulo usiku chifukwa cha kughanaghanira vyamunthazi. Nkhajifumbanga kuti, ‘Chifukwa wuli tikukhala nyengo yichoko waka mbwe tikufwa?’ ‘Chifukwa wuli nili na umoyo?’ Ine nkhukhumba yayi kufwa.”
7 Pamanyuma, apo wakaŵa muwukirano, Yvonne wakakumana na Ŵakaboni ŵa Yehova. Iyo wakuti: “Nkhamba kugomezga kuti ningazakakhala na umoyo kwamuyirayira mu Paradiso pa charu chapasi.” Kasi kusambira unenesko kukamovwira uli mudumbu withu? Iyo wakutiso: “Sono nkhusoŵaso tulo yayi usiku chifukwa cha kughanaghanira vyamunthazi panji kopa nyifwa.” Ntchakuwonekerathu kuti Yvonne wakuwutemwa chomene unenesko wa mu Baibolo, ndipo wakukondwa chomene kuphalirako ŵanyake chigomezgo cha munthazi icho wali nacho.—1 Tim. 4:16.
Unenesko wa mu Baibolo Uli nga Ni . . . Usambazi
Kuteŵetera Yehova sono, kweniso kuŵa na chigomezgo chakuti tizamumuteŵetera umoyo withu wose pasi pa Ufumu wake, vili nga mbusambazi. Ntchinthu chakuzirwa chomene kuluska chilichose icho tingachileka (Wonani ndime 8-11)
8-9. (a) Kasi munthu wa mu ntharika ya Yesu wakalongora wuli kuti wakuzirwiska usambazi uwo wakasanga? (b) Kasi unenesko ngwakuzirwa wuli kwa imwe?
8 Unenesko wa mu Baibolo ukusazgaposo makani ghawemi gha Ufumu wa Chiuta. Yesu wakayaniska unenesko wakukhwaskana na Ufumu na usambazi wakubisika. Pa Mateyu 13:44, Yesu wakati: “Ufumu wakuchanya uli nga mbusambazi wakubisika mu munda, uwo munthu wakawusanga na kubisa. Ndipo chifukwa cha chimwemwe icho wakaŵa nacho, wakaluta na kuguliska vinthu ivyo wakaŵa navyo na kugura munda wura.” Wonani kuti munthu uyu wakapenjanga usambazi yayi. Kweni wakati wawusanga, wakachita chilichose icho wangafiska kuti wawugure. Nakuti wakaguliska chilichose icho wakaŵa nacho. Chifukwa wuli? Wakamanya kuti usambazi uwo wakawusanga ukaŵa wakuzirwa chomene. Ukaŵa wakuzirwa chomene kuluska chilichose icho wakaguliska.
9 Kasi ndimo imwe mukuwonera unenesko? Tikukayika yayi kuti ndimo mukuwuwonera. Tikumanya kuti palije chinthu chakuzirwa chomene mu charu ichi icho tingachiyaniska na chimwemwe icho tikusanga apo tikuteŵetera Yehova, kweniso chigomezgo icho tili nacho cha kuzakakhala na umoyo wamuyirayira para Ufumu wake wazakamba kuwusa. Mwaŵi uwo tili nawo wakuŵa paubwezi wakukhora na Yehova, ngwakuzirwa chomene kuluska chilichose icho tingachileka mu charu ichi. Ntheura tili ŵakukondwa chomene pakuŵa na mwaŵi uwu, ndipo chilato chithu ntchakuti ‘timukondweskenge pa chilichose’ icho tikuchita.—Kol. 1:10.
10-11. Kasi ntchivichi chikawovwira Micheal kuti wasinthe umoyo wake?
10 Taŵanandi ŵa ise tili kuleka vinthu vinyake vyakuzirwa kuti tiŵe paubwezi na Yehova. Ŵanyake ŵali kuleka ntchito zapachanya mu charu ichi. Apo ŵanyake ŵali kuleka kupenjapenja usambazi. Ŵanyakeso ŵali kusintha umoyo wawo ŵakati ŵasambira vyakukhwaskana na Yehova. Nakuti ivi ndivyo wakachita Michael. Iyo wakakulira mu unenesko yayi. Apo iyo wakaŵa muwukirano, wakasambira vyakutimbana panji kuti karati. Iyo wakuti: “Nyengo zose nkhawoneseskanga kuti nili wankhongono chomene. Ndipo nyengo zinyake nkhajiwonanga kuti palije munthu uyo wangalimbana nane.” Kweni wakati wamba kusambira Baibolo, Micheal wakamanya umo Yehova wakuwonera nkhaza. (Sal. 11:5) Pakuyowoya za banja ilo likamusambizganga unenesko, Micheal wakuti: “Ŵakaniphalirapo yayi kuti nileke maseŵero gha karati. Iwo ŵakalutilira waka kunisambizga unenesko wa mu Baibolo.”
11 Apo Micheal wakalutiliranga kusambira vinandi vya Yehova, chitemwa chake pa Yehova nacho chikakuranga chomene. Iyo wakakhwaskika chomene wakati wamanya kuti Yehova wakuchitira chiwuravi awo ŵakumusopa. Nyengo yikati yajumphapo, Micheal wakamanya kuti wakeneranga kusintha umoyo wake. Iyo wakuti: “Nkhamanya kuti chiniŵirenge chakusuzga chomene kuti nileke maseŵero gha karati. Kweni nkhamanyaso kuti para nilekenge maseŵero agha, nikondweskenge Yehova, ndipo nkhakhorwa kuti kuteŵetera Chiuta ndicho chinthu chakuzirwa chomene kuluska chilichose.” Chifukwa chakuti Micheal wakamanya kuti unenesko uwo wakasanga ukaŵa wakuzirwa chomene, vikamovwira kuti wasinthe umoyo wake.—Yak. 1:25.
Unenesko wa mu Baibolo Uli nga Ni . . . Nyali
Nyali yikutowira kuti tende makora para kuli chisi. Mwakuyana waka, Mazgu gha Chiuta ghakutovwira kuti tisankhenge makora vinthu mu charu cha Satana cha chisi ichi (Wonani ndime 12-13)
12-13. Kasi unenesko wa mu Baibolo ukamovwira wuli Mayli?
12 Baibolo likuyaniska unenesko na nyali iyo yikubuka nausiku, kulongora kuti unenesko ngwakuzirwa. (Sal. 119:105; Efe. 5:8) Mudumbu munyake zina lake Mayli wa ku Azerbaijan, wakuwonga chomene umo Mazgu gha Chiuta ghamovwilira. Iyo wakakulira mu banja ilo ŵapapi ŵake ŵakaŵa mu visopa vyakupambana. Adada ŵake ŵakaŵa Musilamu apo amama ŵake ŵakaŵa Muyuda. Iyo wakuti: “Nangauli nkhakayikiranga yayi kuti Chiuta waliko, kweni nkhaŵa na mafumbo ghanandi ghakukhwaskana na Chiuta. Nkhajifumbanga kuti, ‘Chifukwa wuli Chiuta wakalenga ŵanthu, ndipo chifukwa wuli munthu wakukhalira waka kusuzgika mu charu ichi umoyo wake wose, paumaliro na kukasuzgikaso ku helo? Chifukwa chakuti ŵanthu ŵakatenge chilichose icho chikuchitika likuŵa khumbo la Chiuta, nkhajifumbanga kuti, ‘Kasi ndikuti Chiuta ndiyo wakupangiska ŵanthu kuti ŵachitenge vinthu ivi, ndipo paumaliro wakukondwa para wakuwona ŵanthu ŵakusuzgika?’”
13 Mayli wakalutilira kupenja mazgoro gha mafumbo ghake. Nyengo yikati yajumphapo, wakazomera kusambira Baibolo, ndipo paumaliro wakaŵa Kaboni wa Yehova. Iyo wakati: “Fundo zakukhorweska za mu Baibolo zikanovwira chomene kuti nisinthe umo nkhawoneranga vinthu. Fundo izo nkhasanga mu Mazgu gha Chiuta izo zili kulongosoreka makora chomene, zili kunovwira kuti niŵe na mtende wamumtima. Nga ni Mayli, tose tikulumba Yehova, ‘uyo wali kutichema kufuma mu chisi kwiza ku ungweru wake wakuzizwiska.’—1 Pet. 2:9.
14. Kasi tingachita wuli kuti tiwutemwenge chomene unenesko? (Wonani bokosi lakuti “ Vinthu Vinyake Ivyo Tingaviyaniska na Unenesko wa mu Baibolo.”)
14 Ivi ni viyelezgero vichoko waka ivyo vikulongora kuti unenesko ngwakuzirwa chomene. Tikukayika yayi kuti namwe mukumanya ŵanthu ŵanandi awo unenesko waŵawovwira. Mungachita makora usange pa sambiro linu lamwaŵene, mungasanga vifukwa vinyake ivyo tikwenera kutemwera unenesko. Manyani kuti para tikutemwa chomene unenesko, tisangengeso nthowa zinandi izo tingalongolera kuti tikuwutemwa unenesko uwu.
UMO TINGALONGOLERA KUTI TIKUTEMWA UNENESKO
15. Kasi ni nthowa wuli yimoza iyo tingalongolera kuti tikutemwa unenesko?
15 Tingalongora kuti tikutemwa unenesko para nyengo zose tikusambira Baibolo kweniso mabuku agho ghakulongosora Baibolo. Kwali takhala mu unenesko kwa vyaka vinandi wuli, kweni tose pachali vinandi vyakuti tisambire. Magazini yakwamba ya Gongwe la Mulinda yikati: “Mu charu ichi mukuyowoyeka mautesi ghanandi agho ghakupangiska kuti chiŵe chakusuzga kumanya uwo mbunenesko nadi. Kuti musange uwo mbunenesko nadi mukwenera kuwupenjisiska. . . . Ndipo usange mwawusanga, mukwenera kuŵikapo mtima kuti muwukoreske. Mukwenera yayi kukhorwa waka na fundo yimoza yaunenesko. . . . Mukwenera kulutilira kupenja fundo zinyake zaunenesko.” Nangauli kusambira nkhantchito, kweni nkhwakuzirwa chomene.
16. Kasi ni nthowa wuli yakusambilira Baibolo iyo mukuwona kuti njakovwira chomene kwa imwe? (Zintharika 2:4-6)
16 Ni tose yayi ise tikutemwa kuŵerenga na kusambira. Kweni Yehova wakutipempha kuti ‘tilutilire kupenja na kupenjisiska’ kuti tipulikiske makora unenesko. (Ŵazgani Zintharika 2:4-6.) Para tikuŵikapo mtima kuchita nthena, nyengo zose tikusanga chandulo. Wonani umo wakuchitira Corey para wakusambira Baibolo payekha, iyo wakuti wakusanda vesi lililose palekha. Iyo wakulongosora kuti: “Nkhuŵerenga mazgu ghamusi ghose agho ghali pa vesi, malemba ghanyake agho ghali pa vesi, na kufufuza fundo zinyake zakusazgikira. . . . Nkhusanga fundo zinandi chomene para naŵerenga mu nthowa iyi.” Kwali tikusambira Baibolo mu nthowa iyi panji zinyake, tikulongora kuti tikuzirwiska chomene unenesko para tikupatura nyengo na kuŵikapo mtima kuti tisambirenge Baibolo.—Sal. 1:1-3.
17. Kasi chikung’anamurachi kuchita ivyo tikusambira? (Yakobe 1:25)
17 Nga umo tikumanyira, kusambira waka unenesko nkhwakukwana yayi. Kuti tipindure na unenesko, tikwenera kuchita ivyo unenesko ukuyowoya, panji kuti kulondezga ivyo tikusambira pa umoyo withu. Pekha para tachita nthena, ndipo unenesko utovwirenge kuti tiŵe ŵakukondwa zanadi. (Ŵazgani Yakobe 1:25.) Kasi tingachita wuli kuti tilondezgenge nadi ivyo tikusambira? Mubali munyake wakasachizga kuti tikwenera kujisanda na kuwona vigaŵa ivyo tikuchita makora, na vigaŵa ivyo tikwenera kugwilirapo ntchito. Mpositole Paulosi wakalemba kuti: “Mulimose umo talutira panthazi, tiyeni tilutilire kwenda mwakwenelera munthowa yeneyiyi.”—Fil. 3:16.
18. Chifukwa wuli tikuŵikapo mtima ‘kulutilira kwenda mu unenesko’?
18 Ghanaghanirani waka uwemi uwo ukuŵapo para ise taŵikapo mtima ‘kulutilira kwenda mu unenesko.’ Ise tikuŵa na umoyo uwemi, kweniso Yehova pamoza na ŵasopi ŵanyithu ŵakukondwa chomene. (Zinth. 27:11; 3 Yoh. 4) Nadi, ivi ni vifukwa vyakukwana vyakutemwera unenesko, na kuchita ivyo tikusambira.
SUMU 144 Laŵiskani pa Njombe
^ Kanandi vigomezgo vithu kweniso umo tikuchitira vinthu pa umoyo withu ndivyo tikuti ni “unenesko.” Kwali tasambira sonosono unenesko kwali tikasambira ni kale, tose tingasanga chandulo para tingaghanaghanira chifukwa icho tikutemwera unenesko. Ivi vitovwirenge kuti tiŵikepo chomene mtima kukhozga ubwezi withu na Yehova.
