1. Chifukwa wuli tikwenera kusopa Yehova pera?

TIKWENERA kusopa Yehova pera chifukwa ni Mlengi withu kweniso ndiyo wali kutipa umoyo. (Chivu. 4:11) Kweni pali suzgo linyake. Nangauli tikumutemwa Yehova na kumuchindika, kweni pali vinthu vinyake ivyo vingatitondeska kuti timusopenge iyo pera. Tikwenera kumanya umo vinthu ivi vingatitondeskera. Kweni chakwamba, tiyeni tidumbiskane dankha ng’anamuro la kusopa Yehova pera.

2. Kuyana na Ekisodo 34:14, kasi tichitenge vichi para tikusopa Yehova pera?

² Mu Baibolo, mazgu ghakuti kujipeleka kwa Chiuta ghakulongora kuti tikumutemwa chomene. Para tili ŵakujipeleka kwa Yehova na mtima wose, timusopenge iyo pera. Ntheura tizomerezgenge waliyose yayi panji chinthu chilichose kutitimbanizga.—Ŵazgani Ekisodo 34:14.

3. Chifukwa wuli tili na vifukwa vyakupulikikwa vya kusopera Yehova pera?

³ Tili na vifukwa vyakupulikikwa vya kusopera Yehova pera. Tikusopa iyo pera chifukwa tikumumanya makora, ndipo tikudokera mikhaliro yake. Tikumanya ivyo wakutemwa na ivyo wakutinkha, ndipo nase tikukhumba kuti timuyezge. Tikupulikiska na kukhozgera khumbo lake. Kweniso tikuwona kuti ni mwaŵi wapadera kuti wali kutizomerezga kuŵa ŵabwezi ŵake. (Sal. 25:14) Chilichose icho tikusambira chakukhwaskana na Mlengi withu chikutovwira kusendelera kwa iyo.—Yak. 4:8.

4. (a) Kasi Dyabulosi wakuchita wuli kuti chitiŵire chinonono kutemwa Yehova pera? (b) Kasi tidumbiskanenge vichi mu nkhani iyi?

 ⁴ Dyabulosi ndiyo wakuwusa charu, ndipo wakuchigwiliskira ntchito kuti chipangenge vinthu ivyo ŵanthu ŵakuviwona kuti ni vyakuzirwa chomene. Ndipo vinthu ivi vikupangiska kuti chiŵe chinonono kukana makhumbiro ghaheni. (Efe. 2:1-3; 1 Yoh. 5:19) Chilato chake ntchakuti tingatemwanga Yehova pera yayi. Tidumbiskanenge nthowa ziŵiri izo Dyabulosi wakuchitira ivi. Yakwamba, wakutikopa kuti titemwenge usambazi, ndipo yachiŵiri, wakutikopa kuti tisankhengenge vyakusanguluska viheni.

5. Chifukwa wuli tikwenera kuŵa maso kuti tileke kwamba kutemwa ndalama?

⁵ Tose tikukhumba kuŵa na chakurya chakukwana, malaya ghawemi na malo ghawemi ghakukhala. Ndipouli, tikwenera kuŵa maso kuti tileke kutemwa ndalama. Ŵanandi mazuŵa ghano “ŵakutemwa ndalama” kweniso vinthu ivyo ŵakugura. (2 Tim. 3:2) Yesu wakamanya kuti ŵasambiri ŵake ŵangayezgeka kuti ŵambe kutemwa ndalama. Iyo wakati: “Palije uyo wangateŵetera nga ni muzga wa mabwana ghaŵiri, chifukwa panji watinkhenge yumoza na kutemwa munyake, panji wademelerenge kwa yumoza na kuyuyura munyake. Vingachitika yayi kuti pa nyengo yimoza muŵe ŵazga ŵa Chiuta na Usambazi.” (Mat. 6:24) Munthu uyo wakusopa Yehova ndipo panyengo yimozamoza wakumalira nyengo yinandi kupenja usambazi wa mu charu ichi, ndikuti wakuteŵetera mabwana ghaŵiri. Ndipo munthu wanthena wakusopa Yehova na mtima wose yayi.

6. Kasi tingasambirako vichi ku ivyo Yesu wakayowoya ku mpingo wa ku Lawodikeya?

⁶ Cha m’ma 96 C.E., ŵanthu awo ŵakaŵa  mu mpingo wa mu msumba wa Lawodikeya ŵakajithumbwanga kuti: “Nili musambazi ndipo nasanga usambazi unandi ndipo nkhusoŵa kanthu yayi.” Kweni mu maso gha Yehova na Yesu, ŵanthu aŵa ŵakaŵa ‘ŵakusokwa, ŵakuchitiska chitima, ŵakavu, ŵachibulumutira na ŵankhule.’ Yesu wakaŵapa ulongozgi, chifukwa chakuti ŵakaŵa ŵasambazi yayi, kweni chifukwa chakuti ubwezi wawo na Yehova ukanangikanga chifukwa cha kutemwa chomene usambazi. (Chivu. 3:14-17) Para tamanya kuti tamba kutemwa ndalama tikwenera kuchitapo kanthu mwaluŵiro. (1 Tim. 6:7, 8) Usange tikhalengepo waka chete, mtima withu ugaŵikanenge ndipo Yehova wazomerenge yayi kusopa kwithu. Yehova “wakukhumba kuti ŵanthu ŵasopenge iyo pera.” (Doto. 4:24) Kasi ntchivichi icho chingapangiska kuti tiwonenge ndalama mwambura kwenelera?

7-9. Kasi mukusambirako vichi kwa mulara munyake zina lake David?

⁷ Wonani chiyelezgero cha David, mubali mulara wakulimbikira uyo wakukhala ku United States. Iyo wakuti wakalimbikiranga chomene ntchito yakulembeka. Ŵakamukwezga pa ntchito ndipo wakapokeranga ndalama zinandi, ŵanthu ŵakamuwonanga kuti njumoza mwa ŵanthu awo ŵakuyimanya makora ntchito mu charu chawo. David wakati: “Panyengo iyi, nkhaghanaghananga kuti, kukwezgeka pa ntchito mbukaboni wakuti Yehova wanitumbika.” Kweni kasi uwu ukaŵa unenesko?

⁸ David wakamba kuwamo kuti ntchito iyo wakugwira yamba kunanga ubwezi wake na Yehova. Iyo wakuti: “Para nili pa maungano gha mpingo kweniso mu upharazgi, nkhaghanaghananga waka vya masuzgo gha ku ntchito. Nkhasanganga ndalama zinandi nadi,  kweni nkhasuzgikanga maghanoghano, ndipo nthengwa yikaleka kwenda makora.”

⁹ David wakamanya kuti wakeneranga kusankha ivyo vikaŵa vyakuzirwa chomene kwa iyo. Iyo wakuti: “Nkhasankha kuti nisinthe.” Wakakhumbanga kuti wasinthe umo wakagwiliranga ntchito, ndipo wakaphalira abwana ŵake ivyo wakaghanaghananga. Kasi chikachitika ntchivichi? Ntchito yikamumalira. Kasi wakachita wuli? Iyo wakuti: “Machero ghake, nkhapempha upayiniya wakanyengo.” Kuti ŵasange vyakukhumbikwa pa umoyo, David na muwoli wake ŵakamba kugwira ntchito yakutozga mu nyumba. Nyengo yichoko waka yikati yajumphapo, wakamba upayiniya wanyengozose, pamanyuma muwoli wake nayo wakamba upayiniya. Mbumba iyi yikasankha kugwira ntchito iyo ŵanandi ŵakuyiwona kuti njapasi. Kweni ntchito iyo ŵakugwira ndiyo ŵakuyiŵika pakwamba yayi pa umoyo wawo. Nangauli pasono ŵakusanga ndalama zinandi yayi pakuyaniska na izo ŵakasanganga pakwamba, kweni ŵakukwaniska kulipira mabilu mwezi uliwose. Ŵakukhumba kuŵika Yehova pakwamba, ndipo ŵajiwonera ŵekha umo wakupwelelera ŵanthu awo ŵakuŵika vinthu vya Ufumu pakwamba.—Mat. 6:31-33.

10. Kasi tingavikilira wuli mtima withu?

¹⁰ Kwali tili na ndalama zinandi panji yayi, kweni tikwenera kuvikilira mtima withu. Kasi tingawuvikilira wuli? Tikwenera yayi kutemwa usambazi. Ndipo mungazomerezganga yayi kuti ntchito yakulembeka ndiyo yiŵe yakuzirwa chomene kwa imwe kuluska uteŵeti uwo mukuchitira Yehova. Kasi mungamanya wuli usange mwamba kutemwa chomene ntchito yakulembeka? Mungachita makora kujifumba kuti: ‘Kasi para nili ku maungano panji mu uteŵeti, nkhughanaghanira chomene vya ntchito yane? Kasi nkhufipa mtima usange nizamuŵa na ndalama zakukwana munthazi? Kasi ndalama panji katundu vikupangiska masuzgo mu nthengwa yane? Kasi ningagwira ntchito iyo ŵanandi wakuyiwona kuti njapasi, kuti niŵe na nyengo yinandi yakuteŵetera Yehova?’ (1 Tim. 6:9-12) Apo tikughanaghanirapo mafumbo agha, tingaluwanga yayi kuti Yehova wakutitemwa ndipo wakulayizga awo ŵakusopa iyo pera kuti: “Nikulekenge yayi napachoko nesi kukutaya munthowa yiliyose.” Lekani mpositole Paulosi wakalemba kuti: “Umoyo winu uŵenge wambura kutemwa ndalama.”—Heb. 13:5, 6.

11. Kasi vyakusanguluska vingamupangiska munthu kuchita vichi?

¹¹ Yehova wakukhumba kuti tisangwenge na umoyo, ndipo vyakusanguluska vingatovwira kuti tisangwenge. Nakuti Mazgu gha Chiuta ghakuti “palije chiwemi kuluska kuti munthu warye na kumwa na kusangwa na mulimo wake.” (Muph. 2:24) Ndipouli, vyakusanguluska vinandi mu charu vingatinanga. Vikupangiska ŵanthu ŵanandi kwamba kutemwa vinthu ivyo Mazgu gha Chiuta ghakukana.

12. Kuyana na 1 Ŵakorinte 10:21, 22, chifukwa wuli tikwenera kusankha makora vyakusanguluska?

¹² Tikukhumba kusopa Yehova pera, lekani tingarya yayi pa “thebulu la Yehova” na pa “thebulu la viŵanda.” (Ŵazgani 1 Ŵakorinte 10:21, 22.) Kulyera lumoza chakurya na munthu munyake kanandi chikulongora kuti pali ubwezi. Para tikusankha vyakusanguluska ivyo vikukhozgera nkhaza, vyamizimu, uzaghali, panji makhumbiro gha thupi, ndikuti vikuyana waka na kulyera pamoza chakurya icho ŵalwani ŵa Chiuta ŵanozga. Paumaliro, tikujipweteka tekha kweniso tikunanga ubwezi withu na Yehova.

13-14. Kuyana na Yakobe 1:14, 15, chifukwa wuli tikwenera kuŵa maso na vyakusanguluska ivyo tikusankha? Pelekani chiyelezgero.

¹³ Kasi chakurya chingayana wuli na vyakusanguluska? Para tikurya, tikuchita kusankha ivyo vinganjira mu mulomo withu. Kweni para tamira, tingasankha yayi umo chakurya chikwenera kugwilira ntchito mu thupi lithu. Chakurya chiwemi chikovwira thupi kuŵa lankhongono, apo chakurya chiheni chingatilwaliska. Ivi vikuchitika nyengo yeneyiyo yayi, kweni pakutora nyengo.

¹⁴ Mwakuyana waka, para tikusankha vyakusanguluska, tikwenera kusankha ivyo tikunjizga mu maghanoghano ghithu. Tikwenera kumanya kuti vyakusanguluska ivyo tasankha vikhwaskenge maghanoghano ghithu. Vyakusanguluska viwemi vingatikondweska kweni vyakusanguluska viheni vingatipweteka. (Ŵazgani Yakobe 1:14, 15.) Uheni wa vyakusanguluska viheni ungawoneka nyengo yeneyiyo yayi, kweni ukuzakawoneka para pajumpha nyengo. Lekani Baibolo likutichenjezga kuti: “Mungapuluskikanga yayi: Chiuta wakupusikika yayi. Chifukwa icho munthu wakuseŵa, ndicho wazamuvuna. Pakuti uyo wakuseŵa vyathupi wazamuvuna kuvunda kufuma ku thupi lake.” (Gal. 6:7, 8) Ntheura ntchakuzirwa chomene kukana vyakusanguluska vyose ivyo vikukhozgera vinthu ivyo Yehova wakutinkha.—Sal. 97:10.

15. Kasi Yehova watipa chawanangwa wuli icho tikukondwa nacho?

¹⁵ Ŵanthu ŵa Yehova ŵakukondwa kuwonelera TV yithu ya pa Intaneti ya JW Broadcasting^®. Mudumbu munyake zina lake Marilyn wakati: “JW Broadcasting yanovwira kuti niŵe wakukondwa, ndipo ningawonelera chilichose pa TV iyi chifukwa vyose ivyo vikuŵapo ni viwemi. Para nachita phukwa panji nagongowa, nkhuwonelera waka nkhani yakukhozga panji pulogiramu ya Kusopa kwa Mulenji. Ivi vyanovwira kuti nijipulikenge kuti nili pafupi na Yehova na gulu lake. JW Broadcasting yili kusintha umoyo wane.” Kasi mukupindura na chawanangwa cha Yehova ichi? Padera pa pulogiramu ya mwezi na mwezi, pa JW Broadcasting pali vinthu vinandi vya kupulikizga waka na mavidiyo. Kweniso pali sumu zakukhozga izo mungawonelera na kupulikizga nyengo yiliyose.

16-17. Chifukwa wuli tikwenera kuŵa maso na nyengo iyo tikumalira pa vyakusanguluska, ndipo tingachita wuli nthena?

¹⁶ Tikwenera kuŵa maso na vyakusanguluska ivyo tikutemwa, na nyengo iyo tikumalirapo.  Para tingaleka kuŵa maso mbwenu timalirenge nyengo yinandi pa vyakusanguluska m’malo mwa kuteŵetera Yehova. Ŵanandi vikuŵasuzga kuti ŵaleke kumalira nyengo yinandi pa vyakusanguluska. Mudumbu munyake wa vyaka 18 zina lake Abigail wakuti: “Para namalizga milimo yane ya zuŵa ilo, nkhuwonelera TV, ndipo vikunovwira kuti nijipulikeko makora. Kweni para nindaŵikeko mahara, nkhumalira nyengo yinandi kuwonelera TV.” Munyamata munyake zina lake Samuel wakuti: “Nyengo zinyake nkhuwoneleranga tumavidiyo tunandi pa Intaneti. Paumaliro ndipo nkhuwamo kuti nawonelera mavidiyo kwa maora ghatatu panji ghanayi.”

¹⁷ Kasi mungachita wuli kuti muleke kumalira nyengo yinandi pa vyakusanguluska? Chakwamba, manyani unandi wa nyengo iyo mukumalira pa vyakusanguluska. Yezgani kumanya nyengo iyo mukumalira pa vyakusanguluska mu sabata yimoza. Lembani pa kalendara nyengo iyo mwamalira pakuwonelera TV, kuwona vinthu pa Intaneti, na kuseŵera magemu pa foni panji pa tabuleti. Para mwamanya kuti mukumalira nyengo yinandi pa vyakusanguluska, pangani ndondomeko. Ŵikani vinthu vyakuzirwa chomene pakwamba, ndipo nyengo iyo yakhalako yiŵe ya vyakusanguluska. Pamanyuma, lombani Yehova kuti wamovwirani kulondezga ndondomeko yinu. Para mungachita nthena mbwenu muŵenge na nyengo kuti musambirenge Baibolo pamwekha, musopenge na mbumba yinu, muwunganenge, kweniso mupharazgenge na kusambizga. Ntheura mujiyimbenge mulandu yayi na nyengo iyo mumalirenge pa vyakusanguluska.

18-19. Kasi tingalongora wuli kuti tikusopa Yehova pera?

¹⁸ Wakati walemba vyaumaliro wa charu cha Satana na vya charu chiphya icho chikwiza, mpositole Petrosi wakati: “Ntheura ŵakutemweka, pakuti mukulindilira vinthu ivi, yezgani chomene kuti paumaliro, iyo wazakamusangani ŵambura kabanga na ŵambura kalema ndiposo mu mtende.” (2 Pet. 3:14) Para tikulondezga ulongozgi uwu na kuyezgayezga kuŵa ŵatuŵa mwakuthupi na mwauzimu, tikulongora kuti tikusopa Yehova pera.

¹⁹ Satana na charu chake ŵalutilirenge kutiyezga kuti tiŵikenge vinthu vinyake pakwamba m’malo mwa Yehova. (Luka 4:13) Kweni nanga tingasangana na masuzgo wuli, tizomerezgenge waliyose yayi panji chinthu chinyake kuti chititimbanizge kuteŵetera Yehova. Taŵikapo mtima kusopa Yehova pera.