NKHANI YAKUSAMBIRA 41
Muzakalutilire Kugomezgeka Panyengo ya “Suzgo Yikuru”
“Temwani Yehova, mose ŵakugomezgeka kwa iyo! Yehova wakuvikilira ŵakugomezgeka.”—SAL. 31:23.
SUMU 129 Tilutilirenge Kuzizipizga
CHILATO CHA NKHANI IYI *
1-2. (a) Kasi sonosono apa mitundu yichemerezgenge kuti vichi? (b) Kasi tizgorenge mafumbo wuli?
GHANAGHANIRANI kuti ŵalongozgi ŵandyali ŵachemerezga kuti “bata na mtende.” Ŵamba kujithubwa kuti charu chose chili pa mtende. Mitundu yizamukhumba kuti tambe kugomezga kuti yamazga masuzgo ghose pa charu chapasi. Kweni icho chizamuchitika pamanyuma ntchakuti pazamuŵavya icho ŵangachitapo. Chifukwa wuli? Kuyana na uchimi wa mu Baibolo, “nyengo yeneyiyo pharanyiko lamabuchi lizamuŵawira, . . . ndipo ŵazamupona yayi.”—1 Tes. 5:3.
2 Pali mafumbo ghakuzirwa chomene agho ghakukhumbikwa mazgoro: Kasi ntchivichi icho chizamuchitika panyengo ya “suzgo yikuru”? Kasi Yehova wakukhazga kuti tizamuchita wuli panyengo iyi? Kasi tinganozgekera wuli kuti tizakalutilire kugomezgeka panyengo ya suzgo yikuru?—Mat. 24:21.
KASI NTCHIVICHI ICHO CHIZAMUCHITIKA PANYENGO YA “SUZGO YIKURU”?
3. Kuyana na Chivumbuzi 17:5, 15-18, kasi Chiuta wazamuparanya wuli “Babuloni Mukuru”?
3 Ŵazgani Chivumbuzi 17:5, 15-18. “Babuloni Mukuru” wazamuparanyika! Nga umo tayowoyera kale, panyengo iyo pazamuŵavya icho mitundu yingachitapo. Chifukwa wuli? Chifukwa “Chiuta [wazamuŵika] ichi mu mitima yawo kuchita maghanoghano ghake.” Kasi ni maghanoghano wuli? Ghakuparanya visopa vyose vyautesi kusazgapo matchalitchi agho ghakujichema kuti Ngachikhristu. * Chiuta wazamuŵika maghanoghano ghake mu mitima ya “masengwe 10” gha “chikoko chiswesi.” Masengwe 10 ghakwimira maboma ghose ghandyali agho ghakukhozgera “chikoko,” uwo ni wupu wa United Nations. (Chivu. 17:3, 11-13; 18:8) Para maboma ghandyali ghazakawukira chisopa chautesi, chizamuŵa chimanyikwiro chakuti suzgo yikuru yamba. Ichi chizamuŵa chakofya chomene ndipo waliyose pa charu chapasi wazamukhwaskika.
4. (a) Kasi mitundu yingakazayowoya vifukwa wuli ivyo vyapangiska kuti yiwukire chisopa chautesi? (b) Kasi ŵanthu awo ŵakaŵa mu visopa vyautesi ŵazamuchita wuli?
4 Tikumanya yayi vifukwa ivyo vizamupangiska mitundu kuwukira Babuloni Mukuru. Panji mitundu yizamuti visopa ndivyo vikutimbanizga mtende chifukwa chakuti vikunjilirapo pa ndyali. Panjiso yingazakayowoya kuti mawupu gha visopa ghajiwunjikira usambazi na vinthu vyakudura. (Chivu. 18:3, 7) Vikuwoneka kuti para mitundu yazakawukira visopa, ni ŵanthu wose yayi awo ŵali mu visopa ivi ŵazamuparanyika. M’malo mwake, vikulongora kuti mitundu yizamuparanya mawupu gha visopa. Para mawupu agha ghazakaparanyika, ŵanthu awo ŵakaŵa mu visopa ŵazamumanya kuti ŵalongozgi ŵa visopa ŵakaŵapusikanga. Ndipo ŵazamwamba kujipatura ku visopa ivi.
5. Kasi Yehova walayizga vichi vyakukhwaskana na suzgo yikuru, ndipo chifukwa wuli?
5 Baibolo likuyowoyapo yayi kuti pazamutora nyengo yitali wuli kuti Babuloni Mukuru wamare kuparanyika, kweni icho tikumanya ntchakuti yizamuŵa nyengo yitali yayi. (Chivu. 18:10, 21) Yehova walayizga kuti ‘wazamudumulizga mazuŵa’ gha suzgo yikuru na chilato chakuti “ŵakusoleka” ŵake kweniso chisopa chaunenesko chizakaponoskeke. (Mrk. 13:19, 20) Kweni kasi Yehova wakukhazga kuti tizakachite vichi para suzgo yikuru yamba kweniso pa nkhondo ya Aramagedoni?
KOLESKANI KUSOPA KUTUŴA
6. Chifukwa wuli ntchakukwana yayi kujipatura waka ku chisopa chautesi?
6 Nga umo tikadumbiskirana mu nkhani iyo yajumpha, Yehova wakukhazga kuti awo ŵakumusopa ŵajipature ku Babuloni Mukuru. Ndipouli, ntchakukwana yayi kujipatura waka ku chisopa chautesi. Tikwenera kuŵikapo mtima kuteŵetera Yehova. Tiyeni tiwone nthowa ziŵiri izo tingachitira nthena.
Tingalekanga yayi kuwungana kwithu pamoza nanga tingaŵa kuti tili mu nyengo zakusuzga (Wonani ndime 7) *
7. (a) Kasi tingachita wuli kuti tilutilire kupulikira fundo za Yehova za makhaliro ghawemi? (b) Kasi lemba la Ŵahebere 10:24, 25 likulongora wuli kuzirwa kwa kuwungana pamoza, chomenechomene sono?
7 Chakwamba, tikwenera kulutilira kupulikira fundo za Yehova za makhaliro ghawemi. Tingazomerezganga yayi kwendera maghanoghano gha charu pa nkhani ya makhaliro ghawemi. Mwachiyelezgero, tikuzomerezga yayi uzaghali wamtundu uliwose, kusazgapo kuti ŵanalume panji ŵanakazi ŵagonanenge ŵekhaŵekha panji kutorana ŵekhaŵekha. (Mat. 19:4, 5; Rom. 1:26, 27) Chachiŵiri, tikwenera kulutilira kusopa pamoza na Ŵakhristu ŵanyithu. Tikuchita nthena kulikose uko tingaŵa, kwali nkhu Nyumba ya Ufumu, munyumba za Ŵakaboni ŵanyithu panji mu malo ghanyake. Mulimose umo vingaŵira, tizamulekapo yayi kuwungana pamoza. Nakuti ntchakukhumbikwa kuwungana pamoza ‘chomenechomene apo tikuwona zuŵa likuneng’enera.’—Ŵazgani Ŵahebere 10:24, 25.
8. Kasi uthenga uwo tikupharazga uzamusintha wuli kunthazi?
8 Panyengo ya suzgo yikuru uthenga uwo tikupharazga, ukwenera kuti uzamusintha. Pasono, tikupharazga uthenga uwemi wa Ufumu na kuzgora ŵanthu kuŵa ŵasambiri. Kweni pa nyengo iyo, tizamupharazga uthenga wakuŵinya. Baibolo likuyelezgera uthenga uwu na vula ya malibwe. (Chivu. 16:21) Panji tizamupharazga uthenga wakuti charu cha Satana chakhala pachoko chomene kuti chiparanyikirethu. Panyengo yakwenelera, ndipo tizamumanya uthenga wenecho uwo tizamupharazga kweniso umo tizamuwupharazgira. Kasi tizamugwiliskira ntchito nthowa izo tapharazgira kwa vyaka vinandi panji tizamugwiliskira ntchito nthowa zinyake? Tikumanya yayi. Mulimose umo vingazakaŵira, kweni tizamuŵa na mwaŵi wakupharazga mwachikanga uthenga wa cheruzgo wa Yehova.—Ezek. 2:3-5.
9. Kasi mitundu yizamuchita wuli na uthenga uwo tizamupharazga, kweni tili na chigomezgo wuli?
9 Vikuwoneka kuti uthenga withu, uzamuŵaŵinya chomene ŵamitundu ndipo ŵazamuyezga kuti ŵatikanizge kupharazga. Nga umo sono tikugomezgera Yehova para tikupharazga, tizamukhumbikwiraso wovwiri wake pa nyengo iyi. Tikugomezga kuti Chiuta withu wazamutipa nkhongono kuti tifiske khumbo lake.—Mika 3:8.
NOZGEKERANI APO ŴANTHU ŴA CHIUTA ŴAZAMUWUKILIKA
10. Kuyana na Luka 21:25-28, kasi ŵanthu ŵazamuchita wuli na vinthu ivyo vizamuchitika pa suzgo yikuru?
10 Ŵazgani Luka 21:25-28. Pa suzgo yikuru ŵanthu ŵazamuzizwa para ŵawona kuti vyose ivyo ŵakathembanga vyamba kuparanyika. ‘Ŵazamukweŵeka mtima,’ chifukwa cha wofi wakuti ŵangakomeka panyengo yakusuzga chomene iyi mu mbiri ya ŵanthu. (Zef. 1:14, 15) Panyengo iyo, umoyo uzamuŵa wakusuzga chomene nanga nkhu ŵanthu ŵa Yehova. Pakuti tili ku chigaŵa cha charu yayi, tingazakasangana na masuzgo. Tingazakasoŵerwa vinthu vyakukhumbikwa pa umoyo.
11. (a) Para chisopa chautesi chazakaparanyika, chifukwa wuli ŵalongozgi ŵandyali na ŵanthu wose maso ghazamuŵa pa Ŵakaboni ŵa Yehova? (b) Chifukwa wuli tikwenera yayi kopa suzgo yikuru?
11 Ŵanthu awo visopa vyawo vizamuparanyika, ŵazamukwiya chomene kuwona kuti Ŵakaboni ŵa Yehova ŵachali kusopa. Ŵazamuwoneseska kuti ŵanthu ŵanyake nawo ŵamanye umo ŵakwiyira, ŵazamutumizganga mauthenga, nanga mpha Intaneti. Mitundu na mulongozgi wawo Satana, ŵazamutitinkha chomene chifukwa chisopa chithu ndicho chizamuŵa kuti chindaparanyike. Ŵazamufiska yayi chilato chawo chakuparanya visopa vyose pa charu chapasi. Ntheura maso ghawo ghazamuŵa pa ise. Apa ndipo mitundu yizamuŵa Gogi wa Magogi. * Yizamukolerana na kuwukira ŵanthu ŵa Yehova. (Ezek. 38:2, 14-16) Chifukwa chakuti tikumanya vyose yayi ivyo vizamuchitika pa suzgo yikuru, tingamba kwenjerwa. Ndipouli, tikwenera yayi kopa chifukwa Yehova wazamutipa ulongozgi wose wakukhumbikwa kuti tizakapone. (Sal. 34:19) ‘Tizamwimilira na kwinuska mitu yithu’ chifukwa tizamumanya kuti ‘kuwombokwa kwithu kuli pafupi.’ *
12. Kasi “muzga wakugomezgeka na wavinjeru” wakutovwira wuli kuti tinozgekere ivyo vizenge munthazi?
12 “Muzga wakugomezgeka na wavinjeru” wakutovwira kuti tilutilire kugomezgeka m’paka pa suzgo yikuru. (Mat. 24:45) Muzga wachita ivi munthowa zinandi, kweni tiyeni tiwonepo waka nthowa yimoza: Maungano gha chigaŵa gha panyengo yake agho ghakaŵako kwamba mu 2016 m’paka 2018. Nkhani izo zikayowoyeka pa maungano agha zikatovwira chomene kuti tikhozge mikhaliro iyo yingatovwira apo zuŵa la Yehova likusendelera. Tiyeni tiweleremo mwakudumura mikhaliro iyo tikasambira.
LUTILIRANI KUŴA ŴAKUGOMEZGEKA, ŴAKUZIZIPIZGA, NA ŴACHIKANGA
Nozgekerani sono kuti muzakapone pa “suzgo yikuru (Wonani ndime 13-16) *
13. Kasi tingachita wuli kuti tilutilire kugomezgeka kwa Yehova, ndipo chifukwa wuli ntchakuzirwa kuchita nthena sono?
13 Kugomezgeka: Mutu wa ungano wa chigaŵa wa mu 2016 ukaŵa wakuti “Lutilirani Kugomezgeka kwa Yehova!” Pa ungano uwu tikasambira kuti para tili paubwezi wakukhora na Yehova, tilutilirenge kuŵa ŵakugomezgeka. Tikakumbuskika kuti tingasendelera kwa Yehova para tikumulomba kufumira pasi pamtima na kufwilirapo kusambira Mazgu ghake. Kuchita nthena kukutipa nkhongono zakuzizipizgira masuzgo ghakuru. Apo umaliro wa charu cha Satana ichi ukusendelera, tikukhazga kuti tisanganenge na masuzgo agho ghatiyezgenge usange tili ŵakugomezgeka kwa Chiuta na Ufumu wake. Ŵanthu ŵalutilirenge kutinena. (2 Pet. 3:3, 4) Ivi vingachitika chifukwa chakuti tikunjilirapo yayi pa vya charu. Tikwenera kukhozga chipulikano chithu sono kuti tizakalutilire kugomezgeka pa suzgo yikuru.
14. (a) Kasi ntchivichi chizamusintha pa nkhani ya ŵabali awo ŵakulongozga? (b) Chifukwa wuli tikwenera kuzakagomezgeka pa nyengo iyo?
14 Panyengo ya suzgo yikuru, pazamuŵa kusintha pa nkhani ya ŵabali awo ŵakulongozga. Nyengo yizamukwana apo ŵakuphakazgika wose awo ŵachali pa charu chapasi, ŵazamuwunganyikira kuchanya kuti nawo ŵazakarweko nkhondo ya Aramagedoni. (Mat. 24:31; Chivu. 2:26, 27) Apa ndikuti Wupu Wakulongozga uzamuŵa kuti waluta kuchanya. Ndipouli, mzinda ukuru uzamulutilira kukolerana. Ŵabali ŵakwenelera awo mbamzinda ukuru ndiwo ŵazamulongozganga. Tizamulongora kuti ndise ŵakugomezgeka kwa Yehova para tizamupulikira ulongozgi uwo ŵazamupokera kufuma kwa Chiuta. Para tikukhumba kupona tikwenera kuzakaŵapulikira.
15. Kasi tingachita wuli kuti tisazgireko nkhongono zithu zakuzizipizgira, ndipo chifukwa wuli sono ndiyo nyengo yiwemi yakuchitira nthena?
15 Kuzizipizga: Mutu wa ungano wa chigaŵa wa mu 2017 ukaŵa wakuti “Mungavukanga Chara!” Ungano uwu ukatovwira kusazgirako nkhongono zithu zakuzizipizgira masuzgo. Tikasambira kuti kuzizipizga kwithu kukuthemba pakuti vinthu viŵe makora yayi, kweni pakugomezga Yehova. (Rom. 12:12) Tingaluwanga yayi layizgo la Yesu lakuti: “Uyo wazizipizgenge m’paka kuumaliro ndiyo wazamuponoskeka.” (Mat. 24:13) Layizgo ili likung’anamura kuti tikwenera kulutilira kugomezgeka nanga tingasangana na masuzgo wuli. Para sono ndipo tikuzizipizga viyezgo, chipulikano chithu chizamuŵa kuti ntchakukhora para suzgo yikuru yikwamba.
16. Kasi ntchivichi chikutovwira kuŵa na chikanga, ndipo tingachita wuli kuti tisazgireko chikanga chithu?
16 Chikanga: Mutu wa ungano wa chigaŵa wa mu 2018 ukaŵa wakuti “Khwimani Mtima!” Ungano uwu ukatikumbuska kuti tikuŵa ŵakukhwima mtima para tikuthemba Yehova m’malo mwa kuthemba nkhongono zithu. Nga umo vikuŵira kuti tikuzizipizga chifukwa cha kuthemba Yehova, tikweneraso kumuthemba kuti tiŵe na chikanga chenecho. Kasi tingachita wuli kuti tithembenge chomene Yehova? Tikwenera kuŵazga Mazgu ghake zuŵa lililose na kughanaghanirapo umo Yehova wakaponoskera ŵanthu ŵa mu nyengo yakale. (Sal. 68:20; 2 Pet. 2:9) Para mitundu yazakatiwukira pa suzgo yikuru, tikwenera kuzakaŵa na chikanga na kuthemba chomene Yehova kuluska kumanyuma kose. (Sal. 112:7, 8; Heb. 13:6) Usange sono ndipo tikuthemba Yehova, tizamuŵa na chikanga icho tikukhumbikwira para Gogi wazakatiwukira. *
LINDILIRANI MWAKUNWEKA KUWOMBOKWA KWINU
Yesu na ŵankhondo ŵake ŵakuchanya sonosono apa ŵaparanyenge ŵalwani ŵa Chiuta pa nkhondo ya Aramagedoni (Wonani ndime 17)
17. Chifukwa wuli tikwenera yayi kopa nkhondo ya Aramagedoni? (Wonani chithuzi cha pa chikopi.)
17 Nga ni umo yikayowoyera nkhani iyo yajumpha, taŵanandi takhala umoyo withu wose mu mazuŵa ghaumaliro. Nangauli vili nthena, tikugomezga kuti tizamupona pa suzgo yikuru. Charu ichi chizamumara pa nkhondo ya Aramagedoni. Ndipouli, palije chifukwa chakuŵira na wofi. Chifukwa wuli? Chifukwa Chiuta ndiyo wazamurwa nkhondo. (Zinth. 1:33; Ezek. 38:18-20; Zek. 14:3) Para Yehova wazakalangura, Yesu Khristu wazamulongozga pa nkhondo iyi. Wazamuŵa pamoza na ŵakuphakazgika awo ŵali kuwuskikira kuchanya kweniso na ŵangelo ŵanandi. Ŵazamwimikana na Satana, viŵanda vyake, pamoza na ŵasilikari ŵake ŵa pa charu chapasi.—Dan. 12:1; Chivu. 6:2; 17:14.
18. (a) Kasi Yehova walayizga vichi? (b) Kasi lemba la Chivumbuzi 7:9, 13-17 likumovwirani wuli kuti muleke kukayika ivyo vichitikenge munthazi?
18 Yehova walayizga kuti: “Palije chilwero icho chapangikira iwe icho chitondenge.” (Yes. 54:17) “Mzinda ukuru” wa ŵanthu ŵakugomezgeka awo ŵakusopa Yehova ‘uzamufuma mu suzgo yikuru’ ngwamoyo. Pamanyuma uzamulutilira kuteŵetera Yehova. (Ŵazgani Chivumbuzi 7:9, 13-17.) Baibolo likutipa vifukwa vyakupulikikwa makora ivyo tingagomezgera kuti tizamuponoskeka. Tikumanya kuti “Yehova wakuvikilira ŵakugomezgeka.” (Sal. 31:23) Wose awo ŵakutemwa na kulumba Yehova ŵazamukondwa kuwona kuti wakuthuwuska zina lake lituŵa.—Ezek. 38:23.
19. Kasi ni vinthu wuli viwemi ivyo tikulindilira ivyo vichitikenge sonosono apa?
19 Ghanaghanirani umo lemba la 2 Timote 3:2-5 lingaŵazgikira para lingayowoya vya ŵanthu awo ŵali mu charu chiphya, awo ŵandatimbanizgike na Satana. (Wonani bokosi lakuti “Umo Ŵanthu Ŵazamuŵira Panyengo Iyo.”) Mubali George Gangas, * uyo wakateŵeterapo mu Wupu Wakulongozga, wakati: “Charu chizamuŵa chiwemi chomene para waliyose wazakamba kusopa Yehova. Sonosono apa muŵenge na mwaŵi wakukhala mu charu chiphya. Muzamuŵa na umoyo utali nga ni Yehova. Muzamukhala kwamuyirayira.” Tikulindilira vinthu viwemi chomene!
SUMU 122 Muŵe Ŵakukhora, Ŵambura Kusunkhunyika!
^ ndime 5 Tikumanya kuti “suzgo yikuru” yizenge sonosono apa. Kasi ntchivichi chizamuchitikira ŵanthu ŵa Yehova panyengo iyi? Kasi Yehova wakukhazga kuti tizamuchita vichi? Kasi tikwenera kuŵa na mikhaliro wuli kuti tizakalutilire kugomezgeka? Nkhani iyi yizgorenge mafumbo agha.
^ ndime 3 MAZGU GHALONGOSOLEKA: Matchalitchi Agho Ghakujichema Kuti Ngachikhristu ni matchalitchi ghose agho ghakuti ghakulondezga Khristu kweni ghakusambizga yayi ŵanthu ŵawo kuti ŵasopenge Yehova munthowa iyo wakukhumba.
^ ndime 11 MAZGU GHALONGOSOLEKA: Mazgu ghakuti Gogi wa Magogi (mwakudumura Gogi) ghakung’anamura kukolerana kwa mitundu iyo yizamuwukira awo ŵakusopa Yehova panyengo ya suzgo yikuru.
^ ndime 11 Kuti mumanye vinandi za ivyo vizamuchitika kuti nkhondo ya Aramagedoni yiyambe, wonani mutu 21 mu buku la Ufumu wa Chiuta Ukuwusa! Kuti mumanye vinandi vya umo Gogi wa Magogi wazamuwukira ŵateŵeti ŵa Chiuta kweniso umo Yehova wazamuvikililira ŵanthu ŵake pa Aramagedoni, wonani mutu 17 na 18 mu buku la Yehova Wawezgerapo Kusopa Kutuŵa!
^ ndime 16 Mutu wa ungano wa chigaŵa wa mu 2019 wakuti “Chitemwa Chikumara Yayi!” ukatisimikizgira kuti tingakhalilira mu chitemwa cha Yehova kwamuyirayira na kuŵa ŵakuvikilirika na iyo.—1 Kor. 13:8.
^ ndime 19 Wonani nkhani yakuti ‘Zochita Zake Zamtsata’ mu Gongwe la Mulinda Lachicheŵa la Disembala 1, 1994.
^ ndime 65 MAZGU GHAKULONGOSORA CHITHUZI: Kagulu ka Ŵakaboni ŵa Yehova, mwachikanga kakuchita maungano kuthondo panyengo ya suzgo yikuru.
^ ndime 67 MAZGU GHAKULONGOSORA CHITHUZI: “Mzinda ukuru” wa ŵanthu ŵakugomezgeka awo ŵakusopa Yehova ‘wafuma mu suzgo yikuru’ ngwamoyo kweniso wakukondwa!
