1-2. (a) Kasi maboma ghanyake ghali kuchita vichi na ŵanthu ŵa Yehova, kweni ŵanthu aŵa ŵachita wuli? (b) Chifukwa wuli tingaŵa ŵakukondwa nanga ni para tikutambuzgika? (Wonaniso chithuzi cha pa chikopi.)

 PASONO nthena, mu vyaru vyakujumpha 30 mulimo withu ngwakukanizgika panji muli bani. Mu vinyake mwa vyaru ivi, ŵalara ŵa boma ŵali kujalira ŵabali na ŵadumbu ŵithu. Kasi ŵali kunanga vichi? Kuyana na Yehova palije icho ŵali kunanga. Icho ŵali kuchita nkhuŵerenga na kusambira Baibolo, kuphalira ŵanji ivyo ŵakugomezga, kweniso kuwungana na Ŵakhristu ŵanyawo. Kweniso ŵali kukana kunjilirapo pa nkhani za ndyali. Nangauli ŵakususkika chomene, ŵateŵeti ŵa Chiuta aŵa, ŵalutilira kuŵa na mtima wakufikapo * panji kuti kugomezgeka. Ŵalongora kuti ŵakusopa Yehova pera. Ndipo ivi vikuŵapangiska kuŵa ŵakukondwa.

² Mukwenera muli kuviwonapo vithuzi vya Ŵakaboni ŵachikanga aŵa ndipo mukawona kuti ŵakamwemweteranga. Iwo mbakukondwa chifukwa ŵakumanya kuti Yehova wakukondwa nawo chifukwa chakuti ŵakulutilira kugomezgeka. (1 Mid. 29:17a) Yesu wakati: “Mbakukondwa awo ŵakutambuzgika chifukwa cha urunji. . . Sekelerani na kukondwa chomene, pakuti njombe yinu njikuru kuchanya.”—Mat. 5:10-12.

3. Kuyana na Milimo 4:19, 20, kasi ŵapositole ŵakachita wuli apo ŵakatambuzgikanga, ndipo chifukwa wuli?

³ Ŵabali na ŵadumbu ŵithu ŵakusangana na masuzgo ghakuyanako waka na agho ŵapositole ŵakasangana nagho, apo ŵakatambuzgikanga chifukwa cha kupharazga vyakukhwaskana na Yesu. Mwakuwerezgawerezga, ŵeruzgi ŵa Khoti Likuru la Ŵayuda ‘ŵakaŵaphalira kuti ŵaleke kuyowoyaso panji kusambizga mu zina la Yesu.’ (Mil. 4:18; 5:27, 28, 40) Kasi ŵapositole ŵakachita wuli? (Ŵazgani Milimo 4:19, 20.) Iwo ŵakathera yayi, chifukwa ŵakamanyanga kuti munyake wamazaza chomene ndiyo wali kuŵatuma ‘kupharazga ku ŵanthu na kupeleka ukaboni wakukwana’ wakukhwaskana na Khristu. (Mil. 10:42) Ntheura Petrosi na Yohane, mwachikanga ŵakazgora kuti ŵapulikirenge Chiuta kuluska ŵeruzgi aŵa ndipo ŵakati ŵalekengepo yayi kuyowoya vya Yesu. Vikaŵa nga ni para ŵakufumbaso ŵeruzgi aŵa kuti, ‘Kasi ndikuti mukuwona kuti imwe muli na mazaza chomene kuluska Chiuta?’

4. Kuyana na Milimo 5:27-29, kasi ntchiyelezgero wuli icho ŵapositole ŵali kulongora ku Ŵakhristu wose ŵaunenesko, ndipo tingaŵayezga wuli?

⁴ Chiyelezgero chiwemi icho ŵapositole ŵakalongora, ndicho Ŵakhristu wose ŵaunenesko ŵakulondezga kwambira waka panyengo iyo. Ŵapositole ŵakaŵikapo mtima kupulikira Chiuta nga muwusi m’malo mwa ŵanthu.” (Ŵazgani Milimo 5:27-29.) Ŵati ŵatimbika chifukwa cha kulutilira kugomezgeka, ŵapositole ŵakafuma mu Khoti Likuru la Ŵayuda ‘ŵakusekelera pakuti ŵakapimika ŵakwenelera kuyuyulika chifukwa cha zina la Yesu,’ ndipo ŵakalutilira kupharazga.—Mil. 5:40-42.

5. Kasi ni mafumbo wuli agho tikukhumbikwira kuzgoreka?

⁵ Chiyelezgero icho ŵapositole ŵakalongora chikuwuskaso mafumbo ghanyake. Mwachiyelezgero, kasi ŵapositole ŵakachita wuli kuti ŵapulikire Chiuta kuluska ŵanthu, panyengo yimoza pera kupulikira dango la mu Malemba lakuti waliyose “wajilambikenge ku ŵamazaza”? (Rom. 13:1) Kasi mazuŵa ghano tingapulikira wuli “maboma na ŵamazaza” nga umo mpositole Paulosi wakayowoyera, uku tikulutilira kuŵa  ŵakugomezgeka kwa Chiuta uyo ni Muwusi withu mukuru?—Tito 3:1.

6. (a) Kasi “ŵamazaza” awo ŵakuyowoyeka pa Ŵaroma 13:1 mbanjani, ndipo ise tili na udindo wuli kwa iwo? (b) Kasi unenesko ngwakuti wuli pakuyowoya za ŵawusi wose ŵa ŵanthu?

⁶ Ŵazgani Ŵaroma 13:1. Mu vesi ili, lizgu lakuti “ŵamazaza” likuyowoya za ŵawusi ŵa charu awo ŵali na nkhongono na kuwusa ŵanyawo. Ŵakhristu ŵakwenera kujilambika ku ŵamazaza aŵa. Iwo ŵakovwirako kuti mu charu muŵeko mtende, kuwoneseska kuti ŵanthu ŵakupulikira dango, kweniso nyengo zinyake ŵakuvikilira ŵanthu ŵa Yehova. (Chivu. 12:16) Lekani tikuphalirika kuti tipelekenge misonkho, mithulo, kweniso tiŵawopenge na kuŵapa ntchindi. (Rom. 13:7) Ndipouli, ŵawusi ŵa maboma gha ŵanthu aŵa, ŵali na mazaza chifukwa Yehova ndiyo wali kuzomerezga kuti ŵaŵe nagho. Yesu wakalongosora mwakupulikikwa makora fundo iyi, apo wakafumbikanga mafumbo na Pontiyo Pilato Kazembe Wachiroma. Apo Pilato wakati wali na mazaza kumuponoska Yesu, panji kumupeleka kuti wafwe, Yesu wakati: “Mulekenge kupika mazaza ghakufuma kuchanya mphanyi mulije nkhongono pa ine.” (Yoh. 19:11) Ntheura nga umo vikaŵira na Pilato, mazaza agho ŵali nagho ŵawusi wose ŵa ŵanthu kweniso ŵandyali ghali na mphaka.

7. Kasi mphawuli apo tikwenera yayi kupulikira ŵawusi ŵa ŵanthu, ndipo ŵakwenera kukumbuka vichi?

⁷ Ŵakhristu ŵakwenera kupulikira maboma gha ŵanthu para malango ghawo ghakususkana yayi na malango gha Chiuta. Kweni tikwenera yayi kughapulikira para ghakutiphalira kuchita chinthu icho Chiuta wakukana, panji para ghakutikanizga kuchita chinthu icho Chiuta wali kutituma kuti tichite. Mwachiyelezgero, nyengo zinyake ŵangachichizga ŵachinyamata kuti ŵanjire usilikari na kurwako nkhondo. * Panji ŵangakanizga Baibolo na mabuku ghithu ghakulongosora Baibolo, kweniso kutikanizga kupharazga na kusopa. Para ŵawusi wakugwiliskira ntchito uheni mazaza ghawo, nga nkhutambuzga ŵasambiri ŵa Khristu, ŵazamuzgora kwa Chiuta. Yehova wakuwona.—Muph. 5:8.

8. Kasi pali mphambano wuli pakati pa lizgu lakuti “chapachanya” na lizgu lakuti “chapachanya nkhanira,” ndipo chifukwa wuli ntchakuzirwa kumanya mphambano iyo yilipo?

⁸ Lizgu lakuti “chapachanya” likung’anamura “chinthu chiwemi, chikuru, panji chinthu chapachanya.” Kweni kuti likung’anamura “chinthu chiwemi chomene, chikuru chomene panji chinthu chapachanya chomene” yayi. Mazgu agha ghakulongosora za lizgu linyake lakuti “chapachanya nkhanira.” Nangauli maboma gha ŵanthu ghakuchemeka kuti ŵamazaza ŵalara, panji kuti ŵapachanya, kweni paliso munyake uyo ngwapachanya chomene kuluska iwo. Mu Baibolo, kanayi kose Yehova wakuchemeka kuti “Wapachanya Nkhanira.”—Dan. 7:18, 22, 25, 27.

9. Kasi ntchimi Daniyeli yikawona vichi mu mboniwoni?

⁹ Ntchimi Daniyeli yikawona mboniwoni iyo yikalongolerathu pakweru kuti Yehova wali na mazaza chomene, kuluska ŵamazaza ŵanyake wose. Chakwamba Daniyeli wakawona vikoko vikuruvikuru vinayi, ivyo vikimiranga maufumu gha pa charu chose gha mu nyengo yakale, kweniso gha mu nyengo yithu yino. Maufumu agha ni Babuloni, Medi na Peresiya, Girisi na Romu kweniso ufumu wa pa charu chose wa mazuŵa ghano wa Britain na America. (Dan. 7:1-3, 17) Pamanyuma Daniyeli wakawona Yehova Chiuta wakhala pa chitengo kuchanya. (Dan. 7:9, 10) Ivyo ntchimi yakugomezgeka yikawona kufuma apa, vikwenera kuŵa chenjezgo ku ŵawusi ŵa mazuŵa ghano.

10. Kuyana na Daniyeli 7:13, 14, 27, kasi mbanjani awo Yehova wakuŵapa muwuso, kuŵa na mazaza pa charu chose chapasi, ndipo ivi vikulongorachi vyakukhwaskana na Iyo?

¹⁰ Ŵazgani Daniyeli 7:13, 14, 27. Mu mboniwoni  iyi, Daniyeli wakawona kuti Chiuta wakapoka nkhongono na mazaza ghose ku maboma gha ŵanthu, na kupeleka ku ŵanyake awo mbakwenelera kweniso awo mbankhongono chomene. Kasi wakapeleka kwa njani? Wakapeleka ku “munthu munyake wakuŵa nga ni mwana wa munthu,” Yesu Khristu, kweniso ku “ŵatuŵa ŵa Wapachanya Nkhanira,” ŵa 144,000, awo “ŵazamuwusa muyirayira swi.” (Dan. 7:18) Apa ntchakuwonekerathu kuti Yehova ‘Ngwapachanya Nkhanira’ chifukwa ndiyo pera wali na mazaza kuchita vyanthena ivi.

11. Kasi Daniyeli wakalembaso vichi icho chikulongora kuti Yehova ngwapachanya nkhanira pa mitundu yose?

¹¹ Vyakuchitika ivyo Daniyeli wakawona mu mboniwoni vikukolerana chomene na ivyo wakayowoya kukwambilira. Daniyeli wakati: “Chiuta wakuchanya,” “wakuwuskapo mathemba na kwimika mathemba.” Wakalembaso kuti “Wapachanya Nkhanira ndiyo Wakuwusa mu ufumu wa ŵanthu [ndipo] . . . , wakupeleka Ufumu kwa uyo mweneko wakhumba.” (Dan. 2:19-21; 4:17) Kasi yikaŵapo nyengo iyo Yehova wakawuskapo mathemba panji kwimika mathemba? Enya!

12. Yowoyani viyelezgero vya umo Yehova wakawuskirapo mathemba ghanyake pa chitengo mu nyengo yakale. (Wonani chithuzi.)

¹² Yehova walongora pakweru kuti wali na mazaza chomene pa “ŵamazaza” ŵa charu ichi. Wonani viyelezgero vitatu ivi. Farawo wa ku Eguputo wakakora wuzga ŵanthu ŵa Yehova, ndipo mwakuwerezgawerezga wakakana kuŵafumiska. Kweni Chiuta wakaŵafumiska na kubizga Farawo mu Nyanja Yiswesi. (Eks. 14:26-28; Sal. 136:15) Themba la Babuloni Belishazara likapanga chiphikiro ndipo ‘likajikuzga kwimikana na Fumu yakuchanya’ kweniso ‘likalumba ŵachiuta ŵa siliva na golide’ m’malo mwa kulumba Yehova. (Dan. 5:22, 23) Kweni Chiuta wakamuyuyura munthu wakujikuzga uyu. “Mu usiku wenewura,” Belishazara wakakomeka ndipo ufumu wake ukapelekeka ku Ŵamedi na Peresiya. (Dan. 5:28, 30, 31) Themba la Palestina Herode Agripa I likakoma mpositole Yakobe ndipo pamanyuma likajalira mpositole Petrosi na chilato chakuti mpositole uyu nayo limukome. Kweni Yehova wakatondeska pulani ya Herode. ‘Mungelo wa Yehova wakamutimba’ ndipo wakafwa.—Mil. 12:1-5, 21-23.

13. Yowoyani chiyelezgero icho chikulongora umo Yehova wakathereskera ŵawusi awo ŵakakolerana.

¹³ Yehova walongoraso kuti wali na mazaza chomene nanga mpha ŵawusi awo ŵakolerana.  Wakaŵalwera Ŵaisrayeli na kovwira kuparanya mathemba 31 gha Ŵakenani agho ghakakolerana ndipo Ŵaisrayeli ŵakapoka vigaŵa vikuru vya Charu cha Layizgano. (Josh. 11:4-6, 20; 12:1, 7, 24) Yehova wakawovwiraso Ŵaisrayeli kuthereska Benihadadi Themba la Siriya pamoza na ŵawusi ŵanyake 32 awo ŵakarwanga na Israyeli.—1 Mathe. 20:1, 26-29.

14-15. (a) Kasi Themba Nebukadinezara na Dariyasi ŵakayowoya vichi vyakukhwaskana na muwuso wa Yehova? (b) Kasi wamasalimo wakayowoya vichi vyakukhwaskana na Yehova na Mtundu wake?

¹⁴ Kanandi waka Yehova walongora kuti Ngwapachanya Nkhanira. Nyengo yinyake Themba la Babuloni Nebukadinezara likajikuzga chifukwa cha ‘nkhongono zake na uchindami wa ukuru wake,’ m’malo mwa kujiyuyura na kuzomerezga kuti Yehova ndiyo wakwenelera kulumbika. Chifukwa chakuchita nthena, Yehova wakalifunthiska themba ili. Nebukadinezara wakati wachira, ‘wakalumba Chiuta Wapachanya Nkhanira’ na kuzomerezga kuti ‘muwuso wa Yehova ngwamuyirayira.’ Wakasazgiraposo kuti: “Palije uyo wangamukanizga.” (Dan. 4:30, 33-35) Pamanyuma pakuti Daniyeli wayezgeka usange ngwakugomezgeka kwa Chiuta, kweniso Yehova wati wamuponoska mu khululu la nkhalamu, Themba Dariyasi likalangura kuti: “Ŵanthu ŵakwenera kopa na kumbwambwantha pamaso pa Chiuta wa Daniyeli. Chifukwa ni Chiuta wamoyo ndipo wakukhalilira muyirayira. Ufumu wake uzamuparanyikapo chara, ndipo muwuso wake ngwamuyirayira.”—Dan. 6:7-10, 19-22, 26, 27.

¹⁵ Wamasalimo wakati: “Yehova wapindingura viŵembu vya mitundu. Watimbanizga maghanoghano gha ŵanthu.” Wakasazgiraposo kuti: “Ngwakukondwa mtundu uwo Chiuta wake ni Yehova, ŵanthu awo waŵasora kuŵa chiharo chake.” (Sal. 33:10, 12) Tili na chifukwa chakupulikikwa nadi chakuŵira na mtima wakufikapo kwa Yehova!

16. Kasi tikugomezga kuti chizamuchitika ntchivichi pa nyengo ya “suzgo yikuru,” ndipo chifukwa wuli? (Wonani chithuzi.)

¹⁶ Tawona ivyo Yehova wakachita mu nyengo yakale. Ipo kasi tikwenera kukhazgaso vichi ivyo vichitikenge munthazi sonosono apa? Tili na chigomezgo chose kuti Yehova wazamuponoska  ŵateŵeti ŵake ŵakugomezgeka pa nyengo ya “suzgo yikuru” iyo yikwiza. (Mat. 24:21; Dan. 12:1) Wazamuchita ivi apo Gogi wa Magogi, uko nkhukolerana kwa mitundu, wazamuwukira ŵateŵeti ŵakugomezgeka ŵa Yehova pa charu chose. Nanga ni para kukolerana uku kuzamuŵa kwa vyaru vyose 193 ivyo vili mu wupu wa United Nations, vizamutondeka kwimikana na Wapachanya Nkhanira pamoza na ŵankhondo ŵake ŵakuchanya. Yehova wakulayizga kuti: “Nizamulongora nadi ukuru wane na kujituŵiska na kujimanyiska pamaso pa mitundu yinandi. Ndipo ŵazamumanya kuti ine ndine Yehova.”—Ezek. 38:14-16, 23; Sal. 46:10.

17. Kasi Baibolo likuti ntchivichi chizamuchitikira mathemba gha pa charu chapasi kweniso awo mbamtima wakufikapo pamaso pa Yehova?

¹⁷ Kuwukira kwa Gogi kuzamupangiska nkhondo ya Aramagedoni ndipo Yehova wazamuparanya “mathemba gha charu chose.” (Chivu. 16:14, 16; 19:19-21) Kweni ‘ŵakunyoloka ŵekha ndiwo ŵazamukhala pa charu chapasi ndipo awo mbamtima wakufikapo ndiwo ŵazamusidikamo.’—Zinth. 2:21, mazgu ghamusi.

18. Kasi Ŵakhristu ŵanandi ŵaunenesko ŵachita wuli, ndipo chifukwa wuli? (Daniyeli 3:28)

¹⁸ Kwamba kale, Ŵakhristu ŵanandi ŵaŵika umoyo wawo pangozi kweniso kuleka wanangwa wawo chifukwa cha kutemwa Yehova Muwusi wawo mukuru. Ŵakhristu aŵa ŵakuŵikapo mtima kulutilira kugomezgeka kwa Yehova. Ŵali nga Mbahebere ŵatatu awo ŵakaŵikapo mtima kuŵa ŵakugomezgeka kwa Wapachanya Nkhanira uyo pamanyuma wakaŵaponoska mu ng’anjo ya moto.—Ŵazgani Daniyeli 3:28.

19. Kasi Yehova wazamuwona vichi pakweruzga ŵanthu ŵake, ndipo fundo iyi yikutichiska kuti sono tikwenera kuchita vichi?

¹⁹ Wamasalimo Davide wakalemba vyakukhwaskana na kuzirwa kwa kuŵa wakunyoloka kwa Yehova panji kuti kuŵa na mtima wakufikapo. Iyo wakati: “Yehova ndiyo wadumurenge mulandu wa ŵanthu. Neruzgani, A Yehova, kuyana na urunji wane kweniso kuyana na kunyoloka kwane.” (Sal. 7:8) Davide wakalembaso kuti: “Mphanyi urunji na kunyoloka vyanisungilira.” (Sal. 25:21) Ntheura chinthu chiwemi chomene icho tingachita nkhukhalilira ŵakugomezgeka kwa Yehova na kulutilira kuŵa ŵakunyoloka kwa iyo kwali visuzge viti wuli! Para tichitenge nthena, tijipulikenge nga umo wamasalimo wakajipulikira, uyo wakalemba kuti: “Mbakukondwa awo mbamtima wakufikapo . . . , awo ŵakwenda mu dango la Yehova.”—Sal. 119:1, mazgu ghamusi.