ŴANTHU ŴANYAKE ŴAKUGOMEZGA kuti para tafwa tikukaŵaso ŵamoyo kunyake. Kweni ŵanyake ŵakuti para tafwa, mbwenu vyose vyamalira papo. Kasi imwe mukuti wuli?

IVYO BAIBOLO LIKUYOWOYA

“Ŵakufwa ŵakumanya kalikose chara.” (Mupharazgi 9:5) Para tafwa, ndikuti taleka kuŵako.

NI VICHI VINYAKE IVYO TIKUSAMBIRA MU BAIBOLO?

• Adamu, uyo wakaŵa munthu wakwamba kulengeka, wakapangika “kufuma ku dongo.” Wakati wafwa, wakawelera ku dongo. (Genizesi 2:7; 3:19) Ntheura ŵanthu wose awo ŵakufwa ŵakuwelera ku dongo.​—Mupharazgi 3:19, 20.

• Ŵanthu awo ŵafwa ŵakufwatuka ku zakwananga zawo. (Ŵaroma 6:7) Ntheura para munthu wafwa, wakulangikaso yayi.

MUNGAZGORA KUTI?

• Enya

• Yayi

• Panyake

IVYO BAIBOLO LIKUYOWOYA

“Kuzamuŵa chiwuka.”—Milimo 24:15.

NI VICHI VINYAKE IVYO TIKUSAMBIRA MU BAIBOLO?

• Kanandi Baibolo likuyaniska nyifwa na tulo. (Yohane 11:11-14) Chiuta wazamuwuska ŵakufwa nga umo ise tikuwuskira munthu uyo wali mu tulo.​—Yobu 14:13-15.

• Baibolo likuzunurapo ŵanthu awo ŵakafwa ndipo ŵakawuskika. Ntheura nase tili na chigomezgo chose kuti awo ŵali kufwa ŵazamuwuka.​—1 Mathemba 17:17-24; Luka 7:11-17; Yohane 11:39-44.