Kasi Charu Ichi Chili Pafupi Kumara?
Panyake mukumanya ivyo Baibolo likuyowoya pa nkhani ya umaliro wa charu. (1 Yohane 2:17) Kweni kasi likung’anamura kuti pa charu chapasi pazamuŵavya mtundu uliwose wa ŵanthu? Kasi mu charu muzamuŵavya chamoyo chilichose ndipo na charu wuwo chizamuparanyikirathu?
ZGORO LA MU BAIBOLO PA MAFUMBO GHAŴIRI AGHA NDAKUTI YAYI!
Kasi Ntchivichi Icho Chizamumara Yayi?
ŴANTHU
Ivyo Baibolo likuyowoya: Chiuta “wakachilenga waka yayi [charu], kweni wakachipanga kuti ŵanthu ŵakhalengemo.”—YESAYA 45:18.
CHARU CHAPASI
Ivyo Baibolo likuyowoya: “Muwiro umoza ukuluta, muwiro unyake ukwiza, kweni charu chapasi chikukhalilira muyirayira.”—MUPHARAZGI 1:4.
IVYO LEMBA ILI LIKUNG’ANAMURA: Mwakuyana na Baibolo, charu chapasi chizamumarapo yayi ndipo ŵanthu ŵalutilirenge kukhalamo. Kweni kasi Baibolo likung’anamurachi para likuti charu chizamumara panji kuti kuparanyika?
FUNDO YAKUTI MUGHANAGHANIREPO: Baibolo likuyaniska umaliro wa charu ichi na ivyo vikachitika mu nyengo ya Nowa. Panyengo yira ‘charu chikazura na nkhaza.’ (Genizesi 6:13) Kweni Nowa wakaŵa murunji. Ndipo Chiuta wakamuponoska Nowa pamoza na banja lake, kweni wakaparanya ŵanthu ŵaheni na Chigumula. Pakuyowoya za ivyo vikachitika, Baibolo likuti: “Vinthu ivi vikaparanya charu icho chikaŵako nyengo yira apo chikazura na maji.” (2 Petrosi 3:6) Uwu ndiwo ukaŵa umaliro wa charu panyengo yira. Kweni kasi ntchivichi icho chikaparanyika? Ŵanthu ŵaheni, charu chapasi yayi. Lekani Baibolo para likuyowoya za umaliro wa charu, likung’anamura charu cheneko yayi, m’malo mwake likung’anamura kuparanyika kwa ŵanthu ŵaheni na vinthu vyose viheni ivyo vilimo.
Kasi Ntchivichi Icho Chizamumara?
MASUZGO KWENISO UHENI
Ivyo Baibolo Likuyowoya: “Kwakhala kanyengo kachoko waka, ŵaheni ŵazamuŵakoso chara. Muzamupenja apo ŵakakhalanga, ndipo ŵazamuŵapo yayi. Kweni ŵakuzika ŵazamuhara charu chapasi, ŵazamukondwa chomene na mtende ukuru.”—SALIMO 37:10, 11.
IVYO LEMBA ILI LIKUNG’ANAMURA: Chigumula cha mu nyengo ya Nowa chikamazgirathu uheni yayi chifukwa chikati chajumpha ŵanthu ŵaheni ŵakaŵaposo ndipo umoyo ukaŵa wakusuzga kwa waliyose. Ndipouli, sonosono apa, Chiuta wamazgirengethu vinthu viheni. Wamasalimo wakati: “Ŵaheni ŵazamuŵakoso chara.” Chiuta wazamumazga uheni kwizira mu Ufumu wake ilo ni boma la kuchanya ilo lizamuwusa ŵanthu ŵarunji pa charu chose chapasi.
FUNDO YAKUTI MUGHANAGHANIREPO: Kasi awo ŵakuwusa charu pasono, ŵazamuzomera kuwusika na Ufumu wa Chiuta? Baibolo likulongora kuti ŵazamuzomera yayi. Mwambura mahara iwo ŵazamulimbana na Ufumu wa Chiuta. (Salimo 2:2) Kasi chizamuchitika ntchivichi? Ufumu wa Chiuta uzamuwuskapo maboma ghose gha ŵanthu, ndipo “iwo wekha ndiwo uzamuŵako kwamuyirayira.” (Daniyeli 2:44) Kweni chifukwa wuli maboma gha ŵanthu ghakwenera kumara?
ICHO CHIKUKHUMBIKWA—Maboma gha Ŵanthu Ghakwenera Kumara
Ivyo Baibolo likuyowoya: “Munthu uyo wakwenda wangalongozga yayi mendero ghake.”—YEREMIYA 10:23.
IVYO LEMBA ILI LIKUNG’ANAMURA: Ŵanthu ŵakalengeka kuti ŵajiwusenge ŵekha yayi. Ŵakutondeka kulamulira makora ŵanyawo kweniso kumazga masuzgo ghawo.
FUNDO YAKUTI MUGHANAGHANIREPO: Buku linyake likuyowoya kuti maboma ghatondeka kumazga “masuzgo agho ghali pa charu chose nga ni ukavu, njara, matenda, masoka gha chilengiwa, nkhondo panji vinthu vinyake vyankhaza.” Buku ili likulutilizga kuti: “Ŵanthu ŵanyake . . . ŵakugomezga kuti boma la pa charu chose lekha ndilo lingamazga masuzgo agha.” (Britannica Academic) Ndipouli, nanga maboma ghose pa charu chapasi ghangakolerana, kweni charu chingaŵa kuti chichali kuwusika na ŵanthu ŵakwananga awo ŵangamazga yayi masuzgo agho taghazunura pachanya apa. Ufumu wa Chiuta ndiwo ni boma lekha ilo lili na nkhongono kumazga masuzgo pa charu chose kwamuyirayira.
Ntheura mwakuyana na ivyo Baibolo likuyowoya, tikwenera yayi kopa umaliro wa charu chiheni ichi panji kuti vinthu viheni ivyo vikuchitika. M’malo mwake, tikwenera kulindilira mwakunweka chifukwa charu chiheni ichi chizamufumapo ndipo charu chiphya cha Chiuta ndicho chizamunjira mu malo mwake.
Kweni kasi vyose ivi vizamuchitika pawuli? Nkhani yakulondezgapo yilongosorenge zgoro la mu Baibolo.
Panji Mungatemwa Kuŵerengaso Nkhani Izi
GONGWE LA MULINDA
Kasi “Umaliro” Ni Vichi?
Kasi mukumanya kuti “umaliro” uwo Baibolo likuyowoya ni nkhani yiwemi?
MAFUMBO AGHO BAIBOLO LIKUZGORA
Kasi Charu Chapasi Ndicho Chizamuparanyika?
Baibolo likutiphalira ivyo Chiuta wakukhumba kulazga ku charu chapasi.
MAFUMBO AGHO BAIBOLO LIKUZGORA
Kasi Nkhondo ya Aramagedoni Ni Vichi?
Mazgu ghakuti Aramagedoni ghakuzunulika kamoza mu Baibolo, kweni Malemba ghanandi mu Baibolo ghakuyowoyapo vya nkhondo iyi.
MAFUMBO AGHO BAIBOLO LIKUZGORA
Kasi Nkhani ya Nowa na Chiwowota Ntchidokoni Waka?
Baibolo likuti Chiuta wakiziska Chigumula pa charu chapasi kuti waparanye ŵanthu ŵaheni. Kasi pali ukaboni wuli wa mu Malemba uwo ukulongora kuti Chigumula chikachitika nadi?
