Enya, ŵaliko nadi. Kasi ŵakafuma nkhu? Kumbukani kuti Chiuta wakalenga ŵangelo na wanangwa wakusankha chiwemi panji chiheni. Pamasinda pakuti Chiuta walenga Adamu na Eva, mungelo munyake murunji wakagwiliskira ntchito uheni wanangwa wake wakusankha, ndipo wakambiska uchigaluka pa charu chapasi. Iyo wakapangiska kuti Adamu na Eva ŵagalukire Chiuta. (Genizesi 3:1-7; Chivumbuzi 12:9) Baibolo likuyowoya yayi zina la mungelo uyo wakachita ivi kweniso udindo uwo wakaŵa nawo pambere wandagaluke. Wati wagaluka, wakamba kumanyikwa na zina lakuti Satana, kung’anamura “Wakususka,” na Dyabulosi, kung’anamura “Mutesi.”—Mateyu 4:8-11.

Chachitima ntchakuti uchigaluka uwu ukamalira penepara yayi. Mu nyengo ya Nowa, ŵangelo ŵanyake “ŵakaleka malo ghawo ghakwenelera kukhalako” kuchanya. Ŵangelo aŵa ŵakiza pa charu chapasi na kujizgora nga mbanthu. Ŵakatora ŵanakazi na kuchita vinthu vyakupambana na umo Chiuta wakaŵalengera.—Yuda 6; Genizesi 6:1-4; 1 Petrosi 3:19, 20.

Kasi vikaŵamalira wuli? Apo Chiuta wakaparanya charu chapasi na Chigumula, ŵangelo ŵaheni aŵa awo ŵakuchemekaso viŵanda, ŵakaweleraso kuchanya. Ndipouli, Chiuta wakaŵazomerezga yayi kuti ŵawelere pa ‘malo ghawo ghakwamba.’ M’malo mwake, Chiuta wakaŵaŵika “mu chisi chakofya” panji kuti ukhaliro wapasi chomene uwo Baibolo likuti Tatarasi. (Yuda 6; 2 Petrosi 2:4) Satana Dyabulosi uyo ni “fumu ya viŵanda” kweniso uyo “wakujizgora nga ni mungelo wa ungweru” ndiyo wakulamulira viŵanda ivi.—Mateyu 12:24; 2 Ŵakorinte 11:14.

Baibolo likuti Ufumu wa Mesiya uwo ni boma la Chiuta, ukamba kuwusa kuchanya mu 1914. * Pa nyengo iyi Satana na viŵanda vyake ŵakachimbizgika kuchanya na kuponyeka pa charu chapasi. Vinthu viheni ivyo vikuchitika pa charu chapasi mbukaboni wakuti Satana wali nadi pa charu chapasi.—Chivumbuzi 12:9-12.

Ndipouli, kuyana na umo vinthu vyahenipira mu charu, mbukaboni wakuti Satana na viŵanda vyake ŵafumiskikengepo. Para Ufumu wa Chiuta wazakawusa vyaka 1000, Satana na viŵanda vyake ŵazamuzomerezgeka kuyezga ŵanthu kaumaliro kwa kanyengo kachoko waka. Kufuma apo ŵazamuparanyika kwamuyirayira.—Mateyu 25:41; Chivumbuzi 20:1-3, 7-10.