Kasi Mphawuli Apo Thinkho Lizamumalirathu?
Nanga vingaŵa kuti ise tamazga thinkho mu mtima withu, kweni tingalekeska yayi ŵanthu kuti ŵaleke kutinkhana. Ŵanthu ŵambura mulandu ŵakulutilira kutinkhika. Ntheura kasi ntchivichi icho chingawovwira kuti thinkho limalirethu?
Ni Yehova Chiuta pera uyo wangamazgirathu kuti ŵanthu ŵaleke kutinkhana. Ivi ndivyo Baibolo likulayizga kuti Yehova wazamuchita.—Zintharika 20:22.
CHIUTA WAZAMUMAZGA IVYO VIKWAMBISKA THINKHO
-
1. SATANA DYABULOSI. Satana, uyo ni mungelo wakugaluka ndiyo wakupangiska ŵanthu kuti ŵatinkhanenge. Chiuta wazamuparanya Satana kweniso ŵanthu wose awo ŵakutinkha ŵanyawo.—Salimo 37:38; Ŵaroma 16:20.
-
2. CHARU CHIHENI CHA SATANA. Chiuta wazamuwuskapo vinthu vyose ivyo vikupangiska uheni pa charu chapasi, kusazgapo ŵandyali, na ŵalongozgi ŵavisopa awo ŵakukhozgera kuti ŵanthu ŵatinkhanenge. Chiuta wazamuparanyaso ŵamalonda ŵaryezi awo ŵakulyera ŵanyawo masuku pa mutu.—2 Petrosi 3:13.
-
3. KWANANGA UKO ŴANTHU ŴALI KUHARA. Baibolo likulongosora kuti ŵanthu wose ŵali kuhara kwananga ndipo kanandi ivyo ŵakughanaghana na kuchita vikuŵa viheni. (Ŵaroma 5:12) Chimoza mwa viheni ivi ni thinkho. Chiuta wazamovwira ŵanthu kumazga mikhaliro yose yiheni mwakuti thinkho nalo lizamumalirathu.—Yesaya 54:13.
BAIBOLO LIKULAYIZGA KUTI THINKHO KUZAMUŴAVYA
-
1. KUZAMUŴAVYA VINTHU VYAMBURA URUNJI. Ufumu wa Chiuta ndiwo uzamulamulira pa charu chose. Uzamulamulira mwaurunji kufuma kuchanya, ndipo uzamulamulira kwamuyirayira. (Daniyeli 2:44) Kuzamuŵavya kusankhana mtundu. Chiuta wazamunozga vinthu mwakuti pazamuŵa urunji wekhawekha.—Luka 18:7.
-
2. WALIYOSE WAZAMUŴA PAMTENDE. Palije uyo wazamusuzgika chifukwa cha viwawa panji nkhondo. (Salimo 46:9) Charu chapasi ghazamuŵa malo gha mtende chifukwa muzamuŵa ŵanthu ŵekha ŵakutemwa mtende.—Salimo 72:7.
-
3. WALIYOSE WAZAMUKHALA KWAMUYIRAYIRA MU CHARU CHIWEMI. Waliyose pa charu chapasi wazamutemwa munyake na mtima wose. (Mateyu 22:39) Palije uyo wazamusuzgika maghanoghano, panji na vinthu viheni vyakumasinda. (Yesaya 65:17) Pa nyengo iyo pa charu pazamuŵavya kutinkhana, ndipo ŵanthu “ŵazamukondwa chomene na mtende ukuru.”—Salimo 37:11.
Kasi namwe mungatemwa kuzakakhala mu charu chanthena ichi? Nanga ni sono nthena, chifukwa cha kusambira fundo za mu Baibolo, ŵanthu ŵanandi ŵakuleka kutinkha ŵanyawo. (Salimo 37:8) Ivi ndivyo Ŵakaboni ŵa Yehova ŵakuchita pa charu chose chapasi. Nangauli iwo ŵakupambana mitheto na uko ŵakulira, kweni mbakukolerana ndipo ŵakutemwana yumoza na munyake.—Yesaya 2:2-4.
Ŵakaboni ŵa Yehova ŵangakondwa kumuphaliraniko umo mungachitira na vinthu vyambura urunji kweniso suzgo la kusankhana mtundu. Ivyo mungasambira vingamovwirani mwapachokopachoko kumazga thinkho ndipo mungamba kutemwa ŵanthu wose. Mungasambira umo mungalongolera chitemwa nanga nkhu ŵanthu awo ŵakuwonga yayi panji awo ŵakutinkha ŵanyawo. Ntheura mungaŵa ŵakukondwa sono ndipo mukhalenge makora na ŵanyinu. Kweni kwakuluska vyose, musambirenge kumanya ivyo mungachita kuti muzakakhale mu Ufumu wa Chiuta umo muzamuŵavya kutinkhana.—Salimo 37:29.
Panji Mungatemwa Kuŵerengaso Nkhani Izi
GONGWE LA MULINDA
Kasi Ufumu wa Chiuta Uzamufiska Vichi?
Yesu wakamanyanga kuti ni Ufumu wa Chiuta pera uwo ungamazga masuzgo pa charu chapasi. Kasi ni vichi ivyo Ufumu wa Chiuta uli kuchita kale ndipo ni vichi ivyo ufiskenge?
MAFUMBO AGHO BAIBOLO LIKUZGORA
Kasi Chigomezgo Ningachisanga Nkhu?
Pali chinthu chinyake icho chingamovwirani chomene kusintha umoyo winu pasono na kumupani chigomezgo chiwemi chamunthazi.
NKHANI ZINYAKE
Kasi Vingachitika Kuti pa Charu Pachitikenge Vinthu Vyaurunji?
Baibolo likulongora kuti urunji wenecho ukufuma kwa Chiuta, uyo wakuzirwiska umoyo wa munthu waliyose.
WUKANI!
Sankho—Munkhwala Uwo Uzamumazga Sankho
Kasi ni vinthu wuli vinayi ivyo Ufumu wa Chiuta uzamuchita kuti umazge sankho?
