1. Kasi ni mzimu wuli uwemi uwo tikuwona pakati pa ŵanthu ŵa Yehova?

VYAKA vinandi ivyo vyajumpha, Baibolo likayowoyerathu kuti ŵanthu ŵa Chiuta ‘ŵazamujipeleka na mtima wose’ kuteŵetera Yehova mwakulongozgeka na Mwana wake. (Sal. 110:3) Uchimi uwu ukufiskika nadi mazuŵa ghano. Chaka chilichose, ŵateŵeti ŵa Yehova ŵakumalira maora mamiliyoni ghanandi pa mulimo wa kupharazga. Ŵakuchitako ntchito iyi mwakujipeleka ŵekha kweniso kwambura kulipirika. Ŵakupaturaso nyengo yakovwilira ŵasopi ŵanyawo mwakuthupi, maghanoghano, na mwauzimu. Ŵabali ŵakwimikika ŵakumalira maora ghanandi pakunozgekera vigaŵa vya maungano kweniso kukhozga ŵasopi ŵanyawo. Chifukwa wuli ŵakuchita milimo yose iyi? Chifukwa ŵakutemwa Yehova na ŵanthu.—Mat. 22:37-39.

2. Kuyana na lemba la Ŵaroma 15:1-3, kasi Yesu wakalongora chiyelezgero wuli?

² Yesu wakalongora chiyelezgero chiwemi chomene pakudagizga vyakukhumba vya ŵanji m’malo mwa vyake. Tikuchita vyose ivyo tingafiska kuti tilondezge mendero ghake. (Ŵazgani Ŵaroma 15:1-3.) Para tichitenge nthena, tisangenge vitumbiko vinandi. Yesu wakati: “Uyo wakupeleka wakukondwa chomene kuluska uyo wakupokera.”—Mil. 20:35.

3. Kasi tiwonenge vichi mu nkhani iyi?

³ Mu nkhani iyi, tiwonenge vinyake mwa vinthu ivyo Yesu wakachita kuti wawovwire ŵanji ndiposo umo nase tingamuyezgera. Tidumbiskanengeso umo nase tingachitira kuti tikuzge khumbo lithu la kuteŵetera ŵanji.

4. Kasi Yesu wakalongora wuli kuti wakadangizganga vyakukhumba vya ŵanji m’malo mwa vyake?

⁴Yesu wakajipelekanga kovwira ŵanji nanga ni apo wakaŵa kuti wavuka. Ghanaghanirani waka umo Yesu wakakhwaskikira apo mzinda wa ŵanthu ukaluta kukakumana nayo mumphepete mwa phiri, uko panji kukaŵa kufupi na Kaperenaumu. Yesu wakaŵa kuti watchezera kulomba usiku wose. Wakwenera kuti wakavuka chomene, kweni wati wawona mzinda, wakalengera chitima ŵakavu na ŵalwari awo ŵakaŵapo. Ndipo wakachizga ŵalwari kweniso wakadumba nkhani zakupambanapambana zakukhozga chomene kuluska zose izo ŵanthu ŵali kudumbapo. Nkhani izi zikumanyikwaso kuti Upharazgi wa pa Phiri.—Luka 6:12-20.

5. Kasi mitu ya mbumba yikumuyezga wuli Yesu pa nkhani ya kujipeleka para yavuka?

⁵Umo mitu ya mbumba yikuyezgera Yesu. Ghanaghanirani chiyelezgero ichi: Pamanyuma pakuti dada wagwira ntchito zuŵa lose, wakufika pa nyumba uku wavuka chomene. Nangauli wakujipulika nga wangaleka waka kuchita Kusopa kwa Mbumba mise iyo, kweni wakulomba Yehova kuti wamupe nkhongono zakuchitiskira sambiro. Yehova wakuzgora lurombo lwake, ndipo wakusambira na mbumba yake nga umo wakuchitira nyengo zose. Ŵana ŵakusambirapo sambiro liwemi chomene mise ghara, kufuma kwa ŵapapi ŵawo, kuti vinthu vyauzimu ndivyo ni vyakuzirwa chomene kuluska chilichose.

6. Pelekani chiyelezgero cha umo Yesu wakajipelekera pakugwiliskira ntchito nyengo yake kuti wawovwire ŵanji.

⁶Yesu wakapaturanga nyengo kovwira ŵanji nanga mphanyengo iyo wakakhumbanga kuŵa payekha. Ghanaghanirani umo Yesu wakajipulikira wati wamanya kuti mubwezi wake Yohane Mubatizi wadumulika mutu. Chitima chikwenera kuti chikamukora chomene Yesu. Baibolo likuti: “Yesu wakati wapulika [za nyifwa ya Yohane], wakafumako kura ndipo wakakwera boti kuluta ku malo ghamayiyi kuti wakaŵe payekha.” (Mat. 14:10-13) Tingapulikiska chifukwa icho wakakhumbiranga kuŵira payekha. Taŵanandi ŵa ise tikutemwa kulilira kwatekha. Kweni Yesu wakatondeka kuŵa kwayekha. Mzinda ukuru ukafika ku malo uko wakakhumbanga kukaŵa payekha pambere iyo wandafike. Kasi Yesu wakachita wuli? Wakaghanaghanira vyakukhumba vya mzinda, ndipo “wakawulengera chitima.” Wakawona kuti ŵakakhumbikwiranga chomene kukhozgeka mwauzimu, ndipo mwaluŵiro wakachitapo kanthu. Wakamba  kuŵasambizga “vinthu vinandi.”—Mrk. 6:31-34; Luka 9:10, 11.

7-8. Pelekani chiyelezgero icho chikulongora umo ŵalara ŵachitemwa ŵakuyezgera Yesu para munyake wakukhumbikwira wovwiri mu mpingo.

⁷Umo ŵalara ŵachitemwa ŵakuyezgera Yesu. Tikuwongera chomene milimo iyo ŵalara ŵithu ŵakujipeleka ŵakutichitira! Ŵabali na ŵadumbu ŵanandi mu mpingo ŵakumanya yayi milimo yose iyo ŵalara ŵakuchita. Mwachiyelezgero, para mubali panji mudumbu walwara chomene, ŵabali awo ŵali mu Komiti Yakudumbiskana na Chipatala ŵakovwira ŵabali na ŵadumbu mwaluŵiro. Nakuti kanandi vyanthena ivi vikuchitikanga usiku. Kweni chifukwa chakuti ŵali na chitemwa pa mubali panji mudumbu uyo wakukhumbikwira wovwiri, ŵalara ŵachitemwa aŵa, pamoza na mbumba zawo, ŵakuŵika vyakukhumba vya ŵasopi ŵanyawo pakwamba m’malo mwa vyawo.

⁸ Ŵalara ŵakovwiraposo pa ntchito ya kuzenga Nyumba za Ufumu na vyakuzenga vinyake kweniso para kwachitika masoka gha chilengiwa. Ŵakumaliraso nyengo yawo yinandi pa kutisambizga, kutichiska, na kutikhozga. Ŵabali wose aŵa na mbumba zawo ŵakukhumbikwira kuti tiŵawongenge chomene. Mphanyi Yehova watumbika mzimu wawo wakujipeleka uwo ŵakulongora! Ndipouli, nga umo viliri na waliyose, ŵalara ŵakwenera kuchita vinthu mwavinjeru. Ŵakwenera yayi kumalira nyengo yawo yose pakuchita mauteŵeti agha m’paka kufika na pakuleka kuŵa na nyengo yakovwilira mbumba yawo.

9. Kuyana na Ŵafilipi 2:4, 5, kasi Ŵakhristu wose ŵakwenera kuŵa na mzimu wuli?

⁹ Ŵazgani Ŵafilipi 2:4, 5. Mbalara pera yayi awo ŵakwenera kuchita nthena, tose tingamuyezga  Yesu pa nkhani ya kujipeleka. Baibolo likuyowoya kuti ‘wakaŵa nga muzga.’ (Fil. 2:7) Ghanaghanirani ivyo tingasambirapo pa vesi ili. Muteŵeti, panji muzga muwemi, wakupenjapenja nthowa zakukondweskera bwana wake. Pakuti tili ŵazga ŵa Yehova kweniso tikuteŵetera ŵabali ŵithu, ntchakuwonekerathu kuti tikukhumba chomene kumuchitira vinandi Yehova kweniso ŵabali withu. Namweso mungachita nthena mwakughanaghanirapo pa masachizgo ghakulondezgapo agha.

10. Kasi tikwenera kujifumba mafumbo wuli?

¹⁰Jisandani mwaŵene. Jifumbani mafumbo nga ghakuti: ‘Kasi ndine wakunozgeka kujipeleka kovwira ŵanji? Mwachiyelezgero, kasi ningazgora wuli para ningapempheka kuti nkhendere mubali muchekuru ku nyumba yakusungirako ŵachekuru, panji kovwira mudumbu muchekuru kuluta nayo ku maungano? Kasi nkhuŵa wakunozgeka kujipeleka kovwirapo pa mulimo wakutozga malo gha ungano panji kunozga Nyumba ya Ufumu?’ Yehova wakukondwa chomene para tikupeleka nyengo yithu na vinthu vithu kovwira ŵanji, chifukwa tikamulayizga apo tikajipelekanga kwa iyo kuti timuteŵeterenge na mtima wose na vyose ivyo tili navyo. Ipo kasi tingachita wuli para tawona kuti pakukhumbikwira kuti tisinthe?

11. Kasi lurombo lungatovwira wuli kuti tiŵe na mzimu wakovwira ŵanji?

¹¹Lombani kwa Yehova kufumira pasi pamtima. Tiyelezgere kuti mwamanya kuti mukukhumbikwira kusintha pa malo ghanyake, kweni vikumusuzgani kuti musinthe. Para vyaŵa nthena, lombani kwa Yehova kufumira pasi pamtima. Ŵani ŵanenesko. Muphalirani Yehova umo mukujipulikira, ndipo mulombani kuti wamupani “khumbo kweniso nkhongono kuti muchite vyose ivyo wakukhumba.”—Fil. 2:13.

12. Kasi ŵabali ŵachiwukirano awo mbakubatizika ŵangawovwira wuli pa mpingo?

¹² Para ndimwe mubali muwukirano wakubatizika, lombani Yehova kuti wamovwirani kuti muŵe na khumbo la kuchita vinandi pakovwira ŵabali na ŵadumbu mu mpingo winu. Mu vyaru vinyake, muli ŵalara ŵanandi kuluska ŵateŵeti ŵakovwira, ndipo ŵanandi mwa ŵateŵeti ŵakovwira aŵa mbachilara. Apo gulu likukulirakulira, pakukhumbikwira ŵabali ŵachiwukirano ŵanandi kuti ŵawovwire ŵalara pakupwelelera ŵabali na ŵadumbu mu mpingo. Para muŵenge ŵakunozgeka kukateŵetera kulikose uko mungakhumbikwira, muŵenge ŵakukondwa. Chifukwa wuli? Chifukwa mukondweskenge Yehova, muŵenge na mbiri yiwemi, ndipo musangenge chimwemwe chanadi icho chikwiza chifukwa chakovwira ŵanji.

13-14. Kasi ni vichi ivyo tingachita kuti tovwire ŵabali na ŵadumbu ŵithu? (Wonani chithuzi cha pa chikopi.)

¹³Muŵenge maso na kuwoneseska para munyake wakukhumbikwira wovwiri. Mpositole Paulosi wakaphalira Ŵakhristu awo ŵakakhalanga mu Yudeya kuti: “Mungaluwanga yayi kuchita uwemi na kugaŵirako ŵanyinu vinthu ivyo muli navyo, chifukwa Chiuta wakukondwa na sembe zanthena.” (Heb. 13:16) Ulongozgi uwu ukaŵa wa panyengo yake! Nyengo yichoko waka ŵati ŵapokera kalata iyi Ŵakhristu ŵa ku Yudeya ŵakeneranga kuleka vikaya vyawo, mabizinesi ghawo, kweniso ŵachibali ŵawo awo ŵakaŵa ŵambura kugomezga na ‘kwamba kuchimbilira ku mapiri.’ (Mat. 24:16) Pa nyengo iyo, chikaŵa chakukhumbikwa chomene kuti ŵawovwiranenge yumoza na munyake. Pambere ivi vindachitike ŵaŵenge kuti ŵakalondezganga kale ulongozgi wa Paulosi wakugaŵana ivyo ŵakaŵa navyo kwa yumoza na munyake, chikatenge chiŵenge chipusu kuzgoŵera umoyo wawo wasono wambura kukhumba vinandi.

¹⁴ Ni nyengo zose yayi apo ŵabali na ŵadumbu ŵithu ŵangatiphalira ivyo ŵakukhumbikwira. Mwachiyelezgero, muwoli wa mubali munyake wangaŵa kuti wali kufwa. Kasi mubali  withu wangaŵa kuti wakukhumbikwira wovwiri wa chakurya, mendero, panji ntchito za pa nyumba? Wangatiphalira yayi kuti wakukhumbikwira wovwiri chifukwa wangawona nga wakutisuzga. Kweni wangawonga chomene para tingamovwira waka nanga vingaŵa kuti wandatipemphe. Tikwenera yayi kughanaghana kuti ŵanji ndiwo ŵawovwirengepo panji kughanaghana kuti uyo wakukhumbikwira wovwiri ndiyo nyengo zose watiphalirenge ivyo tingawovwirapo. Jifumbani kuti, ‘Niŵenge kuti ndine nili mu suzgo iyi, kasi ningatemwa kupokera wovwiri wuli?’

15. Kasi tikwenera kuchita vichi para tikukhumba kovwira ŵanji?

¹⁵Muŵe ŵakufikirika. Tikukayika yayi kuti mukuŵamanyapo ŵabali na ŵadumbu mu mpingo winu awo nyengo zose ŵakuŵa ŵakunozgeka kovwira ŵanji. Iwo ŵakutipangiska kughanaghana kuti tikuŵasuzga yayi. Ndipo tikumanya kuti mbakunozgeka kutovwira para pangakhumbikwira wovwiri, ndipo tingakondwa kuŵa nga ndiwo! Alan, uyo ni mulara wa vyaka 45, wakukhumba kuŵa wakufikirika. Pakughanaghanirapo pa chiyelezgero cha Yesu, Alan wakuti: “Yesu wakaŵanga wakutangwanika chomene, kweni ŵanthu ŵamisinkhu yose ŵakizanga kwa iyo ndipo ŵakafwatukanga kumupempha wovwiri. Ŵakawonanga kuti ni munthu uyo wakaŵatemwanga zanadi. Nkhukhumba kuyezga Yesu na kumanyikwa kuti ndine munthu uyo ngwakufikirika, waubwezi, kweniso wakovwira ŵanji.”

16. Kasi kulondezga ulongozgi uwo uli pa Salimo 119:59, 60, kungatovwira wuli kulondezga chiyelezgero cha Yesu mwakugomezgeka?

¹⁶ Tikwenera yayi kugongowa para tatondeka kuyezga Yesu mwakufikapo. (Yak. 3:2) Msambiri wangaluska msambizgi wake yayi. Kweni apo wakusambirapo kanthu pa ivyo wakubudiska na kuyezga chomene kulondezga msambizgi wake mwakugomezgeka, mbwe msambiri  walutilirenge kusintha. Mwakuyana waka, para tikugwilirapo ntchito pa ivyo tasambira kwizira pa sambiro la Baibolo lataŵene, na kuyezga kusintha apo mphakwenelera, mbwenu vitovwirenge kulondezga chiyelezgero icho Yesu wali kutilekera.—Ŵazgani Salimo 119:59, 60.

17-18. Kasi tisangenge vyandulo wuli para tikuyezga Yesu pa nkhani ya kujipeleka?

¹⁷ Para tili na mzimu wakujipeleka, ŵanji ŵachiskikenge kuti nawo ndimo ŵachitirenge. Tim uyo ni mulara wakuti: “Tili na ŵabali ŵachiwukirano awo mbakuluta panthazi mwauzimu, ndipo ŵali kwimikika kuŵa ŵateŵeti ŵakovwira. Ŵanyake mbavyaka vichoko chomene. Ndipo chifukwa chimoza icho chapangiska ntchakuti ŵakayezga ŵanji awo nawo ŵakaŵa ŵakujipeleka kovwira ŵanji, ndipo nawo ŵakakhumbanga kuŵa nga ndiwo. Ŵabali ŵachiwukirano aŵa ŵakovwira chomene mpingo withu kweniso ŵalara.”

¹⁸ Ŵanthu ŵanandi mu charu ichi mbakujighanaghanira ŵekha. Kweni ŵanthu ŵa Yehova ndimo ŵaliri yayi. Takhozgeka na mzimu wakujipeleka uwo Yesu wakaŵa nawo, ndipo ndise ŵakunweka kumuyezga. Tikumanya kuti tingamuyezga mwakufikapo yayi, kweni ‘tingalondezga mendero ghake mwakugomezgeka.’ (1 Pet. 2:21) Ntheura apo tikuchita vyose ivyo tingafiska kuti timuyezge Yesu pa nkhani ya kujipeleka, tiŵenge ŵakukondwa chifukwa tikukondweska Yehova.