Ŵani na Chiwuravi ku “Ŵanthu ŵa Mitundu Yose”
APO Yesu wakasambizganga ŵasambiri ŵake umo ŵangapharazgira makani ghawemi, wakayowoyaso kuti ni wose yayi ŵazamupokelera uthenga wa Ufumu. (Luka 10:3, 5, 6) Mu uteŵeti, tingakumana na ŵanthu awo ŵangatizgora mwaukali panji kutinena. Ntchakupulikikwa nadi kuti para ŵanthu ŵanyake ŵangatizgora nthena, chingaŵa chakusuzga kulutilira kuŵa na chiwuravi.
Munthu wachiwuravi wakuwona masuzgo gha ŵanji na ivyo ŵakukhumbikwira, ndipo wakuŵalengera lusungu, na kuŵa na khumbo la kuŵawovwira. Kweni para tingaleka kuŵa na chiwuravi ku ŵanthu awo tikukumana nawo mu uteŵeti, tingaleka kuŵa ŵamwamphu mu uteŵeti na kuleka kukondwa na uteŵeti. Para tikuŵa na chiwuravi, tikuŵa nga tikusonkha nkhuni ku moto, ndipo tikulutilira kuŵa ŵamwamphu mu uteŵeti.—1 Tes. 5:19.
Kasi tingachita wuli kuti tiŵe na chiwuravi nanga ni apo chingaŵa chakusuzga kuchita nthena? Tiyeni tiwone ŵanthu ŵatatu awo tingaŵayezga pa nkhani iyi. Ŵanthu aŵa ni Yehova, Yesu, na mpositole Paulosi.
ŴANI NA CHIWURAVI NGA NI YEHOVA
Kwa vyaka vinandi, Yehova wazizipizga nangauli zina lake labinkhiskika. Kweni wakulutilira ‘kuchitira lusungu ŵambura kuwonga na ŵaheni.’ (Luka 6:35) Walongora kuti ngwalusungu chifukwa wazikira pakuchita vinthu. Yehova wakukhumba kuti “ŵanthu ŵa mitundu yose” ŵaponoskeke. (1 Tim. 2:3, 4) Nangauli Chiuta wakutinkha viheni, kweni wakuwona kuti ŵanthu mbakuzirwa ndipo wakukhumba yayi kuti munyake waparanyike.—2 Pet. 3:9.
Yehova wakumanya umo Satana wabulumutizgira ŵanthu ŵambura kugomezga. (2 Kor. 4:3, 4) Ŵanandi ŵasambizgika vigomezgo vyautesi ndiposo nkharo ziheni kufuma waka apo ŵakababikira, ndipo chikuŵa chakusuzga kuti ŵazomere unenesko. Yehova wakukhumba chomene kovwira ŵanthu aŵa. Kasi tikumanya wuli?
Wonani umo Yehova wakawonera ŵanthu ŵa ku Nineve. Nangauli ŵakaŵa ŵankhaza, Yehova wakaphalira Yona kuti: “Kasi ine nkhwenera chara kuchitira chitima msumba ukuru wa Nineve, uwo uli na ŵanthu ŵakujumpha 120,000, awo ŵakumanya chara kupambaniska pakati pa chiwemi na chiheni?” (Yona 4:11) Yehova wakawona kuti ŵanthu ŵa mu Nineve ŵakaŵa ŵakufwa mwauzimu, ndipo wakaphalira Yona kuti wakaŵachenjezge.
Nga ni Yehova, nase tikuwona kuti ŵanthu mbakuzirwa. Tingamuyezga para tikuyezgayezga kovwira waliyose uyo wangategherezga, nanga ni para wakuwoneka kuti wakukhumba viŵi yayi.
ŴANI NA CHIWURAVI NGA NI YESU
Nga Mbawiske, Yesu wakalengera chitima ŵanthu awo ŵakakhumbikwiranga kovwirika mwauzimu. “Wakati wawona mizinda, wakayilengera chitima, chifukwa ŵakaŵa ŵakufyopoka na kujowoleka nga ni mberere zambura muliska.” (Mat. 9:36) Yesu wakawona suzgo lenecho; wakamanya kuti ŵanthu awo ŵakamutegherezganga ŵakasambizgika mautesi ndipo ŵakayuzgikanga na ŵalongozgi ŵa visopa. Nangauli Yesu wakamanya kuti ŵanandi ŵazomerenge yayi uthenga wake, kweni wakalutilira “kuŵasambizga vinthu vinandi.”—Mrk. 4:1-9.
Mungakhuŵaranga yayi para munthu ngwambura kunweka pakwamba
Vinthu vikusintha pa umoyo, ndipo munthu uyo pakwamba wakakananga unenesko wangazomera
Para ŵanthu ŵandapokelere uthenga withu, tikwenera kumanya ilo ni suzgo ndipo tijifumbe chifukwa icho ŵakuchitira nthena. Ŵanyake ŵakuŵa na maghanoghano ghambura kwenelera ghakukhwaskana na Baibolo panji Chikhristu chifukwa cha vinthu viheni ivyo ŵanthu awo ŵakuti Mbakhristu ŵakuchita. Panji ŵanyake ŵali kuphalirika mautesi ghakukhwaskana na vigomezgo vithu. Kweni ŵanyake ŵakopa kuti usange ŵangatipokelera makora mbwenu ŵanenekenge na ŵanthu ŵa mu chigaŵa chawo panji mu mbumba yawo.
Ŵanyake awo tikukumana nawo mu uteŵeti ŵangatizgora uheni chifukwa cha masuzgo ghakuru agho ŵakumana nagho, agho ghatimbanizga maghanoghano ghawo. Mishonale munyake zina lake Kim, wakuti: “Dera linyake mu chigaŵa chithu, ŵanthu ŵanandi ŵali kusuzgikapo na nkhondo ndipo ŵali kuluza katundu wawo yose. Ŵalije chilindizga cheneko cha munthazi. Mbakali ndipo munthu ŵakumugomezga yayi. Mu chigaŵa ichi, kanandi tikukumana na ŵanthu awo ŵakususka uthenga withu. Zuŵa linyake, ŵakakhumbanga kunitimba apo nkhapharazganga.”
Kasi Kim wakuchita wuli kuti walutilire kuŵa na chiwuravi nangauli wakukumana na masuzgo agha? Iyo wakuti: “Para ŵanthu ŵanichitira nkhaza, nkhukumbuka mazgu gha pa Zintharika 19:11, agho ghakuti: ‘Munthu wamahara wakuwezgako ukali wake.’ Kukumbuka umo ŵanthu ŵa mu chigaŵa chithu ŵali kukulira kukunovwira kuti niŵachitirenge chiwuravi. Ndipo ni waliyose yayi uyo tikukumana nayo ni mukali. Mu chigaŵa chenechichi, tili na ŵanthu ŵawemi awo tikuwelerako.”
Tijifumbe kuti: “Kasi ine niŵenge nga mbanthu awo nkhuŵapharazgira, natenge niwupokelerenge uthenga wa Ufumu?’ Mwachiyelezgero, wuli niŵenge kuti naphalirika mautesi ghakukhwaskana na Ŵakaboni ŵa Yehova mwakuwerezgawerezga? Panji nase tatenge tikanenge uthenga ndipo ŵanyithu ŵeneranga kutichitira chiwuravi. Para tikukumbuka languro la Yesu lakuti ivyo tikukhumba ŵanthu ŵatichitirenge ndivyo nase tiŵachitirenge, tizgorenge makora nanga ni para ntchakusuzga kuchita nthena.—Mat. 7:12.
ŴANI NA CHIWURAVI NGA NI PAULOSI
Mpositole Paulosi wakaŵa na chiwuravi nanga nkhu ŵanthu ŵankhaza awo ŵakamususkanga. Chifukwa wuli? Wakaluwa yayi umo iyo wakaŵira kumasinda. Iyo wakati: “Pakwamba nkhaŵa wakuyuyura Chiuta na wakutambuzga ŵanthu ŵake kweniso munthu wamsinjiro. Kweni wakanilongora lusungu chifukwa nkhachitanga kwambura kumanya kanthu ndipo nkhaŵavya chipulikano.” (1 Tim. 1:13) Paulosi wakamanya kuti Yehova na Yesu ŵakamulongora lusungu lukuru. Wakwenera kuti wakawonanga kuti ŵanthu ŵanyake awo wakaŵapharazgiranga ŵakaŵa nga umo iyo wakaŵira kumasinda.
Nyengo zinyake, Paulosi wakakumananga na ŵanthu awo vigomezgo vyautesi vili kukhomelera. Kasi wakachita wuli? Lemba la Milimo 17:16 likuti apo Paulosi wakaŵa mu Ateni, “mzimu wake ukasuzgika wakati wawona kuti mu msumba mukaŵa vikozgo vinandi.” Kweni vinthu ivyo vikamukhuŵazga ndivyo wakambirapo kupharazga. (Mil. 17:22, 23) Wakaŵa na nthowa zakupharazgira ŵanthu ŵa mitundu yakupambanapambana mwakuti ‘munthowa yiliyose waponoske ŵanyake.’—1 Kor. 9:20-23.
Tingamuyezga Paulosi para tingamanya chifukwa icho ŵanthu ŵakutisuskira panji icho ŵaliri na vigomezgo vyautesi, na kuŵapharazgira mwaluso “makani ghawemi gha vinthu viwemi.” (Yes. 52:7) Mudumbu munyake zina lake Dorothy wakuti: “Mu chigaŵa chithu, ŵanandi ŵali kusambizgika kuti Chiuta ni mukali ndipo wakukhalira waka kweruzga. Nkhuŵawonga ŵanthu aŵa chifukwa cha kuŵa na chigomezgo mwa Chiuta. Pamanyuma, nkhuŵalongora ivyo Baibolo likuyowoya pa nkhani ya wunthu wa Yehova kweniso vinthu viwemi ivyo watilayizga.”
“LUTILIRANI KUCHITA UWEMI KUTI MUTHERESKE UHENI”
Apo tikulutilira kuŵa “mu mazuŵa ghaumaliro,” tikwenera kumanya kuti nkharo ya ŵanthu awo tikuŵapharazgira ‘yilutilirenge kuŵa yiheni.’ (2 Tim. 3:1, 13) Kweni tingazomerezganga yayi kuti ivi vititondeske kuŵa na chiwuravi panji kutipoka chimwemwe. Yehova wangatipa nkhongono kuti ‘tilutilire kuchita uwemi kuti tithereske uheni.’ (Rom. 12:21) Mupayiniya munyake zina lake Jessica wakuti: “Kanandi nkhukumana na ŵanthu awo mbakujiyuyura yayi, ndipo ŵakuyuyura ise na uthenga withu. Ichi chingaŵa chakukwenyerezga. Para nawona kuti munthu wazgora uheni, nkhulomba dankha kwa Yehova cham’mtima kuti wanovwire kuwona ŵanthu umo iyo wakuŵawonera. Ichi chikunovwira kuti nileke kuŵika chomene maghanoghano pa umo nkhujipulikira. M’malo mwake, nkhughanaghanira umo ningawovwilira munthu uyo.”
Tikupenja ŵanthu awo ŵali na maghanoghano ghakwenelera umoyo wamuyirayira
Para tazikira, ŵanji ŵakuzomera uthenga withu ndipo tikuŵawovwira mwauzimu
Tikweneraso kughanaghanira umo tingakhozgera ŵantchito ŵanyithu. Jessica wakuti: “Usange yumoza wa ise wamba kuyowoya nkhani yambura kukhozga, nkhuŵikako maghanoghano yayi. M’malo mwake, nkhusintha nkhani na kwamba kuyowoya nkhani zakukhozga, nga ni vinthu viwemi ivyo vikuchitika chifukwa cha uteŵeti withu nangauli ŵanthu ŵanyake ŵakukana uthenga withu.”
Yehova wakumanya masuzgo agho tikukumana nagho mu uteŵeti. Wakwenera kuti wakukondwa para tikuŵa ŵalusungu nga ndiyo. (Luka 6:36) Mbunenesko kuti Yehova walongorenge chiwuravi chake kwamuyirayira yayi. Tikugomezga kuti wakumanya nyengo yakwenelera yakumazgira mgonezi uwu. Tikwenera kupharazga mwaluŵiro m’paka pa nyengo iyo. (2 Tim. 4:2) Tiyeni tilutilire kuchita mulimo withu mwamwamphu na kuŵa na chiwuravi ku “ŵanthu ŵa mitundu yose.”
