Kuyowoya unenesko, ndimo vinthu viliri kwa tose. Sonosono apa pachitikenge chinthu chinyake. Yesu wakalongosora kuti pachitikenge “suzgo yikuru.” (Mateyu 24:21) Tingayigwentha yayi suzgo yikuru. Kweni pali chinyake icho tingachita icho chingatovwira kuti tizakaŵe ŵakuvikilirika. Kasi tingachita vichi?

Pa upharazgi wake wa pa phiri, Yesu wakapeleka ulongozgi, wakati: “Ipo lutilirani kupenja dankha Ufumu [wa Chiuta] na urunji wake.” (Mateyu 6:33) Kasi tingapenja wuli?

Penjani dankha Ufumu wa Chiuta. Ichi chikung’anamura kuti tikwenera kuwona Ufumu wa Chiuta kuti ngwakuzirwa chomene kwa ise kuluska chilichose. (Mateyu 6:25, 32, 33) Chifukwa wuli? Chifukwa ŵanthu ŵangamazga yayi masuzgo ghithu. Ni Ufumu wa Chiuta pera uwo ungamazga masuzgo ghithu.

Penjani urunji wake. Tikwenera kufwilirapo kulondezga fundo zaurunji za Chiuta na malango ghake. Chifukwa wuli? Chifukwa para tingajisankhira tekha icho ntchiwemi na chiheni, mbwenu tisanganenge na masuzgo. (Zintharika 16:25) Kweni para tikulondezga fundo za Chiuta tikukondweska Chiuta kweniso tikuŵa na umoyo uwemi.​—Yesaya 48:17, 18.

Lutilirani kupenja dankha Ufumu wa Chiuta na urunji wake. Yesu wakachenjezga kuti ŵanji ŵatimbanizgikenge na kughanaghana kuti para ŵangasanga ndalama zinandi, ndipo ŵangaŵa ŵakuvikilirika. Apo ŵanyake ŵatangwanikenge na kupenja vinthu vya umoyo  uno mwakuti ŵangaŵavya nyengo yakupenjera Ufumu wa Chiuta.​—Mateyu 6:19-21, 25-32.

Kweni Yesu wakalayizga kuti ŵanthu awo ŵakupenja dankha Ufumu wa Chiuta ŵasangenge ivyo ŵakukhumbikwira pasono kweniso ŵazamukondwa na umoyo kwamuyirayira.​—Mateyu 6:33.

Nangauli ŵasambiri ŵa Yesu mu nyengo yakale ŵakadangizganga Ufumu wa Chiuta na urunji wake, kweni vinthu vikaŵayendelanga makora pera yayi. Ndipouli ŵakaŵa ŵakuvikilirika. Ŵakaŵa ŵakuvikilirika wuli?

Chifukwa chakuti ŵakalondezganga fundo za Chiuta, ŵakaŵa ŵakuvikilirika ku nkharo ziheni za mu charu. Chigomezgo icho ŵakaŵa nacho pa Ufumu wa Chiuta, chikaŵawovwiranga kuti watonde masuzgo gha mu charu. Nakuti Chiuta wakaŵapa “nkhongono zakuluska zakawiro” kuti ŵazizipizge masuzgo.​—2 Ŵakorinte 4:7-9.

Ŵakhristu ŵa mu nyengo yakwambilira ŵakapulikira dango la Yesu, ndipo ŵakapharazga makani ghawemi mu vigaŵa vyawo vyose vya pa charu chapasi. (Ŵakolose 1:23) Kasi ŵalipo awo ŵakuchita mulimo uwu mazuŵa ghano?

Enya, Mbakaboni ŵa Yehova. Iwo ŵakumanya kuti nyengo yakuti Ufumu wa Chiuta uparanye charu chiheni ichi yakhala pachoko waka. Lekani ŵakuchita vyose ivyo ŵangafiska kuti ŵapharazge makani ghawemi nga umo Yesu wakayowoyera kuti: “Makani ghawemi agha gha Ufumu, ghazamupharazgika mu charu chose chapasi kuti uŵe ukaboni ku mitundu yose, penepapo ndipo umaliro wizenge.”​—Mateyu 24:14.

Kasi muchitenge wuli na makani ghawemi agho ghakupharazgika? Tikumuchiskani kuti namwe muŵe nga mbanthu ŵa mu msumba wa Makedoniya ku Bereya. Ŵakati ŵapulika makani ghawemi ghakuyowoya za Ufumu kwa mpositole Paulosi, ŵakazomera uthenga wake “na kunweka kukuru.” Ndipo “ŵakasandanga Malemba mwakupwelelera” kuti ŵawone usange uthenga uwo ŵakapulika ukakolerananga na Malemba, ndipo ŵakachitapo kanthu pa ivyo ŵakasambira.​—Milimo 17:11, 12.

Namwe mungachita mwakuyana waka. Para mungapenja dankha Ufumu na urunji wake, muŵenge ŵakuvikilirika sono, kweniso muzamusanga mtende na chivikiliro chambura kumara kunthazi.