Tili Ŵakukwana Nkanira Kuŵa Ŵasambizgi ŵa Mazgu gha Ciuta

‘Ciuta . . . wakatenereska ise kuti tiŵe ŵateŵeti.’—2 ŴAKORINTE 3:5, 6.

1, 2. Kasi matcharitchi gha Cikristu nyengo zinyake ghayezga kucitaci, ndipo ncifukwa wuli ncito yawo kanandi yikutondeka?

 KASI mungajipulika wuli usange mungapika ncito iyo mukumanya yayi umo mungacitira? Tiyerezgere kuti vintu vyose vyakukhumbikwira vilipo, virwero vili mbwee pamaso pinu. Kweni mukumanya yayi apo mungambira. Ncito iyi yikukhumbikwa kuti yicitike luŵiro. Ŵantu ŵali jengele-re kulaŵilira imwe. Soni zingamukorani comene!

² Ici ncakucitika ca kughanaghanira waka yayi. Awonani ciyerezgero ici. Nyengo zinyake, matcharitchi gha Cikristu ghayezga kucita uteŵeti wa kupharazga ku nyumba na nyumba. Kanandi uteŵeti uwu ukutondeka, ukumara mukati mwa masabata panji myezi yicoko waka. Cifukwa wuli? Visopo vya Cikristu vindasambizgepo mberere zawo kuti zimanye umo zingacitira ncito iyi. Ŵaliska nawo ŵakumanya makora yayi umo ŵangacitira ncito ya kupharazga, nanga ŵangamalira virimika vinandi pa koleji panji pa sukulu yakusambizga uliska. Cifukwa wuli tikuyowoya ntena?

3. Ni lizgu wuli ilo likuzunurika katatu pa 2 Ŵakorinte 3:5, 6, ndipo likung’anamuraci?

³ Mazgu gha Ciuta ghakurongosora uyo wakusambizga muntu kuti waŵe mupharazgi wakukwana wa makani ghaweme. Mwakukhuŵirizgika na mzimu, mpostole Paulos wakalemba kuti: ‘Tiri ŵakukwana tekha cara, nga [ni] para tingeruzga kantu tekha, kweni kukwana kwithu kukufuma kwa Ciuta; ndiyoso wakatenereska ise kuti tiŵe ŵateŵeti [“ŵakukwana,” NW].’ (2 Ŵakorinte 3:5, 6) Awonani lizgu lakuti ‘kukwana’ ilo lagwiriskirika ncito katatu mu vesi ili. Kasi likung’anamuraci? Kuyana na umo likuyowoyera Vine’s Expository Dictionary of Biblical Words: “Para tikuyowoya za vintu, lizgu ili [la Cigiriki] likung’anamura ‘kuzura’ . . . ; para tikuyowoya za ŵantu, likung’anamura ‘kufikapo,’ ‘kwenelera.’” Mwanteura, muntu uyo ‘ngwakukwana’ ni uyo ngwakufikapo na wakwenelera kucita ncito iyo wapika. Inya, ŵateŵeti ŵa makani ghaweme mbakukwana kucita ncito iyi. Iwo ŵakumanya, ndipo mbakwenelera na ŵakufikapo kuti ŵapharazge.

4. (a) Kasi Paulos wakurongora wuli kuti kukwana kwa Ŵakristu kukucitikira ŵantu ŵakusankika waka cara kuti ŵacite uteŵeti? (b) Ni ntowa zitatu zini izo Yehova wakusambizgira ŵateŵeti ŵake lero kuti ŵaŵe ŵakukwana?

⁴ Kasi kukwana uku kukufuma nku? Kufuma ku mahara ghakubabika nagho? Kufuma ku muntu wavinjeru? Kufuma ku sukulu zakuzirwa, zakumanyikwa na zapacanya? Paulos wakaŵa navyo vyose ivi. (Milimo 22:3; Ŵafilipi 3:4, 5) Ndipouli, wakamanya kuti kukwana kwake nga ni muteŵeti kukafuma ku sukulu za masambiro ghapacanya cara, kweni kufuma kwa Yehova Ciuta. Kasi kukwana uku kukucitikira ŵantu ŵakusankika waka? Paulos wakalembera mpingo wa ku Korinte za ‘kukwana kwithu.’ Ici cikurongora kuti Yehova wakuwoneseska kuti ŵateŵeti ŵake wose mbakukwana, mbakufikapo kucita ncito iyo ŵapika. Kasi Yehova wakusambizga wuli  lero Ŵakristu kuti ŵaŵe ŵakukwana? Tiyeni tidumbiskane ntowa zitatu izo wakugwiriskira ncito: (1) Mazgu ghake, (2) mzimu wake utuŵa, na (3) gulu lake la pa caru capasi.

Mazgu gha Yehova Ghakutisambizga Kuti Tiŵe Ŵakukwana

5, 6. Kasi Malemba Ghatuŵa ghakupangiska Ŵakristu ŵeneco kuŵa ŵantu wuli?

⁵ Cakwamba, kasi Mazgu gha Ciuta ghakovwira wuli kuti tiŵe ŵakukwana nga mbateŵeti? Paulos wakalemba kuti: “Malembo ghose ghakuperekeka na Ciuta ghakwanduliraso kusambizga, na kucenya, na kunozga, na kulanga uko kuli mu urunji; mwakuti muntu wa Ciuta waŵenge wakufikapo, wakunozgekera nkanira milimo yose yiweme.” (2 Timote 3:16, 17) Inya, Malemba Ghatuŵa ghakutipangiska kuti tiŵe ‘ŵakufikapo, ŵakunozgekera nkanira’ kucita ‘mulimo uweme’ wa kusambizga ŵantu Mazgu gha Ciuta. Wuli pakuyowoya za wose awo ŵali mu matcharitchi gha Cikristu? Baibolo ŵali nalo ndipo ŵakuliŵazga. Ncifukwa wuli pera buku limoza likovwira ŵantu ŵanyake kuŵa ŵateŵeti ŵakufikapo, ŵanyake cara? Zgoro lagona pa kacitiro kithu kurazga ku Baibolo.

⁶ Ncacitima kuwona kuti ŵanandi awo ŵakuruta ku tcharitchi ŵakuzomera yayi kuti uthenga wa Baibolo ni ‘mazgu ghaunenesko . . . gha Ciuta.’ (1 Ŵatesalonika 2:13) Visopo vya Cikristu vili na lumbiri luheni pa nkani iyi. Pamanyuma pakumalira virimika vinandi pa koleji ya kusambizga Baibolo, kasi ŵarongozgi ŵa visopo ŵanozgekera nkanira kuŵa ŵasambizgi ŵa Mazgu gha Ciuta? Napacoko-pose. Ŵanyake para ŵakwamba sukulu ya uliska ŵakuligomezga Baibolo, kweni para ŵamalizga sukulu ŵakwamba kususka ivyo likuyowoya. Mumalo mwa kupharazga Mazgu gha Ciuta—gheneagho ŵanandi ŵaleka kughagomezga, ŵakwamba kusambizga ivyo iwo ŵakumanya, kunjira mu ndyari, kubendezga ivyo vili mu Baibolo, panji kusambizga vinjeru vya ŵantu mu upharazgi wawo. (2 Timote 4:3) Mwakupambana na iwo, Ŵakristu ŵeneco ŵakurondezga ciyerezgero ca Yesu Kristu.

7, 8. Kasi kacitiro ka Yesu kurazga ku Mazgu gha Ciuta kakapambana wuli na ŵarongozgi ŵa visopo mu nyengo yake?

⁷ Yesu wakazomerezga cara ŵarongozgi ŵa visopo mu nyengo yake kuti ŵatimbanizge kaghanaghaniro kake. Kwali wakasambizganga kagulu kacoko waka, nga ni ŵapostole ŵake, panji ŵantu ŵanandi, Yesu wakawoneseskanga kuti ivyo wakuyowoya nvyakufuma mu malemba ghatuŵa. (Mateyu 13:10-17; 15:1-11) Kacitiro aka kakamupambaniska na ŵarongozgi ŵa visopo mu nyengo yira. Ŵarongozgi ŵa visopo ŵakakanizganga ŵantu-bweka kuti ŵamanye vintu vyakubisika vya Ciuta. Musambizgi mu nyengo yira wakaŵa na kaluso ka kusambizga visambizgo vinyake  vya mu Baibolo ivyo vikaŵa vyakuzirwa comene ku musambiri wake wakutemweka pera. Nangauli vikaŵa ntena, kweni wakayowoyanga mazgu mwakukhizga uku wavwara cifunga ku mutu. Ŵarongozgi ŵa visopo ŵara ŵakawonanga nga kuti ni mziro kudumbiskana vigaŵa vinyake vya mu Baibolo na kuzunura zina la Ciuta.

⁸ Kristu ndimo wakacitiranga yayi. Iye wakamanya kuti ni ŵantu ŵakusankika waka yayi, kweni ŵantu wose ŵakenera kupulika “mazgu ghose agho ghakufuma mu mlomo wa Ciuta.” Yesu kuti wakakhumba kusambizga kagulu ka ŵantu ŵapacanya kuti ndiwo ŵamanye Malemba cara. Wakaphalira ŵasambiri ŵake kuti: “Ico nkumuphalirani mu cisi muyowoye mu kungweruka; ndipo ico mukupulika mu vipwepwerezgo, mupharazge pa nyumba pacanya.” (Mateyu 4:4; 10:27) Khumbo la Yesu likaŵa lakuti wasambizge ŵantu ŵanandi kuti ŵamanye Ciuta.

9. Ni mwauli umo Ŵakristu ŵaunenesko ŵakuligwiriskira ncito Baibolo?

⁹ Para tikusambizga, ivyo tikuyowoya vikwenera kujinta pa Mazgu gha Ciuta. Mwaciyerezgero, para tikuyowoya nkani mu Nyumba ya Ufumu ya Ŵakaboni ŵa Yehova, cingaŵa cakukwanira cara kuŵazga waka mavesi mu Baibolo. Kweni tikwenera kupataura makora, kuyerezgera, na kurongosora kukolerana kwa lemba ilo na nkani. Cifukwa ca kucitira ici ncakuti tikukhumba kutora uthenga wa mu Baibolo na kuŵika mu mitima ya ŵapulikizgi ŵithu. (Nehemiya 8:8, 12) Usange ncakwenelera, tikwenera kugwiriskiraso ncito Baibolo para tikucenya panji para tikumupa muntu urongozgi. Nangauli ŵantu ŵa Yehova ŵakuyowoya viyowoyero vyakupambana-pambana na kufuma ku mikhaliro yakupambana-pambana, kweni wose ŵakucindika Buku ili lakuruska mabuku ghose—Baibolo.

10. Ni vintu wuli ivyo uthenga wa Baibolo ungaticitira?

¹⁰ Usange tiligwiriskirenge ncito mwakwenelera, uthenga wa Baibolo uŵenge na nkongono. (Ŵahebere 4:12) Baibolo likucitiska ŵantu kuleka mikhaliro iyo Malemba ghakukana, nga ni uzaghali, kusopa vikozgo, uloŵevu, na unkungu. Lawovwira ŵanandi kuvura wuntu wakale na kuvwara upya. (Ŵaefeso 4:20-24) Para tilicindikenge kuruska maghanoghano panji mitheto ya ŵantu, na kuligwiriskira ncito makora, Baibolo litovwirenge kuŵa ŵakufikapo, ŵakukwana nga mbasambizgi ŵa Mazgu gha Ciuta.

Mzimu wa Yehova Ukutovwira Kuŵa Ŵakukwana

11. Ncifukwa wuli mzimu utuŵa wa Yehova ukwenera nadi kucemeka “movwiri”?

¹¹ Caciŵiri, tiyeni tidumbiskane ncito iyo mzimu utuŵa wa Yehova ukuticitira mwakuti tiŵe ŵakukwana. Tileke kuruwa kuti mzimu wa Yehova wuli na nkongono yikuru comene. Yehova wapereka mazaza kwa Mwana wake wakutemweka kuti wagwiriskire ncito nkongono iyi kovwilira Ŵakristu wose ŵaunenesko. Yesu wakaneneska nadi apo wakati mzimu utuŵa ni ‘[“movwiri,” NW].’ (Yohane 16:7) Wakaphalira ŵarondezgi ŵake kuti ŵarombe mzimu uwu kwa Yehova, ndipo wakaŵasimikizgira kuti waŵapenge mwawanangwa.—Luka 11:10-13; Yakobe 1:17.

12, 13. (a) Cifukwa wuli ncakuzirwa kuromba mzimu utuŵa kuti utovwire mu uteŵeti withu? (b) Kasi Ŵafarisi ŵakarongora wuli kuti mzimu utuŵa ukaseŵezanga cara mwa iwo?

¹² Zuŵa na zuŵa tikwenera kupempa mzimu utuŵa kuti uŵe nase, comene-comene kuti utovwire mu uteŵeti withu. Kasi mzimu uwu ungaŵa na vipambi wuli pa ise? Ungaŵa na nkongono pa maghanoghano na mtima withu, kusinta milimo yithu, kutovwira kuti tikure mwauzimu, na kuvura wuntu wakale na kuvwara wasono. (Ŵakolose 3:9, 10) Ungatovwira kuti tiŵe na mikhaliro yiwemi iyo Kristu wali nayo. Ŵanandi ŵa ise tingazunura ivyo vili pa Ŵagalatiya 5:22, 23. Mavesi agha ghali na vipambi vya mzimu wa Ciuta. Cakwamba ni citemwa. Mukhaliro uwu ngwakukhumbikwa comene mu uteŵeti withu. Cifukwa wuli?

¹³ Citemwa ndico cikumutuma muntu kucita ncito. Kutemwa Yehova na ŵanyithu ndiko kukukhuŵirizga Ŵakristu ŵaunenesko kupharazga makani ghaweme. (Marko 12:28-31) Kwambura citemwa, mbwenu tingenelera cara kuŵa ŵasambizgi ŵa Mazgu gha Ciuta. Awonani mpambano pakati pa Yesu na Ŵafarisi. Kuyana na Yesu, lemba la Mateyu 9:36 likuti: “Wakati wawona mizinda, wakayilengera citima, cifukwa ŵakakweŵeka  na [“kubalarika,” NW] nga ndi mberere zambura mliska.” Kasi Ŵafarisi ŵakaŵawonanga wuli ŵantu ŵakuyuyulika? Ŵafarisi ŵakati: “Mzinda uwu wambura kumanya Marango ngwakutembeka.” (Yohane 7:49) Ŵafarisi ŵara ŵakaŵatemwanga cara ŵantu, ŵakanyanyaranga para ŵawona ŵantu-bweka. Apa tawona kale kuti mzimu wa Yehova ukaseŵezanga cara mwa Ŵafarisi.

14. Kasi citemwa ca Yesu kurazga ku uteŵeti wake cikwenera kutikhuŵirizga wuli?

¹⁴ Yesu wakaŵalengeranga citima ŵantu. Wakamanya ivyo vikasuzganga ŵantu. Wakamanya kuti ŵantu aŵa ŵakanenekanga, ndipo ŵakahangayikanga na kubalarika nga ni mberere zambura mliska. Lemba la Yohane 2:25 likutiphalira kuti Yesu “wakamanyanga ivyo vikaŵa mu muntu.” Pakuti wakagwiranga ncito lumoza na Yehova pakulenga vyose, Yesu wakamanya makora comene umo ŵantu ŵali kulengekera. (Zintharika 8:30, 31) Ici cikamupangiska kuti watemwe comene ŵantu. Mphanyi nase tikukhuŵirizgika na citemwa ici para tikupharazga. Usange tikuwona kuti tikukhumbikwira kunyolorera pa nkani iyi, ipo tirombe mzimu utuŵa wa Yehova na kucita vintu mwakuyana na ivyo taromba. Yehova watizgorenge. Watumenge nkongono yake yikuru kutovwira kuti tikhale mwakukolerana na Kristu, mweneuyo wakakwanirathu nkanira kupharazga makani ghaweme.

15. Kasi mazgu gha pa Yesaya 61:1-3 ghakumwenelera wuli Yesu, kweniso ghakuvumbura wuli ŵalembi na Ŵafarisi?

¹⁵ Kasi ninjani uyo wakenereska Yesu kuti waŵe wakukwana? Iye wakati: ‘Mzimu wa Fumu [Yehova] wuli pa ine.’ (Luka 4:17-21) Inya, kwizira mu mzimu utuŵa, Yehova yekha ndiyo wakamwimika Yesu. Yesu wakenera kuŵaso na masatifiketi ghanyake yayi. Kasi ŵarongozgi ŵa visopo mu nyengo ya Yesu ŵakimikika na mzimu utuŵa? Napacoko-pose. Ŵakaŵa ŵakwenelera yayi kukwaniriska lemba la Yesaya 61:1-3, leneilo Yesu wakaŵazga na kurongosora kuti mazgu agha ghakuyowoya za iye. Conde, ŵazgani mavesi agha ndipo mujiwonere mwekha umo ŵakaŵira ŵakupereŵera ŵalembi na Ŵafarisi ŵatesi ŵara. Ŵakaŵavye makani ghaweme kupharazgira ŵakuzika. Ndiposo, kasi iwo ŵakatenge ŵapharazgenge wuli kusutuka kwa ŵazga na kujura maso gha ŵaciburumutira? Iwo ŵakaŵa ŵaciburumutira mwauzimu ndiposo ŵazga ŵa mitheto iyo ŵakapanganga! Mwakupambana na iwo, kasi ise tili ŵakukwana cara kusambizga ŵantu?

16. Kasi ŵantu ŵa Yehova ŵakumanya vici pakuyowoya za kwimikika kwawo nga mbateŵeti?

¹⁶ Mbunenesko kuti ise tindarutepo ku sukulu zakusambizga masambiro ghapacanya za visopo. Tikwimikika na sukulu ya uliska cara kuti tiŵe ŵasambizgi. Kasi ndikuti tili ŵakupereŵera? Yayi! Kwimikika kwithu nga Mbakaboni kukufuma kwa Yehova. (Yesaya 43:10-12) Usange tirombenge mzimu wake na kucita mwakuyana na pempero lithu, mbwenu tiŵenge ŵakwenelera mwapadera nkanira. Inya, tili ŵantu ŵakwananga ndipo tikutondeka kurondezga nkanira ndendende ciyerezgero ciwemi ico wali kutilekera Musambizgi Mukuru, Yesu. Nanga viŵe ntena, kasi tikuwonga cara kuti Yehova wakugwiriskira ncito mzimu wake kuti tiŵe ŵakukwana nkanira kusambizga Mazgu ghake?

Gulu la Yehova Likutisambizga Kuŵa Ŵakukwana

17-19. Kasi maungano ghankondi agho ghakucitika mu sabata ghakunozgeka na gulu la Yehova ghakutovwira wuli kuti tiŵe ŵateŵeti ŵakukwana?

¹⁷ Sono tiyeni tidumbiskane ntowa yacitatu iyo Yehova wakwenereskera ŵasambizgi ŵa Mazgu ghake—kwizira mu mpingo wake pano pasi, panji gulu leneilo likutisambizga kuŵa ŵateŵeti. Kasi likutisambizga wuli? Aghanaghanani waka za urongozgi uwo tikupokera! Mu sabata yimoza, tikuŵa na maungano gha Cikristu ghankondi. (Ŵahebere 10:24, 25) Tikuwungana pamoza mu magulu ghacoko-ghacoko pa Sambiro la Buku la Mpingo mwakuti tisambire vinandi kufuma mu Baibolo mwakugwiriskira ncito buku lakuperekeka na gulu la Yehova. Mwa kutegherezga na kuzgorapo, tikusambira na kukhuŵirizgana yumoza na munyake. Waliyose wa ise wakupokera urongozgi kufuma kwa uyo wakucitiska sambiro la buku. Tikuryaso cakurya cauzimu pa nkani ya Baibolo na Sambiro la Gongwe la Mulinda.

¹⁸ Sukulu ya Uteŵeti wa Teokrase yili kunozgeka kuti yitirongozge umo tingasambizgira ŵantu. Mwa kunozgekera nkani za mu sukulu iyi,  tikusambira umo tingasambizgira makora ŵanji Mazgu gha Ciuta pa nkani zakupambana-pambana. (1 Petros 3:15) Kasi mu sukulu iyi muli kuyowoyapo nkani yeneiyo pakwamba mukayiwonanga nga mukuyimanya kale, kweni pamanyuma pake mukawona kuti mwasambirapo fundo zinyake zacilendo? Ici cikucitikira waliyose. Kusambizga ŵanji ndiko kwekha kukutipangiska kumanya makora nkani iyo. Nanga kungaŵa kuti tindapike nkani yakuti tiyowoye, kweni tingasambira nipera kuti tiŵe ŵasambizgi ŵaluso. Para musambiri waliyose wakuyowoya nkani, tiwone kayowoyero kake kawemi ndipo nase tirondezge kayowoyero ako.

¹⁹ Ungano wa Uteŵeti nawo wuli kunozgeka kuti utisambizge kuŵa ŵasambizgi ŵakufikapo ŵa Mazgu gha Ciuta. Sabata yiliyose tikutegherezga ku nkani, vidumbirano, na viyerezgero mwakuti vitovwire mu uteŵeti withu. Kasi ni viyerezgero wuli ivyo tingagwiriskira ncito? Ni mwauli umo tingatondera vyakumara-mahara vinyake mu uteŵeti withu? Ni mtundu wuli wa upharazgi uwo tingagwiriskira ncito? Ncivici cingatovwira kuti tiŵe ŵasambizgi ŵaluso para tikuwelerako kwa ŵakukondwelera na para tikucitiska masambiro gha Baibolo? (1 Ŵakorinte 9:19-22) Mafumbo gha nga ni agha na ghanyake ghanandi ghakuzgoreka pa Ungano wa Uteŵeti. Nkani zinandi za mu ungano uwu zikufuma mu Uteŵeti Withu Waufumu, cirwero cinyake ico gulu la Yehova likutipa kuti tiŵe ŵakukwana nkanira pakucita ncito yakuzirwa iyi.

20. Ni mwauli umo tingandulira comene na maungano gha mpingo na maungano ghakuru?

²⁰ Mwa kunozgekera na kufika pa maungano, ndiposo kugwiriskira ncito ivyo tikusambira, tikupokera urongozgi wapacanya nkanira. Kweni paliso vinandi. Tiliso na maungano ghakuru—maungano gha dera na gha cigaŵa gheneagho ghakutisambizga kuŵa ŵakukwana nkanira kusambizga Mazgu gha Ciuta. Mwee, nako nkunweka uko tili nako kutegherezga na kugwiriskira ncito urongozgi uwo tikupokera!—Luka 8:18.

21. Ni ukaboni wuli ukurongora kuti masambiro agho tikupokera ghakugwira nadi ncito, ndipo marumbo ghakuruta kwa njani?

²¹ Kasi masambiro agho Yehova wakutipa ghaŵa ghakugwira ncito? Ukaboni ndimo ukurongolera. Cirimika cilicose, ŵantu vikwi vinandi ŵakusambizgika kumanya visambizgo vya mu Baibolo mwakuti ŵakhale mwakukolerana na ivyo Ciuta wakukhumba. Ciŵerengero cithu cikukwelera-kwelera, kweni palije nanga njumoza wa ise wakujirumba yekha. Tikwenera kuwona vintu nga ni umo Yesu wakacitira. Wakati: “Palive muntu wakumanya kwiza kwa ine, kwambura kuti Ŵadada aŵo ŵakandituma ŵamuguze.” Nga ni umo ŵakaŵira ŵapostole mu nyengo yira, ise nase tili ŵantu ŵambura kusambira. (Yohane 6:44; Milimo 4:13) Kutonda kwithu kukuthemba pa Yehova uyo wakuguza ŵantu ŵawemi mtima kwiza ku unenesko. Mpostole Paulos wakaneneska apo wakalemba kuti: “Ine nkapanda, Apolo wakathiriranga maji; kweni Ciuta ndiyo wakamezga.”—1 Ŵakorinte 3:6.

22. Ncifukwa wuli tikwenera kufipa mtima cara para tikucita uteŵeti Wacikristu?

²² Enya, Yehova Ciuta wali nase mu ncito yithu yakusambizga Mazgu ghake. Nyengo zinyake tingajiwona nga kuti tili ŵasambizgi ŵakupereŵera. Kweni kumbukani, Yehova ndiyo wakuguzira ŵantu kwa iyemwene na kwa Mwana wake. Ni Yehova uyo wakutisambizga kwizira mu Mazgu ghake, mzimu wake utuŵa, na gulu lake la pa caru capasi kuti titeŵetere awo ŵakupenja unenesko. Tiyeni titegherezge, tisambire, na kugwiriskira ncito vintu ivyo Ciuta wakutipa mwakuti tiŵe ŵakukwana nkanira kusambizga Mazgu ghake!

Kasi Mungazgora Wuli?

• Kasi Baibolo likutovwira wuli mwakuyana na ncito ya kupharazga?

• Ni ncito wuli iyo mzimu utuŵa ukucita kuti tiŵe ŵakukwana nga mbateŵeti?

• Kasi gulu la Yehova la pa caru capasi lamovwirani wuli imwe kuti muŵe ŵakukwana kupharazga makani ghaweme?

• Ncifukwa wuli tingaŵa na cikanga para tikucita uteŵeti?

[Mafumbo]

[Cithuzithuzi pa peji 19]

Nga ni musambizgi wa Mazgu gha Ciuta, Yesu wakarongora kuti wakutemwa ŵantu