Ŵawukirano—Yehova Waruwenge Yayi Ncito Zinu!

“Ciuta kuti ngwambura urunji cara, kuti waruwe mulimo winu na kutemwa uko mukarongora ku zina lake, apo mukaŵateŵetera ŵatuŵa, ndipo mucali kuŵateŵetera.”—ŴAHEBERE 6:10.

1. Kasi mabuku gha mu Baibolo gha Ŵahebere na Malaki ghakurongora wuli kuti Yehova wakuwonga uteŵeti winu?

 KASI muli kucitirapo mubwezi winu cintu ciweme kweni wakamuwongani yayi? Vingaŵinya comene usange muntu wangapepuska lusungu ulo mwamurongora panji kuruwa ivyo mwamucitira. Ndipouli, ici cikupambana comene na para tateŵetera Yehova na mtima wose. Baibolo likuti: “Ciuta kuti ngwambura urunji cara, kuti waruwe mulimo winu na kutemwa uko mukarongora ku zina lake, apo mukaŵateŵetera ŵatuŵa, ndipo mucali kuŵateŵetera.” (Ŵahebere 6:10) Ghanaghanani waka ivyo ici cikung’anamura. Yehova wakuwona kuti mburunji yayi, nkhwananga kuti waruwe ivyo mwacita na ivyo mukurutilira kucita mu uteŵeti wake. Ee, Yehova ni Ciuta wakuwonga nadi mwe!—Malaki 3:10.

2. Ncivici ico cikupangiska kuteŵetera Yehova kuŵa kwapadera?

 ² Muli na mwaŵi wapadera wa kusopa na kuteŵetera Ciuta uyo wakuwonga. Pakuti pa ŵantu 6 biliyoni awo ŵali pa caru, pali ŵasopi ŵanyinu ŵakukwana 6 miliyoni pera, ipo muli na mwaŵi wapadera nadi. Kusazgaso apa, pakuti mukupulikizga na kukolerana na makani ghaweme, ncakuwonekerathu kuti Yehova wakunweka namwe. Nakuŵanako, Yesu wakati: “Palive muntu wakumanya kwiza kwa ine, kwambura kuti Ŵadada aŵo ŵakandituma ŵamuguze.” (Yohane 6:44) Enya, Yehova wakovwira muntu waliyose payekha kuti wapindule na sembe ya Kristu.

Kuwonga Mwaŵi Ukuru Uwo Muli Nawo

3. Ni mwauli umo ŵana ŵa Kora ŵakawongera mwaŵi wa kuteŵetera Yehova?

³ Nga ni umo ukayowoyera mutu uwo wajumpa, muli na mwaŵi ukuru wa kukondweska mtima wa Yehova. (Zintharika 27:11) Ici ncakuti mungacitoreranga maseŵera yayi. Mu limoza mwa masalmo agho ŵana ŵa Kora ŵakalemba mwakufunyilirika, iwo ŵakayowoya uweme wa mwaŵi wa kuteŵetera Yehova. Tikuŵazga kuti: “Zuŵa limoza mu maluwugha ghinu ndiweme lakuruska cikwi kunyake. Mtima wane uli mcanya kuŵa mlinda pa muryango mu nyumba ya Ciuta wane, kwakuruska kukhala mu mahema gha uheni.”—Salmo 84:10.

4. (a) Ncivici ico cingapangiska ŵanyake kuwona nga kusopa Yehova kukuŵapoka wanangwa wawo? (b) Ni mwauli umo Yehova wakurongolera kuti wakuwona ndipo wakupereka njombe ku ŵateŵeti ŵake?

⁴ Kasi ndimo namwe mukuwonera mwaŵi winu wa kuteŵetera Adada ŵinu ŵakucanya? Tikukana yayi kuti nyengo zinyake kusopa Yehova kungawoneka nga kukumupokani wanangwa winu. Mbunenesko kuti kukhala mwakukolerana na marango gha Baibolo kukukhumba mtima wa kujinora. Ndipouli, paumaliro wake, vyose ivyo Yehova wakukhumba vili na phindu kwa imwe. (Salmo 1:1-3) Kusazgaso apa, Yehova wakuwona kuyezgayezga kwinu ndipo wakurongora kuwonga kwake cifukwa ca kugomezgeka kwinu. Paulos wakalemba kuti Yehova ‘wakupereka njombe kwa aŵo ŵakumupenja na mtima wose.’ (Ŵahebere 11:6, NW) Yehova wakupenja mwaŵi wakuti wacitire ici. Mprofeti murunji mu nyengo ya Ŵaisrayeli wakayowoya kuti: “Maso gha Yehova ghakulaŵiska uku na uko mu caru cose ca pasi, [“kurongora nkongono zake,” NW] kovwira awo mitima yawo njakufikapo pamaso pake.”—2 Midauko 16:9.

5. (a) Ni ntowa wuli yiweme comene iyo mungarongolera kuti mtima winu wose wuli kwa Yehova? (b) Cifukwa wuli kuphalirako ŵanyinu cigomezgo cinu kungawoneka kwakusuzga?

⁵ Ntowa yiweme comene iyo mungarongolera kuti mtima winu wose wuli kwa Yehova ni kuphalirako ŵanyinu za iyo. Kasi muli kuŵapo na mwaŵi wa kuyowoya cigomezgo cinu kwa ŵanyinu pa sukulu? Pakwamba, kucita ici kungawoneka kunonono, ndipo mungaŵa na wofi para mwaghanaghana waka za ici. Mungafumba kuti, ‘Sono para ŵaniseka ke?’ ‘Wuli usange ŵamanya kuti cisopo cane ncakupambana na vinyake?’ Yesu wakazomerezga kuti ni waliyose yayi wazamupulikizga uthenga wa Ufumu. (Yohane  15:20) Kweni ici cikung’anamura kuti nyengo zose mutinkikenge panji kunyozeka yayi. M’malo mwake, ŵawukirano ŵanandi awo Mbakaboni ŵasanga kuti ŵawukirano ŵanyawo ŵakupulikizga ivyo ŵakuyowoya ndipo ŵakupokera ncindi zikuru cifukwa ca kudemelera ku vigomezgo vyawo.

“Yehova Wamovwiraninge”

6, 7. (a) Ni mwauli umo msungwana munyake wa virimika 17 wakapharazgira ŵanyake mu kilasi? (b) Kasi mwasambirapo vici pa cakukumana naco ca Jennifer?

⁶ Kweni kasi mungaŵa wuli na cikanga cakuyowoyera cigomezgo cinu? Mwalekeraci kusimikizga mtima kuti muyowoyenge mwambura kubisa para muntu wamufumbani cisopo cinu? Wonani ico cikacitikira Jennifer uyo wali na virimika 17. “Nkharyanga cakurya ca namuhanya ku sukulu. Ŵasungwana awo tikaryeranga pa thebulo limoza ŵakadumbiskananga za cisopo, ndipo yumoza wa iwo wakafumba cisopo cane,” wakuyowoya nteura. Kasi Jennifer wakacita wofi kuzgora? “Enya,” wakuzomera mwanteura, “cifukwa nkamanyanga yayi umo ŵacitirenge para naŵaphalira.” Sono kasi Jennifer wakacitaci? “Nkaŵaphalira kuti ndine Kaboni wa Yehova,” ndimo wakurutizgira nkani yake. “Pakwamba ŵakawoneka kuti ŵakuzizwa nane. Ncakuwonekerathu kuti ŵakawonanga Ŵakaboni ŵa Yehova kuŵa ŵantu ŵakupambana na ŵantu ŵanyake. Ici cikaŵapangiska kuti ŵanifumbe mafumbo ghanandi, ndipo nkaŵarongosolera makora vintu vinyake ivyo ŵantu ŵakaŵapusikanga pakuyowoya za ise. Kufuma pa zuŵa lira, nyengo zinandi ŵasungwana ŵanyake ŵakizanga na mafumbo ghawo kwa ine.”

⁷ Kasi Jennifer wakadandaura cifukwa cakuti wakayowoya vigomezgo vyake? Napacoko-pose! “Nkajipulika makora comene apo nyengo ya cakurya yikamara,” wakuyowoya nteura. “Sono ŵasungwana aŵa ŵalije maghanoghano ghaheni pakuyowoya za Ŵakaboni ŵa Yehova.” Sono Jennifer wakupereka urongozgi upusu uwu: “Usange cikumuŵirani cinonono kupharazgira ŵanyinu mu kilasi panji asambizgi ŵinu, perekani lurombo lufupi. Yehova wamovwiraninge. Muzamukondwa para mwagwiriskira ncito mwaŵi wa kupharazga uwo wasangika.”—1 Petros 3:15.

8. (a) Kasi lurombo lukawovwira wuli Nehemiya apo wakakumana na mkhaliro wamabuci? (b) Kasi mpha mikhaliro wuli yinyake ya pa sukulu apo mungapereka lurombo lufupi ndiposo lwacisisi kwa Yehova?

⁸ Wonani kuti Jennifer wakuti nciweme ‘kupereka lurombo lufupi’ kwa Yehova para pasangika mwaŵi wa kuyowoyera za cigomezgo cinu. Ici ndico Nehemiya, uyo wakagwiranga ncito ya kupereka vyakumwa kwa Themba Artazerkses la ku Persia wakacita apo wakakumana na mkhaliro wamabuci. Nehemiya wakawoneka wacitima cifukwa wakaŵa kuti waphalirika masuzgo agho Ŵayuda ŵakakumananga nagho ndiposo kuti viliŵa vya Yerusalemu vyagumurika. Themba likamanya kuti Nehemiya wali na citima, mwanteura, likamufumba ico casuzga. Pambere wandazgore, Nehemiya wakapempa danka urongozgi kwa Yehova. Ndipo na cikanga cose, wakapempa kuti wawelere ku Yerusalemu kukawovwira kuzengaso msumba. Artazerkses wakazomera ivyo Nehemiya wakapempa. (Nehemiya 2:1-8) Mukusambirapo vici apa? Usange muli na wofi kuyowoya cigomezgo cinu para mwaŵi wasangika, mungazerezganga yayi kupereka lurombo lwacisisi. ‘Muthulirani [Yehova] kwenjerwa kwinu kose,’ ndimo wakalembera Petros, “cifukwa wakumupwererani.”—1 Petros 5:7; Salmo 55:22.

‘Kunozgekera Kuzgora’

9. Kasi Leah, wa virimika 13, wakagaŵira wuli mabuku 23 gha Achichepere Akufunsa?

⁹ Wonani cakukumana naco cinyake. Leah, wa virimika 13, wakaŵazganga buku la Mafunso Achichepere Akufunsa—Mayankho Amene Amathandiza a ku sukulu pa nyengo ya cakurya ca namuhanya. “Ŵanyane ŵakanilaŵiliranga,” ndimo wakuyowoyera, “mwambura kukhaliska, wumba wukazura ku musana wane. Ŵakamba kunifumba za buku ili.” Paumaliro wake, ŵasungwana ŵanayi ŵakapempa Leah kuti waŵapenjere buku la Achichepere Akufunsa. Ŵasungwana aŵa ŵakamba kubwereka ŵanyawo mabuku ghawo, ndipo ŵanyawo nawo ŵakakhumba  kuŵa nalo. Pakati pajumpa sabata zicoko waka, Leah wakagaŵira mabuku 23 gha Achichepere Akufunsa kwa ŵanyake pa sukulu na mabwezi ghawo. Kasi cikaŵa cipusu kwa Leah kuyowoya apo ŵanyake ŵakamufumba za buku ilo wakaŵazganga? Yayi! “Pakwamba nkaŵa na wofi,” wakuzomera mwanteura. “Kweni nkapempera, ndipo nkamanya kuti Yehova wali nane.”

10, 11. Kasi kasungwana ka Ciisrayeli kakawovwira wuli kazembe wa ŵasilikari ŵa ku Syria kuti wamanye Yehova, ndipo pamanyuma pake wakasinta wuli?

¹⁰ Ico Leah wakakumana naco cingamukumbuskani ivyo vikacitikira kasungwana ka Ciisrayeli ako kakatorekera ku wuzga ku Syria. Namani, kazembe wa ŵasilikari ŵa ku Syria wakaŵa na vyoni. Muwoli wake wakwenera kuti ndiyo wakayambiska nkani iyo yikapangiska kuti kasungwana aka kayowoye cigomezgo cake. Kasungwana kakati: “Sekuru wane wakharenge na ncimi iyo yiri ku Samaria, mphanyi yiri kumucizga ku vyoni vyake.”—2 Mathemba 5:1-3.

¹¹ Cifukwa cakuti kasungwana aka kakaŵavya wofi lekani Namani wakafika pakumanya kuti ‘kulije Ciuta mu caru ca pasi kweni mwa Israyeli pera.’ Ndipo wakasimikizga mtima kuti “tiwaperekeso sembe kwa ŵaciuta ŵanyake cara, kweni kwa Yehova.” (2 Mathemba 5:15, 17) Ncakuwonekerathu kuti Yehova wakatumbika cikanga ca kasungwana aka. Ndimo wacitirengeso kwa ŵawukirano lero. Leah wakawona kuti ici ncaunenesko. Nyengo yikati yarutapo, ŵana ŵanyake ŵa sukulu ŵakiza kwa iyo na kumuphalira kuti  buku la Achichepere Akufunsa likaŵawovwiranga comene kuti ŵasinte nkaro yawo. “Nkakondwa comene,” wakuyowoya mwanteura Leah, “cifukwa nkamanya kuti nkawovwiranga ŵanji kuti ŵamanye vinandi pakuyowoya za Yehova na kuŵawovwira kusinta umoyo wawo.”

12. Kasi mungakhozgeka wuli kuti muvikilire vigomezgo vinu?

¹² Namwe mungaŵa na vyakukumana navyo vyakuyana waka na Jennifer na Leah. Nga Mbakristu, rondezgani urongozgi wa Petros uyo wakalemba kuti mukwenera ‘kunozgekera mazuŵa ghose kumuzgora yose uyo wakumufumbani kafukwa ka cigomezgo ico muli naco, kweni na kuzika na [ncindi, NW].’ (1 Petros 3:15) Kasi mungacita wuli ici? Rondezgani ciyerezgero ca Ŵakristu ŵakwambilira awo ŵakapempa Yehova kuti waŵawovwire kupharazga “na cikanga cose.” (Milimo 4:29) Ndipo iŵani na cikanga pakuyowoya vigomezgo vinu ku ŵanji. Mungazizwa na vyakufumapo vyake. Kusazgaso apa, mukondweskenge mtima wa Yehova.

Mavidiyo na Ivyo Mwatumika Kucita

13. Ni mwaŵi wuli uwo ŵawukirano ŵanyake ŵagwiriskira ncito kuti ŵapharazge? (Wonani mabokosi gha pa peji 14 na 15.)

¹³ Ŵawukirano ŵanandi ŵarongosora cigomezgo cawo kwa ŵanyawo pa sukulu panji asambizgi ŵawo mwakugwiriskira ncito mavidiyo. Nyengo zinyake, vintu ivyo ŵatumika kucita ku sukulu navyo vyaŵapa mwaŵi wa kutumbikira Yehova. Mwaciyerezgero, ŵanyamata ŵaŵiri ŵa virimika 15, awo Mbakaboni ŵa Yehova, ŵakatumika na asambizgi ŵawo kuti ŵalembe lipoti lakukhwaskana na visopo, pa nyengo ya sambiro la history. Iwo ŵakakhala pamoza na kulemba lipoti lakuyowoya za Ŵakaboni ŵa Yehova mwakugwiriskira ncito buku la Jehovah’s Witnesses—Proclaimers of God’s Kingdom. b Ndipo ŵakeneraso kuyowoya pa mlomo lipoti linyake kwa maminiti ghankondi. Pamanyuma pake, asambizgi na ŵana ŵa sukulu ŵakaŵa na mafumbo ghanandi mwakuti ŵanyamata aŵa ŵakakhala kuntazi maminiti ghanyakeso 20, kuzgora mafumbo ghawo. Kwa masabata ghanandi, ŵanyawo mu kilasi  ŵakarutilira kuŵafumba mafumbo ghakukhwaskana na Ŵakaboni ŵa Yehova.

14, 15. (a) Cifukwa wuli kopa muntu kukuthya cipingo? (b) Cifukwa wuli mukwenera kucita wofi yayi kuphalirako ŵanji vigomezgo vinu?

¹⁴ Nga ni umo vyakukumana navyo vya pacanya apa vyarongolera, mungasanga vitumbiko vinandi para mukuphalirako ŵanji vigomezgo vinu nga ni Kaboni wa Yehova. Lekani kuzomerezga kopa muntu kuti kumutondeskani kugwiriskira ncito mwaŵi wa kovwira ŵanji kumanya Yehova. Baibolo likuti: ‘Kopa ŵantu kukuthya cipingo, kweni uyo wakugomezga Yehova tiwasungikenge.’—Zintharika 29:25.

¹⁵ Kumbukirani kuti, pakuti ndimwe muwukirano Wacikristu, muli na kantu kanyake ako ŵawukirano ŵanyinu ŵalije—umoyo uweme sono na umoyo wamuyirayira kuntazi. (1 Timote 4:8) Cakukondweska ncakuti ku United States, uko mungaghanaghana kuti ŵantu ŵanandi ŵakukana makani ghaweme ndiposo kuti ŵakughanaghana waka za ndarama, voti iyo yikacitika yikarongora kuti hafu ya ŵawukirano ŵakuzirwiska comene cisopo. Ndipo ŵawukirano ŵatatu ŵaliwose pa ŵawukirano 10 ŵakayowoya kuti kusopa “nkhwakuzirwa comene” mu umoyo wawo. Ncakumanyikwirathu kuti ndimo viliriso na mu vigaŵa vinandi vya caru. Mwanteura, kungaŵa kuti ŵana ŵa sukulu ŵanyinu ŵazamukondwa comene na uthenga winu wakufuma mu Baibolo.

Nga ni Muwukirano, Sendererani kwa Yehova

16. Kusazgapo pa kuphalirako ŵanyithu za Yehova, ncivici ico tikweneraso kucita kuti timukondweske?

¹⁶ Kuyowoya unenesko, kukondweska mtima wa Yehova kukusazgapo vinandi kuruska kuyowoya waka za iyo. Nkaro yinu yikweneraso kukolerana na marango ghake. Mpostole Yohane wakalemba kuti: “Kumutemwa Ciuta nceneici, cakuti tisungirire marango ghake: ndipo marango ghake kuti ngazitu cara.” (1 Yohane 5:3) Muzamumanya kuti mazgu agha ngaunenesko para mwasenderera kwa Yehova. Kasi mungasenderera wuli?

17. Kasi mungasenderera wuli kwa Yehova?

¹⁷ Iŵani na nyengo ya kuŵazgira Baibolo na mabuku ghakurongosora Baibolo. Para mwasambira vinandi vya Yehova, cizamuŵa cipusu comene kumupulikira na kuphalirako ŵanji za iye. “Muntu muweme mu usambazi uweme wa mu mtima wake wakufumya ico nciweme,” wakayowoya mwanteura Yesu, “pakuti ivyo viri kuzara mu mtima ndivyo mlomo wake ukuyowoya.” (Luka 6:45) Mwanteura, zuzgani mtima winu na vintu viweme. Mwalekeraci kujiŵikira vilato pa nkani iyi? Mutepanyake, sabata yikwiza munganyolorera kunozgekera maungano gha mpingo. Cilato cinu caciŵiri cingaŵa kupereka mazgoro ghafupi kweni ghakukondweska pa maungano. Ncakukhumbikwaso kuti mucitenge ivyo mukusambira.—Ŵafilipi 4:9.

18. Nanga ŵanyake ŵangamususkani, kweni mungasimikizga za vici?

¹⁸ Vitumbiko ivyo muntu wakusanga cifukwa ca kuteŵetera Yehova ni vyakukhaliska, enya, vyamuyirayira. Mbunenesko kuti nyengo zinyake mungasuskika panji kunyozeka cifukwa ndimwe Kaboni wa Yehova. Kweni ghanaghanani za Moses. Baibolo likuti wakalaŵiska pa njombe iyo yikaŵa kuntazi. (Ŵahebere 11:24-26) Namweso mungaŵa ŵakusimikizga kuti Yehova wazamumutumbikani cifukwa ca kuyezgayezga uko mukucita kuti musambire za iye na kuphalirako ŵanyinu za iye. Enya, Yehova ‘waruwenge yayi mulimo winu na kutemwa uko mukarongora pa zina lake.’—Ŵahebere 6:10.

[Mazgu ghamusi]

Kasi Mukukumbuka?

• Cifukwa wuli mungaŵa ŵakusimikizga kuti Yehova wakuwonga uteŵeti winu?

• Ni ntowa wuli za kupharazgira pa sukulu izo ŵanyake ŵawona kuti ni ziweme?

• Kasi mungakhozgeka wuli kuti mupharazgire awo mukusambira nawo?

• Kasi mungasenderera wuli kwa Yehova?

[Mafumbo]

[Box/Pictures on Page 14]

Nanga ni Ŵana Ŵacoko Nawo Ŵakutumbika Yehova!

Nanga ni ŵana ŵacoko nawo ŵakucita upharazgi uweme pa sukulu. Wonani vyakukumana navyo ivi.

Amber uyo wali na virimika 10 ndipo wali mu sitandadi 5 wakaŵazganga buku lakuyowoya za nkaza izo cipani ca Nazi cikacitiranga Ŵayuda mukati mwa Nkondo Yaciŵiri ya Caru Cose. Amber wakaghanaghana kuyeyera asambizgi ŵake vidiyo ya Purple Triangles. Asambizgi ŵake ŵakazizwa kumanya kuti Ŵakaboni ŵa Yehova nawo ŵakasuzgika na cipani ca Nazi. Musambizgi uyu wakawoneska vidiyo iyi kwa wose mu kilasi.

Apo wakaŵa na virimika 8, Alexa wakalembera karata kilasi lake na kurongosora cifukwa ico wakukanira kukondwerera Khisimasi. Musambizgi wake wakakondwa nayo comene karata iyi ndipo wakatuma Alexa kuti waŵazgire ŵanyake mu kilasi mwakukwezga mazgu na kuŵazgiraso makilasi ghanyake ghaŵiri. “Nili kusambizgika kuti nicindikenge ŵanyane awo vigomezgo vyawo vikupambana na vyane,” ndimo wakayowoyera kuumaliro wa karata yake, “ndipo nkumuwongani cifukwa ca kucindika cakusanka cane ca kuleka kukondwerera Khisimasi.”

Wati wamba waka sitandadi 1, Eric wakayeya Bukhu Langa la Nkhani za Baibulo ku sukulu na kupempa asambizgi ŵake kuti warongore ŵanyake mu kilasi. “Naghanaghana makora,” ndimo wakayowoyera musambizgi wake. “Walekeraci kuti uŵazgire kilasi nkani za mu buku ili?” Eric wakaŵazga. Pamanyuma pake, wakapempa waliyose uyo wakukhumba buku ili kuti wawuske woko. Ŵantu 18, kusazgapo asambizgi ŵake, ŵakawuska. Panyengo yasono Eric wakuwona kuti wali na cigaŵa cake cakupharazgako.

Whitney, wa virimika 9 wakutemwa comene brosha la Mboni za Yehova ndi Maphunziro. c “Amama nyengo zose ŵakupereka brosha ili kwa asambizgi ŵane cirimika cilicose,” ndimo wakuyowoyera, “kweni cirimika cino napereka nekha. Nkuwonga brosha ili cifukwa ndilo lapangiska kuti asambizgi ŵanisanke kuŵa ‘mwana wa nkaro yiweme comene mu sabata.’”

[Mazgu ghamusi]

[Box/Pictures on Page 15]

Mikhaliro iyo ŵanyake Ŵagwiriskira Ncito kuti Ŵayowoye Cigomezgo Cawo

Para ŵatumika kuti ŵalembe nkani panji cintu cinyake ku sukulu, ŵanyake ŵakusanka mutu uwo ungaŵawovwira kuti ŵapharazge

Ŵawukirano ŵanandi ŵakupereka vidiyo panji buku ilo likuyowoya za vintu ivyo ŵasambiranga mu kilasi kwa asambizgi ŵawo

Ŵawukirano ŵanyake ŵakufumbika mafumbo na ŵawukirano ŵanyawo para ŵakuŵazga Baibolo panji magazini yakurongosora Baibolo pa nyengo ya kupumura

[Cithuzithuzi pa peji 12]

Awo mbakukhwima ŵakwenera kusambizga ŵawukirano kuteŵetera Yehova