Cipembuzgo kwa Awo Ŵakukhumba Covwiro

BAIBOLO ni buku lakusambizga za kacizgiro ka ntenda ya maghanoghano yayi. Ndipouli, likutipa cipembuzgo na kutovwira kuwona kuti umoyo ngwakuzirwa, nangauli tikusangana na masuzgo. Malemba ghakuyowoya kwambura kubisa kuti: “Muntu wakubabika na mwanakazi mazuŵa ghake ngacoko waka na kuzura visuzgo.” (Job 14:1) Viyezgo vinyake vikutisanga cifukwa cakuti tiri ŵambura urunji. Kweni ninjani comene uyo wakucitiska kuti ŵantu ŵasuzgikenge?

Ni uyo Baibolo likumuthya kuti mzimu uheni, wakucemeka Dyabulosi na Satana. “Wakupusika caru cose capasi” na kucitiska masuzgo ghanandi agho ghakuwira ŵantu. Kweni Baibolo likutiphaliraso kuti nyengo yake yiri pafupi kumara. (Civumbuzi 12:9, 12) Sono-sono apa, Ciuta wazamunjilirapo, ndipo vyakuŵinya vyose ivyo Satana wiziska pa ŵantu mu caru vizamumara. Mwakuyana na ivyo Baibolo likuyowoya, Ciuta wakulayizga caru cipya caurunji mweneumo vikhuŵazgo vizamumara.—2 Petros 3:13.

Ncakupembuzga comene kumanya kuti masuzgo gha ŵantu nga kanyengo kacoko! Mu muwuso wa Ufumu wa Ciuta wakucanya, wakuwusika na Yesu Kristu, muzamuŵa urunji ndipo masuzgo ghazamumara. Pakuyowoya za Fumu yakusankika na Ciuta, Malemba ghakuti: ‘Wazamuthaska musauci para wacema, na mukavu, na uyo walije movwiri. Wazamufwira lusungu (ŵambura nkongono) na kuponoska mizimu ya ŵasauci. Wazamuwombola mizimu yawo ku kuyuzga na ukari; ndopa zawo zizamuŵa zakuzirwa comene mu maso ghake.’—Salmo 72:12-14.

Nyengo yakuti mazgu gha ucimi agha ghafiskike yiri pafupi comene. Tizamukondwa na umoyo wamuyirayira mu caru ca paradiso mu mikhaliro yiweme comene. (Luka 23:43; Yohane 17:3) Kumanya malayizgo gha mu Malemba agha kukupereka cilindizga na cipembuzgo kwa wose awo ŵakukhumba covwiro.

[Cithuzithuzi/Kulongosora Cithuzithuzi 32]

Msungwana wacitima: Cithuzi ca ILO/J. Maillard