Ico Cikukhumbikwa Kuti Tiŵe Ŵakukondwa

YEHOVA, “Ciuta wakukondwa,” na Yesu Khristu, ‘yekha na yekha Mwenenkhongono wakukondwa,’ ŵakumanya makora ico cikukhumbikwa kuti munthu waŵe wakukondwa. (1 Timote 1:11, NW; 1 Timote 6:15) Ntheura tikuzizwa yayi kuti nthowa yakusangira umoyo wakukondweska yili mu Mazgu gha Ciuta, Baibolo.—Civumbuzi 1:3; 22:7.

Mu upharazgi wake wakumanyikwa makora wa pa Lupiri, Yesu wakulongosora ico cikukhumbikwa kuti munthu waŵe wakukondwa. Wakuti: Mbamwaŵi [“mbakukondwa,” NW] (1) ŵakavu mu mzimu, (2) awo ŵakutengera, (3) ŵakuzika, (4) awo ŵali na njara na nyota ya urunji, (5) ŵalusungu, (6) ŵakutowa mu mtima, (7) awo ŵakutuniska, (8) awo ŵakuzikizgika cifukwa ca urunji, ndiposo (9) awo ŵakutombozgeka  na kuzikizgika, cifukwa ca iyo.—Mateyu 5:3-11. a

Kasi Mazgu gha Yesu Ngaunenesko?

Vinyake ivyo Yesu wakayowoya vikuwonekerathu kuti ni vyaunenesko. Ninjani wangakana kuti munthu wakuzika, walusungu na wamtende, wakukhuŵirizgika na mtima wakufikapo wakuŵa wakukondwa kuluska munthu mukali, wa mbembe, na wambura lusungu?

Ndipouli, tingazizwa umo vingacitikira kuti munthu uyo wali na njara na nyota ya urunji panji uyo wakutengera waŵe wakukondwa. Ŵanthu aŵa ŵakumanya makora umo vinthu viliri mu caru. Iwo “ŵakucinchima na kulira cifukwa ca maunyankhasi ghose agho ghakucitika” lero. (Ezekiel 9:4) Ici pa ico cekha cikuŵacitiska kuŵa ŵakukondwa yayi. Kweni para ŵasambira khumbo la Ciuta lakuti wanozgenge vinthu pa caru capasi na kuŵacitira urunji awo ŵakusuzgika, iwo ŵakuŵa ŵacimwemwe comene.—Yesaya 11:4.

Cinyake ico cikuŵalizga, waliyose payekha nchakuti kanandi vikuŵasuzga kucita uwemi. Ntheura ŵakumanya kuti mbakavu mu mzimu. Ŵanthu aŵa ŵakukhumbisiska kuti Ciuta waŵalongozge, cifukwa ŵakumanya kuti ndiyo pera wangawovwira ŵanthu pa ivyo ŵakutondeka.—Zintharika 16:3, 9; 20:24.

Ŵanthu awo ŵakulira, awo ŵali na njara ndiposo nyota ya urunji, kweniso awo mbakavu mu mzimu ŵakumanya kuti nchakuzirwa kuŵa paubwezi na Mlengi. Tikukondwa usange tili na ŵabwezi ŵawemi, kweni tikuŵa ŵakukondwa kwakuruska usange ubwezi withu na Ciuta nguwemi. Inya, ŵanthu awo ŵakutemwa uwemi ndipo ŵakukhumba kulongozgeka na Ciuta ndiwo ŵangaŵa ŵakukondwa nadi.

Ndipouli, cingaŵa cakusuzga kwa imwe kugomezga kuti munthu uyo wakuzikizgika na kutombozgeka wangaŵa wakukondwa. Kweni uwu ukwenera kuŵa unenesko, cifukwa Yesu ndiyo wakayowoya nthena. Ntheura, kasi mazgu agha tikwenera kughapulikiska wuli?

Ŵakuzikizgika Kweni Ŵakukondwa—Mwauli?

Yesu wakayowoyapo yayi kuti kutombozgeka na kuzikizgika pa ivyo vyekha vikukondweska munthu. Iyo wakati: “Mbamwaŵi [mbakukondwa] awo ŵakuzikizgika cifukwa ca urunji . . . para ŵati ŵamutombozganinge na kumuzikizgani . . . cifukwa ca ine.” (Mateyu 5:10, 11) Ntheura, munthu wakuŵa wakukondwa kwekha para wakutombozgeka cifukwa cakuti wakulondezga Khristu na fundo za urunji izo Yesu wakasambizga.

Ciyelezgero ciwemi pa fundo iyi ni ivyo vikacitikira Ŵakhristu ŵakale. Ŵa wupu wa Sanhedrin, mphara ya Ŵayuda, “ŵakati ŵacema ŵapositole ŵakaŵathyapula, ndipo ŵakaŵalanga kuti ŵangayowoyanga mu zina la Yesu [cara], ndipo ŵakaŵalekezga.” Kasi ŵapositole ŵakacita wuli? ‘Ntheura iwo ŵakafumapo pa mphara, ŵakakondwa kuti ŵakapimika ŵakwenelera kulengeskeka cifukwa ca zina ilo. Ndipo mazuŵa ghose, mu tempele na mu nyumba zawo, kuti ŵakalekanga cara kusambizga na kupharazga Yesu kuti ndi Khristu.’—Milimo 5:40-42; 13:50-52.

Mpositole Petrosi wakutingweruskaso za kukolerana uko kulipo pakati pa kutombozgeka na kukondwa. Wakalemba kuti: “Usange mukutombozgekera zina la Khristu muli ŵa mwaŵi [ŵakukondwa]; pakuti mzimu wa ucindami na mzimu wa Ciuta ukukhala pa imwe.” (1 Petros 4:14) Inya, nangauli masuzgo ghakuŵa ghakuŵinya, munthu wakukondwa usange wakusuzgika cifukwa ca Cikhristu na kucita uwemi, pakumanya kuti wakupokera mzimu utuŵa wa Ciuta. Kasi mzimu wa Ciuta ukukolerana wuli na kukondwa?

Milimo ya Thupi Panji Vipambi vya Mzimu?

Mzimu utuŵa wa Ciuta ukuŵa pa ŵekha awo ŵakupulikira Ciuta pakuŵa muwusi wawo.  (Milimo 5:32) Yehova wakuŵanora mzimu wake awo ŵakucita “milimo ya thupi.” Milimo iyi ni “uzaghali, ukazuzi, ukwakwa, kusopa vikozgo, ufwiti, maurwani, zawe, bina, maukali, zimphindano, zimphatukano, visambizgo vyautesi, sanje, uloŵevu, vilere, na vyose vya ntheura.” (Ŵagalatiya 5:19-21) Mbunenesko, lero “milimo ya thupi” yandana mu caru. Kweni awo ŵakuyicita mbakukondwa nadi yayi. M’malo mwake, para munthu wakucita vinthu ivi, wakunanga ubwezi uwemi uwo ukuŵapo pakati pa iyo na ŵabali ŵake ndiposo ŵanyake. Kuluska vyose, Mazgu gha Ciuta ghakuti awo ŵakucita vinthu ivi “ŵaharenge Ufumu wa Ciuta cara.”

Kweni Ciuta wakupeleka mzimu wake kwa awo ŵali na “vipambi vya mzimu.” Vipambi vya mzimu ni “kutemwa, cimwemwe, mtende, kuzizipizga, wezi, uwemi, magomezgeko, kuzika [na] kujikora.” (Ŵagalatiya 5:22, 23) Usange tili na mikhaliro iyi, tikuŵa pa mtende na ŵanyithu kweniso na Ciuta, ndipo njombe yake nkhukondwa kweneco. (Wonani bokosi.) Cakuzirwa comene nchakuti para tili na citemwa, lusungu, uwemi na mikhaliro yinyake iyo Ciuta wakukhumba, tikukondweska Yehova ndipo tikuŵa na cilindizga cakukondweska ca umoyo wamuyirayira mu caru ciphya ca urunji.

Tikusankha Kuŵa Ŵakukondwa

Apo Wolfgang na muwoli wake Brigitte, ŵa ku Germany, ŵakayamba kusambira Baibolo na mtima wose, ŵakaŵa na katundu munandi uyo ŵanthu ŵakuti ngwakukhumbikwa kuti ŵaŵe ŵakukondwa. Ŵakaŵa ŵawukirano kweniso ŵankhongono. Ŵakavwaranga malaya ghapacanya, ŵakakhalanga mu nyumba yakutowa ndipo bizinesi yawo yikendanga makora. Ŵakamaliranga nyengo yitali pa kupenja cuma, ndipouli, ŵakaŵa ŵakukondwa nadi yayi. Kweni pamanyuma pake Wolfgang na Brigitte ŵakacita cinthu cakuzirwa. Ŵakayamba kumalira nyengo yitali pa vinthu vyauzimu na kuwona umo ŵangasendelera kufupi na Yehova. Nyengo yicoko waka, ŵakasintha maghanoghano, ndipo ŵakaleka kujipenjera vinandi mu umoyo wawo na kuŵa ŵapayiniya, panji ŵapharazgi ŵa Ufumu ŵa nyengo zose. Sono ŵakuteŵetera pa ofesi ya Ŵakaboni ŵa Yehova ku Germany. Kweniso ŵakusambira ciyowoyero cinyake ca ku Asia, mwakuti ŵasambizgenge ŵalendo unenesko uwo ukusangika mu Mazgu gha Ciuta, Baibolo.

Kasi mbumba iyi yili kuwusanga umoyo wakukondweska nadi? Wolfgang wakuti: “Kufuma apo tikayambira kutangwanika na vinthu  vyauzimu, tili ŵakukondwa comene nakuti tili ŵakukhorwa kuluska kale. Kweniso nthengwa yithu yakhora cifukwa cakuti tikuteŵetera Yehova na mtima wose. Nangauli pakwamba tikaŵa ŵakukondwa mu nthengwa yithu, kweni mphingo izo tikaŵa nazo na vyakucita vikatipatuskanga. Sono tili ŵakukolerana pakucita cinthu cimoza.”

Nchivici Cikukhumbikwa Kuti Munthu Waŵe Wakukondwa?

Mwakudumura: Kucheŵa “milimo ya thupi” ndiposo kuŵa na “vipambi vya mzimu” wa Ciuta. Kuti munthu waŵe wakukondwa, wakwenera kuŵa paubwezi na Ciuta. Munthu uyo wakulimbikira kucita nthena ndiyo Yesu wakati ngwakukondwa.

Ntheura, lekani kughanaghana kuti mungatondeka kuŵa ŵakukondwa. Mbunenesko, panji muli ŵalwari, panyake muli na masuzgo mu nthengwa yinu. Panji nyengo yakuti muŵe na ŵana yili kujumpha, panyake mukutondeka kusanga nchito yiwemi. Panji sono muli na ndarama zicoko kuluska kale. Ndipouli, zikani mtima, palije cifukwa cakukweŵekera! Ufumu wa Ciuta uzamumazga masuzgo ghose agha na ghanyake ghanandi. Inya, Yehova Ciuta wazamufiska mazgu gha uyo wakimba salmo lakuti: “Ufumu winu mbufumu wamuyirayira . . . Mukujura woko linu na kukhorweska camoyo cose.” (Salmo 145:13, 16) Ŵakaboni ŵa Yehova ŵakukwana mamiliyoni pa caru cose ŵakukhozgera kuti tikuŵa ŵakukondwa usange tikukumbuka layizgo lakukhwimiska ili lakufuma kwa Yehova.—Civumbuzi 21:3.

[Mazgu ghamusi]

[Bokosi/Cithuzithuzi pa peji 6]

Ivyo Vikovwira Kuti Muŵe Ŵakukondwa

Citemwa. Temwani ŵanyinu, ndipo nawo ŵamutemwaninge.

Cimwemwe. Cimwemwe cikumupani nkhongono kuti muzizipizge masuzgo na viyezgo.

Mtende. Mtende ukumovwirani kuti muleke kwambana na ŵanyinu.

Kuzizipizga. Usange mukuzizipizga, mukulutilira kukondwa na para mukuyezgeka wuwo.

Lusungu. Lukovwira kuti ŵanyinu ŵafwatuke namwe.

Uwemi. Para mukucita uwemi, ŵanyinu ŵazamukondwa kumovwirani pa suzgo.

Cipulikano. Mukhorwenge kuti Ciuta wamulongozganinge mwacitemwa.

Kuzika. Mtima ukuŵa mu malo, mukuvunduka yayi, thupi likufwatuka.

Kujikora. Jikorani, ndipo mubudiskenge vinandi yayi.

[Vithuzithuzi pa peji 7]

Kuti muŵe ŵakukondwa, mukwenera kukhorweska njara yinu yauzimu